Li Mantaletik ta Vitse

Kʼalal laj xa ox stʼuj li 12 yajtakboltak Jesuse, yal batel li ta vitse. Vaʼun, te bat yoʼ bu tsobol li krixchanoetik ti likemik talel ta Galilea, Judea, Tiro, Sidon, Siria xchiʼuk li ta jot ukʼum Jordane. Laj yikʼik tal li buchʼutik ip chaʼiike xchiʼuk li buchʼutik ochem pukuj ta yoʼontonike, vaʼun poxtaatik yuʼun li Jesuse. Laje, te choti li ta stenlejaltik vitse, vaʼun te lik yalbe krixchanoetik kʼusi skʼan jpastik mi ta jkʼan chkamigointik li Jeovae. Laj yal ti skʼan xkakʼtik venta ti jaʼ noʼox xuʼ sbeiltasutik li Jeovae xchiʼuk ti skʼan jkʼantike. Pe mu xuʼ jkʼantik Jeova mi muʼyuk jkʼanojtik li krixchanoetike. Jaʼ yuʼun, skʼan lekuk koʼontontik xchiʼuk ti mu kʼusi chopol jpasbetik li yantike xchiʼuk li buchʼutik oy kʼusi chopol tspasbutike.

Jaʼ yuʼun, xi laj yal li Jesuse: «Maʼuk noʼox bal mi akʼanoj li avamigotakike, yuʼun skʼan xakʼanik ek li avajkontraike xchiʼuk ti ta sjunuluk avoʼonton xapasik ta pertone. Jaʼ yuʼun, mi oy buchʼu ch-ilin ta atojolale, skʼan noʼox xbat akʼanbe perton, yuʼun skʼan jech xapas ti kʼu yelan chakʼan chavichʼ pasbel eke».

Li Jesuse laj yakʼ lekil tojobtaseletik sventa mu jaʼuk xbat ta koʼontontik saʼel jkʼulejaltik ta sba balumile. Yuʼun xi laj yale: «Jaʼ mas lek mi jaʼ yamigoot li Jeovae, jaʼ mu sta mi ep akʼulejale. Yuʼun xuʼ chbat ta elekʼ li atakʼine, pe li yamigoinel Jeovae muʼyuk buchʼu xuʼ xelkʼanbot. Jaʼ yuʼun, mu xavat avoʼonton ta sventa li aveʼele, li kʼusi chavuchʼe xchiʼuk ta sventa li akʼuʼ apokʼe. Kʼelo avil li mutetik ta vinajele, ta xchabiatik xchiʼuk chmakʼlinatik yuʼun li Jeovae. Mi jaʼ chavat tajek avoʼonton ta skoj taje, maʼuk me ti jal xa chakuxi yuʼune. Vuleso me ta ajol ti snaʼoj Jeova li kʼusi chtun avuʼun jujun kʼakʼale».

Muʼyuk bu yaʼiojik-o jech li krixchanoetik ti kʼu yelan chanubtasvan li Jesuse. Yuʼun mu jechuk chchanubtasvanik li jnitvanejetik ta relijione. ¿Kʼu yuʼun jaʼ jun lekil jchanubtasvanej echʼ li Jesuse? Yuʼun skotol li kʼusi laj yakʼ ta chanele te likem talel ta stojolal li Jeovae.