Lekuk onoʼox me kʼusi jpastik
«Li voʼoxuque [...] pasic cʼusi lec.» (LUC. 6:35.)
1, 2. ¿Kʼu yuʼun mu onoʼox kʼunuk ta spasbel kʼusi lek li yantike?
MU SKOTOLUK velta kʼun ta pasbel kʼusi lek li yantike. Jech kʼuchaʼal liʼe, bateltike ta slekil koʼontontik chi jtsakvan ta mukʼ, pe mu jechuk chkichʼtik tsakel ta mukʼ ek. O mi moʼoje, ta jkʼantik ti lekuk oyikuk ta mantal li jlakʼnataktike, vaʼun ta jcholbetik «li Lequil Aʼyej ti toj jun yutsile» ti jaʼ yuʼun li Dios xchiʼuk li xNichʼone, pe bu cha ta, kʼajomal ch-ilinik-o xchiʼuk muʼyuk bu chalik kolaval (1 Tim. 1:11). Maʼuk noʼox taje, yuʼun ti kʼusie «oy ep bochʼotic muʼyuc stu chaʼyic ti icham [...] li Cristoe», jaʼ noʼox ta skontrainik (Fili. 3:18). Pe ¿kʼu yelan skʼan xkiltik li krixchanoetik kʼuchaʼal yajtsʼaklomutik Cristoe?
2 Li Jesuse xi laj yalbe li yajtsʼaklomtake: «Li voʼoxuque tscʼan chacʼanic li avajcontraique. Pasic [li] cʼusi le[ke]», xi (Luc. 6:35). Li ta xchanobil liʼe, ta jkʼelbetik skʼoplal taje xchiʼuk yantik kʼusitik laj yal Jesús ti jaʼ skʼoplal spasbel kʼusi lek li yantike.
«Cʼuxubino avajcontraic»
3. 1) Alo ta chaʼoxpʼeluk noʼox kʼop li kʼusi laj yal Jesús ta Mateo 5:43-45 2) ¿Kʼusi tsnopik li jbabeetik ta relijion ta sventa li judioetik xchiʼuk li buchʼu maʼuk judioetike?
3 Li ta ojtikinbil Mantaletik ta Vitse, te albatik yuʼun Jesús li buchʼutik te chaʼiik mantale, ti skʼan la xkʼuxubin li yajkontraike xchiʼuk ti skʼoponbeik Dios li buchʼutik ch-utsʼintavanike (kʼelo Mateo 5:43-45). Naka judioetik ti buchʼutik te tsobajtik taje, jech oxal snaʼojik lek li smantal Dios liʼe: «Mu me tojtoj paqueluc avuʼunic li cʼusi chapasbatique; mu me tojtoj ilineloxuc noʼox ta stojol li achiʼiltaquic ta israelale. Cʼano achiʼil jech chac cʼu chaʼal cʼux ta avoʼnton abecʼtal atuc» (Lev. 19:18). Veno, pe li jbabeetik ta relijion ta baʼyel sigloe, kʼalal «achiʼiltaquic ta israelale», ti x-utatike xchiʼuk ti «achiʼil», xie, jaʼ noʼox skʼoplal yalojik li judioetike. Jech xtok, tsots chalik ti sMantal la Moisese chal ti akʼo la mu skap sbaik li ta yantik lumetike. Jech oxal, li jbabeetike jaʼ skontraik yalojik skotol li buchʼutik maʼuk judioetike xchiʼuk ti skʼan spʼajike.
4. ¿Kʼu yelan skʼan xil yajkontraik li yajtsʼaklomtak Jesuse?
4 Pe li Jesuse xi laj yale: «Cʼuxubino avajcontraic; cʼopanbeic Dios ta stojol li bochʼotic chayutsʼintaoxuque», xi (Mat. 5:44). Li yajtsʼaklomtake skʼan xkʼuxubinik li buchʼutik chkontrainatike. Jech kʼuchaʼal chal li j-al lekil aʼyej Lucase, xi la laj yal li Jesuse: «Voʼoxuc ti liʼ chavaʼibicun jcʼope, jech chacalboxuc: Cʼanic me li avajcontraique. Pasbeic cʼusi lec li bochʼo chayilintaoxuque. Cʼanbeic slequilal li bochʼo ta xchopolcʼoptaoxuque. Cʼopanbeic Dios ta stojol li bochʼo chopol cʼusi chaspasboxuque», xi (Luc. 6:27, 28). Jech kʼuchaʼal li jchankʼopetik ta baʼyel sigloe, li voʼotik eke chkakʼ me lek ta koʼontontik li chanubtaseletik chakʼ Jesuse. ¿Kʼuxi ta «[jpasbetik] cʼusi lec li bochʼo [chiltautike]»? Jaʼ ti kʼalal lek kʼusi ta jpastik ta stojolalike. ¿Kʼuxi ta «[jkʼanbetik] slequilal li bochʼo ta xchopolcʼopta[utike]»? Jaʼ ti kʼalal ta slekil koʼontontik ta jkʼopontik xchiʼuk chkichʼantik ta mukʼe. ¿Kʼuxi ta «[jkʼoponbetik] Dios ta stojol li bochʼo chopol cʼusi [tspasbutike]», ti chmajvanike o ti ch-utvanike? Jaʼ ti ta jkʼanbetik Jeova ti akʼo sjel stalelal li krixchanoetik taje xchiʼuk ti lekuk x-ilatike. Jaʼ jech chkakʼtik ta ilel ti jkʼanojtik li kajkontratike.
5, 6. ¿Kʼu yuʼun skʼan jkʼuxubintik li kajkontratike?
5 ¿Kʼu yuʼun skʼan xkʼuxubin yajkontraik li yajtsʼaklomtak Cristoe? Sventa «jech ta xvinaj o ti voʼoxuc xnichʼnabxuc li Jtotic Dios ta vinajele», xi li Jesuse (Mat. 5:45). ¿Kʼuxi ti chkakʼtik ta ilel ti xnichʼnabutik Diose? Jaʼ ti jchanbetik stalelale, yuʼun li Jeovae «coʼol ta xacʼ qʼuepuc ta stojol li bochʼotic chopolique xchiʼuc li bochʼotic lequique. Coʼol chacʼbe voʼ li bochʼotic tucʼ yoʼntonique xchiʼuc li bochʼotic muc tucʼuc yoʼntonique» o, jech kʼuchaʼal chal Lucase oy «slequil yoʼnton ta stojol li bochʼotic mu snaʼ stojic ta vocole, ti chopol yoʼntonique» (Luc. 6:35).
6 Li Jesuse xi tsots laj yalbe skʼoplal li yajtsʼaklomtak ti akʼo xkʼuxubin li yajkontraike: «Me jaʼ noʼox chacʼuxubinic ec li bochʼo chaxcʼuxubinoxuque, ¿me chata amotonic ti jech chapasique? Yuʼun jaʼ jech tspasic ec li jtsobpatanetique. Me jaʼ noʼox chacʼopanic li bochʼotic xavotquin aba achiʼuquique, ¿cʼusi lec chapasic li voʼoxuque? Yuʼun jaʼ jech tspasic ec li yanlum cristianoetique», xi (Mat. 5:46, 47). Mi jaʼ noʼox ta jkʼantik li buchʼutik chi skʼanutike, mu me jta jutebuk jmotontik ta stojolal Dios, jaʼ xkaltik, mu jtatik-o ti lek chilutike. Kʼalal ta jtsob patanetik ti pʼajbilik yuʼun li judioetike, skʼanojik ek li krixchanoetik chkʼanvanike (Luc. 5:30; 7:34).
7. ¿Kʼu yuʼun mu kʼusi labal sba tspas li jun yajtunel Dios ti jaʼ noʼox tskʼopon li yermanotake?
7 «Junuc avoʼntonic» xi snaʼ skʼopon sbaik li judioetik ti kʼalal chil sbaike, vaʼun jaʼ jech chakʼik ta ilel ti tskʼanik ti mu x-ipaj xchiʼuk ti lekuk xbat xkuxlejal li krixchanoe (Jue. 19:20; Juan 20:19). Jaʼ yuʼun chaʼa, li yajtunel Dios ti jaʼ noʼox tskʼopon li yermanotake mu me kʼusi labal sba yakal tspas. Kʼuchaʼal laj yal Jesuse «jaʼ [la] jech tspasic ec li yanlum cristianoetique».
8. ¿Kʼusi la skʼan laj yal Jesús kʼalal laj yalbe yajtsʼaklomtak ti skʼan tukʼikuke?
8 Xi yelan la stsutses li mantal chal Jesuse: «Li voʼoxuke chaʼa, skʼan me tukʼoxuk, jech kʼuchaʼal tukʼ li aTotik ta vinajele», xi (Mat. 5:48, NM). Pe mu xuʼ tukʼ xakʼ sbaik li yajtsʼaklomtak Cristoe, yuʼun xkuchinojbeik li smul Adane (Rom. 5:12). Vaʼun chaʼa, ¿kʼusi la skʼan laj yal li Jesuse? Jaʼ ti skʼan xchanbeik lek jtosuk stalelal li sTotik ta vinajele: jaʼ ti xtukʼib lek yuʼunik li kʼuxubinel chakʼike, jaʼ xkaltik, ti masuk tsʼakale. ¿Kʼuxi ta spas yuʼunik? Jaʼ ti chkʼuxubin li yajkontraike. Jaʼ jech skʼan spasik ek li yajtsʼaklomtak Cristo avie.
¿Kʼu yuʼun skʼan xkakʼtik perton?
9. ¿Kʼusi smakoj li spasel kʼusi lek kʼuchaʼal laj yal Jesús li ta orasion ti padrenuestro sbie?
9 Yan noxtok ti kʼuyelan xuʼ jpastik li kʼusi leke, jaʼ ti kʼalal ta xkʼuxul koʼontontik ta jpasbetik perton li buchʼutik tsaʼ smul ta jtojolaltike. Li orasion ti padrenuestro sbie xi chal kaʼitik jlomuke: «Pasbuncutic perdón yuʼun jmulcutic jech chac cʼu chaʼal jpasojbecutic perdón li bochʼotic oy smul cuʼuncutique», xi (Mat. 6:12).
10. ¿Kʼu yelan xuʼ jchanbetik stalelal Jeova ta sventa ti kʼu yelan chakʼ pertone?
10 Jkotoltik skʼan jchanbetik stalelal li Diose, ti ta slekil yoʼonton chakʼbe perton li jsaʼ muliletik ti sutesoj yoʼontonike. Xi la stsʼiba li jtakbol Pabloe: «Lec xavil abaic, cʼux xavaʼay abaic ta jujuntal. Talbat xapasbeic abaic perdón jech chac cʼu chaʼal la spasboxuc perdón Dios ta sventa li Cristoe», xi (Efe. 4:32). Xi la skʼejinta li David jtsʼibajom yuʼun Salmoe: «Li Mucʼul Diose jaʼ jcʼanvanej, jaʼ jcʼuxubinvanej stuc; cʼuncʼun chlic scʼacʼal yoʼnton, jaʼ toj mucʼ li cʼuxubinel yuʼune. [...] Mu sta jech ch-ilin ta jtojoltic jech chac cʼu chaʼal yepal li jmultique; mu sta jech yepal chacʼ jtojtic jech chac cʼu chaʼal yepal jchopoliltique. [...] Batsʼi nom la sjip loqʼuel ta stojol li jmultique, jech chac cʼu chaʼal nom xil sbaic li sloqʼuem cʼacʼal xchiʼuc smaleb cʼacʼale. Jech chac cʼu chaʼal totil ti cʼux ta yoʼnton xnichʼnabe, jaʼ jech ec li Mucʼul Diose cʼux ta yoʼnton li bochʼotic chichʼic ta muqʼue. Yuʼun snaʼoj ti cʼu xʼelan pasbilutique; snaʼ ti lum achʼelutic noʼoxe», xi (Sal. 103:8-14).
11. ¿Buchʼutik chakʼbe perton li Jeovae?
11 Sventa xakʼbutik perton li Diose, baʼyel me skʼan xkakʼbetik perton ek li buchʼutik saʼoj smul ta jtojolaltike (Mar. 11:25). Jaʼ jech tsots laj yakʼ ta aʼiel Jesús kʼalal xi laj yale: «Me chapasbeic perdón li bochʼo oy smul avuʼunique, jech chaspasboxuc perdón yuʼun amulic ec li Jtotic ta vinajele. Yan me mu xapasbeic perdón li bochʼo oy smul avuʼunique, jaʼ noʼox jech mu xaspasboxuc perdón ec li Jtotic te oy ta vinajele», xi (Mat. 6:14, 15). Jech ta melel, li Jeovae jaʼ noʼox me chakʼbe perton li buchʼutik ta sjunul yoʼonton chakʼbeik perton xchiʼiltakike. Jaʼ yuʼun chaʼa, jchʼuntik li tojobtasel laj yal Pablo liʼe: «Jech chac cʼu chaʼal la spasboxuc perdón yuʼun amulic li [«Jeovae», NM], jaʼ jech tscʼan chapasbe abaic perdón ec li voʼoxuque» (Col. 3:13). Ta melel, jaʼ jech ta jpasbetik kʼusi lek li jchiʼiltaktike.
«Mu me xaticʼbe smul achiʼilic»
12. ¿Kʼusi laj yal Jesús ta sventa li stikʼbel smul yantike?
12 Li ta Mantaletik ta Vitse, oy kʼusi jtos laj yal Jesús ti skʼan spasik li buchʼutik te chaʼiik mantal ta sventa slekilal li xchiʼiltakike, jaʼ ti mu stikʼbeik smule. Kʼalal laj xaʼox yal li mantal taje, la stunes jun labal sba lokʼol kʼop sventa xkom lek ta sjolik taje (kʼelo Mateo 7:1-5). Pe baʼyel jkʼeltik kʼusi smelolal li kʼusi xi laj yal Jesuse: «Mu me xaticʼbe smul achiʼilic», ti xie.
13. ¿Kʼusi skʼan spasik li buchʼutik chaʼiik kʼusi chal Jesuse?
13 Xi chalbe skʼoplal kʼusi laj yal Jesús li Mateoe: «Mu me xaticʼbe smul achiʼilic, yuʼun jech mu xavichʼ ticʼbel amulic», xi (Mat. 7:1). Li Lucase xi laj yal eke: «Mu me xaticʼbe smul achiʼilic, yuʼun jech mu xaticʼbat amulic ec. Mu me xacʼan acʼo stoj smul achiʼilic, yuʼun jech mu xaʼacʼbat atoj amulic ec. Pasbo perdón achiʼilic, jech chapasbatic perdón ec», xi (Luc. 6:37). Li fariseoetike toj tsots tstikʼbeik smul li krixchanoetike, maʼuk jech tspasik kʼuchaʼal chal li Tsʼibetike, moʼoj, yuʼun jaʼ jech tspasik ti kʼuyelan nopemike. Ti buchʼutik jech nopem xaʼiike, albatik yuʼun Jesús ti akʼo mu stikʼbeik smul li xchiʼiltakike, moʼoj, yuʼun ti kʼusie jaʼ ti akʼo spasbeik perton li xchopolalike. Jaʼ jech itojobtasvan ek li jtakbol Pablo kʼuchaʼal laj xa kiltik ta Efesios 4:32.
14. ¿Kʼusi tstaik li yajtsʼaklomtak Jesús mi chakʼbeik perton li xchiʼiltakike?
14 Mi chakʼbeik perton yan krixchanoetik li jchʼunolajeletike, jaʼ me jech tspasbatik yuʼun li krixchanoetik eke. «Ti cʼu xʼelan chaticʼbe smul achiʼilique, jaʼ jech chavichʼ ticʼbel amulic ec. Ti cʼu yepal chabisbe achiʼilique, jaʼ jech chabisbatic ec», xi li Jesuse (Mat. 7:2). Ti kʼusi ta jpasbetik li jchiʼiltaktike, jaʼ me jech chkichʼtik pasbel ek (Gál. 6:7).
15. ¿Kʼuxi tsots laj yal Jesús ti chopol ti chi jloʼiltavane?
15 Sventa chakʼ lek ta aʼiel ti chopol ti ta jloʼiltatik li yantike, xi la sjakʼ li Jesuse: «¿Cʼu yuʼun ti chaqʼuelbe li juteb scʼaʼepal sat achiʼil ti jaʼ mu xaqʼuel li jtel ta tsʼamteʼ te xtelet ta asat atuque? ¿Cʼu xʼelan xuʼ jech chavalbe li achiʼile: “Laʼ jloqʼuestic li scʼaʼepal asate”, ti xavute, yuʼun voʼot jtel ta tsʼamteʼ te xtelet ta asat atuc?», xi (Mat. 7:3, 4). Li jun jloʼiltavanej krixchanoe jaʼ chalbe skʼoplal li juteb spaltail ta «sat» li yermanoe, vaʼun jaʼ jech chakʼ ta aʼiel ti mu xtojob ta skʼelel mi tsots o mi moʼoj li kʼusitike. Manchuk mi muʼyuk tsots li smul xchiʼile —jech kʼuchaʼal uni kʼaʼep—, chalbe ti ta stukʼibtase; xi chalbee: «Laʼ jloqʼuestic li scʼaʼepal asate», xut. Jloʼlavanej, chalbe yermano ti tskʼan tskolta sventa chakʼbe yil lek li xchopolale.
16. ¿Kʼu yuʼun xuʼ xkaltik ti «jtel ta tsʼamteʼ te xtelet» ta sat li fariseoetike?
16 Li jbabeetik ta relijion yuʼun judioetike nopem onoʼox xaʼiik tsloʼiltaik li yantike. Jech kʼuchaʼal liʼe, jun maʼsat ti poxtaat yuʼun Jesuse, laj yal ti yuʼun onoʼox la takbil tal yuʼun Dios li Jesuse; ta skoj taje xi la stakʼik li fariseoetike: «Li voʼote solel pixilot ta mulil cʼalal lavocʼ. Pero voʼot xa chacʼan chachanubtasuncutic», xiik (Juan 9:30-34). Li fariseoetike mu nomuk xkʼot satik ta mantal mi jaʼuk xtojobik lek ta jchapanvanej, yuʼun «jtel ta tsʼamteʼ te xtelet» ta sat stukik ti pasemik-o ta maʼsat ta jyalele. Jaʼ yuʼun xi laj yal Jesús ta sventa li buchʼutik jech stalelalike: «Jloʼlavanejot. Loqʼueso baʼyuc li jtel ta tsʼamteʼ te oy ta asate, jech xuʼ chavil lec cʼu xʼelan xuʼ chaloqʼuesbe ec li juteb scʼaʼepal sat achiʼile», xi (Mat. 7:5; Luc. 6:42). Mi jpʼel ta koʼontontik spasbel kʼusi lek li yantike, mu me bu chi jloʼiltavan mi jaʼuk ta jsabetik «scʼaʼepal» sat li kermanotaktike. Jnaʼojtik ti jpas mulilutike, jech oxal mu stakʼ jtikʼbetik smul li jkʼanbil chiʼiltaktike.
Kʼuxi skʼan xkiltik li jchiʼiltaktike
17. ¿Kʼu yelan skʼan jtsaktik ta mukʼ li yantik kʼuchaʼal chal Mateo 7:12?
17 Li ta Mantaletik ta Vitse, te laj yal Jesús xtok ti kʼuxutik ta yoʼonton li Jeovae xchiʼuk ti tstakʼ li j-orasiontike, yuʼun jaʼ jun lekil Totil (kʼelo Mateo 7:7-12). Jech xtok, li Jesuse laj yal ti kʼuyelan skʼan jtsaktik ta mukʼ li yantike: «Jaʼ yuʼun, ti cʼu xʼelan chacʼan chaspasboxuc li cristianoetique, jaʼ jech xapasbeic ec», xi (Mat. 7:12). Jaʼ noʼox me jech chkakʼtik ta ilel ti jaʼutik melel yajtsʼaklom Cristo mi jech ta jtsaktik ta mukʼ li jchiʼiltaktike.
18. ¿Kʼu yuʼun xuʼ xkaltik ti tstij koʼontontik li «smantaltac Dios» ta stsakel ta mukʼ jchiʼiltaktik jech kʼuchaʼal ta jkʼantik tsakel ta mukʼe?
18 Kʼalal laj xaʼox yal Jesús ti jech skʼan jtsaktik ta mukʼ yantik kʼuchaʼal ta jkʼantik tsakel ta mukʼe, xi to laj yale: «Jaʼ jech smelol li smantaltac Dios tsʼibabile xchiʼuc li cʼusitic la stsʼibaic li yajʼalcʼoptac Dios ta voʼonee», xi. Kʼalal ta jchʼuntik li mantal ta sventa li talelal taje, jaʼ me jech ta jpastik kʼuchaʼal chal li «smantaltac Dios[e]», jaʼ xkaltik, li sloʼiltak li sbaʼyel voʼlikal livro ta Vivliae (Génesis kʼalal Deuteronomio). Li livroetik taje chal kaʼitik ti oy ta yoʼonton Dios chakʼ tal jun nitilulal ti jaʼ chakʼbe slajeb li choplejale. Jech noxtok, te yichʼoj skotol li mantal ti akʼbatik yuʼun Dios ta stojolal Moisés li j-israeletik ta sjabilal 1513 kʼalal maʼuk toʼox jkʼakʼaliltike (Gén. 3:15). Veno, jlom li mantaletik taje jamal lek chal ti kʼuyelan skʼan stsak ta mukʼ xchiʼiltakik li j-israeletike: skʼan tukʼ spasik kʼusitik xchiʼuk ti parejouk stsakvanik ta mukʼe, jech xtok skʼan spasbeik kʼusi lek li buchʼutik chil mas svokolike xchiʼuk li jyanlumetike (Lev. 19:9, 10, 15, 34).
19. ¿Kʼuxi chakʼ ta ilel li «yajʼalcʼoptac Dios» ti skʼan jpastik li kʼusi leke?
19 Kʼalal chalbe skʼoplal «yajʼalcʼoptac Dios» li Jesuse, jaʼ laj yalbe skʼoplal li slivroal j-alkʼopetik li ta Tsʼibetik ta Hebreo Kʼope. Maʼuk noʼox chalbe skʼoplal Mesías ti kʼot ta pasel ta stojolal Jesuse, moʼoj, yuʼun chal ti chakʼbe bendision Dios li yajtuneltak ti tspasik li kʼusi lek chile xchiʼuk ti tstsakik lek ta mukʼ li xchiʼiltakike. Jech kʼuchaʼal liʼe, li ta albil kʼop yuʼun Isaiase xi tojobtasatik li j-israeletike: «Li Mucʼul Diose jech chal: “Jaʼ me pasilanic li cʼusitic tucʼ ta pasele; jaʼ me pasic li cʼusitic lec ta pasele. [...] Toj xcuxet noʼox yoʼnton li bochʼo tspas jech chac leʼe, ti solel scotol yoʼnton tspas oe, [...] ti tsqʼuel sba lec ta sventa li cʼusi chopole”», xi (Isa. 56:1, 2). Jaʼ jech, li Diose tskʼan ti spasik-o kʼusi lek li yajtuneltake.
Mu me xkikta jbatik ta spasel li kʼusi leke
20, 21. ¿Kʼusi laj yal li krixchanoetik kʼalal laj yaʼiik li Mantaletik ta Vitse, xchiʼuk kʼu yuʼun skʼan xa nopbe lek smelolal?
20 Manchuk mi jaʼ noʼox la jchantik uni jayibuk kʼusitik tsots skʼoplal li kʼusi laj yal Jesús li ta Mantaletik ta Vits ti mu kʼusi xkoʼolaj-oe, xkaʼibetik lek smelolal kʼu yuʼun toj labal to laj yaʼiik li krixchanoetike. Xi chal li Vivliae: «Cʼalal ilaj yoʼnton ta loʼil li Jesuse, ichʼay yoʼnton li cristianoetique, yuʼun laj yaʼyic cʼu xʼelan ichanubtasvan li Jesuse. Yuʼun jaʼ jech ichanubtasvan jech chac cʼu chaʼal li bochʼo tsots yabtele. Mu jechuc ichanubtasvan jech chac cʼu chaʼal li jchanubtasvanejetic ta mantale», xi (Mat. 7:28, 29).
21 Li Jesucristoe «Echʼem Yutsil [echʼ ta] Jbijubtasvanej» jech onoʼox kʼuchaʼal albil skʼoplale (Isa. 9:6). Li Mantaletik ta Vitse jaʼ slekil vinajeb ti xojtikinbe lek snopben li sTot ta vinajele. Oy to kʼusi yan xuʼ chakʼ jchantik taj xtoke, yuʼun chal kʼuxi xuʼ jta jmelel muyubajeltik, kʼuxi mu xi jpʼaj ta mulivajel, kʼuxi xuʼ jpastik li kʼusi tukʼe xchiʼuk kʼuxi xuʼ jtatik li kʼusi lek ta tsʼakal ti xi jmuyubaj noʼox yuʼune, xchiʼuk yan kʼusitik. ¿Kʼu yuʼun mu xa kʼel lek yan velta li kapitulo 5 kʼalal ta 7 ta Mateoe? Mi laj xaʼox akʼopon Jeovae, nopbo lek smelolal li tojobtaseletik laj yal Jesús li ta Mantaletik ta Vitse xchiʼuk akʼbo yipal ta yakʼel ta akuxlejal. Mi jech cha pase, xmuyubaj me avuʼun li Jeovae, jaʼ me jech cha tsak ta mukʼ li jchiʼiltaktik kʼuchaʼal skʼan pasele xchiʼuk lek onoʼox me kʼusi cha pas.
¿Kʼusi cha takʼ?
• ¿Kʼu yelan skʼan xkiltik li buchʼutik tskontrainutike?
• ¿Kʼu yuʼun skʼan xkakʼbetik perton li jchiʼiltaktike?
• ¿Kʼusi laj yal Jesús ta sventa li stikʼbel smul yantike?
• ¿Kʼu yelan skʼan jtsaktik ta mukʼ li yantik kʼuchaʼal chal Mateo 7:12?
[Lokʼol ta pajina 8]
¿Kʼu yuʼun skʼan jkʼoponbetik Dios li buchʼutik chutsʼintautike?
[Lokʼol ta pajina 10]
¿Mi xa naʼ kʼu yuʼun xi laj yal li Jesuse: «Mu me xaticʼbe smul achiʼilic»?
[Lokʼol ta pajina 10]
¿Mi jech onoʼox ta jtsaktik ta mukʼ li yantik kʼuchaʼal ta jkʼantik tsakel ta mukʼe?
[Lokʼol ta pajina 11]