¿Kʼu yelan skʼan xkiltik li jchiʼiltaktike?

«Ti cʼu xʼelan chacʼan chaspasboxuc li cristianoetique, jaʼ tscʼan jech chapasbeic ec.» (LUC. 6:31.)

1, 2. 1) ¿Kʼusi jaʼ li Mantaletik ta Vitse? 2) ¿Kʼusi ta jchantik li ta xchanobil liʼe xchiʼuk li ta yane?

LI JESUSE jaʼ Mukʼta Jchanubtasvanej echʼ ta melel. Kʼalal li yajkontratak Jesús la stakik echʼel jchabivanejetik sventa xbat xchukik tale, xokol skʼob isutik xchiʼuk xi laj yalike: «Me junuc cristiano muʼyuc bochʼo jech chloʼilaj jech chac cʼu chaʼal li vinic leʼe», xiik (Juan 7:32, 45, 46). Jun li ta epal mantal laj yal Jesús ti mas ojtikinbile jaʼ li Mantaletik ta Vitse, ti te ta jtatik ta kapitulo 5 kʼalal ta 7 li ta Evanjelio yuʼun Mateoe. Li ta Lucas 6:20-49 jaʼ jechtik ta jtatik ek.a

² Li kʼusi van mas ojtikinbil li ta Mantaletik ta Vitse jaʼ li Mukʼul lekil Mantal sbie (Regla de Oro). Li mantal liʼe jaʼ chal ti kʼuyelan skʼan xkiltik li jchiʼiltaktike: «Ti cʼu xʼelan chacʼan chaspasboxuc li cristianoetique, jaʼ tscʼan jech chapasbeic ec», xi (Luc. 6:31). ¡Ep tajmek kʼusitik lek la spas ta stojolal krixchanoetik li Jesuse! La xpoxta jchameletik xchiʼuk kʼalal ta animaetik la xchaʼkuxes. Pe ti kʼusi mas tsots skʼoplal la spase jaʼ ti la xchol lekil aʼyeje, vaʼun li buchʼutik la xchʼamike jaʼ la staik li bendision ti mas mukʼ ta skotole (kʼelo Lucas 7:20-22). Li yajrextikoutik Jeova eke ta jcholtik li lekil aʼyej sventa Ajvalilal yuʼun Diose, vaʼun jun tajmek koʼontontik yuʼun (Mat. 24:14; 28:19, 20). Li ta xchanobil liʼe xchiʼuk li tan yan chtale ta jkʼeltik li kʼusi laj yal Jesús ta sventa li abtelal taje, xchiʼuk te ta jchantik xtok li ta Mantaletik ta Vits ti kʼuyelan xuʼ xkiltik li jchiʼiltaktike.

Mukʼuk koʼontontik

3. ¿Kʼusi smakoj ti mukʼ koʼontontike?

³ Xi laj yal li Jesuse: «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale», xi (Mat. 5:5). Jech kʼuchaʼal chal li Tsʼibetike, li buchʼu mukʼ yoʼontone maʼuk skʼan xal ti yuʼun kʼun stalelale. Kʼalal mukʼ koʼontontike skʼan xal ti manxoutike, ti xlamet noʼox jtalelaltike xchiʼuk ti lek koʼontontike, yuʼun jech tskʼan Dios ti akʼo jpastike. Li talelalil taje te chvinaj ti kʼuyelan xkil jbatik xchiʼuk li buchʼutik oy ta jpat jxokontike. Jech kʼuchaʼal liʼe, li krixchano ti mukʼ yoʼontone muʼyuk bu tspakbe li buchʼu chopol kʼusi tspase (Rom. 12:17-19).

4. ¿Kʼu yuʼun xmuyubajik li buchʼutik oy smukʼul yoʼontonike?

⁴ Li buchʼu mukʼ yoʼontonike xmuyubajik, yuʼun «ch-acʼbat sventainic li banamil[e]». Li Jesús ti jaʼ toj lek yoʼonton xchiʼuk ti bikʼit laj yakʼ sbae, laj yichʼ akʼbel «sventain scotol [li] cʼusitic oye». Jaʼ yuʼun, jaʼ li Bankilal ti buchʼu ta xichʼ li Balumile, jaʼ ti buchʼu tsventaine (Mat. 11:29; Heb. 1:2; Sal. 2:8). Pe mu stukuk. Li Vivliae chal ti oy to yan ajvaliletik li ta Ajvalilal yuʼun Dios ta vinajele, maʼuk noʼox li buchʼu kʼotem ta «cristiano yilel[e]» (Dan. 7:13, 14, 21, 22, 27). Jaʼ li 144,000 yajtsʼaklomtak Cristo ti tʼujbilike, ti chakʼ ta ilel smukʼul yoʼontonik eke. Jaʼik ti oy kʼusi «jech ta [xichʼik] ec» kʼuchaʼal Cristoe (Rom. 8:16, 17; Apo. 14:1). Oy to me yan krixchanoetik xtok ti mukʼ yoʼontonik ti ch-akʼbat xkuxlejalik liʼ ta Balumile, ti chventainatik yuʼun li Ajvalilal yuʼun Diose (Sal. 37:11).

5. ¿Kʼusi chkʼot pasel kuʼuntik mi ta jchanbetik li smukʼul yoʼonton Cristoe?

⁵ Mi tsots jtalelal chkakʼ jbatik ta stojolal li kermanotaktike, ta me xtavan xaʼiutik xchiʼuk chnamajik ta jtojolaltik. Pe mi ta jchanbetik li smukʼul yoʼonton Jesuse jaʼ me chnopajik-o talel li jlekil talelaltike xchiʼuk ti tspat oʼontonale. Li smukʼul oʼontonale jaʼ jlom li yabtel xchʼul espiritu Dios chakʼbutike, taje jaʼ koliyal ti jech kuxulutik xchiʼuk ti jech chi jxanav kʼuchaʼal tskʼan li chʼul espiritue (kʼelo Gálatas 5:22-25). ¿Mi mu jechuk ti jkotoltik ta jkʼantik teuk oyutik xchiʼuk li krixchanoetik ti oy smukʼul yoʼontonik ti beiltasbilik yuʼun sjuʼel Jeovae?

¡Xmuyubajik noʼox li buchʼutik oy xkʼuxul yoʼontonike!

6. ¿Kʼusi talelalil lek xvinaj ti jelelik-o li buchʼutik oy xkʼuxul yoʼontonike?

⁶ Xi laj yal Jesús xtok li ta Mantaletik ta Vitse: «Xcuxet noʼox yoʼnton li bochʼo ta xcʼuxubinvanique, yuʼun ta xichʼic cʼuxubinel ec», xi (Mat. 5:7). Li «bochʼo ta xcʼuxubinvanique» kʼux chaʼiik xchiʼuk oy ta yoʼontonik li buchʼu chil svokole, vaʼun tstsakik ta mukʼ. Li Jesuse «icʼuxubaj ta yoʼnton» li krixchanoetike, jaʼ yuʼun la xpoxtabe xchameltak ta skʼelobil juʼelal (Mat. 14:14; 20:34). Ti kʼux chkaʼitik li yantik xchiʼuk ti oyik tajmek ta koʼontontike jaʼ me chkakʼ-o ta ilel xkʼuxul koʼontontik (Sant. 2:13).

7. ¿Kʼusi la spas Jesús ta skoj li xkʼuxul oʼontonale?

⁷ Jun veltae, la skʼan chkux jutuk li Jesuse. Pe kʼalal laj yakʼ venta ti yakal tsaʼe yuʼun epal krixchanoetike, «icʼuxubaj ta yoʼnton, yuʼun jaʼ jechic jech chac cʼu chaʼal chijetic ti muʼyuc xchabielique», vaʼun «lic xchanubtas; ep cʼusitic laj yacʼ ta chanel» (Mar. 6:34). Jaʼ me jech ek li voʼotike, ta xkalbetik ta sventa Ajvalilal yuʼun Dios li krixchanoetike xchiʼuk ta sventa li xkʼuxul yoʼonton Diose. ¡Jaʼ jun muyubajel ti spas kuʼuntike!

8. ¿Kʼu yuʼun xmuyubajik noʼox li buchʼutik oy xkʼuxul yoʼontonike?

⁸ Li buchʼutik oy xkʼuxul yoʼontone xmuyubajik, yuʼun jaʼ ti «ta xichʼic cʼuxubinel» eke. Kʼalal kʼux ta koʼontontik li yan krixchanoetike, jaʼtik onoʼox me jech kʼuxutik ta yoʼontonik ek (Luc. 6:38). Xi laj yal xtok li Jesuse: «Me chapasbeic perdón li bochʼo oy smul avuʼunique, jech chaspasboxuc perdón yuʼun amulic ec li Jtotic ta vinajele», xi (Mat. 6:14). Jaʼ noʼox tspasbat perton smulik xchiʼuk lek ch-ilatik yuʼun Jeova li buchʼutik oy xkʼuxul yoʼontonike.

¿Kʼu yuʼun xmuyubaj li buchʼu mu snaʼ saʼ kʼope?

9. ¿Kʼusi ta jpastik mi mu jnaʼ jsaʼtik kʼope?

⁹ Li Jesuse laj yalbe skʼoplal yan talelal ti chakʼ muyubajel kʼalal xi laj yale: «Xcuxet noʼox yoʼnton li bochʼo yacʼoj svocolic ta spajesel cʼope; jaʼ xnichʼnabtac Dios», xi (Mat. 5:9). Li jpʼel kʼop ta griego ti jelubtasbil kʼuchaʼal «spajesel [kʼop]», ti xie, jaʼ skʼan xal ti «mu snaʼ saʼik kʼope», jaʼ xkaltik, krixchanoetik ti tsaʼik lekilale. Mi jech jtalelaltik taje, mu me bu «jaʼ noʼox ta jsaʼ [jkontratik]», mu me bu ta jsabetik smul krixchanoetik xchiʼuk mu me bu lek noʼox chkiltik ti jech tspasik li yantike (Pro. 16:28). Ta jsaʼtik lekilal ta jkʼopojeltik xchiʼuk ta kʼusitik ta jpastik li ta tsobobbail xchiʼuk ta yantik butikuke (Heb. 12:14). Pe ti kʼusi mas to tsots skʼoplal skʼan xkakʼ kipaltik spasele jaʼ ti lekuk oyutik ta stojolal Jeovae (kʼelo 1 Pedro 3:10-12).

10. ¿Kʼu yuʼun xmuyubajik li buchʼutik mu snaʼ saʼik kʼope?

¹⁰ Li Jesuse laj yal ti «bochʼo yacʼoj svocolic ta spajesel cʼope» xmuyubajik la, yuʼun jaʼ ti biiltasbilik ta «xnichʼnabtac Dios[e]». Ta skoj ti yakʼoj xchʼunel yoʼontonik ta stojolal Jesuse, li buchʼutik tʼujbilike ch-akʼbat smotonik, jaʼ ti chkʼotik ta «xnichʼnab Dios[e]» (Juan 1:12; 1 Ped. 2:24). ¿Kʼusi xuʼ xkaltik ta sventa li jtsop yan chijetik ti mu snaʼ saʼik kʼop eke? Kʼelavil, li Jesuse jaʼ «Totil Sbatel Osil» yuʼunik li ta Ajvalilal ta Jmil Jabile, jaʼo ti kʼu sjalil ch-ajvalilaj ta vinajel xchiʼuk li xchiʼiltak ti koʼol kʼusi ta staike (Juan 10:14, 16; Isa. 9:6; Apo. 20:6). Kʼalal mi tsuts li Jmil Jabile, li jnaklometik ta Balumil ti mu snaʼ saʼik kʼope chkʼotik ta xnichʼnab Dios ta batsʼi melel un (1 Cor. 15:27, 28).

11. ¿Kʼu yelan ta jpas jbatik ta stojolal yantik mi chkakʼ akʼo sbeiltasutik li «jbijiltic chlic tal ta stojol Diose»?

¹¹ Sventa lek tajmek xkil jbatik xchiʼuk Jeova, li «Dios ti chacʼ jun coʼntontique», skʼan me jchanbetik li stalelaltake, ti te smakoj ti mu snaʼ saʼ kʼope (Fili. 4:9). Mi chkakʼtik akʼo sbeiltasutik li «jbijiltic chlic tal ta stojol Diose», mu me bu ta jsaʼtik kʼop xchiʼuk li yan krixchanoetike (Sant. 3:17). Kʼalal ta jsaʼtik li lekilal taje xi jmuyubaj me ta melel.

«Tscʼan xaxojobanic ta stojol cristianoetic»

12. 1) ¿Kʼusi laj yal Jesús ta sventa li lus ta mantale? 2) ¿Kʼuxi chojobaj kuʼuntik li luse?

¹² Jech kʼuchaʼal laj xa kiltike, skʼan me chkichʼtik ta kʼux li jchiʼiltaktike. Pe ti kʼusi xuʼ mas lek jpastik ta stojolalike jaʼ ti jkoltatik ti akʼo xilik li sakil osil ta mantal chakʼ Diose (Sal. 43:3). Li Jesuse laj yalbe yajchankʼoptak ti ta «stojolal ti yan[tik]e, coʼol sʼelan luz cʼotem[ik]», xchiʼuk noxtok laj yalbe ti akʼo la xojobajike yuʼun la jech chilik yantik ti lek kʼusitik tspasike, jaʼ xkaltik, ti lek kʼusi tspas ta stojolal li xchiʼiltakike. Li slusalike chakʼ xojobal «ta stojol ti yan[tik]e», ti chakʼbeik sakil osil ta mantal li krixchanoetike (kʼelo Mateo 5:14-16, Ch). Li avie chvinaj jlusaltik kʼalal ta jkoltatik bu kʼalal xuʼ kuʼuntik li jlakʼnataktike xchiʼuk kʼalal ta jkolta jbatik li ta chol mantal ti chichʼ pasel «ta sbejel banamil[e]» (Mar. 13:10; Mat. 26:13). ¡Jaʼ jun mukʼta matanal jtaojtik!

13. ¿Kʼusi ojtikinbilutik-o li yajtsʼaklomutik Cristoe?

¹³ Xi laj yal li Jesuse: «Ti jun jteclum ti oy ta jol vitse, muʼyuc ta nacʼal», xi. Ta melel, jun jteklum kʼuchaʼal taje lek tajmek xvinaj, akʼo mi nom oy. Jaʼ me jech ek un, li jchol mantalutik sventa Ajvalilal yuʼun Diose ojtikinbilutik lek ta sventa jlekil abteltik xchiʼuk ta jlekil talelaltik, jech kʼuchaʼal ti oy noʼox jmeloltike xchiʼuk ti sak jtalelaltike (Tito 2:1-14).

14. 1) ¿Kʼu yelan li lampara ta baʼyel sigloe? 2) ¿Kʼuxi xuʼ mu jnujmakitik ta almul li lus ta mantale?

¹⁴ Li Jesuse laj yal mi oy la buchʼu tstsan jun lamparae, maʼuk sventa tsnujmaki ta almul, jaʼ sventa chakʼ ta yavil kantela, sventa «jech ta xacʼ xojobal ta sbejel li yut [nae]». Jech onoʼox, li slamparaik ta baʼyel sigloe jaʼ uni pʼinetik pasbil ta achʼel ti tsnojesik ta yaseiteal oliva o ta yan-o kʼusiuke. Li xmechaile chuchʼ muyel li aseitee, vaʼun jaʼ jech tsanem-o. Li lamparae ta onoʼox xichʼ akʼel ta jun yavil kantela, ta jun skajleb ti toyol to oye, ta takʼin pasbil o ta teʼ, sventa jech xilik osil li buchʼutik te oy ta yut nae. Mi jaʼuk onoʼox buchʼu tsnujmakiik ta almul (spʼisobil trigo o kʼusitik yan ti baluneb litro x-och-oe). Veno, li Jesuse mu onoʼox skʼan ti tsnujmakiik ta almul li slusalik yajtsʼaklomtake; li lus yuʼunik ta mantale skʼan onoʼox me xakʼ xojobal, ti mu kʼusi xmakatik-o ta jyalele. Jaʼ yuʼun chaʼa, akʼo mi chkiltik kontrainel, mu me jnakʼtik li kʼusitik melel ta Vivliae, ti jech mu xa xkaltik echʼele.

15. ¿Kʼuxi xuʼ chtun ta xkuxlejal yan krixchanoetik li jlekil abteltike?

¹⁵ Kʼalal laj xaʼox yalbe skʼoplal lampara li Jesuse, xi laj yalbe li yajtsʼaklomtake: «Acʼbeic yipal, vinajuc xojobinel aluzic ta stojol ti yane. Cʼalal ta xilic ti lec cʼusitic ta xapasique, ta slequil-cʼoptaic ti Dios avuʼunic ti oy ta vinajele», xi. Oy buchʼutik tslekil kʼoptaik Dios xchiʼuk chkʼotik ta yajtunel ta skoj li jlekil abteltike. Ti jech jnaʼojtik taje jaʼ me tstij koʼontontik ta melel sventa jechuk-o xi «[jxojobaj] ta stojolic jech chac cʼu chaʼal luz ti xojobanic cʼalal icʼ osile» (Fili. 2:15).

16. ¿Kʼusi skʼan jpastik ta sventa ti «coʼol sʼelan luz cʼotem[utike]»?

¹⁶ Ta sventa ti «coʼol sʼelan luz cʼotem[utike]», skʼan me jcholtik li mantal sventa Ajvalilal yuʼun Diose xchiʼuk ti jpastik echʼel jchankʼopetike. Pe oy to me kʼusi skʼan. Xi laj yal li jtakbol Pabloe: «Xanovanic jech chac cʼu chaʼal li bochʼo chanov ta sac osile. Yuʼun li yabtelal sac osile ch-ayin slequil coʼntontic yuʼun, chijtuqʼuib yuʼun, melel scotol cʼusi chcaltic yuʼun», xi (Efe. 5:8, 9). Li jtalelaltike stekel me ora skʼan xakʼ ta ilel ti chi jtun ta stojolal Diose. Jaʼ jech, skʼan jchʼuntik li tojobtasel laj yakʼ jtakbol Pedro liʼe: «Lecuc me cʼusi chapasic ta stojol li bochʼotic muʼyuc yichʼojic ta mucʼ Diose. Acʼo me chal acʼoplalic ti chopol cʼusi chapasique, pero cʼalal chilic ti lec cʼusitic chapasique, chalbeic slequilal Dios ti cʼalal chtal chapanvanuque» (1 Ped. 2:12). Pe kʼelavil un, ¿kʼusi skʼan jpastik kʼalal oy jkʼoptik xchiʼuk junuk ermanoe?

«Chapano baʼyuc acʼop achiʼuc li achiʼile»

17-19. 1) ¿Kʼusi jaʼ li matanal chal Mateo 5:23, 24? 2) ¿Kʼu to yepal sbalil ti jchap jkʼoptik xchiʼuk jun ermanoe, xchiʼuk kʼu yelan laj yal li Jesuse?

¹⁷ Li ta Mantaletik ta Vits laj yal Jesuse, laj yalbe li yajchankʼoptak ti mu me x-ilin ta stojolal xchiʼiltakike xchiʼuk ti mu me spʼajike. Laj yichʼik tojobtasel ti akʼo xchapan ta anil li skʼopik mi oy yutoj sbaik xchiʼuk junuk ermanoe (kʼelo Mateo 5:21-25). Jkʼelbetik lek skʼoplal li tojobtasel laj yakʼ Jesús liʼe. Jnoptik noʼox ti avichʼoj batel junuk matanal sventa chbat avakʼ ta skajleb matanal te ta chʼulnae, pe kʼalal te xa oyote, vul ta ajol ti oy akʼop xchiʼuk jun ermanoe. ¿Kʼusi van skʼan xa pas? Skʼan te xavikta ta yeloval skajleb matanal li matanal avichʼoj batele, vaʼun bat chapano baʼyel li akʼope. Mi laj xaʼox achapan li kʼop une, xuʼ xa me xbat avakʼ li matanale.

¹⁸ Li matanal taje jaʼ me smoton Dios ti chichʼ akʼel ta xchʼulna Jeovae, ti kʼusi mas onoʼox chichʼ akʼele jaʼ jkot chonbolom ti chichʼ milele. Toj tsots skʼoplal ti xakʼik matanal li j-israeletik ti jaʼ jtos yichʼobil ta mukʼ Diose, yuʼun jaʼ jech chal li sMantal Moisese. Pe mi vul ta sjol li j-israel ti oy skʼop xchiʼuk jun yermanoe, ti kʼusi mas tsots skʼoplal li vaʼ ora taje maʼuk li yakʼel matanale, jaʼ ti skʼan xchapan baʼyuk li skʼope. «Te xacomtsan ta stuqʼuil scajleb matanal li smoton Dios avichʼoj batele —xi li Jesuse—. Bat chapano baʼyuc acʼop achiʼuc li achiʼile. Tsʼacal xuʼ chtal avacʼbe li smoton Diose.» Ta melel, jaʼ mas tsots skʼoplal ti xichʼ chapanel li kʼop xchiʼuk jun ermanoe, jaʼ mu sta ti jaʼ xichʼ pasel li kʼusi chal li Mantale.

¹⁹ Melel onoʼox chaʼa, li Jesuse muʼyuk bu laj yal kʼusi matanalil xchiʼuk muʼyuk bu laj yal kʼusi mulilal. Jaʼ yuʼun chaʼa, kʼusiuk matanalil ti yichʼoj batel li j-israele, ti kʼusie jaʼ ti tsʼakal to akʼo yakʼ mi yuʼun oy skʼop xchiʼuk junuk ermanoe. Mi jaʼ jkot chonbolome, te kuxul skʼan xikta, «ta stuqʼuil scajleb matanal» sventa chichʼ chikʼel, te ta yamakʼ paleetik. Mi chap xaʼox li kʼop une, xuʼ xa sut batel xchiʼuk xbat yakʼ li matanale.

20. Mi ilinemutik ta stojolal jun ermanoe, ¿kʼu yuʼun skʼan jchapantik ta anil li kʼope?

²⁰ Sventa xchʼam Dios li ichʼel ta mukʼ chkakʼbetike, skʼan me lek xkil jbatik xchiʼuk li kermanotaktike. Li ta Israele, mi chʼabal kʼusi lek tspasbe xchiʼiltak li buchʼu chakʼik matanale, chchʼay me sbalil ta jyalel ta sat Dios li matanale (Miq. 6:6-8). Jaʼ yuʼun laj yalbe yajchankʼoptak Jesús ti persa skʼan xchapan ta ora li skʼopike (Mat. 5:25). Jaʼ jech la stsʼiba ek li Pabloe: «Me chaʼilinique, mu me teuc xasaʼ amulic o. Mu me sbejeluc cʼacʼal xaʼilinic. Mu me xajambeic sbe li pucuje», xi (Efe. 4:26, 27). Akʼo mi oy srasonal sventa chi j-ilin ta stojolal li jun jchiʼiltike, skʼan me jchapantik ta ora li kʼope. Yuʼun mi moʼoje, jech me chi j-ilin-o, vaʼun jaʼ jech chkakʼtik abtejuk li Diabloe (Luc. 17:3, 4).

Kichʼtik-o me ta mukʼ li jchiʼiltaktike

21, 22. 1) ¿Kʼuxi xuʼ jchʼuntik li mantaletik laj yal Jesús ti naka to la jkʼeltike? 2) ¿Kʼusi ta jkʼeltik li ta yan xchanobile?

²¹ Li Mantaletik ta Vits ti la jvules ta joltik liʼe, jaʼ me tstij koʼontontik ti xkichʼtik ta mukʼ xchiʼuk ti jpastik kʼusi lek ta stojolal li jchiʼiltaktike. Akʼo mi naka jpas mulilutik, skʼan me jchʼunbetik li smantal Jesuse, yuʼun li stuk xchiʼuk sTote mu me bu chi skʼanbutik li kʼusi mu xa spas kuʼuntike. Mi ta jkʼanbetik koltael li Jeovae xchiʼuk ti chkakʼtik persa eke, ch-ayan me smukʼul koʼontontik, xkʼuxul koʼontontik xchiʼuk manxo krixchanoutik me. Jech noxtok, chvinaj me kuʼuntik li lus ta mantal sventa tskʼupil kʼopta li Jeovae xchiʼuk ch-ayan me kuʼuntik lekilal xchiʼuk kermanotaktik kʼalal chlik kʼope.

²² Ta stsutsebal une, mi ta jkʼantik chchʼam Dios ti kʼuyelan chkichʼtik ta mukʼe skʼan me lek kʼusi jpastik ta stojolal li jchiʼiltaktike (Mar. 12:31). Li ta yan xchanobile ta jkʼeltik yan loʼiletik ti laj yichʼ alel ta Mantaletik ta Vits ti tskoltautik ta spasel li kʼusi lek eke. Ti laj xa jnopbetik lek skʼoplal li chanubtaseletik ti mu kʼusi xkoʼolaj-o laj yal Jesuse, xi jakʼbe jbatike: «¿Mi lek kʼusi ta jpasbe li yantike?».

[Tsʼibetik ta yok vun]

¿Kʼusi cha takʼ?

• ¿Kʼusi skʼan xal ti mukʼ noʼox koʼontontike?

• ¿Kʼu yuʼun xmuyubaj li «bochʼo ta xcʼuxubinvanique»?

• ¿Kʼuxi chojobaj kuʼuntik li luse?

• ¿Kʼu yuʼun skʼan jchapantik ta anil mi oy jkʼoptik xchiʼuk li kermanotaktike?

[Lokʼol ta pajina 4]

Jtos ti kʼusi tsots skʼoplal sventa xojobaj kuʼuntik li luse jaʼ ti ta jcholtik li mantal sventa Ajvalilal yuʼun Diose

[Lokʼol ta pajina 5]

Li jtalelaltike stekel me ora skʼan xakʼ ta ilel ti chi jtun ta stojolal Diose

[Lokʼol ta pajina 6]

Kakʼ kipaltik sventa jchapan li jkʼoptik xchiʼuk li kermanotaktike

[Lokʼol ta pajina 6]