Li Pedroe la smuk ta yoʼonton li Jesuse

Kʼalal te toʼox oyik li Jesus xchiʼuk yajtakboltak ti bu la spasik ta slajeb velta li Veʼlil ta bat kʼakʼale, xi laj yalanbe li yajtakboltake: «Akotolik chakomtsanikun li ta akʼobal tanae». Pe li Pedroe xi la stakʼe: «Li voʼone muʼyuk bu ta jkomtsanot akʼo mi skomtsanikot li yantike». Vaʼun, xi la stakʼbe Pedro li Jesuse: «Ta melel chkalbot avaʼi, kʼalal skʼan toʼox x-okʼ jkot kotse, oxib xa ox velta avaloj ti mu xavojtikinune».

Kʼalal ikʼat batel yuʼun soltaroetik ta sna Kaifas li Jesuse, jatavik batel li yantik jtakboletike. Pe oy chaʼvoʼ ti te tijilik batel ta spat li epal krixchanoetike. June jaʼ li Pedroe, li stuke te och ta yamakʼil sna li Kaifase, te lik kʼatinuk. Vaʼun, te nopaj talel jun kiara, xi laj yalbe li Pedroe: «Li voʼote xa kojtikinot, te toʼox achiʼuk li Jesuse».

Xi laj yal li Pedroe: «Muʼyuk, mu xkaʼi li kʼusi chavalbune». Vaʼun, li Pedroe bat ta tiʼ na. Pe ilat yuʼun yan kiara xtok, vaʼun li kiarae xi lik yalbe li buchʼutik te oyike: «¡Li vinik liʼe te toʼox xchiʼuk li Jesuse!». Pe xi la stakʼ yan velta li Pedroe: «¡Mu xkojtikin li Jesus chavalike!». Xi laj yal jun vinik eke: «Ta melel, te toʼox kapalot ek, xvinaj ta akʼopojel, yuʼun jech chakʼopoj kʼuchaʼal li Jesuse». Vaʼun, li Pedroe xi jamal laj yale: «¡Mu xkojtikin li vinik taje!».

Kʼalal jech la stakʼ li Pedroe, jaʼo okʼ jkot kots. Vaʼun, laj yakʼ venta ti te kʼelbil tal yuʼun li Jesuse xchiʼuk te vul ta sjol li kʼusi albat onoʼoxe. Jaʼ yuʼun, lokʼ batel xchiʼuk bat smil sba ta okʼel.

Li Sanedrine te la stsob sbaik ta sna Kaifas sventa teuk xchapanik li Jesuse. Li Sanedrine jaʼik li jchapanvanejetik yuʼun judaetike. Kʼotem xa onoʼox ta nopel yuʼunik ti tsmilik li Jesuse, jaʼ yuʼun tskʼelik kʼusi smul ta sabeik. Pe mi jutebuk smul la stabeik. Jaʼ yuʼun, li Kaifase xi la sjakʼbe li Jesuse: «¿Mi voʼot li Xnichʼonot Diose?». Xi la stakʼ li Jesuse: «Jech, voʼon maʼ taje». Jaʼ yuʼun, xi laj yal li Kaifase: «¿Kʼu yuʼun persa to skʼan xtal yan testigoetik? Yuʼun laj xa kaʼitik ti chopol kʼopoj ta stojolal li Diose». Lek laj yaʼi skotolik li Sanedrine, vaʼun xi laj yalike: «¡Akʼo yichʼ milel li vinik leʼe!». Jaʼ yuʼun, la smajbeik xokon sat, la stubtaik, la smakbeik sat xchiʼuk la smajik, vaʼun xi laj yalbeike: «Mi ta melel j-alkʼopote, albun kaʼikutik buchʼu ti la smajote».

Ta sob yokʼomale, laj yikʼik batel ta stojolal Sanedrin li Jesuse. Vaʼun, xi la sjakʼbeike: «¿Mi voʼot li Xnichʼonot Diose?». Xi la stakʼ li Jesuse: «Jaʼ, voʼoxuk laj aval atukik». Vaʼun, la spakʼtaik ta jchopolkʼoptavanej xchiʼuk laj yikʼik batel ta stojolal li ajvalil ta Roma ti jaʼ li Poncio Pilatoe. Pe ¿kʼusi van kʼot ta pasel ta mas tsʼakal? Jkʼeltik batel.