Chaʼkuxi li Jesuse

Kʼalal chamem xa ox li Jesuse, oy jun jkʼulej vinik ti Jose sbie la skʼanbe vokol Pilato ti akʼo x-akʼbat syales li sbekʼtal Jesus ti te jokʼol ta jtel teʼe. Li Josee la xpixbe sbekʼtal Jesus ta jun lekil manta ti pasbil ta linoe xchiʼuk laj yakʼbe muil tsʼiʼleletik, vaʼun te la smuk ta jun achʼ mukinal. Laje, laj yal mantal ti akʼo xichʼ makbel stiʼ ta jpʼej mukʼta tone. Pe li bankilal paleetike xi laj yalbeik li Pilatoe: «Chixiʼkutik ti xbat yelkʼanbeik tal sbekʼtal Jesus li yajchankʼoptake xchiʼuk ti xlik yalik ti chaʼkuxiem xae». Jaʼ yuʼun, li Pilatoe xi laj yale: «Makbeik lek stiʼ li mukinale xchiʼuk vaʼanik jchabivanejetik».

Kʼalal echʼem xa ox oxib kʼakʼale, oy jlom antsetik sob batik li ta mukinale. Kʼalal kʼotike, laj yilik ti lokʼesbil xa li ton ti smakoj toʼox li stiʼ mukinale. Li ta yut chʼene te oy jun anjel, vaʼun xi laj yal li anjele: «Mu xa xiʼik, yuʼun chaʼkuxiem xa li Jesuse, bat albeik li yan yajchankʼoptak ti akʼo batikuk ta Galilea sventa te xilike».

Pe jaʼuk li Maria Magdalenae bat saʼ ta anil li Pedro xchiʼuk Juan kʼalal laj yil ti lokʼesbil xa ox li ton te ta mukinale. Kʼalal la stae, xi laj yalanbee: «La slokʼesik xa batel ta smukinal li Jesuse». Vaʼun, li Pedro xchiʼuk Juane batik li ta smukinal Jesuse. Pe kʼalal laj yilik ti chʼabal te oy ta smukinale, sut batel ta snaik.

Ta tsʼakale, chaʼsut ta mukinal li Maria Magdalenae, vaʼun te laj yil ta yut mukinal chaʼvoʼ anjeletik, xi laj yalbee: «Slokʼesojik xa batel li Kajvale, mu jnaʼ bu bat stelanik». Vaʼun, te laj yil jun vinik, yaloj mi jaʼ li jkʼel nichimetik ta mukinale, jaʼ yuʼun xi laj yalbee: «Bankilal, avokoluk, albun bu laj avakʼik». Pe xi takʼbate: «¡Maria!», vaʼun ta ora noʼox laj yakʼ venta Maria ti jaʼ li Jesuse. Vaʼun, xi laj yale: «¡Jchanubtasvanej!». Jaʼ yuʼun, xi albat yuʼun li Jesuse: «Bat albo li kajchankʼoptak ti laj avilun xae». Vaʼun, li Mariae bat yalanbe ta anil.

Ta mas tsʼakal jutuke, oy chaʼvoʼ yajchankʼoptak Jesus lokʼik batel ta Jerusalen sventa xbatik li ta lum Emause. Kʼalal yakalik ta xanbale, te nopaj tal ta stojolalik jun vinik xchiʼuk te chiʼinatik batel, vaʼun jakʼbatik kʼusi ti yakal tsloʼiltaike, xi la stakʼike: «¿Mi mu xanaʼ li kʼusi kʼot ta pasele? Yuʼun oy xa ta oxib kʼakʼal ti laj yakʼik ta milel Jesus li bankilal paleetike, pe avie oy junantik antsetik ti yakal chalik ti chaʼkuxi xa li Jesuse». Pe xi la sjakʼ li vinike: «¿Mi mu xachʼunik li kʼusi yalojik li j-alkʼopetike? Yuʼun albil onoʼox ti persa ta xcham li Kristoe xchiʼuk ti ta xichʼ chaʼkuxesele». Laje, xcholet lik yalbe skʼoplal li Tsʼibetike. Kʼalal kʼotik ta Emause, laj yalbeik ti akʼo te xkom chiʼinatikuke. Vaʼun, kʼalal chveʼik xa oxe, li vinike la spas orasion ta sventa li pane, jaʼ to te laj yakʼik venta ti jaʼ li Jesuse. Pe sak chʼay noʼox batel.

Li chaʼvoʼ yajchankʼoptak Jesuse sutik batel ta anil li ta Jerusalene, yuʼun bat yalbeik jtakboletik li kʼusi kʼot ta pasele. Pe kʼalal te oyik ta yut nae, laj yakʼ sba ta ilel li Jesuse. Ta slikebale, mu toʼox xchʼunik li jchankʼopetike, jaʼ yuʼun xi albatike: «Kʼelo avilik li kok jkʼobe, pikikun mi chakʼanike. Yuʼun tsʼibabil onoʼox ti chchaʼkuxi li Kristoe».