Tʼujat yuʼun Jesus li Sauloe

Li Sauloe jaʼ jromail vinik ti te vokʼ ta Tarsoe. Jaʼ jun jfariseo vinik ti xchanoj lek li mantaletik yuʼun judaetike xchiʼuk solel spʼajoj li yajtsʼaklomtak Kristoe. Yuʼun bat xjochan lokʼel ta snaik li viniketik xchiʼuk antsetik sventa stikʼan ta chukele. Pe maʼuk noʼox, yuʼun jun veltae te vaʼal skʼeloj ti kʼu yelan laj yichʼ milel ta ton li Esteban ti jaʼ jun yajchankʼop Jesuse.

Pe li Sauloe muʼyuk bu bal noʼox chaʼi ti tstikʼan ta chukel li yajtsʼaklomtak Kristo ta Jerusalene. Jaʼ yuʼun, laj yalbe li mero bankilal pale ti akʼo xtakat batel ta Damasko sventa stikʼan ta chukel li yan yajtsʼaklomtak Kristo teye. Kʼalal jutuk xa ox skʼan xkʼot ta Damasko li Sauloe, ta anil noʼox joyobtabil kʼot ta xojobal lus ti lik tal ta vinajele, vaʼun li Sauloe lom ta lum xchiʼuk laj yaʼi jun yechʼomal eil ti xi chale: «Saulo, ¿kʼu yuʼun ti yakal chakontrainune?». Li Sauloe xi la sjakʼe: «¿Buchʼuot?». Vaʼun, xi takʼav li yechʼomal eile: «Voʼon Jesusun. Batan ta Damasko jaʼ tey cha-albat li kʼusi skʼan xapase». Kʼalal jech albat li Sauloe, maʼsat kom, vaʼun nitbil bat kʼalal to ta Damasko.

Oy jun yajchankʼop Kristo ta Damasko ti Ananias sbie tukʼ yakʼoj sba ta stojolal Dios, xi albat yuʼun Jesus li Ananias kʼalal oy kʼusi akʼbat yile: «Vaʼlan, batan li ta kaye ti bu Tukʼ chalbeik sbie, vaʼun bat saʼo jun vinik ta sna Judas ti Saulo sbie». Xi la stakʼ li Ananiase: «Kajval, ep kaʼioj chalbeik skʼoplal li vinik taje, yuʼun yakal tstikʼ ta chukel skotol li buchʼutik chalik abie». Pe xi takʼbat yuʼun li Jesuse: «Batan, yuʼun laj xa jtʼuj sventa spukbe skʼoplal li lekil aʼyejetik yuʼun Dios ta epal lumetike».

Jaʼ yuʼun, li Ananiase bat skʼel li Sauloe, xi kʼot yalbee: «Ermano Saulo, li Kajvaltik Jesuse la stakun tal sventa xjam asat yan velta». Vaʼun, ta ora noʼox jam sat li Sauloe. Laje, lik xchan li mantaletik ta sventa li Jesuse xchiʼuk pas ta jchankʼop ek. Ta tsʼakale, laj yichʼ voʼ xchiʼuk koʼol lik xcholbeik skʼoplal Jesus ta snail tsobobbailetik xchiʼuk li yan yajtsʼaklomtak Kristoe. ¿Mi xnop avuʼun ti kʼu yelan chʼayal to kom yoʼontonik li judaetike? Jaʼ yuʼun, xi to la sjakʼbe sbaike: «¿Mi mu jaʼuk li vinik ti chilbajin toʼox li yajchankʼoptak Jesuse?».

Li Sauloe oxib jabil la xcholbe mantal krixchanoetik ta Damasko. Pe li judaetike solel spʼajojik tajek li Sauloe xchiʼuk laj xa ox xchap skʼopik ti tsmilike. Kʼalal laj yaʼiik li ermanoetik taje, la skoltaik sventa xjatav batel li Sauloe. Vaʼun, la stʼuyanik yalel ta jun moch ti bu jomol li ta muroe.

Kʼalal bat ta Jerusalen li Sauloe, bat skʼel li ermanoetike. Pe li ermanoetik taje solel chiʼik tajek ta stojolal. Vaʼun, oy jun yajchankʼop Jesus ti toj lek yoʼonton ti jaʼ Bernabe sbie, jaʼ laj yikʼ batel Saulo ta stojolal jtakboletik xchiʼuk laj yalanbe ti jelem xa li stalelale. Vaʼun, li Sauloe te kom li ta tsobobbail ta Jerusalene xchiʼuk ta sjunul yoʼonton la xcholbe skʼoplal li lekil aʼyejetik ta sventa Diose. Pe ta mas tsʼakale, la sjelbeik li sbie: Pablo xa laj yalbeik.