Pablo xchiʼuk Timoteo

Li ta tsobobbail ta Listrae oy jun kerem ti Timoteo sbie. Li smeʼe jaʼ juda ants, pe li stote jaʼ jgresia vinik. Li smeʼe jaʼ Eunise, li syayae jaʼ Loida, xchaʼvoʼalik la xchanubtasik ta smantal Jeova li Timoteoe.

Kʼalal bat svulaʼan ta xchibal velta Listra li Pabloe, laj yakʼ venta ti skʼanoj tajek ermanoetik li Timoteoe xchiʼuk ti oy tajek ta yoʼonton tskoltaane. Jaʼ yuʼun, li Pabloe laj yalbe Timoteo ti akʼo xbat chiʼinatuk ti bu chbat xchol mantale. Vaʼun, li Timoteoe lik chanubtasatuk yuʼun Pablo sventa xkʼot ta jun lekil jchanubtasvanej xchiʼuk ti xtojobuk lek ta xcholel li lekil aʼyeje.

Buyuk noʼox xbatik li Pablo xchiʼuk Timoteoe jaʼ beiltasatik yuʼun li chʼul espiritue. Pe oy jun akʼobale, oy kʼusi akʼbat yil li Pabloe, yuʼun laj yil jun vinik ti xi chale: «Laʼ ta Masedonia, laʼ koltaunkutik». Jaʼ yuʼun, li Pabloe bat xcholik mantal ta Masedonia, la xchiʼin batel Silas, Timoteo xchiʼuk Lukas. Vaʼun, la slikesik achʼ tsobobbailetik.

Li ta Tesalonikae, oy ep viniketik xchiʼuk antsetik ti kʼotik ta yajtsʼaklom Kristoe. Pe oy junantik judaetike lik itʼixajuk yoʼontonik ta stojolal li Pablo xchiʼuk li xchiʼiltak ta cholmantale. Jaʼ yuʼun, lik stsobik chopol krixchanoetik sventa xikʼik batel ta stojolal ajvaliletik li ermanoetike. Xi tsots kʼot avanikuk li judaetike: «¡Li viniketik liʼe jaʼik yajkontra li ajvalil ta Romae!». Oy tajek ta vokol xkuxlejalik li jtakbol Pablo xchiʼuk Timoteoe. Jaʼ yuʼun, jatavik batel ta akʼobaltik sventa xbatik li ta Bereae.

Li krixchanoetik ta Bereae oy tajek ta yoʼonton chaʼiik li lekil aʼyejetik yuʼun Jeovae, jaʼ yuʼun ep jgresiaetik xchiʼuk judaetik kʼotik ta yajtsʼaklom Kristo. Pe oy junantik judaetik ti likemik ta Tesalonikae, kʼotik ta Berea sventa saʼik kʼop. Jaʼ yuʼun, bat ta Atenas li Pabloe. Yan li Timoteo xchiʼuk Silase te komik ta Berea sventa stsatsubtasbeik yoʼonton li ermanoetike. Ta mas tsʼakale, li Pabloe la stak batel yan velta ta Tesalonika li Timoteo sventa skolta li ermanoetik ti yakal chichʼik kontrainele. Ta mas tsʼakale, li Pabloe la stak batel yan velta Timoteo li ta yantik tsobobbail sventa xbat svulaʼanan xchiʼuk spatbe yoʼontonike.

Xi albat yuʼun Pablo li Timoteoe: «Li buchʼutik tskʼan chichʼik ta mukʼ li Jeovae ta xichʼik kontrainel». Jaʼ yuʼun, li Timoteoe laj onoʼox yichʼ kontrainel xchiʼuk laj yichʼ tikʼel ta chukel ta skoj li xchʼunel yoʼontone. Akʼo mi jech, xmuyubaj noʼox, yuʼun jaʼ jech laj yakʼ ta ilel ti tukʼ chakʼ sba ta stojolal li Jeovae.

Li Pabloe xi laj yalbe batel li ermanoetik ta Filipose: «Ta jtakboxuk talel li Timoteoe. Jaʼ ta xchanubtasoxuk kʼuxi ta cholel mantal xchiʼuk ti kʼuxi xuʼ tukʼ chavakʼ abaike». Li Pabloe solel spatoj yoʼonton ta stojolal li Timoteoe. Vaʼun, ep jabiletik koʼol la xcholik mantal xchiʼuk lek laj yamigoin sbaik.