¿Kʼusi smakojbe skʼoplal li ichʼel ta mukʼe?

Kʼalal yichʼel ta mukʼ Dios xie, yichʼoj alel ti jaʼ «kʼalal oy kʼusi [...] jkʼanojtik xchiʼuk chkichʼtik ta mukʼe». Li ta jeltos kʼop yichʼoj tsʼibael li Vivliae, kʼalal «ichʼel ta mukʼ» xie jaʼ chakʼ ta aʼiel ti oy buchʼu chichʼ ich’el ta mukʼe o ti chkakʼ jbatik ta ventainel yuʼune (Mat. 28:9). Li jpʼel kʼop taje chichʼ tunesel kʼalal oy kʼusi chichʼ pasel sventa xichʼ ichʼel ta mukʼ Dios o yan kʼusitike (Juan 4:23, 24). Pe skʼan jkʼeltik butik yichʼoj tunesel sventa masuk xkaʼibetik smelolale.

Jaʼ noʼox sta-o ichʼel ta mukʼ li Jeovae, li Jpasvanej xchiʼuk Mukʼul Jpasmantal ta vinajelbalumile (Apok. 4:10, 11). Yakal chkichʼtik ta mukʼ Jeova kʼalal jchʼunojtik ti jaʼ noʼox stuk sta-o ch-ajvalilaje xchiʼuk mi chkichʼbetik ta mukʼ li sbie (Sal. 86:9; Mat. 6:9, 10). Li slivroal Esekiele ep ta velta chalbe skʼoplal li sbi Diose xchiʼuk ti jaʼ Mukʼul Jpasmantale. Jech xtok, te chvinaj te van 217 ta velta li jpʼelantik kʼop «Kajval Jeova ti jaʼ Mukʼul Jpasmantal» o «Ajvalil Jeova ti jaʼ Mukʼul Jpasmantal». Yan kʼalal xi chale: «Sventa xanaʼ ti voʼon Jeovaune» o yantik ti xkoʼolaje, chvinaj te van 55 ta velta (Esek 2:4; 6:7).

Pe maʼuk noʼox skʼan xkaltik ti kichʼojtik ta mukʼ li Diose, yuʼun skʼan oyuk yabtelal (Sant. 2:26). Kʼalal chkalbetik Jeova ti chkakʼbetik jkuxlejaltike, yakal chkalbetik ti ta jchʼunbetik smantal li ta jkuxlejaltike xchiʼuk ti chkichʼbetik ta mukʼ li sbie. Skʼan teuk ta joltik ti kʼalal la stakʼ sutel Jesus li yoxibal preva akʼbate, laj yal ti nitil skʼoplal li yichʼel ta mukʼ Dios xchiʼuk li ‹xchʼul abtele› (Mat. 4:10). Li yajtunelutik Jeovae oy tajek ta koʼontontik ti chijtun ta stojolale (Deut. 10:12).a Li xchʼul abtel Diose jaʼ kʼalal ta jpastik li kʼusitik nitil skʼoplal xchiʼuk li yichʼel ta mukʼe xchiʼuk ti persa oy kʼusi skʼan jpastik o ti chkiktatike. ¿Kʼusi skʼoplal taje?

Ep ta tos kʼu yelan xuʼ xijtun ta stojolal li Diose, yuʼun yakal ta jpastik chʼul abtel kʼalal ta jcholtik mantal, kʼalal chijbat ta tsobajeletik, kʼalal chkakʼ jloʼiltik, kʼalal ta jchabitik Salon o mi chijkoltavan ta svaʼanel jpʼejuk Salon sventa Tsobobbaile. Pe maʼuk noʼox, yuʼun jaʼ chʼul abtel xtok kʼalal ta jpastik li yichʼel ta mukʼ Jeova ta kutsʼ kalaltik, kʼalal ta jkoltatik li ermanoetik ti tsots laj yil svokolike, kʼalal chijkoltavan ta junuk asamblea o mi chijtun ta Betel (Ebr. 13:16; Sant. 1:27). Kʼalal jaʼ batem ta koʼontontik yichʼel ta mukʼ Diose, ta kʼakʼal akʼobal ta jpastik li ‹xchʼul abtele›. ¡Jaʼ mukʼta matanal chkiltik ti chijtun ta stojolal li Jeovae! (Apok. 7:15).