Chanbo stalelal li jesuse xchiʼuk jechuk xavichʼ ta mukʼ Dios ti kʼuyelan tskʼane

Li Diose ta slekil yoʼonton tstak ta ikʼel krixchanoetik ti «liquemic tal ta jujun banamil, ta jujuchop stsʼunubalic, ta jujun lum, xchiʼuc ta jujuchop cʼop» (Apo. 7:9, 10; 15:3, 4). Li buchʼutik chchʼunik li ikʼel taje chilik ti «cʼu yutsil stuc» li Jeovae (Sal. 27:4; 90:17). Jech kʼuchaʼal li jtsʼibajom yuʼun salmoe, tstoy yechʼomal yeik ta skʼupil kʼoptael, xi chalike: «Laʼ quichʼtic ta [mukʼ], laʼ jpatan jbatic ta stojol, laʼ jquejan jbatic ta stojol li Mucʼul Diose yuʼun jaʼ la spasutic», xiik (Sal. 95:6).

Li yichʼel ta mukʼ Jeova ti ep sbalil laj yile

Ti kʼotem ta jun noʼox xNichʼon Dios li Jesuse, laj yojtikinbe lek snopben li sTote, li beiltaseletik yuʼune xchiʼuk li smantaltake. Snaʼoj onoʼox ti kʼuyelan tskʼan ichʼel ta mukʼ li Diose. Jaʼ yuʼun xi laj yale: «Vuʼun li beune, vuʼun li melelune, vuʼun li cuxlejalune. Muʼyuc bochʼo xuʼ chbat ta stojol Jtot ti me mu xtal ta jtojole», xi (Juan 1:14; 14:6).

Toj lek tukʼ laj yakʼ ta ilel ti bikʼit chakʼ sba li Jesuse xchiʼuk ti chchʼunbe smantal Diose, yuʼun xi laj yal stuke: «Jaʼ noʼox ta jpas jech chac cʼu chaʼal xchanubtasojun li Jtot ti la stacun tale. [...] Jaʼ ta jpasbe scotol cʼacʼal li cʼusi lec chile», xi (Juan 8:28, 29). ¿Kʼusitik la spas sventa tslekubtasbe yoʼonton?

Ti kʼusi baʼyel la spas Jesuse jaʼ ti lek tsʼakal la spasbe yabtel li Diose, jaʼ yuʼun jaʼ jech skʼan spasik ek li buchʼutik chichʼik ta mukʼ ta melel li Jeovae. Ta skoj ti skʼanoj tajmek sTot li Jesuse, la xchʼunbe smantal xchiʼuk la spasbe li kʼusi tskʼan yoʼontone, akʼo mi xil svokol ta skoj (Fili. 2:7, 8). Toj tsots skʼoplal laj yil Jesús sventa yichʼobil ta mukʼ Dios li spasel ta jchʼunolajel li krixchanoetike. Toj echʼem xa noʼox la xchol mantal, yuʼun kʼalal to ta krixchanoetik ti muʼyuk yakʼoj xchʼunel yoʼontonik ta stojolale la sbiiltasik ta Jchanubtasvanej (Mat. 22:23, 24; Juan 3:2). Jech xtok, ta skoj ti oy ta yoʼonton tstsʼik svokole, jaʼ tijbat-o yoʼonton ti lekuk tsʼakal spasbe yabtel li Diose xchiʼuk ti skolta li krixchanoetike. Xmuyubaj la spas, akʼo mi muʼyuk xa mas xokol ta spasel li kʼusi tskʼan stuke (Mat. 14:13, 14; 20:28). Akʼo mi muʼyuk noʼox xokol, ta onoʼox xchʼakbe yorail sventa tskʼopon li sTot ta vinajele (Luc. 6:12). Jnaʼojtik ta melel ti ep sbalil laj yil Jeova ti ichʼat ta mukʼ yuʼun Jesuse.

Li yakʼel persa sventa jlekubtasbetik yoʼonton Diose

Li Jeovae yiloj onoʼox ti tukʼ stalelal li xNichʼone xchiʼuk laj yal ti skʼanoje (Mat. 17:5). Pe li Satanás eke yiloj ti tukʼ yakʼoj sba li Jesuse, jaʼ yuʼun laj yakʼ lek sat ta stojolal. ¿Kʼusi ti tskʼan Satanase? Ti vaʼ ora taje mu toʼox junuk krixchano tukʼ xchʼunojbe smantal li Diose xchiʼuk muʼyuk toʼox buchʼu yichʼoj ta mukʼ Dios ti kʼuyelan staʼoe. Jaʼ Jesús ti buchʼu baʼyel tspas yuʼune, pe li Diabloe tskʼan ox tsmak ta be (Apo. 4:11).

Sventa xchʼayes ta be Jesús li Satanase, oy kʼusi laj yal chakʼbe ti tstij oʼontonale. Vaʼun ikʼe echʼel «ta jun batsʼi toyol vits noxtoc li Jesuse. Te laj yacʼbe yil scotol svuʼelic li ajvaliletic liʼ ta banamile xchiʼuc li slequilal yutsilalique. Jech laj yalbe: —Scotol leʼe, voʼot chacacʼbot scotol me chaquejan aba ta jtojole, me chavichʼun ta muqʼue —xut. Jaʼ yuʼun li Jesuse jech laj yalbe: —Batan, Satanás. Yuʼun jech tsʼibabil ta scʼop Dios: “Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol”, xi tsʼibabil —xut» (Mat. 4:8-10). Li Jesuse snaʼoj onoʼox ti manchuk mi stabe sbalil yileluk ti tskejan sba ta stojolal Satanase, pe jaʼ yichʼel ta mukʼ yan kʼusitik. Yuʼun li stuke yakʼoj onoʼox lek ta yoʼonton ti jaʼ noʼox chichʼ ta mukʼ li Jeovae.

Li Satanás avi kʼakʼale, xuʼ maʼuk xa xi yakʼbutik li ajvaliletik liʼ ta balumil xchiʼuk li slekilalik sventa xkichʼtik-o ta mukʼe. Akʼo mi jech un, oy tajmek ta yoʼonton ta sjoypʼinel echʼel ta yan kʼusitik li ichʼel ta mukʼ chkakʼbetik Diose (2 Cor. 4:4).

Tukʼ-o yoʼonton cham maʼ Jesuse. La stoybe skʼoplal Jeova ti kʼuyelan jpʼel yoʼonton jelave ti muʼyuk  toʼox buchʼu jech pasem yuʼune. Li melel jchʼunolajeletik avi kʼakʼale chkakʼtik persa ta xchanbel stukʼil yoʼonton Jesús ta yakʼel ta toyol li ichʼel ta mukʼ chkakʼbetik li Jpasvaneje. Li kʼusi mas tsots skʼoplal ta skotol chkaʼitike jaʼ ti lekuk oyutik ta stojolal Diose.

Ta jtatik bendisionetik mi jech chkichʼtik ta mukʼ Dios kʼuchaʼal tskʼane

Ep me tsta bendision li jun krixchano mi «melel lec xchʼunoje, [mi] muʼyuc cʼusi chopol tspas ta stojol li Jtotic Diose» (Sant. 1:27). Jech kʼuchaʼal li ta balumil avie, «li cristianoetique jaʼ noʼox tspasic cʼusi tscʼan stuquic. Ta xbat yoʼntonic yuʼun taqʼuin. Tstoy sbaic. [...] Jaʼ tscontrainic o li cʼusitic leque» (2 Tim. 3:1-5). Akʼo mi jech, li ta sna Diose oy kuni motontik xchiʼinel krixchanoetik ti sak snopbenik xchiʼuk lek stalelalike, ti chakʼbeik yipal xchʼunbel li smantaltak yakʼoj Dios ta sventa ti kʼuxi ta ichʼel ta mukʼe. ¿Mi mu jaʼuk chakʼ xkuxetel koʼontontik taje?

Mi muʼyuk chkakʼ akʼo xikʼubtasutik li balumil liʼe, ta jtatik yan bendision: jaʼ ti lek noʼox oy li jnopbentike. Lek noʼox oy li jnopbentik mi ta jchʼunbetik li tukʼil beiltaseletik yuʼun Diose xchiʼuk mi ta jchʼunbetik li smantaltak ajvalil ti muʼyuk skontrainoj sba xchiʼuk li smantaltak Diose (Mar. 12:17; Hech. 5:27-29).

Pe maʼuk noʼox maʼ taje. Mi jaʼ te batem koʼontontik ta yichʼel ta mukʼ Dios ta sjunul jkuxlejaltik xchiʼuk ta spasbel li kʼusi tskʼan yoʼontone, ti maʼuk li kʼusi ta jkʼantike, mas me oy sbalil li jkuxlejaltike xchiʼuk xkuxet noʼox koʼontontik. Maʼuk xi chkaltike: «Laʼ xa noʼox veʼcutic, cuchʼtic lec voʼ, yuʼun ocʼom chaʼej xuʼ chijchamutic» xi jchi, moʼoj, yuʼun jpatoj lek koʼontontik ti xuʼ xi jkuxi sbatel osil ta nichimaltik liʼ ta Balumile (1 Cor. 15:32).

Li slivroal Apocalipsise chal ti ta mas tsʼakale, li buchʼutik la sak laj yakʼ sbaik ta stojolal Jeovae «jaʼic [la] ti buchʼutic cuch yuʼun[ik] ti tsots svocolique». Xi to chale: «Chabibilic yuʼun ti Buchʼu chotol ta mucʼ ta chotlebale», xi (Apo. 7:13-15, Ch). Li buchʼu chotol ta mukʼta chotlebale jaʼ li Jeova Diose, ti jaʼ noʼox stuk mukʼ ta sjunul vinajel-balumile. Nopo avaʼi li muyubajel ta xkaʼitik kʼalal mi la xchʼamutik ta sna li Jeovae xchiʼuk ti chchabiutik ta skotol kʼusitik xibal sbae. Li avi kʼakʼale xuʼ xa onoʼox jkʼupintik jutuk li kʼuxubinel xchiʼuk li chabiel yuʼune.

Li Apocalipsise ta xal xtok ti buchʼutik laj la yichʼik ta mukʼ Dios jech kʼuchaʼal tskʼane «jaʼ ch-icʼatic batel ta nioʼ sventa cuxlejal». Li nioʼ taje jaʼ skotol li kʼusi chakʼbutik Jeova ti chtun kuʼuntik sventa jtatik-o li kuxlejal sbatel osile. Koliyal li pojelal laj yakʼbutik Jesuse, li krixchanoetike «tscusbat yaʼlel satic yuʼun li Diose» (Apo. 7:17). Tspasik ta tukʼil krixchanoetik, ti jaʼ ch-ayan-o mukʼta muyubajel yuʼunik li buchʼutik chkuxiik sbatel osil liʼ ta Balumile. Manchuk mi jech, li avie xuʼ me xmuyubajik xchiʼuk stojik ta vokol li yajtuneltak Diose, ti xmuyubaj tstoy yechʼomal yeik ta yichʼel ta mukʼ Jeova xchiʼuk li buchʼutik te oyik ta vinajel ti xi chkʼejinike: «Cajvaltic Dios, voʼot ti toj echʼem avuʼele, toj tsotsic, toj labalic sba li avabtele. Puru melel, puru tucʼ scotol cʼusi chapas, voʼot ajvalilot yuʼun scotol cristianoetic ta jujun banamil. Cajval, muʼyuc bochʼo ti mu xiʼ ta atojole; muʼyuc bochʼo ti mu xal alequilale. Yuʼun voʼot noʼox atuc Chʼul Diosot. Scotol cristianoetic ta jujun banamil chtal squejan sbaic ta atojol, yuʼun ivinaj xa ti ta melel tucʼ chachapanvane», xiik (Apo. 15:3, 4).

[Lokʼol ta pajina 27]

¿Kʼusi chakʼbutik Satanás mi jaʼ xa chkichʼtik ta mukʼe?