Chol mantal ta chʼivit
KʼALAL jaʼo te oy ta Atenas li jtakbol Pabloe, skotol kʼakʼal chkʼot ta chʼivit ta xcholel li lekil aʼyej ta sventa Jesuse (Hech. 17:17). Te chkʼot xchol mantal ta skoj ti noj ta krixchanoetike.
Jutuk mu chaʼmiluk jabil ta tsʼakale, li steklumal Jeovae yakal chcholik-o echʼel li aʼyej sventa Ajvalilal yuʼun Dios ti bu chichʼ tael ep krixchanoetike. Jech kʼuchaʼal liʼe, oy yajRextikotak Jeovae chbatik ta chʼivit o ta mukʼta pʼolmajebaletik. Mi akʼbatik xaʼox permiso yuʼun li buchʼu sbainoj li mukʼta pʼolmajebale, ta xlik smeltsanbeik yuni kajleb li vunetik ti lokʼemik sloʼilal ta Vivliae.
Ta jun mukʼta pʼolmajebal ta Nueva Jersey (Estados Unidos) toj kʼupil sba ti kʼuyelan la slatsik ep vunetik ti bu chalbe smelolal «Kʼuxi xuʼ lekuk-o stalelalik li utsʼ-alaliletike». ¿Kʼusi kʼot ta pasel? Ta jun noʼox kʼakʼale laj yichʼ akʼel 153 livro ta vakchop kʼopetik.
Nopaj echʼel jun ants ti bu latsal li vunetike, vaʼun la stsʼetanbe lek xchikinal li kʼusi la xchapbe smelolal jun ermanae. Li ants taje laj yakʼ venta ti toj tsots skʼoplal ti jtsaktik ta venta Dios ta jkuxlejaltik ta jujuntal xchiʼuk li ta kutsʼ kalaltike, vaʼun laj yichʼ echʼel li vunetik liʼe: Jchanbetik li Mukʼta Jchanubtasvaneje, El secreto de la felicidad familiar xchiʼuk Lo que los jóvenes preguntan. Respuestas prácticas.
Kʼalal mu toʼox jaluk yechʼel oʼlol kʼakʼale, oy jun vinik ti chbat ta tienda ti bu nopol latsbil livroetike, vaʼun te vaʼi ta skʼelel li livro Los jóvenes preguntan. Li ermanae laj yakʼ venta ti oy kʼusi labal chil li vinike, vaʼun xi la sjakʼbee: «¿Mi lek chavil jlikuk li livroetik liʼe?», xut. Li vinike laj yal ti lek chile, jaʼ laj yakʼ ta ilel li livro Los jóvenes preguntan. Vaʼun laj yakʼbe jlik. Li vinike laj yal ti oy oxvoʼ xnichʼnabe —chaʼvoʼ chex jchʼieletik— xchiʼuk laj yal noxtok ti chchiʼin ta loʼil jun velta ta xemanae. Kʼalal yakal tskʼelilan li livroe, laj yal ti xuʼ la xtun yuʼun bakʼintik kʼalal jaʼo chloʼilaj xchiʼuk li yutsʼ yalale. Jech xtok, li ermanae laj yakʼbe yil li livro El secreto de la felicidad familiar sbie, jamal laj yalbe ti xuʼ te tsta tojobtaseletik xchiʼuk yajnil ti toj jtunelik sventa snaʼik lek li kʼusi tsnop tspas ta yutsʼ yalalike. La stoj ta vokol li kʼusi laj yichʼ albel li vinik taje, laj yakʼ jutuk matanal takʼin xchiʼuk lek laj yaʼi ti chichʼ vulaʼanel ta snae.
¿Kʼu yelan laj yaʼi sbaik li yajrextikotak Jeova kʼalal nel yuʼunik li jun kʼakʼal chol mantal ta mukʼta pʼolmajebale? «La jkʼupin tajmek ti jech la jcholkutik mantale —xi jun ermana—. ¡Toj alakʼ sba kʼusi kʼot ta pasel!» Xi laj yal yan ermana xtoke: «Li Jeovae yaloj ta melel ti chichʼ onoʼox cholel ta spʼejel Balumil li lekil aʼyeje. Li avi ta Paramus (Nueva Jersey), kʼotem xa ta yoʼontonik lekil aʼyej li krixchanoetik ti jelajtik skʼopike. Toj alakʼ sba ti jech la jcholkutik mantale. Xmuyubajik noʼox ti buchʼutik jech abtejike. Muʼyuk buchʼu skʼan xkechan kʼalal mal xaʼox kʼakʼale», xi.
Ti kʼuyelan mas ta jcholtik mantale jaʼ ti chi jbat ta naetike (Hech. 20:20). Akʼo mi jech, oy me yan kʼutik yelan xuʼ jcholtik li lekil aʼyeje. ¿Mi cha pas avaʼi preva jtosuk? Yikʼaluk van xuʼ xa chol mantal ta chʼivit ek o ta mukʼta pʼolmajebal.