XCHANOBIL 46
Akʼbo akuxlejal Dios xchiʼuk ich’o voʼ
K’alal oy buchʼu chak’be xkuxlejal li Jeovae, chalbe ta jun orasion ti jaʼ noʼox stuk chichʼ ta mukʼe xchiʼuk ti jaʼ mas tsots skʼoplal chil ta xkuxlejal ti xchʼunbe smantale (Salmo 40:8). Kʼalal chichʼ voʼ une, chakʼbe yil yantik ti yakʼojbe xa xkuxlejal li Diose. Li kʼusi mas tsots skʼoplal skʼan jnoptike jaʼ mi chkakʼbe jkuxlejaltik li Jeovae. ¿Kʼu yuʼun? Yuʼun tsjel ta jyalel li jkuxlejaltike. ¿Kʼusi xuʼ stij avoʼonton sventa jechuk xapase?
1. ¿Kʼusi tstij koʼontontik sventa xkakʼbe jkuxlejaltik li Jeovae?
Mi jkʼanojtik li Jeovae, jaʼ tstij koʼontontik sventa xkakʼbe jkuxlejaltik (1 Juan 4:10, 19). Xi chalbutik li Vivliae: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal, ta sjunul anopben xchiʼuk ta sjunul avipal» (Markos 12:30). Chvinaj ta jkʼopojeltik xchiʼuk ta kʼusitik ta jpastik mi jkʼanojtik li Jeovae. Kʼalal skʼanoj sbaik ta melel li jun kerem xchiʼuk jun tsebe, chikʼ sbaik. Kʼalal jkʼanojtik ta melel li Jeova eke, chkakʼbe jkuxlejaltik xchiʼuk chkichʼtik voʼ.
2. ¿Kʼusi chakʼbe skʼupin Jeova li stestigotak ti yichʼojik xa voʼe?
Mi laj avichʼ voʼe, chakʼot ta yutsʼ yalal Jeova ti xmuyubajik noʼoxe. Vaʼun, ep ta tos kʼu yelan chavakʼ venta ti skʼanojot li Diose xchiʼuk nopol tajek chavaʼi aba ta stojolal (kʼelo Malakias 3:16-18). Maʼuk noʼox chkʼot ta Atot li Jeovae, yuʼun chata avutsʼ avalal ta spʼejel balumil ti skʼanojik li Diose xchiʼuk ti skʼanojoxuk eke (kʼelo Markos 10:29, 30). Pe sventa xavichʼ voʼe, oy kʼusitik baʼyel skʼan xapas. Skʼan xavojtikin li Jeovae, ti xakʼane, ti xavakʼ ta ilel ti oy xchʼunel avoʼonton ta stojolal li Xnichʼone xchiʼuk ti jamal xavalbe Jeova ti chavakʼbe akuxlejale. Mi la apas skotol taje xchiʼuk mi laj avichʼ voʼe, xuʼ xakʼupin akuxlejal ta sbatel osil. Xi chal li Skʼop Diose: «Li ichʼvoʼ ti jaʼ yakal chakolik-o [avie]» (1 Pedro 3:21).
JCHANTIK TO BATEL MAS
Jkʼeltik avil kʼu yuʼun tsots skʼoplal ti xavakʼbe akuxlejal li Jeovae xchiʼuk ti xavichʼ voʼe.
3. Skʼan jnoptik buchʼu chijtun ta stojolal
Li ta voʼneal Israele, junantik krixchanoetike la snopik ti xuʼ xichʼik ta mukʼ Jeova xchiʼuk ti xichʼik ta mukʼ li jecheʼ dios Baale. Pe muʼyuk lek li kʼusi la spasike. Jaʼ yuʼun, li Jeovae la stak batel Elias ti jaʼ sprofeta o yaj˗alkʼop sventa stukʼibtasan. Kʼelik 1 Reyes 18:21 xchiʼuk albeik skʼoplal li sjakʼobil liʼe:
¿Kʼusi skʼan stʼujik li j˗israeletike?
Li voʼotik eke skʼan jtʼujtik buchʼu chijtun ta stojolal jech kʼuchaʼal la spasik li j˗israeletike. Kʼelik Lukas 16:13 xchiʼuk albeik skʼoplal li sjakʼobiltak liʼe:
¿Kʼu yuʼun mu stakʼ xkichʼtik ta mukʼ Jeova xchiʼuk ti xkichʼtik ta mukʼ xtok junuk krixchano o yan kʼusie?
¿Kʼuxi xuʼ xkakʼbetik yil Jeova ti jaʼ ta jkʼan chkichʼtik ta mukʼe?
4. Nopo kʼu to yepal skʼanojot li Jeovae
Li Jeovae ep kʼusi yakʼojbutik ti ep sbalile. ¿Kʼusi xuʼ xkakʼbetik li voʼotik une? Kʼelik li VIDEOE.
¿Kʼuxitik yakʼojbot ta ilel Jeova ti skʼanojote? Kʼelik Salmo 104:14, 15 xchiʼuk 1 Juan 4:9, 10 xchiʼuk albeik skʼoplal li sjakʼobiltak liʼe:
Ta skotol li kʼusitik yakʼojbot Jeovae, ¿bu junukal ti mas chatojbe ta vokole?
¿Kʼu yelan chavaʼi aba kʼalal chanopbe skʼoplal li kʼusitik yakʼojbot Jeovae?
Kʼalal oy buchʼu oy kʼusi tskʼelanbutik ti ta jkʼupintik tajeke, ta jkʼan chkakʼbetik yil ti ta jtojbetik ta vokole. Kʼelik Deuteronomio 16:17 xchiʼuk albeik skʼoplal li sjakʼobil liʼe:
Kʼalal chachotan aba ta snopbel skʼoplal li kʼusitik yakʼojbot Jeovae, ¿kʼusi chlokʼ ta avoʼonton yakʼbel ek?
5. Ep kʼusi chakʼupin mi laj avakʼbe akuxlejal Diose
Epal krixchanoetike tsnopik ti jaʼ ch˗akʼbat˗o smuyubajelik mi ojtikinbilik leke, mi chchanunajik sventa sta lek yabtelike o mi ep stakʼinike. Pe ¿mi jech van ta melel? Kʼelik li VIDEOE xchiʼuk albeik skʼoplal li sjakʼobiltak liʼe:
Akʼo mi tskʼupin tajek futbol li kereme, ¿kʼu yuʼun laj yikta komel li tajimole?
¿Mi lek xanaʼ ti jaʼ laj yakʼbe xkuxlejal Jeova ti maʼuk laj yakʼ ta yoʼonton li futbole? ¿Kʼu yuʼun ti jech chavale?
Li jtakbol Pabloe oy toʼox kʼusi yakʼoj ta yoʼonton stael kʼalal maʼuk toʼox yajtsʼaklom Kristoe. La xchanbe skʼoplal li smantaltak judaetike, jaʼ chanubtasat yuʼun jun jchanubtasvanej ti lek ojtikinbile. Pe laj yikta komel skotol kʼalal och ta yajtsʼaklom Kristoe. ¿Mi la xchaʼnaʼ li kʼusi laj yiktae? Kʼelik Filipenses 3:8 xchiʼuk albeik skʼoplal li sjakʼobiltak liʼe:
¿Kʼu yuʼun laj yal Pablo ti xkoʼolaj ta «jtsop kʼaʼep» li kʼusitik la spas kʼalal maʼuk toʼox yajtsʼaklom Kristoe?
¿Kʼusitik sbalil la stabe ta skoj li kʼusitik laj yikta komele?
¿Mi jaʼ van lek ti xatun ta stojolal Jeovae o mi jaʼ ti xapas li kʼusi chakʼan atuke? ¿Kʼu yuʼun ti jech chavale?
Kʼalal pas ta yajtsʼaklom Kristo li Pabloe, mas to ep kʼusi la sta, jaʼ jutuk li kʼusi laj yiktae.
JUNANTIKE XI CHALIKE: «Jnaʼoj ti jaʼ li melel relijione, pe muʼyuk jnopoj chkakʼbe jkuxlejal li Diose, lek noʼox ti kʼu yelan oyune».
¿Mi oy sbalil xanaʼ ti xavakʼbe akuxlejal li Jeovae? ¿Kʼu yuʼun ti jech chavale?
¿KʼUSI LA ACHAN?
Mi jkʼanojtik li Jeovae, jaʼ tstij koʼontontik sventa xkakʼbe jkuxlejaltik xchiʼuk ti xkichʼtik voʼe.
Svulesobil ta joltik
¿Kʼu yuʼun sta˗o ti jkʼantik ta sjunul koʼontontik li Jeovae xchiʼuk ti xkichʼtik ta mukʼe?
¿Kʼusi chakʼbe skʼupin Jeova li stestigotak ti yichʼojik xa voʼe?
¿Mi oy ta avoʼonton chavakʼbe akuxlejal li Jeovae?
XUʼ TO XAKʼEL LIʼE
Kʼelavil kʼu yuʼun laj yakʼbe xkuxlejalik Jeova jun jkʼejimol xchiʼuk jun jtajimol.
Kʼelavil yan srasonaltak sventa xavakʼbe akuxlejal li Jeovae.
Sventa xavil ti xmuyubajik noʼox li buchʼutik chakʼ xkuxlejalik ta stojolal Jeovae, kʼelavil li video ti oy smusikaile.
¿Kʼusi tijbat˗o yoʼonton jun ants sventa snop li kʼusi mas tsots skʼoplale? Kʼelbo avil li sloʼil xkuxlejale, «Epal jabil la jakʼbe jba kʼu yuʼun la spasutik li Diose».
«Jelbat˗o xkuxlejalik yuʼun li Vivliae» (Li Jkʼel-osil ta toyole, xchanobil)