¿Mi oy ta avoʼonton chavakʼbe akuxlejal li Jeovae?

1, 2. ¿Kʼusi baʼyuk skʼan xapas sventa xavichʼ voʼe?

LEʼ XA talel ta voʼob jabile, mas ta jun miyon krixchanoetik laj yichʼik voʼ sventa xkʼotik ta stestigo Jeova. Ep buchʼutik ti ta sbikʼtalik noʼox ochik ta mantal jech kʼuchaʼal la spas li Timoteoe (2 Tim. 3:​14, 15). Yantik xtoke, mukʼtik xa ox kʼalal laj yojtikinik mantale o mol meʼelik xa ox. Achʼtik toe, oy jun ants ti la xchan Vivlia xchiʼuk li stestigotak Jeovae, laj yichʼ voʼ kʼalal 97 xa ox sjabilale.

² ¿Mi yakal chavichʼ aestudio? ¿Mi jaʼik stestigotak Jeova li atot ameʼe xchiʼuk mi jaʼ chchanubtasikot ta mantal? Mi jeche, anopoj xa van chavichʼ voʼ. ¡Lek tajek ti jech chanope! Pe yoʼ to mu xavichʼ voʼe, skʼan baʼyel xavakʼbe akuxlejal li Jeovae. Li ta xchanobil liʼe, chchapbe smelolal kʼusi skʼan xal ti chavakʼbe akuxlejal li Jeovae. Jech xtok, te chal ti kʼu yuʼun muʼyuk srasonal chaxiʼ sventa xavakʼbe akuxlejal li Jeova xchiʼuk ti xavichʼ voʼe.

¿KʼUSI SMAKOJ TI CHKAKʼBE JKUXLEJALTIK LI JEOVAE?

3. Albo skʼoplal junantik krixchanoetik ti te chalbe skʼoplal ta Vivlia ti laj yakʼbe xkuxlejalik li Diose.

³ Li ta Vivliae, chal ti kʼalal oy buchʼu chakʼ sba ta stojolal Diose vokʼbil xa chkom sventa spasbe xchʼul abtel, jaʼ xkaltik, ti chtun ta stojolal Diose. Li jteklum Israele yakʼoj sbaik ta stojolal Jeova, pe oy junantik j-israeletik ti stuk xa noʼox jech ti kʼu yelan chtunike. Jech kʼuchaʼal li Aarone, li Jeovae la stʼuj sventa xkʼot ta mero bankilal pale. Jech oxal, li ta yeloval xchuk sjole te oy jun lamina ta oro ti jaʼ «xchʼul senyail ti akʼbil xa ta stojolal Dios li Aarone» (Lev. 8:9). Li jnasareoetik eke stuk xa noʼox jech ti kʼu yelan yakʼoj sbaik ta stojolal Jeovae, yuʼun li jpʼel kʼop nasareo xi ta ebreo kʼope jaʼ nazír ti jaʼ skʼan xal «akʼbil» o «vokʼbil». Li ta Smantal Moisese, te chal li kʼusitik skʼan spasike (Num. 6:​2-8).

4. 1) ¿Kʼusi smakoj ti chkakʼbe jkuxlejaltik li Jeovae? 2) ¿Kʼusi smakoj ti ta jip ta koʼontontik li jkuxlejaltike? (Kʼelo xtok li lokʼole).

⁴ Kʼalal chkakʼbe jkuxlejaltik li Jeovae, jaʼ skʼan xal ti oy ta koʼontontik xijkʼot ta yajtsʼaklom Jesuse xchiʼuk ti jaʼuk baʼyel xkakʼ ta jkuxlejaltik li kʼusi tskʼan yoʼonton Diose. ¿Kʼusi smakoj taje? Xi laj yal li Jesuse: «Mi oy buchʼu tskʼan chtal ta jtojolale, akʼo sjip ta yoʼonton xkuxlejal» (Mat. 16:24). Kʼalal chichʼ jelubtasel ta griego kʼop ti «akʼo sjip ta yoʼonton xkuxlejal» xie, xuʼ xichʼ jelubtasel xtok kʼuchaʼal ti «mu xa spas li kʼusi lek chaʼi stuke». Kʼalal chavakʼbe akuxlejal li Jeovae, skʼan xapʼaj skotol li kʼusitik chopol chile (2 Kor. 5:​14, 15). Taje te me smakoj ti jpʼajtik «li yabtel jbekʼtaltike» jech kʼuchaʼal li mulivajele (Gal. 5:​19-21; 1 Kor. 6:18). ¿Mi toj tsots van ta pasel taje? Mi akʼanoj Jeova xchiʼuk mi jpʼel ta avoʼonton ti lek skotol li smantaltake, muʼyuk me tsots chavaʼi ta spasel (Sal. 119:97; Is. 48:​17, 18). Xi chal jun ermano ti Nikolas sbie: «Li smantaltak Jeovae xuʼ jech xavil kʼuchaʼal jun chukinab ti mu xakʼ apas li kʼusi chakʼane o xuʼ jech chavil kʼuchaʼal sjaulail solojiko ti chchabiot sventa mu stiʼot li leonetike».

5. 1) ¿Kʼu yelan ti chavakʼbe akuxlejal li Jeovae? 2) ¿Kʼusi sjelbenal ti chavakʼbe akuxlejal Dios xchiʼuk ti chavichʼ voʼe? (Kʼelo xtok li lokʼoletike).

⁵ Ti kʼu yelan chavakʼbe akuxlejal li Jeovae, jaʼo kʼalal chapas jun orasion ti bu chavalbe ti jaʼ noʼox chavichʼ ta mukʼe xchiʼuk ti mas tsots skʼoplal chavil ta akuxlejal spasel li kʼusi tskʼan yoʼontone, jaʼ xkaltik, ti chavalbe ta jamal ti jech-o chakʼan ta sjunul avoʼonton, ta sjunul akuxlejal, ta sjunul anopben xchiʼuk ta sjunul avipal (Mar. 12:30). Ti chavakʼbe akuxlejale, jaʼ noʼox voʼot anaʼoj xchiʼuk li Jeovae. Pe kʼalal chavichʼ voʼe, ta xil epal krixchanoetik. Vaʼun, jaʼ jech tsnaʼik ti avakʼojbe xa akuxlejal li Jeovae. Ti chavakʼbe akuxlejal li Diose, maʼuk me jun tajimol. Jaʼ yuʼun, ta van xavakʼ persa ti xkʼot ta pasel li kʼusi laj avalbee. Li Jeova eke oy ta yoʼonton ti jech xapase (Ekl. 5:​4, 5).

¿KʼUSI TSTIJ AVOʼONTON SVENTA XAVAKʼBE AKUXLEJAL LI JEOVAE?

6. ¿Kʼusi tstij avoʼonton sventa xavakʼbe akuxlejal li Jeovae?

⁶ Li kʼusi skʼan stij avoʼonton sventa xavakʼbe akuxlejal li Jeovae jaʼ ti akʼanojuke. Li kʼanelal taje, maʼuk noʼox junchib kʼakʼal ti jech chavaʼie, yuʼun kʼalal mas to laj avojtikin li Jeovae xchiʼuk ti laj avaʼibe smelolal li kʼusi oy ta yoʼonton tspase, mas to la akʼan (Kol. 1:9). Kʼalal lik achan li Vivliae, mas to jpʼel ta avoʼonton 1) ti xuʼ xavamigoin li Jeovae, 2) ti la stunes xchʼul espiritu sventa xakʼ ta tsʼibael li Vivliae xchiʼuk 3) ti oy jun s-organisasion sventa xkʼot ta pasel li kʼusi oy ta yoʼontone.

7. Li buchʼu tskʼan chakʼbe xkuxlejal Jeovae, ¿kʼusi baʼyel skʼan spas?

⁷ Mi oy buchʼu tskʼan chakʼbe xkuxlejal li Jeovae, skʼan xojtikin baʼyel li kʼusitik tsots skʼoplal chakʼ ta chanel li Vivliae, ti yakaluk xa chchʼunbe smantal li Diose xchiʼuk ti yakaluk xa chalbe yantik li kʼusitik xchʼunoj ti bu kʼalal spas yuʼune (Mat. 28:​19, 20). Jech xtok, ti skʼanojuk tajek Jeova xchiʼuk ti oyuk ta yoʼonton jaʼ noʼox xichʼ ta mukʼe. ¿Mi jaʼ xa jech yakal chapas taje? Mi akʼanoj tajek li Jeovae, mu jaʼuk noʼox me chavakʼbe akuxlejal xchiʼuk chavichʼ voʼ sventa lekuk xilot li buchʼu chchanubtasot ta Vivliae. Mi kerem tsebote, mu jaʼuk noʼox jech xapas ta skoj atot ameʼ o ta skoj ti chichʼ xa voʼ li avamigotake.

8. ¿Kʼuxi snitojbe sba skʼoplal ti jnaʼtik stojel ta vokol xchiʼuk ti chkakʼbe jkuxlejaltik li Diose? (Salmo 116:​12-14).

⁸ Mi chanopbe skʼoplal skotol li kʼusitik spasoj ta atojolal li Jeovae, chlokʼ ta avoʼonton stojbel ta vokol xchiʼuk ch-ayan ta avoʼonton ti xavakʼbe akuxlejale (kʼelo Salmo 116:​12-14). Li Vivliae chal ti «skotol li lekil matanal xchiʼuk li tukʼil matanale» te likem talel ta stojolal Jeova (Sant. 1:17). Li matanal mas tsots skʼoplal yakʼojbutik li Diose, jaʼ ti laj yakʼ ta milbil matanal li Xnichʼone. Koliyal li matanal taje, xuʼ xavamigoin abaik xchiʼuk li Diose xchiʼuk ti xakuxi ta sbatel osile (1 Juan 4:​9, 10, 19). Ti kʼu yelan xuʼ xatojbe ta vokol Dios skotol li kʼusi spasoj ta atojolale xchiʼuk ti skʼanojote, jaʼ ti xavakʼbe akuxlejale (Deut. 16:17; 2 Kor. 5:15). Taje jaʼ jech chalbe skʼoplal li livro Kʼupino akuxlejal ta xchanobil 46, punto 4 xchiʼuk li video ti chjalij oxib minuto ti xi sbie: ¿Kʼusitik matanal xuʼ xkakʼbetik li Jeovae?

¿MI CHAPALOT XA SVENTA XAVAKʼBE AKUXLEJAL LI DIOSE XCHIʼUK TI XAVICHʼ VOʼE?

9. ¿Kʼu yuʼun skʼan mu sujbiluk xavaʼi aba sventa xavakʼbe xkuxlejal li Jeovae?

⁹ Xuʼ van muʼyuk to chapalot chavaʼi aba sventa xavakʼbe akuxlejal Jeova xchiʼuk ti xavichʼ voʼe. Xuʼ van oy to kʼusi skʼan xajel ta akuxlejal sventa xachʼunbe smantal Jeova o skʼan to mas stsatsub li xchʼunel avoʼonton chavaʼie (Kol. 2:​6, 7). Teuk ta ajol ti mu koʼoluk chchʼiik ta mantal li buchʼutik chichʼik estudioe xchiʼuk ti mu skotoluk kerem tsebetik koʼol chchʼiik ta mantal akʼo mi koʼol li sjabilalike. Jaʼ yuʼun, kʼelo lek ti kʼu yelan li akuxlejale xchiʼuk li kʼusi spas avuʼune, mu xakoʼoltas aba xchiʼuk li yantike (Gal. 6:​4, 5).

10. ¿Kʼusi xuʼ xapas mi muʼyuk chapalot chavaʼi aba sventa xavakʼbe akuxlejal Jeova xchiʼuk ti xavichʼ voʼe? (Kʼelo xtok li rekuadro «¿Mi jaʼ stestigo Jeova li atot ameʼe?»).

¹⁰ Mi chavakʼ venta ti muʼyuk to chapalot sventa xavakʼbe akuxlejal li Jeovae, mu me xachibaj, jech-o xavakʼ persa. Albo Jeova ti akʼo skoltaot sventa masuk to xlekub li akuxlejale (Filip. 2:13; 3:16). Teuk ta ajol ti ta xchikinta li aorasione xchiʼuk ti tstakʼbote (1 Juan 5:14).

TI KʼUSI TSPAJESATIK-O JUNANTIKE

11. ¿Kʼuxi tskoltautik Jeova sventa tukʼuk xkakʼ jbatike?

¹¹ Junantike chapalik xa sventa xakʼ xkuxlejalik ta stojolal Jeova xchiʼuk xichʼik voʼ, pe muʼyuk tspasik. Xuʼ van chiʼik ti spas tsots smulike, vaʼun ti xichʼik lokʼesel li ta tsobobbaile. Pe li Vivliae chal ti Jeovae tskolta yajtuneltak sventa oyuk lek smelolik xchiʼuk ti lekuk tajek xil sbaike (Kol. 1:10). Jaʼ yuʼun, teuk me ta ajol ti chakʼ avipal Jeova sventa jaʼuk xapas li kʼusitik leke, yuʼun ep xa buchʼu jech skoltaoj (1 Kor. 10:13). Ta skoj ti chkoltavan li Jeovae, jutuk tajek li buchʼutik chlokʼ ta tsobobbaile. Koliyal ti tskoltautik li Jeovae, xuʼ tukʼ xkakʼ jbatik ta stojolal.

12. ¿Kʼusi tskoltautik sventa mu jpastik tsatsal mulil?

¹² Ta skoj ti jpas mulilutike, oy onoʼox kʼusi chopol oy ta koʼontontik (Sant. 1:14). Pe kʼalal chavichʼ akʼel ta prevae, voʼot oy ta aba li kʼusi chkʼot ta nopel avuʼune. Junantike chalik ti vokol la chaʼiik ti spajtsan sbaike. Pe taje mu meleluk, yuʼun xuʼ jchantik spajesel jbatik. Oy jaytos ti kʼusi xuʼ skoltautike: ti jkʼopontik jujun kʼakʼal li Jeovae, ti oyuk lek jprogramatik sventa jchan jvuntik xchiʼuk Jvivliatike, ti xijbat ta tsobajeletike xchiʼuk ti jcholtik mantale. Mi jech ta jpasilantik skotol taje, oy me kipaltik sventa xkʼot ta pasel kuʼuntik li kʼusi kalojbetik Jeovae. Teuk ta joltik ti mu jtukuk oyutike, yuʼun tskoltautik li Jeovae (Gal. 5:16).

13. ¿Kʼusi chakʼ jchantik li Josee?

¹³ Mas me kʼun chkaʼitik ti tukʼ xkakʼ jbatik ta stojolal Jeova mi baʼyel xa onoʼox jnopojtik kʼusi ta jpastik mi laj kichʼtik akʼel ta prevae. Li ta Vivliae, te ta jtabetik skʼoplal krixchanoetik ti tukʼ laj yakʼ sbaik akʼo mi jpas muliletik kʼuchaʼal li voʼotike. Jun ti buchʼu chkalbetik skʼoplale, jaʼ li Josee. Yuʼun ta kʼakʼal akʼobal ch-albat yuʼun yajnil Potifar ti akʼo xchiʼin ta vayele. Pe li stuke snaʼoj xa onoʼox li kʼusi tstakʼbee. Li Vivliae chal ti muʼyuk la xchʼune xchiʼuk xi laj yalbee: «¿Kʼuxi xa noʼox ti ta jpas li tsatsal mulile xchiʼuk ti jsaʼ jmul ta melel ta stojolal li Diose?» (Jen. 39:​8-10). Jamal xvinaj ti snaʼoj xa onoʼox Jose li kʼusi tspase akʼo mi muʼyuk toʼox akʼbil ta preva yuʼun li yajnil Potifare. Jaʼ yuʼun, kʼalal akʼat ta prevae, muʼyuk xmulivaj.

14. ¿Kʼuxi xuʼ jchantik spʼajel skotol li kʼusi tspʼaj Jeovae?

¹⁴ ¿Kʼuxi xuʼ jchanbetik Jose xchiʼuk ti tukʼuk xkakʼ jbatik eke? Jaʼ ti jnopbetik xa onoʼox skʼoplal kʼusi ta jpastik mi laj kichʼtik akʼel ta prevae. Skʼan jpʼajtik ta anil li kʼusi tspʼaj Jeovae, mu teuk xijnaʼet (Sal. 97:10; 119:165). Taje jaʼ tskoltautik sventa mu jpas tsots jmultik. Kʼalal mi laj kichʼtik akʼel ta prevae, jnaʼojtik xa me kʼusi ta jpastik.

15. ¿Kʼuxi xuʼ xavakʼ ta ilel ti ta sjunul avoʼonton chasaʼ li Jeovae? (Ebreos 11:6).

¹⁵ Xuʼ van laj xa avakʼ venta ti laj xa ata li kʼusi melele xchiʼuk ti chakʼan chatun mas ta stojolal Jeova ta sjunul avoʼontone. Pe ¿mi oy kʼusi tspajtsanot sventa mu xavakʼbe akuxlejal Jeova xchiʼuk ti xavichʼ voʼe? Xuʼ jech xapas kʼuchaʼal li ajvalil Davide xchiʼuk xi xakʼanbe vokol li Jeovae: «Dios kuʼun, chajun lek ta kʼelel xchiʼuk naʼo lek li kʼusi oy ta koʼontone. Kʼelun lek avil xchiʼuk naʼo lek li kʼusitik ta jvul-o koʼontone. Kʼelo mi oy kʼusi yakalun spasel ti xuʼ xakʼbun jvokole, jech xtok, beiltasun batel li ta be ti te oy-o sbatel osile» (Sal. 139:​23, 24). Kʼalal chavakʼ avipal sventa xavakʼbe akuxlejal Jeova xchiʼuk ti xavichʼ voʼe, yakal chavakʼ ta ilel ti chasaʼ ta sjunul avoʼonton li Jeovae. Li Vivliae chal ti chakʼbe bendision Jeova li buchʼutik jech tspasike (kʼelo Ebreos 11:6).

JECHUK-O XANOPAJ TA STOJOLAL JEOVA

16, 17. Li Jeovae, ¿kʼu yelan chikʼ tal ta tsobobbail li yalab xnichʼnab ermanoetike? (Juan 6:44).

¹⁶ Li Jesuse laj yal ti jaʼ Jeova tstak ta ikʼel li krixchanoetik ta steklumale (kʼelo Juan 6:44). ¡Toj kʼupil sba taje! Yuʼun oy kʼusi lek chil ta stojolal jujun krixchano ti chikʼ talel ta steklumale. Jujun yajtunel «stuk xa noʼox jech» o «ep sbalil» chil (Deut. 7:6; tsʼib ta yok vun). Taje te me tsakal akʼoplal ek.

¹⁷ Kerem tseb, mi jaʼ laj yikʼot tal ta mantal li atot ameʼe, xuʼ van chanop ti maʼuk Jeova laj yikʼot tal ta steklumale. Pe kʼelavil kʼusi chalbutik li Vivliae: «Nopajanik ta stojolal Dios, jech chnopaj tal ta atojolalik ek» (Sant. 4:8; 1 Kron. 28:9). Taje jaʼ skʼan ti chnopaj talel ta atojolal mi baʼyel chanopaj ta stojolale. Teuk ta ajol ti ep abalil chilot Jeova li ta steklumale, yuʼun skotol li krixchanoetik ti te oy ta steklumale jaʼ yikʼoj tal ta jujuntal. Taje te me tsakal skʼoplal li yalab xnichʼnab ermanoetik eke. Kʼalal oy buchʼu chlokʼ ta yoʼonton chnopaj ta stojolal li Jeovae, li stuk eke chnopaj tal ta stojolal jech kʼuchaʼal chal Santiago 4:8 (koʼoltaso xchiʼuk 2 Tesalonisenses 2:13).

18. ¿Kʼusi ta jchantik li ta yan xchanobile? (Salmo 40:8).

¹⁸ Kʼalal laj yichʼ voʼ li Jesuse, te laj yakʼ ta ilel ti ta sjunul yoʼonton la spas li kʼusi oy ta yoʼonton Stote (kʼelo Salmo 40:8; Ebr. 10:7). Mi laj avakʼbe akuxlejal Jeova xchiʼuk mi laj avichʼ voʼe, yakal me chachanbe stalelal li Jesuse. Li ta yan xchanobile, tskoltaot sventa jechuk-o tukʼ xatun ta stojolal Jeova mi laj xa ox avichʼ voʼe.