Bikʼit xkakʼ jbatik kʼalal oy kʼusi mu jnaʼtike

1. ¿Kʼu yelan spasojutik li Diose, xchiʼuk kʼu yuʼun ti jech la spasutike?

¡TOJ labal sba ti kʼu yelan la spasutik li Jeovae! Yuʼun xuʼ oy kʼusi jnoptik, ti oyuk kʼusi jchantike xchiʼuk ti jnaʼtik yakʼel ta jkuxlejaltik li kʼusi ta jchantike. ¿Kʼu yuʼun ti jech la spasutike? Yuʼun oy ta yoʼonton ti xkojtikintike xchiʼuk ti jtsaktik ta venta li kʼusi xa jchanojtik sventa lekuk kʼusi xkʼot ta nopel kuʼuntik kʼalal chijtun ta stojolale (Prov. 2:​1-5; Rom. 12:1).

2. 1) ¿Kʼusi skʼan teuk ta joltik? (Job 37:​23, 24; kʼelo xtok li lokʼole). 2) ¿Kʼuxi tskoltautik kʼalal bikʼit chkakʼ jbatike xchiʼuk kʼalal te ta joltik ti oy onoʼox kʼusi mu jnaʼtike?

² Ta skoj ti kʼu yelan la spasutik li Jeovae, ep kʼusi xuʼ jchantik, pe ep kʼusi mu jnabetik skʼoplal xtok (kʼelo Job 37:​23, 24). Kalbetik skʼoplal li Jobe. Li Jeovae ep kʼusitik la sjakʼbe sventa xakʼbe yil ti ep to kʼusi mu snabe skʼoplale. Taje jaʼ koltaat-o sventa sjel snopben xchiʼuk ti bikʼit xakʼ sbae (Job 42:​3-6). Li voʼotik eke skʼan bikʼit xkakʼ jbatik xchiʼuk ti teuk ta joltik ti oy onoʼox kʼusi mu jnabetik skʼoplale. Kʼalal te ta joltik taje, jaʼ tskoltautik sventa bikʼit xkakʼ jbatik. Jech xtok, jaʼ tskoltautik sventa jpat koʼontontik ta stojolal Jeova ti ta onoʼox xakʼ jnaʼtik li kʼusi skʼan jpastik sventa lekuk kʼusi xkʼot ta nopel kuʼuntike (Prov. 2:6).

3. ¿Kʼusi ta jkʼelbetik batel skʼoplal?

³ Li ta xchanobil liʼe, ta jkʼeltik batel junantik li kʼusi mu jnabetik skʼoplale xchiʼuk ti kʼu yuʼun chakʼ jvokoltik bakʼintike. Jech xtok, ta jkʼeltik batel ti lek onoʼox kʼalal oy kʼusi mu jnabetik skʼoplale. Li kʼusi ta jchantik batele jaʼ tskoltautik sventa masuk to jpat koʼontontik ta stojolal Jeova ti ta onoʼox xakʼ jnaʼtik li kʼusi persa skʼan jnabetik skʼoplale, yuʼun li stuke jaʼ «li buchʼu snabe lek skʼoplal kʼusitike» (Job 37:16).

MU JNAʼTIK BAKʼIN CHLAJ LI KʼUSITIK OY TA BALUMILE

4. Jech kʼuchaʼal chal ta Mateo 24:​36, ¿kʼusi ti mu jnaʼtike?

⁴ (Kʼelo Mateo 24:36). Mu jnaʼtik bakʼin chlaj li kʼusitik oy ta balumile. Kʼalal ay ta balumil li Jesus eke, mu toʼox snabe «li skʼakʼalil xchiʼuk [yoraile]».a Ta tsʼakale, laj yalbe yajtakboltak ti jaʼ noʼox oy ta skʼob Jeova ta yalel taje, jaʼ xkaltik, ti jaʼ noʼox «xuʼ xal kʼusi ora chkʼot ta pasel li kʼusitike» (Ech. 1:​6, 7). Jaʼ yuʼun, li Jeovae snaʼoj xa bakʼin tslajes li kʼusitik oy ta balumile, pe li voʼotike mu jnaʼtik lek kʼusi ora chkʼot ta pasel.

5. ¿Kʼusi van xuʼ xkʼot ta pasel ta skoj ti mu jnaʼtik bakʼin chlaj li kʼusitik oy ta balumile?

⁵ Ta skoj li kʼusi laj yal Jesuse, mu jnaʼtik kʼu sjalil skʼan jmalatik sventa xichʼ lajesel li kʼusitik oy ta balumile. Jaʼ yuʼun, xuʼ van xlaj smalael kuʼuntik o ti xijchibaje, mas to mi jal xa yakal chijtun ta stojolal Jeovae. Jech xtok, ta skoj ti muʼyuk to talem li slajeb kʼusitike, xuʼ van vokol chkaʼitik stsʼikel kʼalal chlabanvan li kutsʼ kalaltike o li yan krixchanoetike (2 Ped. 3:​3, 4). O xuʼ van xi chlik jnoptike: «Yaʼ, a ti jnaʼuk lek bakʼin chkʼot ta pasele, mas van oy smalael kuʼun xchiʼuk tstsʼik kuʼun li labanele».

6. ¿Kʼu yuʼun lek onoʼox ti mu jnaʼtik kʼusi ora chtal slajeb li kʼusitike?

⁶ Kʼalal muʼyuk chalbutik Jeova bakʼin chichʼ lajesel li kʼusitik ta balumile, jaʼ jech xuʼ xkakʼbetik yil ti chijtun ta stojolal ta skoj ti jkʼanojtike xchiʼuk ti jpatoj koʼontontik ta stojolale. Skʼan muʼyukuk spajeb li xchʼunel koʼontontike, yuʼun ta jkʼan chijtun ta stojolal Jeova ta sbatel osil, maʼuk noʼox ti ta jmalatik chtal li slajebe. Kʼalal ta jnopbetik skʼoplal «li skʼakʼalil Jeovae», mu jaʼuk xkakʼ ta koʼontontik ti bakʼin chkʼot ta pasele, jaʼuk jnoptik li kʼusitik lekik chkʼot ta pasel yuʼune. Mi la jnopbetik skʼoplal li kʼusitik tspas Diose, jaʼ tskoltautik sventa masuk to xijnopaj ta stojolal xchiʼuk ti xkakʼ kipaltik ta spasel li kʼusi lek chile (2 Ped. 3:​11, 12).

7. ¿Kʼusi ti jnaʼojtike?

⁷ Toj lek kʼalal jaʼ chkakʼ ta koʼontontik li kʼusi jnaʼojtike. ¿Kʼusi ti jnaʼojtik une? Jaʼ ti lik ta 1914 li slajebal kʼakʼale. Li Jeovae laj yakʼ ta tsʼibael albil kʼopetik ti chakʼ ta ilel ti ta slajebal xa kʼakʼal kuxulutike xchiʼuk ti kʼu yelan li kuxlejal vaʼ orae. Jaʼ yuʼun, jnaʼojtik lek ti «¡nopol xa li smukʼta kʼakʼalil Jeovae!» (Sof. 1:14). Jech xtok, jnaʼojtik ti oy ta yoʼonton Jeova ti xkalbetik skotol krixchanoetik «li lekil aʼyejetik ta sventa li Ajvalilale» (Mat. 24:14). Li avie, yakal xa ta jcholtik mantal te van ta 240 lumetik xchiʼuk mas ta jmil jeltos kʼopetik. Jaʼ yuʼun chaʼa, ¿mi persa van skʼan jnaʼtik «li skʼakʼalil xchiʼuk yorail» sventa jcholtik mantal ta sjunul koʼontontike?

MU JNAʼTIK KʼUXI TSKOLTAUTIK LI JEOVAE

8. ¿Kʼusi smakoj li «yabtel» melel Diose? (Eklesiastes 11:5).

⁸ Mu jnaʼtik skotol li «yabtel» melel Diose (kʼelo Eklesiastes 11:5). ¿Kʼusi smakoj li yabtele? Jaʼ skʼoplal skotol li kʼusi tspas Jeova o chakʼ kʼotuk ta pasel sventa spas li kʼusi oy ta yoʼontone. Bakʼintike, mu jnaʼtik lek ti kʼu yuʼun oy kʼusi chakʼ kʼotuk ta pasele o ti kʼu yelan tskoltautik ta melele (Sal. 37:5). Li Vivliae chal onoʼox ti mu jaʼuk xkaʼibetik smelolal skotol li kʼusi tspase, jech kʼuchaʼal mu xkaʼibetik smelolal kʼu yelan chchʼi talel jun neneʼ li ta xchʼut smeʼe, yuʼun li avi eke, li sientifikoetike mu to xaʼibeik lek smelolal.

9. ¿Kʼusi van xuʼ xkʼot ta pasel kʼalal mu jnaʼtik kʼuxi tskoltautik li Jeovae?

⁹ Ta skoj ti mu jnaʼtik lek kʼuxi tskoltautik li Jeovae, xuʼ van mu xnop lek kuʼuntik li kʼusi ta jpastike. Jech kʼuchaʼal liʼe, ti mas xa jutuk xij-abtej o ti oyuk kʼusi xkiktatik sventa masuk to jcholtik mantal o ti xijbat ti bu chtun mas jcholmantaletike. Bateltik xtoke, mu jechuk chkʼot ta pasel li kʼusi oy ta koʼontontik staele. Jech xtok, xuʼ van chkakʼtik tajek persa xcholel mantal, pe muʼyuk buchʼu lek chaʼi. O xuʼ van yakal ta jkolta jbatik ta svaʼanel salon o yan naetik, pe oy kʼusi vokol chichʼ nuptanel. Vaʼun, xuʼ van xi chkaltike: «Chkale, muʼyuk xa lek chilun li Jeovae, yuʼun muʼyuk xa yakal tskoltaun».

10. Kʼalal mu jnaʼtik kʼuxi tskoltautik li Jeovae, ¿kʼusi talelal xuʼ skoltautik?

¹⁰ Kʼalal mu jnaʼtik kʼuxi tskoltautik li Jeovae, xuʼ me mas to bikʼit xkakʼ jbatik. Mi jech jtalelaltike, jaʼ tsvules ta joltik ti jaʼ noʼox Jeova snaʼoj li kʼusi mas lek ta jtojolaltike (Is. 55:​8, 9). Jech xtok, tskoltautik sventa masuk to jpat koʼontontik ta stojolal, yuʼun kʼalal ta jkʼanbetik koltaele, lek kʼusi chkʼot ta pasel. Kʼalal oy kʼusi lek chkʼot ta pasel kuʼuntik ta cholmantal o ta junuk abtelal li ta j-organisasiontike, jaʼuk me xkakʼtik ta ichʼel ta mukʼ li Jeovae (Sal. 127:1; 1 Kor. 3:7). Pe mi mu jechuk kʼot ta pasel li kʼusi jnopojtike, teuk ta joltik ti yiloj li Jeovae xchiʼuk ti jaʼ oy ta yok skʼob skotole (Is. 26:12). Jaʼ yuʼun, jaʼuk noʼox jpastik li kʼusi spas kuʼuntike, yan li kʼusi mu xa spas kuʼuntike jaʼ kakʼbetik sbain li Jeovae. Xuʼ jpʼel ta koʼontontik ti ta onoʼox sbeiltasutike akʼo mi muʼyuk xa tspas skʼelobil juʼelal jech kʼuchaʼal la spas ta voʼnee (Ech. 16:​6-10).

11. ¿Kʼusitik jnaʼojtik ti toj tsotsik skʼoplale?

¹¹ Ta jtabetik sbalil kʼalal ta jvules ta joltik li kʼusi jnaʼojtike. Pe ¿kʼusi ti jnaʼojtike? Jaʼ ti skotol ora chkʼanvan li Jeovae, ti tukʼ kʼusi tspase, ti toj pʼije, ti ep sbalil chil li kʼusi ta jpastik ta stojolale xchiʼuk ta stojolal li kermanotaktike. Jech xtok, jnaʼojtik ti chakʼbe bendision li yajtuneltak ti tukʼ chakʼ sbaike (Ebr. 11:6).

MU JNAʼTIK KʼUSI CHKʼOT TA PASEL OKʼOM CHAʼEJ

12. Jech kʼuchaʼal chal Santiago 4:13 xchiʼuk 14, ¿kʼusi ti mu jnaʼtike?

¹² (Kʼelo Santiago 4:​13, 14). Abal buchʼu snaʼ kʼusi chkʼot ta jtojolaltik okʼom chaʼej, yuʼun jkotoltik oy kʼusi xuʼ jnuptantik «ti muʼyuk malabile» (Ekl. 9:11). Jech oxal, abal buchʼu snaʼ mi lek onoʼox chkʼot ta pasel li kʼusi jnopojtike o mi kuxulutik to van sventa jpastik.

13. ¿Kʼu van yelan chkaʼi jbatik ta skoj ti mu jnaʼtik kʼusi chkʼot ta pasel okʼom chaʼeje?

¹³ Ta skoj ti mu jnaʼtik kʼusi chkʼot ta pasel okʼom chaʼeje, xuʼ van chakʼ jvokoltik. Yuʼun mi la jnopbetik tajek skʼoplal ti oy kʼusi xuʼ chopol xkʼot ta jtojolaltike, xuʼ van muʼyuk xa xijmuyubaj. Jech xtok, mi oy kʼusi anil o tsots kʼusi la jnuptantike, kʼux van tajek chkaʼitik xchiʼuk chkap-o van joltik o mu xa kʼusi jkʼantik. O mi mu jechuk kʼot ta pasel li kʼusi jnopojtik oxe, xuʼ van chijchibaj-o (Prov. 13:12).

14. ¿Kʼusi ti chakʼ jmuyubajeltik ta melele? (Kʼelo xtok li lokʼoletike).

¹⁴ Kʼalal chkuch kuʼuntik kʼuksiuk noʼox vokolile, jaʼ jech chkakʼbetik yil Jeova ti chijtun ta stojolal ta skoj ti jkʼanojtike, ti maʼuk ta skoj ti oy kʼusi ta jkʼantik akʼo spas ta jtojolaltike. Li ta Vivliae oy loʼiletik ti chakʼ ta ilel ti mu skotoluk velta chchabiutik Jeova kʼalal oy kʼusi ta jnuptantike xchiʼuk mu baʼyeluk xa onoʼox chal li kʼusi chkʼot ta jtojolaltik ta jelavele. Li Jeovae snaʼoj ti maʼuk chakʼ jmuyubajeltik kʼalal ta jnaʼtik skotol li kʼusi chkʼot ta jtojolaltike. Yuʼun li stuke snaʼoj ti jaʼ chakʼ jmuyubajeltik ta melel kʼalal ta jkʼanbetik beiltasele xchiʼuk kʼalal ta jchʼunbetik smantale (Jer. 10:23). Kʼalal ta jtsaktik ta venta Jeova kʼalal oy kʼusi ta jnop ta jpastike, xkoʼolaj ti xi chkaltike: «Mi jech tskʼan Jeovae, chijkuxiutik xchiʼuk ta jpastik jech xchiʼuk ta jpastik li yane» (Sant. 4:15).

15. ¿Kʼusi jnaʼojtik ti chkʼot ta pasel ta jelavele?

¹⁵ Akʼo mi mu jnaʼtik kʼusi chkʼot ta pasel okʼom chaʼej, jnaʼojtik lek ti xuʼ jtatik kuxlejal sbatel osil ta balumil o ta vinajel. Jnaʼojtik lek ti mu snaʼ sjut kʼop li Jeovae xchiʼuk ti muʼyuk kʼusi chmakat ta be sventa xkʼot ta pasel yuʼun li kʼusi yaloje (Tito 1:2). Jaʼ noʼox stuk ti xuʼ xi xale: «Ta slikebal onoʼox chkal ti kʼu yelan chkʼot ta tsutsele xchiʼuk ta voʼne laj kal li kʼusitik muʼyuk to kʼotemik ta pasele». Li kʼusitik yaloj ta voʼne li Jeovae ep xa kʼotemik ta pasel. Taje jaʼ svinajeb ti chkʼot onoʼox yuʼun ta pasel li kʼusitik skʼan to spase (Is. 46:10). Jech xtok, jnaʼojtik lek ti muʼyuk kʼusi xuʼ xmakat ta be Jeova sventa xakʼ ta ilel ti skʼanojutike (Rom. 8:​35-39). Jaʼ yuʼun, sventa xkuch kuʼuntik kʼuksiuk vokolile, li Jeovae chakʼ jpʼijiltik, tspat koʼontontik xchiʼuk chakʼ kipaltik. Xuʼ jpʼel ta koʼontontik ti tskoltautik xchiʼuk ti chakʼbutik bendisione (Jer. 17:​7, 8).

MU XKAʼIBETIK SMELOLAL KʼU TO YEPAL XOJTIKINUTIK LI JEOVAE

16. Akʼo mi vokol chkaʼitik ta xchʼunel, ¿kʼusi snaʼoj ta jtojolaltik li Jeovae? (Salmo 139:​1-6).

¹⁶ (Kʼelo Salmo 139:​1-6). Li Jpasvanej kuʼuntike snaʼoj lek kʼu yelan pasbilutik, kʼu yelan chkaʼi jbatik xchiʼuk li kʼusi ta jnoptike. Te yakʼoj sat skotol ora ta jtojolaltik. Snaʼoj li kʼusi chkaltike xchiʼuk li kʼusi ta jkʼan chkaltike. Jech xtok, yiloj li kʼusitik ta jpastike xchiʼuk ti kʼu yuʼun jech ta jpastike. Li ajvalil Davide laj yal ti xkoʼolaj ta jun jchabivanej li Jeovae, ti xilutik talel xchiʼuk ti nopol oy ta jtojolaltik sventa xchabiutike. Mu chʼunbaj chkaʼitik ti chakʼ talel sat ta jtojolaltik li Mukʼul Jpasmantal ta vinajelbalumile, li Buchʼu la spas skotol li kʼusi x-ayane xchiʼuk li Buchʼu skotol xuʼ yuʼune. Xi onoʼox laj yal li Davide: «Toj echʼ xa noʼox labal sba chkaʼi ta aʼibel smelolal skotol li kʼusitik taje. Toj echʼ xa noʼox toyol oy chkaʼi, solel mu jta» (Sal. 139:​6, tsʼib ta yok vun).

17. ¿Kʼu yuʼun oy vokol chkaʼitik xchʼunel ti xojtikinutik lek li Jeovae?

¹⁷ Ta skoj ti kʼu yelan laj kichʼtik chanubtasel ta jbikʼtaltike, ti bu lijchʼie o li kʼusitik toʼox jchʼunojtik kʼalal mu toʼox xkojtikintik mantale, xuʼ van vokol chkaʼitik ta xchʼunel ti skʼanojutik li Jtotik Jeovae xchiʼuk ti tsvul yoʼonton ta jtojolaltike. Jech kʼuchaʼal kʼot ta stojolal li Davide, bakʼintike xuʼ van chopol chkaʼi jbatik ta skoj li kʼusitik chopol la jpastik ta voʼnee, vaʼun ta jnoptik ti muʼyuk xa lek chilutik li Jeovae o ti nom oy ta jtojolaltike (Sal. 38:​18, 21). Bakʼintik xtoke, xuʼ van oy buchʼu yakal chakʼ tajek persa spasel li kʼusi tskʼan Diose, pe ta skoj ti oy kʼusi meʼinem ta yoʼontone, xuʼ van xi tsnope: «¿Kʼu yuʼun jech tskʼan akʼo jpas Dios ti jaʼ onoʼox jechune? Ta alele, xaʼibe smelolal ti kʼu yelan chkaʼi jbae».

18. ¿Kʼu yuʼun oy sbalil mi la jchʼuntik ti jaʼ mas xojtikinutik li Jeovae? (Kʼelo xtok li lokʼoletike).

¹⁸ Xuʼ jchʼuntik ta sjunul koʼontontik ti jaʼ mas xojtikinutik li Jeovae, jaʼ mu masuk xkojtikin jbatik li voʼotike. Jech xtok, xil li kʼusitik lekik ta jpastike akʼo mi mu xkakʼtik venta li voʼotike. Akʼo mi xil jpaltailtik li Jeovae, skʼanojutik tajek, yuʼun snaʼoj kʼu yelan chkaʼi jbatik xchiʼuk ti kʼu yuʼun oy bakʼintik chijchʼaye (Rom. 7:15). Mi laj kaʼibetik smelolal ti yiloj Jeova ti oy kʼusi lek spas kuʼuntike, jaʼ tskoltautik sventa tukʼuk xijtun ta stojolal xchiʼuk ti xijmuyubajuk noʼoxe.

19. ¿Kʼusi jnaʼojtik ta stojolal li Jeovae?

¹⁹ Jnaʼojtik lek ti jaʼ kʼanelal li Diose (1 Juan 4:8). Yuʼun skotol li kʼusi chalbutik akʼo jpastike xchiʼuk li kʼusi mu stakʼ jpastike, jaʼ ta skoj ti skʼanojutik tajeke xchiʼuk tskʼan ti lekuk xbat jkuxlejaltike. Jech xtok, jnaʼojtik ti oy ta yoʼonton ti xijkuxi ta sbatel osile. ¿Kʼuxi jnaʼojtik taje? Yuʼun la stak talel Xnichʼon sventa spojutik. Jaʼ yuʼun, akʼo mi oy bu chijchʼay, xuʼ jpʼel ta koʼontontik ti xuʼ xkamigointik li Jeovae (Rom. 7:​24, 25). Jech xtok, jnaʼojtik ti «mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike» (1 Juan 3:​19, 20). Li Jeovae xojtikinutik lek xchiʼuk snaʼoj lek ti spas kuʼuntik li kʼusi oy ta yoʼontone.

20. ¿Kʼusi tskoltautik sventa mu jecheʼuk noʼox jvul koʼontontike?

²⁰ Jech kʼuchaʼal la jchantik xa tale, li Jeovae jaʼ noʼox chalbutik li kʼusi jtunel kuʼuntike. Kʼalal bikʼit chkakʼ jbatike, jaʼ tskoltautik sventa mu jecheʼuk noʼox jvul koʼontontik ta sventa li kʼusi mu jnaʼtike. Li kʼusi mas leke jaʼ ti jaʼuk xkakʼ ta koʼontontik li kʼusi mas tsots skʼoplale. Kʼalal jech ta jpastike, jaʼ jech chkakʼtik ta ilel ti jpatoj koʼontontik ta stojolal Jeova ti jaʼ «li buchʼu xojtikinbe lek [skʼoplal]» skotole (Job 36:4). Akʼo mi ep kʼusi mu jnabetik skʼoplal li avie, xijmuyubaj tajek ti jech-o chchanubtasutik ta sbatel osil li Diose xchiʼuk ti oy-o kʼusi achʼ ta jchantik ta stojolale (Ekl. 3:11).