¿Kʼusi jnaʼojtik ta sventa ti kʼu yelan chchapanvan ta jelavel li Jeovae?

1. ¿Kʼu yuʼun xuʼ xkaltik ti labal sba li kʼusitik chkʼotanuk ta pasel avie?

¡LABAL sba li kʼusitik chkʼotanuk ta pasel avie! Skotol kʼakʼal yakal xa chkiltik chkʼot ta pasel li albil kʼopetik ta Vivliae. Jech kʼuchaʼal liʼe, chkiltik ti yakal tstsak sbaik ta kʼop li ajvalil ta norte xchiʼuk li ajvalil ta sur yoʼ sventainik spʼejel li balumile (Dan. 11:​40, tsʼib ta yok vun). Maʼuk noʼox, yuʼun yakal xa chichʼ cholel lekil aʼyejetik ta sventa li Ajvalilal yuʼun Dios ti chʼabal bu jech ilbil-oe xchiʼuk ta smiyonal xa noʼox krixchanoetik chlik tunikuk ta stojolal Jeova (Is. 60:22; Mat. 24:14). Jech xtok, ta yorail noʼox chkichʼtik akʼbel epal veʼlil ta mantal (Mat. 24:​45-47).

2. ¿Kʼusi ti skʼan jpʼeluk ta koʼontontike xchiʼuk kʼusi skʼan teuk ta joltik?

² Li Jeovae jech-o tskoltautik ta yaʼibel smelolal li kʼusi poʼot xa xkʼot ta pasel ti tsotsik skʼoplale (Prov. 4:18; Dan. 2:28). Xuʼ me jpʼel ta koʼontontik ti chapalutik xa ox sventa tukʼ xkakʼ jbatik xchiʼuk ti jmojuk oyutik kʼalal mi lik li mukʼta tsatsal vokolile. Akʼo mi jech, oy onoʼox kʼusitik ti mu jnaʼtik li kʼusi chtal ta tsʼakale. Li ta xchanobil liʼe, baʼyuk chkalbetik skʼoplal ti kʼu yuʼun jel junantik li kʼusitik toʼox kaʼiojbetik smelolale. Ta tsʼakale, chkalbetik batel skʼoplal li kʼusi jnaʼojtik ta sventa li kʼusi chkʼot ta pasel ta jelavele xchiʼuk ti kʼuxi tspas li Jeovae.

LI KʼUSI MU JNAʼTIKE

3. ¿Kʼusi kalojtik toʼox ti chkʼot ta stojolal li krixchanoetik mi lik li mukʼta tsatsal vokolile, xchiʼuk kʼu yuʼun jech toʼox ta jnoptik?

³ Li ta voʼnee, kalojtik toʼox kʼalal mi lik li mukʼta tsatsal vokolile, li krixchanoetike mu xa xuʼ xakʼ xchʼunel yoʼontonik ta stojolal Jeova xchiʼuk ti xkolik li ta Armajedone. Ti jech ta jnoptike, jaʼ ta skoj li kʼusi kʼot ta pasel ta Nojelal ta voʼe, yuʼun ta jnoptik toʼox ti jaʼtik jech chkʼot ta pasel ta jelavele. Jech kʼuchaʼal liʼe, ta toʼox xkaltik ti kʼalal la smakbe stiʼ arka Jeova kʼalal jutuk xa ox skʼan xtal li Nojelal ta voʼe, jaʼ la jech tsmak tiʼ na Jeova mi lik li mukʼta tsatsal vokolile, vaʼun ti chʼabal xa buchʼu xuʼ xkole (Mat. 24:​37-39).

4. ¿Kʼu yuʼun maʼuk jun albil kʼop ti chkʼot ta pasel ta tsʼakal li kʼusi kʼot ta pasel ta skʼakʼalil Noee?

⁴ ¿Mi jaʼ jun albil kʼop li kʼusi kʼot ta pasel kʼalal tal li Nojelal ta voʼe?a Maʼuk, yuʼun muʼyuk bu jech chal li Vivliae. Melel onoʼox ti la skoʼoltas Jesus xchiʼuk li skʼakʼalil Noe kʼalal mi liʼ xa ox oye. Pe maʼuk laj yakʼ ta aʼiel ti chkʼot ta pasel ta tsʼakal li kʼusitik kʼot ta pasel ta Nojelal ta voʼe, jech kʼuchaʼal ti la smakbe stiʼ arka li Jeovae. Akʼo mi jech, xuʼ ep kʼusi jchantik li ta loʼil liʼe.

5. 1) ¿Kʼusi la spas Noe kʼalal skʼan toʼox xtal li Nojelal ta voʼe? (Ebreos 11:7; 1 Pedro 3:20). 2) ¿Kʼusi xkoʼolaj-o li cholmantal ta jpastik jech kʼuchaʼal la spas li Noee?

⁵ Kʼalal laj yaʼi Noe ti laj yal Jeova ti chtal nojelal ta voʼe, laj yakʼ ta ilel ti oy xchʼunel yoʼonton kʼalal la spas li arkae (kʼelo Ebreos 11:7; 1 Pedro 3:20). Jaʼ noʼox jech ek, li krixchanoetik ti chchikintaik li lekil aʼyejetik ta sventa li Ajvalilal yuʼun Diose skʼan xakʼik ta ilel ti oy xchʼunel yoʼontonike (Ech. 3:​17-20). Li Pedroe xi laj yal ta stojolal li Noee: «La xcholbe skʼoplal li tukʼilale» (2 Ped. 2:5). Jech kʼuchaʼal la jchantik li ta xchanobil echʼe, li Noee mu jnaʼtik mi laj yalbe skotol krixchanoetik xchiʼuk mi laj yalbe ta jujuntal ti chtal Nojelal ta voʼe. Li avie eke, chkakʼ tajek ta koʼontontik xcholbel mantal skotol krixchanoetik ta spʼejel balumil. Akʼo mi jech, mu onoʼox jtatik ta cholbel mantal skotol krixchanoetik kʼalal mu to xtal li slajeb kʼusitike. ¿Kʼu yuʼun ti jech chkaltike?

6, 7. ¿Kʼu yuʼun mu onoʼox jtatik ta cholbel mantal skotol krixchanoetik yoʼ to mu xtal li slajebal kʼusitike?

⁶ Jkʼeltik kʼusi laj yal Jesus ti bu to kʼalal chichʼ cholel mantale. Yaloj xa onoʼox ti ta xichʼ cholel lekil aʼyej «ta spʼejel balumil sventa xaʼi skotol li jteklumetike» (Mat. 24:14). Li kʼusi laj yale yakal xa chkʼot ta pasel li avie. Chichʼ cholel mantal mas xa ta mil jeltos kʼopetik. Jech xtok, koliyal li jpajinatik ta jw.org xuʼ xaʼiik lekil aʼyejetik jutuk mu skotoluk li krixchanoetike.

⁷ Li Jesus xtoke xi laj yalbe li yajchankʼoptake: «Ta melel chkalboxuk avaʼiik ti mu toʼox bu chlaj xanavanik-o ta skotol li jteklumetik ta Israel kʼalal mi vul li Xnichʼon Krixchanoe». Taje jaʼ skʼan xal ti mu onoʼox xlaj xcholbeik mantal skotol krixchanoetik kʼalal mu toʼox xtal chapanvanuke (Mat. 10:23; 25:​31-33). Avie ta smiyonal xa noʼox krixchanoetik jaʼ te nakalik ti bu mu xakʼik jcholtik mantale. Jech xtok, ta sienal xa noʼox neneʼetik chvokʼik ta jujun minuto. Akʼo mi chkakʼ tajek kipaltik xcholel lekil aʼyejetik «ta skotol lumetik, nitilulaletik, jeltos kʼopetik xchiʼuk ta skotol jteklumetik», mu onoʼox xlaj jcholbetik mantal skotol krixchanoetik kʼalal mu to xtal li slajeb kʼusitike (Apok. 14:6).

8. ¿Kʼusi van xuʼ jnopbetik skʼoplal? (Kʼelo xtok li lokʼoletike).

⁸ Jech kʼuchaʼal laj xa kiltike xuʼ van xi jnoptike: «¿Kʼusi chkʼot ta stojolal li krixchanoetik ti muʼyuk laj yaʼiik lekil aʼyejetik kʼalal skʼan toʼox xtal li mukʼta tsatsal vokolile? ¿Kʼusi van tspas Jeova ta stojolalik? ¿Kʼusi van tspas Jesus ti jaʼ akʼbil ta sba chchapanvane?» (Juan 5:​19, 22, 27; Ech. 17:31). Li teksto ti bu lokʼem talel sloʼilal li xchanobil liʼe jaʼ tsvules ta joltik ti «mu skʼan ti oyuk buchʼu xbat ta lajelal junuk» li Jeovae. Yuʼun tskʼan ti akʼo sutes yoʼonton skotolike (2 Ped. 3:9; 1 Tim. 2:4). Akʼo mi jech, muʼyuk to bu yalojbutik Jeova kʼusi tspas ta stojolal li krixchanoetik taje. Yuʼun mu persauk xalbutik.

9. ¿Kʼusi yakʼoj jnaʼtik Jeova li ta Skʼope?

⁹ Li Jeovae yakʼoj jnaʼtik ta Skʼop junantik li kʼusitik tspase. Jech kʼuchaʼal liʼe, yaloj ti ta xchaʼkuxes li buchʼutik muʼyuk tukʼik ti muʼyuk laj yojtikinik Jeova xchiʼuk ti muʼyuk la sjel stalelalike (Ech. 24:15; Luk. 23:​42, 43). Ta skoj taje, xuʼ van oy kʼusitik yan xlik jakʼbe jbatik.

10. ¿Kʼusi to van xuʼ mas jnopbetik skʼoplal?

¹⁰ ¿Mi ta xichʼik lajesel ta sbatel osil xchiʼuk mi muʼyuk xa chchaʼkuxiik li buchʼutik chchamik kʼalal jaʼo yakal li mukʼta tsatsal vokolile? Kʼalal mi tal Jeova xchiʼuk yajsoltarotak sventa slajes ta Armajedon li buchʼutik mu xchʼunik mantale, li Vivliae jamal chal ti jaʼ muʼyuk xa chchaʼkuxiik tale (2 Tes. 1:​6-10). Pe ¿kʼusi van chkʼot ta stojolalik li buchʼutik chchamik ta skoj chamel, yijubel, kʼusi tsnuptanik ta anil o ta skoj ti laj yichʼik milel kʼalal jaʼo yakal li mukʼta tsatsal vokolile? (Ekl. 9:11; Sak. 14:13). ¿Mi te van tsakal skʼoplal kʼalal mi laj yichʼik chaʼkuxesel ta achʼ balumil li buchʼutik muʼyuk tukʼike? Ti melel xkaltike, mu jnaʼtik.

LI KʼUSI JNAʼOJTIKE

11. ¿Kʼusi chichʼ tsakel ta venta kʼalal chichʼik chapanel ta jujuntal li krixchanoetik ta Armajedone?

¹¹ Oy kʼusitik jnaʼojtik ta sventa li kʼusitik chkʼot ta pasel ta jelavele. Jech kʼuchaʼal liʼe, kʼalal chichʼ chapanel li krixchanoetik ta Armajedone, jaʼ chichʼ tsakel ta venta li kʼusi la spasbeik li yermanotak Kristoe (Mat. 25:40). Li buchʼutik laj yakʼik ta ilel ti tskoltaik Kristo xchiʼuk li buchʼutik chmuyik ta vinajele ch-albat skʼoplalik ti xkoʼolajik kʼuchaʼal chijetike. Jnaʼojtik xtok ti kʼalal jaʼo li mukʼta tsatsal vokolile, liʼ toʼox oy junantik yermanotak Kristo ta balumile, pe chichʼik ikʼel muyel ta vinajel kʼalal jutuk xa ox skʼan xlik li Armajedone. Jaʼ yuʼun, li krixchanoetik ti oy ta yoʼontonik mantale xuʼ me skoltaik li buchʼutik tʼujbil chbatik ta vinajel ti liʼ to oyik ta balumil sventa lek spas li yabtelike (Mat. 25:​31, 32; Apok. 12:17). ¿Kʼu yuʼun tsots skʼoplal taje?

12, 13. ¿Kʼusi van tspas junantik krixchanoetik kʼalal chilik chichʼ lajesel li Mukʼta Babiloniae? (Kʼelo xtok li lokʼoletike).

¹² Kʼalal mi lik li mukʼta tsatsal vokolile, xuʼ van oy junantik krixchanoetik chilik ti kʼu yelan chichʼ lajesel li «Mukʼta Babiloniae», vaʼun jaʼ chvul ta sjolik ti voʼne xa onoʼox jech yalojbeik tal skʼoplal li stestigotak Jeovae. ¿Mi oy van junantik krixchanoetik ti xuʼ xlik yichʼik ta mukʼ li Jeovae? (Apok. 17:5; Esek. 33:33).

¹³ Jnopbetik skʼoplal li kʼusi kʼot ta pasel ta skʼakʼalil Moisese. Kʼalal lokʼik ta Ejipto li j-israeletike, te tijil lokʼel epal krixchanoetik ek (Eks. 12:38). Junantike laj van yakʼ xchʼunel yoʼontonik ta stojolal Jeova kʼalal laj yilik ti kʼot ta pasel li lajuneb vokolil laj yal Moisese. Mi laj xa ox yichʼ lajesel li Mukʼta Babiloniae xchiʼuk mi jutuk xa ox skʼan xtal li slajeb kʼusitike, ¿mi ta van jnoptik ti mu sta-o ti jaʼ to chlik yichʼik ta mukʼ Jeova junantik krixchanoetike? ¡Mu jechuk! Ta jkʼan ta jchanbetik stalelal li Jtotik ta vinajel ti «jaʼ jun Dios ti oy xkʼuxul yoʼontone, oy slekil yoʼonton, mu ta aniluk chlik skʼakʼal yoʼonton, ep tukʼil kʼanelal yuʼun xchiʼuk melel snaʼ xkʼopoj» (Eks. 34:6).b

14, 15. ¿Kʼuxi jnaʼojtik ti maʼuk chichʼ tsakel ta venta ti kʼusi ora cham xchiʼuk ti bu nakal li buchʼu xuʼ xkuxi sbatel osile? (Salmo 33:​4, 5).

¹⁴ Yikʼaluk van oy kaʼiojtik ti xi chalik ta stojolal yutsʼ yalalik ti chamem xa ti maʼuk yajtunel Jeovae: «Mas lek ti cham xa ti muʼyuk to talem li mukʼta tsatsal vokolile, yuʼun xuʼ xchaʼkuxi». Ta slekil van yoʼonton ti jech chalik taje. Li buchʼu xuʼ xkuxi ta sbatel osile maʼuk chichʼ tsakel ta venta ti kʼusi ora chame. Li Jeovae jaʼ tukʼil Jchapanvanej xchiʼuk lek tukʼ li kʼusitik chkʼot ta nopel yuʼune (kʼelo Salmo 33:​4, 5). Jpʼel ta koʼontontik ti tukʼ kʼusi tspas «li Jchapanvanej ta spʼejel balumile» (Jen. 18:25).

¹⁵ Li buchʼutik chkuxiik ta sbatel osile maʼuk chichʼ tsakel ta venta xtok ti bu nakale. Li Jeovae maʼuk ti «tentsunetik» xa chil li smiyonal xa noʼox krixchanoetik ta skoj ti jaʼ te nakalik ti bu muʼyuk laj yichʼ cholel li lekil aʼyeje (Mat. 25:46). Mi oy ta koʼontontik li krixchanoetik taje, mas to me oy ta yoʼonton li Jchapanvanej ta spʼejel balumile. Mu jnaʼtik kʼusi tstsak ta venta Jeova kʼalal jaʼo yakal li mukʼta tsatsal vokolile. Mi laj yilik kʼot ta pasel li mukʼta tsatsal vokolile, xuʼ van jaʼ xtijbat-o yoʼontonik sventa xakʼ xchʼunel yoʼontonik ta stojolal Jeova mi la xchʼultajes xa ox li sbie (Esek. 38:16).

16. ¿Kʼusitik jnaʼojtik ta stojolal li Jeovae? (Kʼelo xtok li lokʼole).

¹⁶ Li Jeovae yakʼojbutik li Vivliae, jaʼ yuʼun jchanojtik xa talel ti toj echʼ xa noʼox ep sbalil chilbe xkuxlejal li krixchanoetike. Yuʼun laj yakʼ ta matanal li Xnichʼon sventa xuʼ xijkuxi ta sbatel osile (Juan 3:16). Oy van kakʼojtik venta ti kʼu yelan yakʼoj ta ilel slekil yoʼonton xchiʼuk xkʼuxul yoʼonton ta jtojolaltik li Jeovae (Is. 49:15). Xojtikinutik ta jujuntal xchiʼuk snaʼoj kʼusi jbitik. Jaʼ yuʼun, mi lijchamutike, xuʼ xchaʼkuxesutik ti kʼu onoʼox kelantike, xuʼ xakʼbutik yan velta skotol li kʼusitik tey toʼox ta jnopbentike (Mat. 10:​29-31). Oy lek srasonal kuʼuntik ti xuʼ jpat koʼontontik ta stojolal li Jtotik ta vinajel ti lek tajek chchapan ta jujuntal li krixchanoetike, yuʼun toj echʼ xa noʼox pʼij, tukʼ kʼusi tspas xchiʼuk oy xkʼuxul yoʼonton (Sant. 2:13).

17. ¿Kʼusi ta jkʼeltik batel li ta yan xchanobile?

¹⁷ Avi ti laj xa kaʼibetik talel smelolale, chkakʼtik venta ti mas to skʼan xkakʼ ta koʼontontik li cholmantale. ¿Kʼu yuʼun ti jech chkaltike? Xchiʼuk ¿kʼusi tstij koʼontontik sventa jechuk-o jcholtik batel mantal? Taje jaʼ ta jkʼelbetik skʼoplal li ta yan xchanobile.