Kʼunuk ta aʼiel li kʼusi chavale

¿Kʼuxi laj yakʼ ta ilel li Jesuse?

VIDEO: Li Jesuse chal jun skʼelobil ti chakʼ ta ilel ti chchabiutik li Jeovae

1. Kʼelo li VIDEOE o kʼelo Mateo 6:25 kʼalal ta 27. Laje, nopbo skʼoplal liʼe:

1. ¿Kʼusi skʼelobil laj yal Jesus sventa xakʼ ta chanel ti chchabiutik li Jeovae?

2. Akʼo mi ep kʼusi snaʼ sventa mutetik li Jesuse, ¿kʼu yuʼun jaʼ laj yalbe skʼoplal li kʼusi kʼun ta aʼibel smelolale? ¿Kʼu yuʼun toj lek ti kʼu yelan chanubtasvane?

¿Kʼusi chakʼ jchantik li kʼusi la spas Jesuse?

2. Mi kʼun noʼox ta aʼiel li kʼusi chkaltike, chkom me ta sjol xchiʼuk chkʼot me ta yoʼonton li buchʼu ta jchanubtastike.

Paso li kʼusi la spas Jesuse

3. Mu toj epuk xakʼopoj. Kʼalal oy kʼusi chachanbeik skʼoplale, mu xavalbe avaj-estudio skotol li kʼusi anaʼoje. Jaʼuk noʼox xavalbe skʼoplal li kʼusi talem li ta livro o ta foyeto yakal chachanike. Oyuk me smalael avuʼun sventa stakʼ tal avaj-estudio mi oy kʼusi la ajakʼbee. Pe ¿kʼusi xuʼ xapas mi mu snabe li stakʼobile o mi oy kʼusi chal ti mu jechuk chal Vivliae? Oyuk kʼusitik yan xajakʼbe sventa xaʼibe lek smelolale. Mi laj avil ti laj yaʼibe xa smelolale, jelavan ta yan punto.

4. Albo skʼoplal avaj-estudio li kʼusi xchanoj xa onoʼoxe. Jech kʼuchaʼal liʼe, mi jaʼ xa chlik achanik ta sventa li chaʼkuxesele, xuʼ xavulesbe ta sjol avaj-estudio li kʼusi achanojik xa onoʼox ta sventa ti kʼu yelan oy li animaetike.

5. Nopo lek li skʼelobil chatunese. Kʼalal mu to xaval junuk skʼelobile, nopbo skʼoplal liʼe:

1. «¿Mi kʼun noʼox ta aʼibel smelolal?».

2. «¿Mi chaʼibe smelolal ta anil li kaj-estudioe?».

3. «¿Kʼusi van chvul ta sjol ta jelavel: mi jaʼ li kʼusi la jchanbekutik skʼoplale o mi jaʼ noʼox li skʼelobile?».