¿Mi ta jpastik-o li «cʼusi tscʼan li chʼul espiritue»?
«Jaʼ pasic cʼusi tscʼan li Chʼul Espiritue, yuʼun jech mu jaʼuc chaspasoxuc ta mantal li abecʼtalique.» (GÁLATAS 5:16.)
1. ¿Kʼusi xuʼ slokʼesbutik li xiʼel ti ta jta jmultik ta stojolal li chʼul espiritue?
OY KʼUSI xuʼ slokʼesbutik li xiʼel ti ta jta jmultik ta stojolal li xchʼul espiritu Jeovae. Jaʼ ti jpastik li kʼusi xi laj yal li jtakbol Pabloe: «Jaʼ pasic cʼusi tscʼan li Chʼul Espiritue, yuʼun jech mu jaʼuc chaspasoxuc ta mantal li abecʼtalique», xi (Gálatas 5:16). Mi chkakʼ akʼo sbeiltasutik li xchʼul espiritu Diose, maʼuk me tspasutik ta mantal li kʼusi chopol tskʼan jbekʼtaltike (Romanos 8:2-10).
2, 3. ¿Kʼuxi ta jtabetik sbalil kʼalal ta jpasilantik li kʼusi tskʼan chʼul espiritue?
2 Kʼalal jaʼ ta jpastik li kʼusi tskʼan chʼul espiritue, li yip Dios ch-abteje, jaʼ tstij koʼontontik ta xchʼunbel smantal li Jeovae. Chkakʼtik ta ilel li stalelal ta jnatike, ta chol mantal, ta tsobobbail xchiʼuk ta buyuk noʼox. Li yabtel chʼul espiritue te chvinaj ta sventa ti kʼuyelan chkil jbatik xchiʼuk li jnup jchiʼiltike, li kalab jnichʼnabtike, li kermanotaktik ta chʼunolajele xchiʼuk li yan krixchanoetike.
3 Ti chi jkuxiutik «ta sventa espiritu jech kʼuchaʼal chil li Diose» jaʼ yakʼoj jtentik komel li mulile (1 Pedro 4:1-6, NM). Mi ch-abtej ta jkuxlejaltik li chʼul espiritue, muʼyuk me ta jpas jmultik ti mu pasbajuk ta pertone. Pe ¿kʼutik to yelan xuʼ jtabetik sbalil kʼalal ta jpastik li kʼusi tskʼan chʼul espiritue?
Jmojuk oyutik-o ta stojolal Dios xchiʼuk Cristo
4, 5. Mi jaʼ ta jpastik li kʼusi tskʼan chʼul espiritue, ¿kʼusi ta jchʼuntik ta sventa li Jesuse?
4 Ta sventa ti ta jpastik li kʼusi tskʼan chʼul espiritue, xuʼ lek tajmek chkil jbatik jchiʼuk Dios xchiʼuk li xNichʼone. Kʼalal yakal chalbe skʼoplal matanaletik ta sventa chʼul espiritu li jtakbol Pabloe, xi la stsʼibabe batel li yermanotak ta Corinto ti chichʼik toʼox ta mukʼ kʼusitike: «Chcacʼ anaʼic, li bochʼo ventainbil yuʼun Chʼul Espiritue mu xuʼ chchopolcʼopojic ta sventa li Jesuse. Jech noxtoc muʼyuc bochʼo xuʼ chal: “Jaʼ Cajval li Jesuse”, xi, ti me muc ta sventauc Chʼul Espíritu chcʼopoje», xi (1 Corintios 12:1-3). Kʼusiuk espiritu o juʼelal ti tstijbe yoʼonton jun krixchano sventa chchopol kʼopta li Jesuse, persa jaʼ likem tal ta stojolal Satanás. Pe ta skoj ti jaʼ ta jpastik li kʼusi tskʼan chʼul espiritue, jpʼel-o ta koʼontontik ti la xchaʼkuxes Jesús li Jeovae xchiʼuk ti la svaʼan ta bankilal ta skotol li spasbentake (Filipenses 2:5-11). Oy xchʼunel koʼontontik ta stojolal li matanal pojelal laj yakʼ Jesuse xchiʼuk jtsakojtik ta mukʼ kʼuchaʼal Kajvaltik ti biiltasbil yuʼun Jeova ta jtojolaltike.
5 Li ta baʼyel sigloe oy toʼox krixchanoetik laj yalik ti jaʼik la yajtsʼaklomtak Jesuse, pe mu xchʼunik un ti ay yichʼ sbekʼtal li Jesuse (2 Juan 7-11). Jlome la xchʼunik li jutbilkʼop taje, vaʼun la spʼajik li melel chanubtaseletik ta sventa Jesuse, li Mesiase (Marcos 1:9-11; Juan 1:1, 14). Mi jaʼ ta jpastik li kʼusi tskʼan chʼul espiritue, muʼyuk me ta jvalopatintik li kʼusi melele. Jech xtok, jaʼ noʼox me mi vikʼil jsatik ta sventa li mantale, xuʼ ta jkʼupintik li slekil yoʼonton Jeovae xchiʼuk ti te oyutik-o li ta «cʼusi melele» (3 Juan 3, 4). Jech oxal chaʼa, jpʼajtik me skotol li valopatinej mantale, sventa jech lek xkil-o jbatik xchiʼuk li jTotik ta vinajele.
6. ¿Kʼusitik talelal chakʼ ayanuk li sjuʼel Dios ta stojolal li buchʼutik tspasik kʼusi tskʼan chʼul espiritue?
6 Kʼalal laj yalbe skʼoplal yabtel jbekʼtaltik li Pabloe te la xchapbe skʼoplal ek li yichʼel ta mukʼ kʼusitike, li saʼel kʼusi lek ta chʼunel chkaʼitike, li mulivajel eke xchiʼuk li spasel kʼusitik kʼupil chaʼi jbekʼtaltike. Pe xi laj yalbe smelolale: «Li bochʼotic oyic xa ta stojol Cristo Jesuse, laj xa yaqʼuic ta milel ta cruz [«jtel teʼ», NM] li stalel sbecʼtalique, li cʼusitic tscʼane, xchiʼuc li cʼusitic nopen xaʼay spasele. Jaʼ yuʼun me jaʼ xa cuxulutic ta sventa li Chʼul Espiritue, jaʼ xa ta jpastic batel li cʼusitic tscʼane», xi (Gálatas 5:19-21, 24, 25). ¿Kʼusitik talelal chakʼ ayanuk li yipal Dios ta stojolal li buchʼutik chakʼ ta xkuxlejalik xchiʼuk tspasik li kʼusi tskʼan chʼul espiritue? Li jtakbole xi laj yale: «Li yabtel Chʼul Espiritue jaʼ jech chac liʼi: ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc, jnaʼtic spajesel jbatic», xi (Gálatas 5:22, 23). Tana un, jkʼelbetik skʼoplal li yabteltak chʼul espiritue.
Jkʼanan jbatik ta jujuntal
7. Alo kʼusi jaʼ li kʼanelale xchiʼuk albo skʼoplal kʼutik yelan stalelal.
7 Li kʼanelale —ti jaʼ jtos yabtel chʼul espiritue— jaʼ jun tsatsal kʼanel chkaʼitik ta stojolal yantik xchiʼuk ti oy ta koʼontontik ta melele. «Li Diose jaʼ stalel ta xcʼanvan o», xi chal li Vivliae, yuʼun jaʼ li buchʼu mas yakʼoj ta ilel ta jyalel li talelal taje. Li mukʼta kʼanelal yuʼun Dios xchiʼuk xNichʼon ta stojolal li krixchanoetike te vinaj li ta matanal pojelal laj yakʼ Jesucristoe (1 Juan 4:8; Juan 3:16; 15:13; Romanos 5:8). Li yajtsʼaklomutik Cristoe ojtikinbilutik ta sventa ti jkʼananoj jbatike (Juan 13:34, 35). Jech, albilutik mantal ti akʼo jkʼanan jbatike (1 Juan 3:23). Li Pablo xtoke chal kaʼitik ti kʼanelale oy smukʼul yoʼonton xchiʼuk lek yoʼonton. Mu xtiʼetuk yoʼonton, mu xakʼ sba ta ichʼel ta mukʼ ta sventa ti kʼusi xuʼ yuʼune, muʼyuk chkʼaʼepal satinvan, maʼuk tsaʼ li kʼusi lek chaʼi stuke. Muʼyuk chlik skʼakʼal yoʼonton mi jaʼuk bu chakʼ ta venta li kʼusi chopole. Xmuyubaj ta sventa li kʼusi melele, maʼuk xmuyubaj-o li kʼusi muʼyuk tukʼe. Chchʼay noʼox ta yoʼonton skotol, ta xchʼun, tsmala xchiʼuk tstsʼik yuʼun skotol. Li kʼanelale mu xlaj-o skʼoplal (1 Corintios 13:4-8).
8. ¿Kʼu yuʼun skʼan chkakʼtik ta ilel ti jkʼanojtik li jchiʼiltaktik ta chʼunolajele?
8 Mi chkakʼtik xchʼiesbutik kʼanelal ta jtojolaltik li xchʼul espiritu Diose, li talelal taje te me oy-o ti kʼuyelan chkil jbatik xchiʼuk Dios xchiʼuk jchiʼiltaktike (Mateo 22:37-39). Xi la stsʼiba li jtakbol Juane: «Li bochʼo mu scʼan xchiʼile, te to oy ta sventa lajel. Scotol li bochʼo xtiʼet yoʼnton yuʼun xchiʼile jaʼ jmilvanej chcʼot. Jnaʼojtic ti mu xcuxi sbatel osil li jmilvaneje», xi (1 Juan 3:14, 15). Li ta voʼneal Israele, li buchʼu chmilvane jaʼ noʼox xuʼ chjatav batel li ta jteklum sventa nakʼobbail mi muʼyuk onoʼox bu skontrainoj li buchʼu la smile (Deuteronomio 19:4, 11-13). Mi chkakʼ akʼo sbeiltasutik li chʼul espiritue, chkakʼtik me ta ilel ti jkʼanojtik li Diose, li jchiʼiltaktik ta chʼunolajele xchiʼuk li yan krixchanoetike.
«Li xcuxetel coʼntontic chacʼ Mucʼul Diose jaʼ stsatsal coʼntontic»
9, 10. ¿Kʼusi jaʼ li kuxetel oʼontonale, xchiʼuk kʼusitik srasonal oy kuʼuntik sventa chkaʼitik?
9 Li kuxetel oʼontonale jaʼ li mukʼta muyubajel chkaʼitike. Li Jeovae jaʼ li «Dios ti echʼem slequile [«ti xmuyubaje», NM]» (1 Timoteo 1:11; Salmo 104:31). Li Jesuse xmuyubaj ta spasel li kʼusi tskʼan sTote (Salmo 40:8; Hebreos 10:7-9). «Li xcuxetel coʼntontic chacʼ Mucʼul Diose jaʼ stsatsal coʼntontic» li voʼotik eke (Nehemías 8:10).
10 Koliyal li kuxetel oʼontonal chlik talel ta stojolal Diose, xkuxet noʼox tajmek koʼontontik ta spasel li kʼusi tskʼane, manchuk mi oy jvokoltik o chkichʼtik kontrainel. ¡Toj ep muyubajel chakʼbutik li yojtikinel Diose! (Proverbios 2:1-5.) Ti xi jmuyubaj tajmek chkil jbatik xchiʼuk Diose jaʼ koliyal ti kojtikinojtik leke xchiʼuk ti oy xchʼunel koʼontontik ta stojolal Jeovae xchiʼuk li ta matanal pojelal laj yakʼ Jesuse (1 Juan 2:1, 2). Ti bu chlik talel kuxetel oʼontonal noxtoke jaʼ ti te kapal jkʼoplaltik xchiʼuk li ermanoetik ta spʼejel Balumil ti stuk noʼox jeche (Sofonías 3:9; Ageo 2:7). Jech xtok, li spatobil oʼontonal ta sventa li Ajvalilal yuʼun Diose xchiʼuk li mukʼta matanal ta xcholel li lekil aʼyeje jaʼ chakʼ ep jmuyubajeltik ek (Mateo 6:9, 10; 24:14). Jaʼ noʼox jech ek ti xuʼ chi jkuxi sbatel osile (Juan 17:3). Ti jech toj kʼupilik sba li kʼusitik jmalaojtike, jaʼ chakʼ jmuyubajeltik ti jechuke (Deuteronomio 16:15).
Li jun oʼontonal xchiʼuk li mukʼul oʼontonale
11, 12. 1) ¿Kʼusi jaʼ li jun oʼontonale? 2) ¿Kʼusi chakʼ ta jkuxlejaltik li jun oʼontonal chakʼ Diose?
11 Li jun oʼontonale —ti jaʼ yan yabtel chʼul espiritue— xuʼ xkaltik ti jaʼ li siketel oʼontonal xchiʼuk ti chʼabal kʼusi chakʼ at-oʼontone. Jaʼ Dios yuʼun jun oʼontonal li jTotik ta vinajele xchiʼuk chalbutik ta melel ti chakʼbe «bendición [li steklumale] ti jun yoʼntonic, ti muʼyuc xa cʼop chaʼyique» (Salmo 29:11; 1 Corintios 14:33). Li Jesuse xi laj yalbe li yajtsʼaklomtake: «Ta xcacʼboxuc comel jun avoʼntonic. Li jun oʼntonal oy cuʼune jaʼ ta xcacʼboxuc comel», xi (Juan 14:27). ¿Kʼuxi chkoltaatik-o li jun oʼontonal taje?
12 Li jun oʼontonal ti laj yakʼbe yajtsʼaklomtak Jesuse la spajesbe li vul oʼontonal oy ta stojolalike xchiʼuk la xyochbe li xiʼel chaʼiike. Kʼalal laj yichʼik li chʼul espiritu ti albilik onoʼoxe, mas to jun yoʼonton laj yaʼi sbaik (Juan 14:26). Li avie, ta sventa li chʼul espiritu xchiʼuk ti chkichʼtik takʼbel li j-orasiontike, ta jkʼupintik «li jun oʼntonal chacʼ [Dios]» ti mu kʼusi xkoʼolaj-oe, ti chʼanxi yuʼun jnopbentik xchiʼuk koʼontontike (Filipenses 4:6, 7). Jech xtok, li xchʼul espiritu Jeovae tskoltautik sventa muʼyukuk kʼop kuʼuntik xchiʼuk li kermanotaktike xchiʼuk li yan krixchanoetike (Romanos 12:18; 1 Tesalonicenses 5:13).
13, 14. ¿Kʼusi jaʼ li mukʼul oʼontonale, xchiʼuk kʼu yuʼun skʼan chkakʼtik ta ilel?
13 Li mukʼul oʼontonale snitoj sba skʼoplal xchiʼuk li jun oʼontonale, yuʼun jaʼ jtos talelalil ti chkoltavan ta stsʼikel lek li kʼusi chopol chkichʼtik pasbele xchiʼuk ti jpatoj koʼontontik ti chchapaj onoʼoxe. Oy smukʼul yoʼonton li Diose (Romanos 9:22-24). Li Jesuse chakʼ ta ilel ek li talelal taje, xchiʼuk li voʼotike ta jbalintik ek, yuʼun xi la stsʼiba li jtakbol Pabloe: «La xcʼuxubinun li Jesuse, yuʼun jech laj yacʼ ta ilel ta jventa ti toj mucʼ yoʼntone, yuʼun jech acʼo yilic ti xuʼ tsta xcuxlejalic sbatel osil ec li bochʼotic ta xchʼunique», xi (1 Timoteo 1:16).
14 Li mukʼul oʼontonale jaʼ tskoltautik sventa chkuch kuʼuntik kʼalal oy buchʼu tsyayijesutik ta skʼopojel, ta kʼusitik tspas o kʼalal mu stsakutik ta mukʼe. Li jtakbol Pabloe xi laj yalbe li yermanotak ta chʼunolajele: «Tsʼicbo abaic acotolic», xi (1 Tesalonicenses 5:14, Ch). Ta skoj ti jmulavilutik jkotoltike xchiʼuk ti mu tukʼuk chbat ta pasel kuʼuntik skotole, koliyal chkalbetik ti oy smukʼul yoʼonton yantik kʼalal oy kʼusi chopol chkʼot ta pasel kuʼuntik ta stojolalike. Jech oxal chaʼa, kakʼbetik yipal ti xi jmuyubaj noʼox «ta scotol li vocole» (Colosenses 1:9-12).
Lekil kʼopojel xchiʼuk lekil oʼontonal
15. ¿Kʼuxi ta akʼel ta ilel li lekil kʼopojel xchiʼuk li lekil oʼontonale, xchiʼuk buchʼutik chakʼ kiltik taje?
15 Li lekil kʼopojel xchiʼuk lekil oʼontonale, jaʼ talelaletik ti lek snitoj sba skʼoplale. Chvinaj kʼalal oy ta koʼontontik li yantike, kʼalal lek kʼusitik ta jpastike xchiʼuk ti lek chi jkʼopoj xchiʼukike. Li Jeova xchiʼuk xNichʼone lek yoʼontonik (Romanos 2:4; 2 Corintios 10:1). Jaʼ jech chkichʼtik albel ti jechukutik ek li yajtunelutik Dios xchiʼuk Cristoe (Miqueas 6:8; Colosenses 3:12). Kʼalal to ta krixchanoetik ti muʼyuk lek chil sbaik xchiʼuk Diose xuʼ chakʼik ta ilel ti chkʼuxubinvanike o ti lek yoʼontonike (Hechos 27:3; 28:2). Jech oxal chaʼa, li voʼotik ti ta jpastik li kʼusi tskʼan chʼul espiritue, skʼan me xkakʼtik ta ilel li slekil koʼontontike.
16. ¿Kʼusitik ti chkʼot ta pasel ti skʼan tstij koʼontontik ta yakʼel ta ilel slekil koʼontontike?
16 Bakʼintike oy srasonal chi j-ilinutik ta skoj ti tsyayijesutik ta skʼopojel li jun krixchanoe o ti muʼyuk tstsakutik ta mukʼe. Akʼo mi jech, skʼan chkakʼtik ta ilel slekil koʼontontik. «Me chaʼilinique, mu me teuc xasaʼ amulic o —xi laj yal li Pabloe—. Mu me sbejeluc cʼacʼal xaʼilinic. Mu me xajambeic sbe li pucuje», xi. Vaʼun xi to laj yal xtoke: «Lec xavil abaic, cʼux xavaʼay abaic ta jujuntal. Talbat [xa pasbe] abaic perdón jech chac cʼu chaʼal la spasboxuc perdón Dios ta sventa li Cristoe», xi (Efesios 4:26, 27, 32). Skʼan lekuk koʼontontik, mas to li ta stojolal buchʼutik oy svokolike. Pe tana un, mi muʼyuk chakʼbeik mantal ta Vivlia li moletik yajtsʼaklomtak Cristo li buchʼu xibal sba chikta li sbelel tukʼilal xchiʼuk li kʼusi melel ta skoj ti chiʼik mi tsyayijesbeik yoʼontone, muʼyuk me chakʼ ta ilel slekil yoʼontonik (Efesios 5:9).
17, 18. ¿Kʼusi jaʼ ek li lekil oʼontonale, xchiʼuk kʼusi yabtel ta jkuxlejaltik?
17 Li lekil oʼontonale jaʼ jun lekil talelal ek, mukʼta lekil talelal, jaʼ li spasel kʼusitik leke. Li Diose lek yoʼonton ta jyalel (Salmo 25:8; Zacarías 9:17). Li Jesuse ojtikinbil ti lek stalelal xchiʼuk ti oy yuʼun li mukʼta lekilal talelal taje. Akʼo mi jech, kʼalal «Lequil jchanubtasvanej» xi albat skʼoplale, muʼyuk bu lek laj yaʼi ti Lekil xi laj yichʼ albele (Marcos 10:17, 18). Li srasonal ti muʼyuk la skʼan jech chichʼ biiltasele jaʼ van ti snaʼoj lek ti jaʼ noʼox Dios ti buchʼu mas yakʼoj ta ilel lekil oʼontonale.
18 Ti bu kʼalal xuʼ kuʼuntik chkakʼtik ta ilel slekil koʼontontike oy kʼusi tsmakutik ta be: jaʼ li mulil jkuchojtike (Romanos 5:12). Akʼo mi jech, li talelal taje xuʼ chkakʼtik ta ilel mi ta jkʼanbetik Dios ti akʼo xchanubtasutik ti oyuk slekil koʼontontike (Salmo 119:66, Ch). Li Pabloe xi la stsʼibabe li yajtsʼaklomtak Cristo ta Romae: «Quermanotac, jchʼunoj, jnaʼoj lec ti nojem xa ta avoʼntonic li slequil avoʼntonique, xchiʼuc ti xavotquinic xa lec scotole», xi (Romanos 15:14). Li jkʼelvanej yajtsʼaklom Cristoe «tscʼan jaʼ oy ta yoʼnton li cʼusitic leque» (Tito 1:7, 8). Mi chkakʼ akʼo sbeiltasutik li xchʼul espiritu Diose, chkichʼtik ojtikinel ta sventa li slekil koʼontontike, xchiʼuk ta skoj li kʼusi lek ta jpastike ta svulesutik ta sjol li Jeovae (Nehemías 5:19; 13:31).
«Muc nacauc noʼox ta jcuy jbatic ti jchʼunojtique»
19. Alo kaʼitik kʼusi jaʼ li xchʼunel oʼontonal jech kʼuchaʼal chal Hebreos 11:1.
19 Li xchʼunel oʼontonale, ti jaʼ yabtel ek li chʼul espiritue, «jaʼ chacʼ ti jbel scʼoplal ta jtatic o li cʼusi ta jmalatic ti muʼyuc to quilojtique» (Hebreos 11:1). Mi oy xchʼunel koʼontontike, ta me jchʼuntik ta melel ti chkʼot ta pasel ta persa skotol li kʼusitik yaloj Jeovae. Li sprevail o skʼelobil taje toj lek me xvinaj, akʼo mi muʼyuk to kilojtik, yuʼun chichʼ alel ti xkoʼolaj kʼuchaʼal jaʼ xchʼunel oʼontonal li sprevailtak taje. Jech kʼuchaʼal liʼe, li kʼusitik pasbile chakʼ jchʼuntik ti oy jun Jpasvaneje. Jaʼ me jech xchʼunel koʼontontik mi ta jpastik-o li kʼusi tskʼan chʼul espiritue.
20. ¿Kʼusi jaʼ «li mulil chispajesutique», xchiʼuk kʼuxi xuʼ mu xi jtsʼuj-o li ta mulil taje xchiʼuk li ta yabtel bekʼtalile?
20 Ti jech muʼyuk xchʼunel koʼontontike jaʼ «li mulil chispajesutique» (Hebreos 12:1). Sventa mu jpastik li yabtel bekʼtalile, li saʼel kʼulejale xchiʼuk li jecheʼ chanubtaseletik ti tslajesbe skʼoplal xchʼunel oʼontonale, skʼan me xkakʼ akʼo sbeiltasutik li xchʼul espiritu Diose (Colosenses 2:8; 1 Timoteo 6:9, 10; 2 Timoteo 4:3-5). Li chʼul espiritu taje chakʼbe xchʼunel yoʼonton yajtuneltak Jeova avi jech kʼuchaʼal laj yakʼbe li yajrextikotak ta voʼne kʼalal muʼyuk toʼox talem Cristoe xchiʼuk li yan krixchanoetik ti albil skʼoplalik ta Vivliae (Hebreos 11:2-40). Jech xtok, ti «muc nacauc noʼox ta jcuy jbatic ti jchʼunojtique», xuʼ tstsatsubtasbe xchʼunel yoʼonton li yantike (1 Timoteo 1:5; Hebreos 13:7).
Oyuk slekil yutsil koʼontontik xchiʼuk jnaʼtikuk spajesel jbatik
21, 22. ¿Kʼusi smelolal ti oy slekil yutsil koʼontontike, xchiʼuk kʼu yuʼun skʼan chkakʼtik ta ilel?
21 Kʼalal oy slekil yutsil koʼontontike jaʼ skʼan xal ti manxoutik xchiʼuk ti lek jtalelaltik ta stojolal yantike. Jaʼ jtos stalelal li Diose. Jnaʼojtik taje, yuʼun li Jesuse lek laj yakʼ ta ilel kʼuyelan stalelal li sTote, yuʼun lek yoʼonton laj yakʼ ta ilel (Mateo 11:28-30; Juan 1:18; 5:19). Vaʼun chaʼa, ¿kʼusi skʼan spasik li yajtuneltak Diose?
22 Li yajtsʼaklomutik Cristoe, skʼan chkakʼtik ta ilel «ti oyuc slequilal yutsilal [koʼontontik]» ta stojolal skotol krixchanoetike (Tito 3:2, Ch). Jaʼ jech ta jpastik kʼalal ta jcholtik mantale. Jech xtok, li buchʼutik lek stalelalik ta mantale chichʼik albel ti oyuk slekil yutsil yoʼontonik ta stukʼibtasel li buchʼutik chʼayemik ta bee (Gálatas 6:1, Ch). Jkotoltik xuʼ jkolta jbatik sventa jun oyutik xchiʼuk ti oyuk jun oʼontonal kʼalal bikʼit chkakʼ jbatik xchiʼuk ti manxoutike (Efesios 4:1-3). Jech, sventa oyuk slekil yutsil koʼontontike, tsots skʼoplal ti jpastik-o li kʼusi tskʼan chʼul espiritue xchiʼuk ti jnaʼuk jpajes jbatike.
23, 24. ¿Kʼusi jaʼ li pajesejbaile, xchiʼuk kʼu yelan tskoltautik?
23 Li pajesejbaile tskoltautik ta spajesel li jnopbentike, li jkʼopojeltike xchiʼuk li kʼusitik ta jpastike. Li Jeovae la spajes sba ta stojolal li jbabiloniaetik ti la sjinesik li Jerusalene (Isaías 42:14). Jaʼ jech laj yakʼ kiltik ek li Jesuse, yuʼun la snaʼ spajesel sba kʼalal laj yil svokole. Li jtakbol Pedro eke la stojobtas yermanotak kʼalal laj yalbe ti akʼo yakʼbeik to echʼel yipal saʼel spajesobbailik mi staojik xaʼox li yojtikinobil Diose (1 Pedro 2:21-23; 2 Pedro 1:5-8, Ch).
24 Skʼan chakʼik ta ilel ti tspajes sbaik ek li moletik yajtsʼaklomtak Cristoe (Tito 1:7, 8). Ta melel, skotol li buchʼutik chakʼ akʼo xbeiltasatik yuʼun chʼul espiritue skʼan oyuk yuʼunik li talelal taje, yuʼun jaʼ jech mu xmulivajik, mu chopoluk skʼopojelik xchiʼuk mu spasik kʼusiuk yan ti xuʼ mu xa lekuk ch-ilatik yuʼun li Diose. Mi chkakʼtik akʼo yakʼbutik pajesejbail li xchʼul espiritu Diose, li yantike ta me xakʼik venta ta jkʼopojeltik xchiʼuk ta jtalelaltik.
Jpastik-o li kʼusi tskʼan chʼul espiritue
25, 26. Ti jech ta jpastik li kʼusi tskʼan chʼul espiritue, ¿kʼuxi chvinaj ta sventa ti kʼu yelan chkil jbatik xchiʼuk yantike xchiʼuk ti kʼusi jmalaojtik ta tsʼakale?
25 Mi ta jpastik li kʼusi tskʼan chʼul espiritue, ta sjunul me koʼontontik chkaltik batel li Ajvalilal yuʼun Diose (Hechos 18:24-26). Ta me skʼupinik kʼalal ta jchiʼintik ta loʼil li yantike, mas to li buchʼutik chichʼik ta mukʼ Diose. Jech xtok, mi chkakʼ akʼo sbeiltasutik li chʼul espiritue ta me jtsatsubtastik ta mantal li kermanotaktike (Filipenses 2:1-4). ¿Mi mu jechuk oy ta koʼontontik jkotoltik li yajtsʼaklomutik Cristoe?
26 Mu kʼunuk ta pasel li kʼusi tskʼan chʼul espiritue, yuʼun ventainbil yuʼun Satanás li balumile (1 Juan 5:19). Akʼo mi jech, ta smiyonal noʼox krixchanoetik yakal tspasik. Mi ta sjunul koʼontontik ta jpat koʼontontik ta stojolal Jeovae, ta me jkʼupintik li kuxlejal avie xchiʼuk xuʼ me xi jxanav ta sbatel osil li ta stukʼil betak jTotike, ti jaʼ chakʼbutik xchʼul espiritu ta skoj ti toj echʼem chkʼanvane (Salmo 128:1; Proverbios 5, 6).
¿Kʼusi cha takʼ?
• Mi ta jpastik li kʼusi tskʼan chʼul espiritue, ¿kʼuxi ta jkʼupintik ti kʼu yelan chkil jbatik xchiʼuk Dios xchiʼuk li xNichʼone?
• ¿Kʼusi talelaletik yichʼoj li yabtel chʼul espiritue?
• ¿Kʼutik yelan chkakʼtik ta ilel li yabtel chʼul espiritue?
• Ti jech ta jpastik li kʼusi tskʼan chʼul espiritue, ¿kʼuxi chvinaj ta jkuxlejaltik li avie xchiʼuk ti kʼusi jmalaojtik ta tsʼakale?
[Lokʼol ta pajina 14]
Kakʼtik ta ilel slekil koʼontontik ta jkʼopojeltik xchiʼuk ta kʼusitik ta jpastik