¿Kʼutik yelan chkakʼtik ta ilel ti chi jkʼuxubinvane?
«Jpastic cʼusi lec ta stojol scotol cristianoetic [...]. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique.» (GÁLATAS 6:10.)
1, 2. ¿Kʼusi lekil chanubtasel ta jtatik ta sventa kʼuxubinel li ta lokʼolkʼop ta sventa jsamaria vinike?
JUN vinik ti lek xchanoj Mantale la xchiʼin ta loʼil Jesús, vaʼun xi la sjakʼbee: «¿Bochʼo li jchiʼile?», xut. Sventa stakʼbe li Jesuse laj yalbe jun lokʼolkʼop: «Oy jun jchiʼiltic ilocʼ batel ta Jerusalén, ibat ta Jericó. Te itsacat ta be yuʼun jʼeleqʼuetic. Ipojbat scotol li cʼusitic oy yuʼune, xchiʼuc imajat comel. Chamen xa icom yuʼunic yilel. Tsʼacal te ilocʼ tal jun pale. Cʼalal laj yil te mochole, la sjoy sbe; ta nom noʼox ijelov batel. Tsʼacal te ilocʼ tal jun leví noxtoc. Cʼalal ivul yoʼ bu mochol li vinique, la sjoy sbe, jech ta nom noʼox ijelov batel. Tsʼacal te ilocʼ tal jun samaria vinic. Cʼalal laj yil li vinique, toj abul sba laj yil. Inochʼaj batel ti bu mochole. La xpoxtabe scotol ti bu tuchʼemique. Laj yacʼbe aceite xchiʼuc yaʼlel tsʼusub; la xpixbe ta pocʼ. La scajan batel ta sburo; laj yicʼ batel ta snail vaybal. Te la xchabi. Ta yocʼomal cʼalal ilocʼ batele, laj yacʼbe comel chib denario taqʼuin li yajval nail vaybale. Jech laj yalbe comel: “Chabibun lec li vinique. Me oy to cʼusi ep chlaj avuʼune, ta jtojbot scotol cʼalal me lisut tale”», xi. Vaʼun, li Jesuse xi la sjakʼbe li vinike: «Li oxibique ¿bochʼo junucal la scuy ta xchiʼil li jun vinic ti imajat yuʼun jʼeleqʼuetique?», xut. Xi itakʼav li vinike: «Jaʼ li bochʼo icʼuxubinvane», xi (Lucas 10:25, 29-37 sbavokʼal).
2 Ti kʼuyelan la skʼel li povre jxanvil li jsamaria vinike chakʼ lek ta ilel kʼusi smelolal li melel kʼuxubinele. Kʼuxubaj tajmek ta yoʼonton, la skolta ti bu kʼalal xuʼ yuʼun li jyayijele, manchuk mi jyanlum laj yil. Jech, li kʼuxubinele muʼyuk bu yichʼoj ta venta mi yan slumal, mi yan srelijion o mi jelel stalelal xkuxlejal li jun krixchanoe. Jkʼeltik avil ti xi la stsutses sloʼil ta sventa jlekil samaria vinik li Jesuse, xi laj yalbe li buchʼu chchiʼin ta loʼile: «Batan, bat cʼuxubinvanan jech ec li voʼote», xut (Lucas 10:37 xchaʼvokʼal). Skʼan jtsaktik ta mukʼ ek li tojobtasel taje xchiʼuk xkakʼbetik yipal ta xkʼuxubinel li jchiʼiltaktike. Tana un, ¿kʼutik yelan xuʼ xkakʼtik ta ilel jujun kʼakʼal ti chi jkʼuxubinvane?
Kʼalal oy ermanoetik ti «muʼyuc scʼuʼ spo[kʼike]»
3, 4. ¿Kʼu yuʼun mas to tsots skʼoplal skʼan xkakʼtik ta ilel xkʼuxul koʼontontik li ta tsobobbaile?
3 Xi chalbutik li jtakbol Pabloe: «Jpastic cʼusi lec ta stojol scotol cristianoetic ti cʼalal jaʼ yoraile. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique», xi (Gálatas 6:10). Ti jech teuk ta joltik taje, baʼyel jkʼeltik jlomuk ti kʼutik yelan xuʼ jkʼuxubintik li jchiʼiltaktik ta chʼunolajele.
4 Li Santiago yajtsʼaklom Cristoe chalbe li melel yajtsʼaklomtak Cristo ti akʼo xkʼuxubin sbaike, xi chale: «Li bochʼo muʼyuc cʼux ta yoʼnton xchiʼile, jech muʼyuc cʼux ta oʼntonal ec ti cʼalal ta xchapanate», xi (Santiago 2:13). Li sloʼilal ti bu laj yichʼ alel taje chakʼ kiltik jaytosuk ti kʼuyelan xuʼ xi jkʼuxubinvane. Jech kʼuchaʼal liʼe, ta Santiago 1:27 ta jkʼeltik ti yichʼel ta mukʼ Diose «muʼyuc cʼusi chopol tspas ta stojol li Jtotic Diose. Jaʼ noʼox jech tspas chac liʼi: Ta sqʼuel meʼon ololetic xchiʼuc meʼon antsetic ti cʼalal oy svocolique, xchiʼuc mu soques sba ta sventa li cʼusitic chopol liʼ ta banamile». Jech xtok, Santiago 2:15, 16 xi chalbutike: «Jech chac cʼu chaʼal me oy jchʼunolajel, me vinic me ants, ti muʼyuc scʼuʼ spocʼ xchiʼuc ti muʼyuc sveʼel jujun cʼacʼale, me jech chavalbeic: “Junuc avoʼnton batan; mu me xalaj ta sic, xchiʼuc te bu chata batel aveʼel”, me xavutique, pero me muʼyuc chavacʼbeic jutuc li cʼusi ta xtun yuʼune, ¿cʼusi bal o ti jech chavalbeique?», xi.
5, 6. ¿Kʼutik yelan xuʼ xi jkʼuxubinvan li ta jtsobobbailtike?
5 Li melel relijione chchanubtasutik ti akʼo jkʼuxubin jbatik ta jujuntale xchiʼuk ti jkoltatik li buchʼutik skʼanik mas koltaele. Mu me junuk noʼox koʼontontik chkaʼitik mi jaʼ noʼox chkalbetik «lek oyan», mi xkutik li kermanotike. Yuʼun li kʼuxubinele skʼan tstij koʼontontik ta yakʼbel li kʼusitik mas chtun yuʼune (1 Juan 3:17, 18). Xuʼ jpasbetik sveʼel li buchʼutik ipike, jkoltatik ta yabtelik li buchʼutik malubemik xae, ti x-echʼuk kikʼtik ta karo sventa chbatik ta tsobajel li buchʼutik chtun yuʼunike, ti jkoltatik ta sjunul koʼontontik li buchʼutik staik-oe xchiʼuk yantik kʼuyelan ti xuʼ xi jkʼuxubinvane (Deuteronomio 15:7-10).
6 Yantik x-epaj batel jujun kʼakʼal li buchʼutik ch-ochik ta tsobobbaile. Mi tsots xa onoʼox skʼoplal ti jkoltatik ta sventa li kʼusitik chtun yuʼunike, mas to me tsots skʼoplal ti jkoltatik ta sventa mantale. Xi chkichʼtik albel jkotoltike: «Tsatsubtasbeic me yoʼnton li bochʼotic muʼyuc stsatsal yoʼntonique. Coltaic me li bochʼotic aluben noʼox chaʼyique», xi j-utat (1 Tesalonicenses 5:14). «Li meʼeletique» chichʼik albel ti «acʼo yaqʼuic ta chanel li cʼusi leque» (Tito 2:3). Jech xtok, jujun jkʼelvanej yajtsʼaklom Cristoe skʼan «chcʼotic jech chac cʼu chaʼal jpojubbailtic ta tsatsal icʼ, jaʼ jech chac cʼu chaʼal jnacʼubbailtic cʼalal chtal tsots icʼal voʼ[e]» (Isaías 32:2).
7. ¿Kʼusi chakʼik jchantik ta sventa kʼuxubinel li yajtsʼaklomtak Cristo ta Antioquía ta Siriae?
7 Pe li ermanoetik ta baʼyel sigloe maʼuk noʼox la skoltaik xchiʼuk la stsatsubtasbeik yoʼonton li meʼon antsetike, li meʼon ololetike xchiʼuk yan ermanoetik ta stsobobbailik ti oy kʼusi chtun yuʼunike. Yuʼun la xchapan sbaik sventa tskoltaik xtok li jchʼunolajeletik ta yantik balumile. Jvules ta joltik li kʼusi kʼot ta stojolalik li yajtsʼaklomtak Cristo ta Antioquía ta Siriae. Kʼalal laj yal li j-alkʼop Agábo ti chtal «tsots viʼnal ta scotol banamile», ¿kʼusi la spasik? «La snopic ti ta stacbeic batel coltael li jchʼunolajeletic ta Judea banamile, jaʼ ti cʼu yepal xuʼ yuʼunic jujunique.» Vaʼun, li kʼusitik laj yakʼike «laj yacʼbeic batel ta scʼob li Bernabé xchiʼuc Sauloe», jaʼ jech ikʼot ta skʼob moletik li koltael ta balumil taje (Hechos 11:28-30). ¿Kʼusi xuʼ xkaltik li ta jkʼakʼaliltike? Li «jʼabtel ti jun [«tukʼ», NM] yoʼnton [...], ti lec bije» svaʼanoj komiteetik sventa tskolta li ermanoetik ti oy svokolik ta skoj tsatsal ikʼal voʼetik, nikeletik, tsunamietik xchiʼuk yantik vokolil kʼuchaʼal taje (Mateo 24:45). Kʼalal ta jchʼak jkʼakʼaltik, chi jkoltavan ta abtel xchiʼuk chkakʼ kʼusitik kuʼuntik sventa chi jkoltavane, ta melel jaʼ jech ta jkʼuxubintik li kermanotaktike.
«Me chatʼujic noʼox bochʼotic lec chavilique»
8. ¿Kʼu yuʼun skontrainoj kʼuxubinel ti ta jtʼujtik buchʼu lek chkiltike?
8 Li ta skarta Santiagoe, tspʼijubtasutik ta sventa li talelalil ti skontrainoj li kʼuxubinel xchiʼuk li mantal sventa kʼanelale. «Me chatʼujic noʼox bochʼotic lec chavilique, chata amulic, jbajmantaloxuc chacʼotic, yuʼun mu xachʼunbeic li smantaltac Diose», xi (Santiago 2:8, 9). Jech, mi jaʼ ta jtʼujtik li buchʼu oy lek stakʼine o ti lek ojtikinbile, xuʼ van xkakʼ jbatik ta vokol, yuʼun xiʼel mu xa xkaʼibetik li «scʼop meʼone» (Proverbios 21:13). Ta melel, mi ta jtʼujtik li buchʼutik lek chkil jbatik xchiʼuke xuʼ van mu xa xi jkʼuxubinvan. Jech oxal chaʼa, mi ta jkʼan chi jkʼuxubinvane, skʼan lek chkiltik skotol krixchano.
9. Kʼalal ta jtsaktik mas ta mukʼ jun krixchanoe, ¿kʼu yuʼun xuʼ xkaltik ti muʼyuk yakal ta jtʼujtik ti buchʼutik lek chkiltike?
9 Pe taje, ¿mi jaʼ van skʼan xal ti muʼyuk buchʼu xuʼ xkichʼtik mas ta mukʼe? Moʼoj ta melel. Jnopbetik skʼoplal li Epafroditoe, xchiʼil ta abtel li Pabloe. Li jtakbole xi laj yalbe li yajtsʼaklomtak Cristo ta Filipose: «Li bochʼotic jaʼ jech yoʼntonic jech chac cʼu chaʼal li Epafroditoe, ichʼic me ta mucʼ», xi. ¿Kʼu yuʼun? «Yuʼun li Epafroditoe jutuc mu icham ta sventa yabtel li Cristoe. Solel laj yacʼ sbecʼtal o ta jcoltael, mu sventauc me te chcham o. Yuʼun la snaʼ ti jech avoʼnton chacʼan chacoltaicune, jaʼ noʼox ti muc xatal atuquique.» (Filipenses 2:25, 29, 30.) Jech ta melel, tukʼ la spas yabtel li Epafroditoe, jaʼ yuʼun staʼo ti mas chichʼik ta mukʼe. Jech noxtok, xi ta jkʼeltik ta 1 Timoteo 5:17: «Li jcholcʼopetic [moletik] ti lec tsventain yabtelique, tscʼan echʼem acʼo ichʼaticuc ta mucʼ. Jaʼ echʼem acʼo ichʼatuc ta mucʼ li bochʼo yacʼoj yoʼntonic ta xcholel scʼop Diose, xchiʼuc ta xchanubtasvanique», xi. Jech, staik-o xichʼik ichʼel ta mukʼ li buchʼutik lek stalelalik ta mantale. Ti jech chkichʼtik ta mukʼe mu yuʼunuk yakal ta jtʼujtik sventa lek chkil jbatik xchiʼukik.
Li «jbijiltic chlic tal ta stojol Diose» ep «chijcʼuxubinvanutic» yuʼun
10. ¿Kʼu yuʼun skʼan jtsal li kokʼtike?
10 Li Santiagoe xi chal xtok ta sventa li kokʼtike: «Toj chopol. Mu stacʼ xʼoch ta be. Yuʼun noj ta veneno ti ta xmilvane. Yuʼun ta quetic noʼox ta xcalbetic vocol ti Jtotic Diose. Jaʼ jech xtoc ta quetic noʼox ta jchopol-cʼoptatic ti cristianoetique ti cʼalal jaʼ slocʼobbail stuc ti Dios spasoje. Yuʼun ta quetic noʼox ta xlocʼ ti cʼusi lec ta alele. Jaʼ jech xtoc ta quetic noʼox ta xlocʼ ti cʼusi chopol ta alele», xi. Vaʼun, xi to chal batel li ta yantik versikuloe: «Me ta scoj yitʼixal yoʼnton, me ta scoj noʼox xchopolil yoʼnton, xchiʼuc me ta scoj yuʼun tscʼan tstsalvane, mu me snop ti lec bije; xchiʼuc mu me snop ti xchʼunoj li cʼusi melele. Yuʼun maʼuc jech li bijilil chlic tal ta stojol Diose. Leʼe jaʼ sventa noʼox banamil, stalel noʼox cristiano; jaʼ sventa pucuj. Yuʼun me jaʼ noʼox yitʼixal coʼntontic, me jaʼ noʼox oy ta coʼntontic tsalbaile, te jinil-vucʼulutic o, te chlic o ep cʼusitic chopol. Yan li jbijiltic chlic tal ta stojol Diose, lec scotol cʼusitic ta jpastic yuʼun. Jech noxtoc mu jliquestic cʼop, oy ta coʼnton jchiʼiltic, oy slequil coʼntontic; chijcʼuxubinvanutic, muc tʼujbiluc noʼox bochʼo chquichʼtic ta mucʼ, xchiʼuc muc jaʼuc noʼox ta jmactic satil», xi (Santiago 3:8-10 sbavokʼal, 14-17).
11. ¿Kʼuxi chvinaj ti oy kʼuxubinel kuʼuntik ta skotol li kʼusitik chkaltike?
11 Mi lek ta jtunes li kokʼtike, chkakʼtik ta ilel ti jaʼ tsbeiltasutik li pʼijilal ti «chijcʼuxubinvanutic» yuʼune. Pe mi chkakʼtik akʼo stsalutik li itʼixale, li kontrainvaneje xchiʼuk ti jtoy xa jbatik ta skoj li kʼusitik lek jtaojtike, mi ta jutik kʼop o mi chi jchopol loʼiltavane, ¿kʼusi van yakal xkakʼtik ta ilel? Salmo 94:4 xi chale: «Li chopol cristianoetic leʼe jtoybaetic, stuc noʼox yacʼoj sbaic o», xi. Mu me xchʼay ta joltik xtok ti buchʼu chloʼiltavane ta me sokbe skʼoplal li buchʼu chʼabal smule (Salmo 64:2-4). Jaʼ noʼox jech ek «li chopol testigoe [ti] puru epalcʼop tspas[e]» tsots me vokol chakʼ (Proverbios 14:5; 1 Reyes 21:7-13). Jaʼ yuʼun, kʼalal yalojbe xaʼox skʼoplal xchopol tunesel kokʼtik li Santiagoe, xi to chal batel xtoke: «Quermanotac, mu lecuc ti jech chcʼot ta pasel cuʼuntique», xi (Santiago 3:10 xchaʼvokʼal). Jech kʼuchaʼal chkiltike, li ta ye jkʼuxubinvaneje jaʼ noʼox skʼan xlokʼ lekil kʼopetik xchiʼuk ti oy srasonale. Li Jesús eke, xi la spʼijubtasutike: «Ti cʼu yepal muʼyuc stu cʼusi chavalique ta onoʼox xcʼot avichʼic jacʼbel ti cʼalal tsta yorail ta xchapanvan li Diose», xi (Mateo 12:36). Ta sventa ti jeche, ¡toj tsots me skʼoplal ti vinajuk ti oy kʼuxubinel kuʼuntik ta skotol li kʼusitik chkaltike!
Li yajtsʼaklomtak Cristoe «[ts]pasbeic perdón li bochʼo oy smul [y]uʼunique»
12, 13. 1) ¿Kʼusi jtosukal skʼoplal kʼuxubinel chakʼ ta ilel li lokʼolkʼop ta sventa li j-abtel ti ep tajmek yil ta stojolal yajvale? 2) ¿Kʼusi smelolal ti chkakʼtik perton «cʼalal to ta lajuneb xchanvinic (70) ta velta chichʼ atel li vucube»?
12 Ta yan lokʼolkʼop ti laj yal Jesuse, chchanubtasutik yan kʼuyelan xuʼ xi jkʼuxubinvan. Jun j-abtele oy yil lajunmil talento, jaʼ xkaltik, 60 miyon denario takʼin ta stojolal li yajvale. Chʼabal kʼusi oy yuʼun sventa tstoj-o li yile, jech oxal, la skʼanbe vokol ti akʼo xkʼuxubinat yuʼun li ajvalile. «Icʼuxubaj ta yoʼnton» li ajvalile, la xchʼaybe li yile. Ta tsʼakale, li j-abtele la snup ta be xchiʼil ta abtel ti muʼyuk xtoj yuni il eke: 100 denario takʼin. Mi jutebuk la xkʼuxubin, la stikʼ ta chukel. Pe kʼalal laj yaʼi li kʼusi kʼot ta pasel li ajvalile, la stak ta ikʼel li baʼyel j-abtele, vaʼun xi laj yalbee: «Toj chopol jʼabtelot. Li voʼote la jchʼaybot scotol avil ti cʼalal laj acʼanbun vocol ta jtojole. ¿Me mu xuʼ jech chacʼuxubin achiʼil ec jech chac cʼu chaʼal la jcʼuxubinote?», xut. Vaʼun la stikʼ ta chukel. Xi la stsutses slokʼolkʼop li Jesuse: «Jaʼ noʼox jech chaspasboxuc ec li Jtot te oy ta vinajele me mu scotoluc avoʼntonic jʼechʼel chapasbeic perdón smul li achiʼilique», xi (Mateo 18:23-35).
13 ¡Toj kʼupil sba li lokʼolkʼope! ¡Tsots skʼoplal chal ti skʼan jpastik perton mi ta jkʼan chi jkʼuxubinvane! Li Jeovae la xchʼay li jmukʼta iltik ta sventa li mulile. ¿Mi mu oyuk srasonal ti ta «[jpasbetik] perdón li bochʼo oy smul [kuʼuntike]»? (Mateo 6:14, 15.) Kʼalal muʼyuk toʼox bu sloʼiltaoj Jesús li lokʼolkʼop ta sventa li j-abtel ti muʼyuk xkʼuxul yoʼontone, xi jakʼbat yuʼun li Pedroe: «Cajval, ¿jayib velta tscʼan ta jpasbe perdón cʼalal tsta smul ta jtojol li jchiʼile? ¿Me tscʼan cʼalal to ta vucub velta?», xut. Xi la stakʼ li Jesuse: «Muʼyuc chacalbot ti cʼalal to ta vucub veltae. Jaʼ tscʼan chapasbe perdón cʼalal to ta lajuneb xchanvinic (70) ta velta chichʼ atel li vucube», xi (Mateo 18:21, 22). Kʼuchaʼal chkiltike, li buchʼu chkʼubinvane tspas perton «cʼalal to ta lajuneb xchanvinic (70) ta velta chichʼ atel li vucube», jaʼ xkaltik, chʼabal spajeb.
14. Jech kʼuchaʼal chal Mateo 7:1-4, ¿kʼuxi xuʼ xkakʼtik ta ilel jujun kʼakʼal ti chi jkʼuxubinvane?
14 Li ta Mantaletik ta Vitse, li Jesuse chakʼ kiltik yan kʼuxi xuʼ chi jkʼuxubinvan: «Mu me xaticʼbe smul achiʼilic, yuʼun jech mu xavichʼ ticʼbel amulic yuʼun Dios ec. Yuʼun ti cʼu xʼelan chaticʼbe smul achiʼilique, jaʼ jech chavichʼ ticʼbel amulic ec. [...] ¿Cʼu yuʼun ti chaqʼuelbe li juteb scʼaʼepal sat achiʼil ti jaʼ mu xaqʼuel li jtel ta tsʼamteʼ te xtelet ta asat atuque? ¿Cʼu xʼelan xuʼ jech chavalbe li achiʼile: “Laʼ jloqʼuestic li scʼaʼepal asate”, ti xavute, yuʼun voʼot jtel ta tsʼamteʼ te xtelet ta asat atu[ke]?», xi (Mateo 7:1-4). Ta yan-o kʼope, sventa xkakʼtik ta ilel jujun kʼakʼal ti chi jkʼuxubinvane skʼan xkuch kuʼuntik li xchopolil jchiʼiltaktike, xchiʼuk xtok mu me jchopol kʼoptatik xchiʼuk mu me toj tsotsuk jchapantik.
«Jpastic cʼusi lec ta stojol scotol cristianoetic»
15. ¿Kʼu yuʼun maʼuk noʼox skʼan jkʼuxubintik li yajtsʼaklomtak Cristoe?
15 Li skarta Santiagoe jaʼ chalbe skʼoplal li kʼuxubinel ta stojolal yajtsʼaklomtak Cristoe. Pe taje maʼuk skʼan xal ti jaʼ noʼox skʼan jkʼuxubintik li jchiʼiltaktik ta chʼunolajele. Kakʼtik venta ti «Mucʼul Diose toj lec yoʼnton ta stojol scotol; toj cʼux ta yoʼnton scotol li yabtele» (Salmo 145:9). Ta sventa ti persa skʼan ta «[jchanbetik] yoʼnton li Diose», tsots skʼoplal ek ti «jpastic cʼusi lec ta stojol scotol cristianoeti[ke]» (Efesios 5:1; Gálatas 6:10). Manchuk mi melel ti mu jkʼantik «li cʼusi sventa banamile xchiʼuc li cʼusitic chopol oy ta banamile», maʼuk skʼan xal ti muʼyuk ta koʼontontik li kʼusitik chtun yuʼun li krixchanoetik ta balumile (1 Juan 2:15).
16. ¿Kʼusitik chkichʼtik ta venta ti kʼalal chi jkʼuxubinvane?
16 Li yajtsʼaklomutik Cristoe ta onoʼox jkoltatik ti bu kʼalal xuʼ kuʼuntik li buchʼutik oy svokolike, manchuk mi jaʼ ta skoj ti oy «cʼusi macal ta stojolique», jaʼ xkaltik, ti muʼyuk malabil jech vokolile o ta skoj yan kʼusitik (Eclesiastés 9:11). Jech onoʼox ta melel, ta skoj ti mu koʼoluk li jkuxlejaltike, jelel ti kʼuyelan xuʼ chi jkoltavane xchiʼuk ti kʼusitik xuʼ jpastik ta stojolal li krixchanoetike (Proverbios 3:27). Jech xtok, kʼalal chi jkoltavane, skʼan me xkichʼ jpʼijiltik, yuʼun manchuk mi ta sjunul koʼontontik chi jkoltavan, xuʼ van mu xkakʼtik venta xchʼajub kuʼuntik li krixchanoetike (Proverbios 20:1, 4; 2 Tesalonicenses 3:10-12). Taje chakʼ kiltik mi ta jkʼan chi jkʼuxubinvan ta melele, skʼan me oyuk lek jpʼijiltik kʼalal chkakʼtik ta ilel xkʼuxul koʼontontike.
17. ¿Kʼu yelan ti xuʼ mas ta jkʼuxubintik li krixchanoetik ti maʼuk yajtsʼaklomtak Cristoe?
17 Ti kʼuyelan xuʼ mas ta jkʼuxubintik li krixchanoetik ti maʼuk yajtsʼaklomtak Cristoe jaʼ ti kʼalal chkalbetik li mantal ta Vivliae. ¿Kʼu yuʼun? Yuʼun oyik ta ikʼal osil ta sventa mantal. Ta skoj ti mu snaʼik kʼuyelan ta tsalel lek li vokoliletike xchiʼuk ta skoj ti muʼyuk kʼusi spatoj-o lek yoʼontonik ta sventa li kʼusi chtal ta tsʼakale, jutuk mu skotolikuk abol sbaik ti kʼuyelan oyike: «tanpuquic jech chac cʼu chaʼal chijetic ti muʼyuc xchabiele» (Mateo 9:36). Pe mi chchʼamik li kʼusi chal Vivliae, jaʼ «luz cʼotem» yuʼunik ti bu tstekʼ batel yokike, li sKʼop Diose, ti chkoltaatik ta stsalel li svokolike. Jech xtok, li Vivliae jaʼ «toj cʼotem» yuʼunik sventa chil sbeik, yuʼun ch-akʼbat yilik li kʼusi tspas Dios ta tsʼakale xchiʼuk ch-akʼbat lek spatobil yoʼontonik (Salmo 119:105). Li kʼupil aʼyej taje, ¡jaʼ jun mukʼta matanal ti chkalbetik li buchʼutik chtun yuʼunike! Nopol xa li mukʼta tsatsal vokolile. Jech oxal chaʼa, jaʼ me yorail ta jcholbetik skʼoplal ta sjunul koʼontontik li Ajvalilal yuʼun Diose xchiʼuk spasel ta yajtsʼaklom Cristo li krixchanoetike (Mateo 24:3-8, 21, 22, 36-41; 28:19, 20). Chʼabal yan abtelal sventa kʼuxubinel ti mas tsots skʼoplale.
«Cʼuxubinvananic; qʼuelanic [li] cʼusitic oy avuʼunic [ta] yute»
18, 19. ¿Kʼu yuʼun skʼan chkakʼbetik yipal sventa xvinaj mas jujun kʼakʼal li kʼuxubinel kuʼuntike?
18 Xi laj yal li Jesuse: «Jaʼ lec cʼuxubinvananic; qʼuelanic [li] cʼusitic oy avuʼunic [ta] yute», xi (Lucas 11:41). Sventa jaʼuk kʼuxubinel ta melel li kʼusi ta jpastike, skʼan xlokʼ ta yutil koʼontontik, ta jun oʼontonal ti chkʼanvan tajmeke xchiʼuk ti tskʼan chkoltavane (2 Corintios 9:7). Li ta balumil liʼe, ti chʼabal tajmek kʼuxubinele, ti tskʼan sba stukik xchiʼuk ti muʼyuk tstsakbeik ta mukʼ skʼop xchiʼuk svokol li yantike, ¡toj kʼupil sba ta kʼelel ti chkʼuxubinvanik li yajtsʼaklomtak Cristoe!
19 Jech oxal chaʼa, kakʼbetik yipal sventa xvinaj mas jujun kʼakʼal li kʼuxubinel kuʼuntike. Mi yantik xi jtojob batele, mas me xi jkoʼolaj xchiʼuk li Diose, taje jaʼ chakʼ oyuk sbalil li jkuxlejaltike xchiʼuk ti junuk koʼontontike (Mateo 5:7).
¿Kʼusitik jchanojtik?
• ¿Kʼu yuʼun mas tsots skʼoplal skʼan jkʼuxubintik li jchiʼiltaktik ta chʼunolajele?
• ¿Kʼutik yelan chi jkʼuxubinvan li ta tsobobbaile?
• ¿Kʼu yelan ta jpastik kʼusi lek ta stojolal li krixchanoetik ti maʼuk yajtsʼaklomtak Cristoe?
[Lokʼol ta pajina 12]
Li jsamaria vinike laj yakʼ ta ilel mukʼta kʼuxubinel
[Lokʼol ta pajina 13]
Li yajtsʼaklomutik Cristoe ep ta tos kʼuyelan chi jkʼuxubinvan
[Lokʼol ta pajina 16]
Ti kʼuyelan xuʼ mas ta jkʼuxubintik li buchʼutik maʼuk yajtsʼaklomtak Cristoe jaʼ ti kʼalal chkalbetik li mantal ta Vivliae