Li skʼop Jeovae ta onoʼox xkʼot ta pasel

«Icʼot ta pasel scotol li cʼusi yalojboxuc Mucʼul Dios cuʼuntique. Me jbeluc muʼyuc cʼusi ti muc spase.» (JOSUÉ 23:14.)

1. ¿Buchʼu li Josuee, xchiʼuk kʼusi la spas kʼalal poʼot xaʼox xchame?

MAʼUK noʼox bankilal soltaro echʼ xchiʼuk ti tsots yoʼonton la skolta Moisese, moʼoj, yuʼun toj tukʼ xchiʼuk lek xchʼunel yoʼonton echʼ xtok. Jaʼ li bankilal tʼujat yuʼun Jeova sventa tslokʼes batel li jteklum Israel ta taki xokol balumil ti toj xibal sba ti bu xyal xmuyike, sventa chikʼ batel ta jun balumil ti bu chlokʼ ep yaʼlel xchuʼ vakax xchiʼuk pome. Li sbie jaʼ Josué. Kʼalal poʼot xaʼox xchame, li vinik ti lek ichʼbil ta mukʼ taje, oy kʼusi laj yalbe komel li moletik ta Israel ti chkʼot ta oʼontonale. Jpʼel skʼoplal ti tsatsub xchʼunel yoʼonton li buchʼutik laj yaʼiik li kʼusi laj yale, jaʼ jech xuʼ stsatsub koʼontontik ek.

2, 3. ¿Kʼu yelan oy li steklumal Israel kʼalal la skʼopon moletik li Josuee, xchiʼuk kʼusi laj yalanbe?

² Nopo avaʼi ti kʼuyelan kʼot ta pasele. Xi chal li Vivliae: «Cʼalal ep xaʼox cʼacʼal iʼacʼbat xcux yoʼntonic ta pleito yuʼun Mucʼul Dios li israeletique, cʼalal jun xa yoʼntonique, li Josuee batsʼi mol xaʼox. Jech lic yicʼan scotol li israeletique, xchiʼuc li moletic, li banquilaletic, li jchapanvanejetic, xchiʼuc li jʼabteletic yuʼunique, jech laj yalbe: “Vuʼune molun xa, laj xa yipal cuʼun”», xi (Josué 23:1, 2).

³ Jutuk xa mu 110 sjabilal li Josuee, jech xtok ikuxi ta jun skʼakʼalil ti laj yil jtosuk li kʼusitik toj labal sba kʼotem ta stojolal steklumal Diose. Laj yil li kʼusitik labal sba yabtel Dios la spas ta sjuʼele xchiʼuk laj yil ti kʼot ta pasel ep li kʼusitik yaloj xa onoʼox tspas Diose. Jech oxal xi laj yal ta sjunul yoʼontone: «Lec ta ajol ta avoʼntonic ti icʼot ta pasel scotol li cʼusi yalojboxuc Mucʼul Dios cuʼuntique. Me jbeluc muʼyuc cʼusi ti muc spase», xi (Josué 23:14).

4. ¿Kʼusi laj yalbe j-israeletik ta melel li Jeovae?

⁴ ¿Kʼusitik yaloj ta melel Jeova ti kʼotanuk ta pasel ta skʼakʼalil Josuee? Jchanbetik batel skʼoplal oxibuk. Li baʼyele jaʼ ti tskolta lokʼel ta mosoil j-israeletik li Diose; li xchibale jaʼ ti tspoje, li yoxibale jaʼ ti tsmakʼlin xchiʼuk chchabie. Jaʼ jech yalojbe ta melel steklumal avi li Jeova eke, xchiʼuk kilojtik xa ti kʼotem ta pasel ta jkuxlejaltike. Pe kʼalal mu to ta jkʼeltik kʼusi spasoj ta sventa steklumal Jeova li avie, baʼyel jkʼeltik kʼusi la spas ta stojolal Israel ta skʼakʼalil Josué.

Tskolta lokʼel steklumal li Jeovae

5, 6. ¿Kʼuxi la spoj lokʼel j-israeletik ta Egipto li Jeovae, xchiʼuk kʼusi laj yakʼ ta ilel taje?

⁵ Kʼalal te toʼox oyik ta mosoil ta Egipto li j-israeletike, la skʼanbeik koltael li Diose, vaʼun aʼibatik (Éxodo 2:23-25). Kʼalal jaʼo te oy Moisés ta stsʼel jpets chʼix ti tsanal skʼakʼale, xi albat yuʼun li Jeovae: «Liyal tal; tal jcolta loqʼuel ta scʼobic li egiptoetique. Ta xbat jloqʼuesic tal te ta banamil yoʼ bu oyique. Ta xquiqʼuic batel ta yan banamil ti lec jamale, ti toj jun yutsile. Jaʼ ti bu chlocʼ ep yaʼlel xchuʼ vacax, xchiʼuc pom[e]», x-utat (Éxodo 3:8). ¡Toj echʼ noʼox van lek laj yil Moisés ti yakal xa chkʼot ta pasel yuʼun Jeova li kʼusi laj yale! Kʼalal mukʼ skʼan skolta lokʼel j-israeletik li faraone, albat yuʼun Moisés ti tskʼatajes ta chichʼ ukʼum Nilo li Diose. Muʼyuk bu xchʼay ta be li skʼop Jeovae. Kʼataj ta chʼichʼ li ukʼum Niloe, vaʼun mu xa stakʼ uchʼel xchiʼuk cham li choyetike (Éxodo 7:14-21). Pe ta skoj ti mukʼ skʼan xakʼ sba ta tsalel li faraone, la to stak tal baluneb vokolil li Jeovae, baʼyel ta xalbe ti kʼusi snopoj tspase (Éxodo, kapitulo 8 kʼalal ta 12). Kʼalal echʼ xaʼox li slajeb vokolile —ti la smilbe sba xnichʼnabtak li j-egiptoetike—, li faraone laj yalbe j-israeletik ti akʼo xlokʼik batele, vaʼun lokʼik batel li j-israeletike (Éxodo 12:29-32).

⁶ Li koltael taje, jaʼ laj yichʼik-o tʼujel ta steklumal Jeova li Israele. Laj yalbe smukʼulal Jeova xtok, ti jaʼ ti Buchʼu chkʼot ta pasel yuʼun li kʼusi chal ta melele, yuʼun muʼyuk chchʼay ta be li kʼusi chale. Jech noxtok, laj yakʼ ta ilel ti jaʼ noʼox stuk toj echʼ noʼox smukʼule, ti jaʼ chʼabal li yan diosetike. Mi ta xa onoʼox stsatsubtas xchʼunel koʼontontik xchanel taje, nopo xa noʼox avaʼi kʼu to slekil laj yilik li buchʼutik laj yil ta xkuxlejalike. Li Josuee laj yakʼ venta ta melel ti Jeovae jaʼ «[oy] ta toyol yuʼun scotol ti banomile» (Salmo 83:18, Ch).

Chchabi steklumal li Jeovae

7. ¿Kʼuxi la xchabi j-israeletik li Jeova ta stojolal faraón xchiʼuk yajsoltarotake?

⁷ ¿Kʼusi xuʼ xkaltik ta sventa li xchibal kʼusi albil ta melele, li spojel steklumale? Taje te tsakal skʼoplal ti kʼalal albatik ti chpojatik lokʼel ta Egipto li j-israeletike xchiʼuk ti ch-akʼbatik li Albil Balumile. Jvules ta joltik ti faraone, ta skoj ti ilinem tajmeke, tijil bat ta spat li j-israeletike, laj yikʼ batel yajsoltarotak ti toj echʼem xuʼ yuʼunike xchiʼuk ta sienal noʼox karetaetik sventa pas kʼop. Ta skoj li stoybaile, toj tsots yoʼonton chaʼi sba, mas to ti kʼalal la snop ti mu stakʼ bu xjatav batel li j-israeletike, yuʼun te kakalik ta vitsetik xchiʼuk ta nab. Pe li Diose oy kʼusi la spas sventa tspoj li steklumale. La skakan jvol tok ta stojolalik sventa mu xbat tavanikuk ta be li j-egiptoetike. Ikʼ osil ti bu oyike, yan ti bu oy li j-israeletike sak osil. La stoy muyel snamteʼ li Moisese, vaʼun li Tsajal nabe la xchʼak sba. Li kʼusi tun ta spojobbailik li j-israeletike, kʼataj ta smilobbailik li j-egiptoetike. Li Jeovae la slajesbe li yajsoltarotak faraone, jaʼ jech muʼyuk xakʼ ta tsalel li steklumale (Éxodo 14:19-28).

8. ¿Kʼuxi la xchabi j-israeletik li Dios 1) ta taki xokol balumile xchiʼuk 2) kʼalal ochik ta Albil Balumile?

⁸ Kʼalal echʼik xaʼox ta Tsajal nab li j-israeletike te jyalel muyelik ta «mucʼta xocol banamil ti toj xiʼbal sbae, ti oy ep jtiʼval chonetic xchiʼuc stsequetique, xchiʼuc ti muʼyuc voʼ tee» (Deuteronomio 8:15). Ti jayib jabil te echʼik ta taki xokol balumile, chabiatik yuʼun Jeova xtok. ¿Xchiʼuk kʼusi kʼot ta pasel kʼalal ochik li ta Albil Balumile? Akʼo mi la spasik kʼop xchiʼuk li soltaroetik ta Canaán ti toj echʼem xuʼ yuʼunike, li Jeovae xi laj yalbe li Josuee: «Chavicʼ jelovel ta jot ucʼum Jordán scotol li achiʼiltac ta israelale yuʼun chabatic xa te ta banamil ti bu chacacʼboxuque. Muʼyuc bochʼo xuʼ chastsalot ti jayib cʼacʼal cuxulote. Vuʼun chajchiʼinot o, jech chac cʼu chaʼal la jchiʼin scotol cʼacʼal li Moisese. Me jliqueluc muʼyuc chajcomtsanot», xut (Josué 1:2, 5). Kʼot ta pasel xtok ti jech laj yal li Jeovae. Ta vakib noʼox van jabile la stsal 31 ajvaliletik li Josuee xchiʼuk laj xaʼox yuʼuninik batel ep yosilal li Albil Balumile (Josué 12:7-24). Ti muʼyukuk xchabiatik yuʼun li Jeovae, muʼyuk bu spas yuʼunik jechuk taje.

Tsmakʼlin xchiʼuk chchabi steklumal li Jeovae

9, 10. ¿Kʼuxi la smakʼlin xchiʼuk la xchabi steklumal Jeova kʼalal te toʼox oyik ta taki xokol balumile?

⁹ Jkʼelbetik skʼoplal li yoxibal kʼusi albil ta melele: tsmakʼlin xchiʼuk chchabi steklumal li Jeovae. Kʼalal mu toʼox jaluk skolelik lokʼel ta Egipto li j-israeletike, xi laj yal ta melel li Diose: «Ta xcacʼ yalel tal aveʼelic ta vinajel. Li achiʼiltaque jujun cʼacʼal acʼo loqʼuicuc ta stsobel li sveʼelique», xi. Ta sventa ti toj tukʼ kʼusi chal li Diose, laj yakʼ tal veʼlil ta vinajel. «Li israeletique muc snaʼic cʼusi ti cʼalal laj yilique, jech laj yalbe sbaic: “¿Cʼusi leʼe?”, xut sbaic.» Jaʼ li manae, li veʼlil ti yaloj onoʼox ta melel ch-akʼbatik yuʼun Jeovae (Éxodo 16:4, 13-15).

¹⁰ Ti 40 jabil te echʼik ta taki xokol balumile, chabiatik yuʼun li Jeovae, akʼbat sveʼelik xchiʼuk yaʼalik. La skʼel xtok ti mu xlaj li skʼuʼ spokʼike xchiʼuk ti mu situb yokike (Deuteronomio 8:3, 4). Skotol taje laj yil li Josuee. Lek jamal xvinaj ti la skolta, la spoj xchiʼuk la smakʼlin yajtuneltak li Jeovae, jech onoʼox kʼuchaʼal yaloj ta melele.

Pojelal ta jkʼakʼaliltik

11. ¿Kʼusi kʼot ta pasel ta Brooklyn ta sjabilal 1914, xchiʼuk kʼusi ti kʼot xa skʼakʼalile?

¹¹ ¿Kʼusi xuʼ xkaltik li ta jkʼakʼaliltike? Li ta sob viernes ta 2 yuʼun oktubre ta 1914, li Charles Taze Russell —ti jaʼ toʼox tsbeiltas li Jchanolajeletik ta Vivliae— tukʼ xvaʼvun ochel ta veʼebal ta Betel ta Brooklyn (Nueva York), vaʼun stseʼet noʼox sat xi laj yale: «¡Liʼoxuke!», xi. Vaʼun, kʼalal mu to chchotie, xi xmuyubaj laj yale: «Laj xa li skʼakʼalil jyanlum krixchanoetike; li skʼakʼalil ajvaliletik yuʼunike laj xa skʼoplal», xi. Jaʼ jech kʼot skʼakʼalil xtok sventa tskʼel steklumal li Jeovae, li Mukʼul Ajvalil ta vinajel-balumile. Jaʼ jech la spas taje.

12. ¿Kʼusi pojelal kʼot ta pasel ta sjabilal 1919, xchiʼuk kʼusi kʼot ta pasel yuʼun?

¹² Kʼajomal noʼox echʼ voʼob jabil, li Jeovae la spoj lokʼel steklumal li ta «mucʼta lum Babiloniae», li jventainvanej yuʼun skotol jecheʼ relijionetik ta spʼejel balumile (Apocalipsis 18:2). Manchuk mi eputik ti muʼyuk kilojtik li pojelal ta skoj ti chʼabal to ep tajmek jabilaltike, xuʼ jamal xkiltik li kʼusi kʼotem ta pasel yuʼune. La xchaʼlikes li lekil ichʼel ta mukʼ ch-akʼbat li Jeovae xchiʼuk la stsob li buchʼutik jech oy ta yoʼontonik yichʼel ta mukʼe, jech kʼuchaʼal yaloj onoʼox ta stojolal li j-alkʼop Isaiase: «Ta slajebtic batel cʼacʼale ta xlic yichʼ lec yip yan velta li vits yoʼ bu oy sna Mucʼul Diose; jaʼ toyol chcʼot yuʼun li yantic vitsetique; li yajvaltac jujun banamile te chtal stsob sbaic ta stojol» (Isaías 2:2).

13. ¿Kʼu yepal epajem tal li steklumal Jeova ti kʼalal lik achan Vivliae?

¹³ Li albil kʼop yuʼun Isaiase toj labal sba kʼu yelan kʼotem ta pasel. Ta 1919, li buchʼutik tʼujbilik chbatik ta vinajel ti liʼ to oyik ta balumile la spasik jun campanya, lek tsots yoʼonton la spasik, vaʼun jaʼ jech la smukʼibtasbeik skʼoplal li yichʼel ta mukʼ melel Diose. Leʼ xa van tal ta sjabilal 1930 jamal ivinaj ti likem xa stsobel li yantik chijetike (Juan 10:16). Ta baʼyele, ta smilal, ta tsʼakale ta sien milal, pe li avie ta smiyonal xa noʼox krixchanoetik yakʼoj sbaik ta stojolal li melel yichʼel ta mukʼ Diose. Ta jun vaychil ti akʼbat yil Juane, laj yil kʼuchaʼal «epal cristianoetic liquemic tal ta jujun banamil, ta jujuchop stsʼunubalic, ta jujun lum, xchiʼuc ta jujuchop cʼop. Batsʼi ep ta jyalel, mu xlaj ta atel» (Apocalipsis 7:9). ¿Mi aviloj ti epajem xa tale? ¿Jayib xaʼox yajrextikotak Jeova kʼalal lik achan Vivliae? Li avie oy xa mas ta 6,700,000. Kʼalal la skolta lokʼel ta Mukʼta Babilonia li yajtuneltake, li Jeovae la sjam li tiʼna sventa xchʼi li steklumal kʼuchaʼal chkiltik avi ta spʼejel Balumile.

14. ¿Kʼusi jtosukal koltael skʼan to xkʼot ta pasel?

¹⁴ Kechel to jtos koltael xtok, jtos ti toj mukʼ taj yalele, yuʼun ti kʼusi chkʼot ta pasel yuʼune chvinaj ta spʼejel Balumil. Toj labal sba chakʼ ta ilel li sjuʼel Jeovae, jaʼ me jech chakʼbe slajeb skotol li yajkontratake, vaʼun jaʼ jech ta skolta steklumal sventa x-ochik li ta jun achʼ balumil ti bu oy tukʼilale. Nopo xa noʼox avaʼi kʼu to yepal muyubajel chichʼ ilel kʼalal mi laj li choplejale xchiʼuk ti jaʼ xa chkiltik batel li kʼusi mas toj kʼupil sba ta sjunul kuxlejale. ¡Toj echʼ noʼox labal sba yutsil! (Apocalipsis 21:1-4.)

Li chabiel chakʼ Jeova ta jkʼakʼaliltike

15. ¿Kʼu yuʼun skʼan xchabiutik Jeova li avie?

¹⁵ Kʼuchaʼal laj xa jchantike, li j-israeletik ta skʼakʼalil Josuee, la skʼanik chabiel yuʼun Jeova. ¿Mi jech van tskʼanik li steklumal Dios avi eke? Jech kʼuxi un. Li Jesuse xi onoʼox la spʼijubtas li yajtsʼaklomtake: «Ta to xaʼacʼatic ta cʼabal, yuʼun jech chavichʼic tsots utsʼintael, xchiʼuc chavichʼic milel. Bajbil chacʼotic yuʼun scotol cristianoetic ta scoj ti acuchojbicun jbie», xi (Mateo 24:9). Oy xa tal ta sjayibal jabile, li yajrextikotak Jeova ta epal lumetike, yilojik tsatsal kontrainel xchiʼuk ilbajinel. Pe li Jeovae muʼyuk bu stenoj komel li steklumale (Romanos 8:31). Li sKʼope chalbutik ta melel ti «muʼyuc spasojic jchopuc abtejebal ti xuʼ [ta xulesutike]», mu kʼusi xuʼ spajes li kabteltik ta chol mantale xchiʼuk ti ta jpastik ta yajtsʼaklomtak Cristo li krixchanoetike (Isaías 54:17).

16. ¿Kʼusitik sprevailtak aviloj ti chchabi steklumal li Jeovae?

¹⁶ Li steklumal Jeovae yakal ta chʼiel batel, manchuk mi toj echʼem chkontrainvan li balumile. Li yajrextikoutik Jeovae yakal xa jcholtik mantal ta 236 lumetik xchiʼuk yantik butikuk, taje jaʼ me svinajeb ti xchabiojutik li jDiostik ta stojolal li buchʼutik tskʼan tslajesutike, o ti tskʼan tsmak ketike. ¿Mi xvul ta ajol kʼusi sbi jlomuk jbabeetik ta politika o ta relijion ta jkʼakʼaliltik ti yilbajinojik li steklumal Diose? ¿Kʼusi kʼotem ta pasel ta stojolalik? ¿Bu oyik li avie? Jutuk mu skotolikuk taje chʼabalik xa, jech kʼuchaʼal li faraón ta skʼakʼalil Moisés xchiʼuk Josuee. ¿Pe kʼusi kʼotem ta pasel ta stojolal li tukʼil yajtuneltak Dios ti chamemik xae? Te chabibilik ta sjol Jeova, ti bu mas toj lek xuʼ xkichʼtik chabiele. Muʼyuk buchʼu xuʼ chal ti muʼyuk kʼotem ta pasel ti yaloj chchabi steklumal li Jeovae.

Tsmakʼlin xchiʼuk chchabi steklumal avi li Jeovae

17. ¿Kʼusi laj yal ta melel Jeova ta sventa li veʼlil ta mantale?

¹⁷ Jech kʼuchaʼal la smakʼlin ta taki xokol balumil steklumal li Jeovae, tsmakʼlinutik ek —ta mantal— ta stojolal li «jʼabtel ti jun [«tukʼ», NM ] yoʼnton [...], ti lec bije» (Mateo 24:45). Chakʼ kojtikintik melel mantaletik ti muʼyuk laj yichʼ ojtikinel leʼ xa ta sjayibal sigloe. Jaʼ jech chkʼot ta pasel li kʼusi albat yuʼun anjel li Daniele: «Kʼejo lek li kʼopetik liʼe xchiʼuk akʼbo seyoal li livroe, jaʼ to mi la sta yorail slajebal kʼakʼale. Ep buchʼutik ta saʼik, xchiʼuk li melel yojtikinobile ta x-epaj», xi (Daniel 12:4, NM).

18. ¿Kʼu yuʼun xuʼ xkaltik ti epajem ta jyalel li melel yojtikinobil avie?

¹⁸ Kuxulutik xa ta slajebal kʼakʼal, jech kʼuchaʼal laj yichʼ alele, li melel yojtikinobile epajem xa ta jyalel. Li avie, ta skoltaobba li chʼul espiritue, krixchanoetik ta butikuk noʼox ta Balumil ti skʼanojik li kʼusi melele, xuʼ chojtikinik lek li melel Diose xchiʼuk li kʼusi tskʼan tspase. Ta skotolal kʼusiuk livroal, jaʼ li Vivlia ti mas toj ep pukbile, xchiʼuk oy ep vunetik ti tskoltautik ta yaʼibel smelolal li melel mantaletik ti toj echʼem sbalil ta Vivliae. Jech kʼuchaʼal liʼe, kʼelavil li ta saʼobil li ta livro ¿Kʼusi chchanubtasvan ta melel li Vivliae?a Jlom kapituloe jaʼ liʼe «¿Kʼusi jaʼ li melel ta sventa li Diose?», «¿Bu oy li animaetike?», «¿Kʼusi jaʼ li Ajvalilal yuʼun Diose?» xchiʼuk «¿Kʼu yuʼun yakʼoj to oyuk vokolil li Diose?». Ta smilal xa jabiletik jech sjakʼojbe sba tal li krixchanoetike, li avie xuʼ xa jnabetik li stakʼobile. Manchuk mi ep xa tal siglo muʼyuk nabil xchiʼuk pukem tal chopol chanubtaseletik yuʼun li buchʼutik tskuy sbaik ta yajtsʼaklom Cristoe, li melel mantaletik ta sKʼop Diose kuchem tal yuʼun, xchiʼuk li avie tunem ta sveʼel li buchʼutik tskʼan chtunik ta stojolal Jeovae.

19. ¿Kʼusitik albil ta melel ti aviloj kʼotem ta pasele, xchiʼuk kʼusi chaval ta sventa taje?

¹⁹ Ta sventa ti jech kiloj ta jkuxlejaltike, xuʼ xkaltik ta sjunul koʼontontik jech kʼuchaʼal xi laj yal Josuee: «Icʼot ta pasel scotol li cʼusi yalojboxuc Mucʼul Dios cuʼuntique. Me jbeluc muʼyuc cʼusi ti muc spase», xuʼ xi jchi (Josué 23:14). Jpʼel skʼoplal ti tspoj, chchabi xchiʼuk tsmakʼlin yajtuneltak li Jeovae. ¿Mi xa nabe skʼoplal junuk albil kʼop ti muʼyuk xkʼot ta pasel ta yoraile? Chʼabal. Melel xkʼopoj li sKʼop Diose, jech oxal jpatoj sjunul koʼontontik ta stojolal.

20. ¿Kʼu yuʼun xuʼ jpat koʼontontik ta sventa li kuxlejal ta tsʼakale?

²⁰ ¿Kʼusi chkʼot ta pasel ta jtojolaltik ta mas tsʼakal? Jutuk mu jkotoltikuk li voʼotike, li Jeovae chakʼbutik li spatobil oʼontonal ta sventa li kuxlejal sbatel osil ta jun nichimal Balumil ti noj ta lekilale. Jvokʼ steklumal ti uni juteb noʼoxe, yakʼojbe spatobil yoʼonton sventa chbat ajvalilajuk xchiʼuk Cristo ta vinajel. Kʼusiuk li spatobil koʼontontike, toj ep srasonal kuʼuntik sventa tukʼ xkakʼ jbatik ta stojolal Dios kʼuchaʼal la spas Josuee, yuʼun chkʼot skʼakʼalil ti chkʼot ta pasel li spatobil koʼontontike. Vaʼun, kʼalal ta jvules ta joltik li kʼusitik yaloj ta melel li Jeovae, xi me chkaltik eke: «Me jbeluc muʼyuc cʼusi ti muc spase».

[Tsʼibetik ta yok vun]

¿Mi xa naʼ yalbel smelolal?

• ¿Kʼusitik melel yaloj Jeova laj yil kʼot ta pasel li Josuee?

• ¿Kʼusitik melel yaloj Dios ti aviloj kʼotem ta pasele?

• ¿Kʼusi ti jpatoj-o lek koʼontontik ta sventa li skʼop Diose?

[Lokʼol ta pajina 23]

Oy kʼusi la spas sventa tskolta steklumal li Jeovae

[Lokʼol ta pajina 23]

¿Kʼuxi la xchabi steklumal Jeova li ta Tsajal nabe?

[Lokʼol ta pajina 24]

¿Kʼuxi la xchabi steklumal Jeova li ta taki xokol balumile?

[Lokʼol ta pajina 25]

Oy ta yoʼonton steklumal Jeova li avi eke