Jchanbetik Cristo li Mukʼta Jpasvanej ta Jchankʼopetike
«Aʼyo lec avaʼyic.» (LUCAS 8:18.)
1, 2. ¿Kʼu yuʼun skʼan jkʼeltik lek kʼu yelan la stsak ta mukʼ krixchanoetik Jesús kʼalal la xchol mantale?
LI JESUCRISTOE yakal tspas yabtel ta Mukʼta Jchanubtasvanej xchiʼuk ta Jpasvanej ta Jchankʼopetik kʼalal xi laj yalbe mantal li buchʼutik talemik xa ta stojolale: «Aʼyo lec avaʼyic», xi (Lucas 8:16-18). Pe li tojobtasel taje skʼan xchʼunik skotol li jtunel yajtsʼaklomtak Cristo eke. Jech onoʼox ta melel, mi chkaʼitik lek li chanubtaseletik ta mantale, xuʼ me jech jtalelaltik kʼuchaʼal chal li mantale xchiʼuk ta me xi jtojob batel lek ta xcholel li mantale. Melel onoʼox, li avie muʼyuk chkaʼi ta jchikintik chkʼopoj li Jesuse, pe xuʼ xkaʼitik mi ta jkʼeltik li Vivliae, ti jaʼ chalbutik li kʼusitik la spase xchiʼuk li kʼusitik laj yale. Jtos ti kʼusi chalbutike, jaʼ ti kʼuyelan la stsak ta mukʼ li krixchanoetik kʼalal la xchol mantale. Jech un chaʼa, ¿kʼusi chal Vivlia ta sventa taje?
2 Jaʼ jun lekil jchol mantal echʼ li Jesuse xchiʼuk lekil jchanubtasvanej echʼ xtok ta sventa li Chʼul Tsʼibetike (Lucas 8:1; Juan 8:28). Li abtel kichʼojtik ta spasel jchankʼopetik eke te smakoj chol mantal xchiʼuk chanubtasvanej. Oy jlom yajtsʼaklomtak Cristoe xtojobik lek ta chol mantal, pe jaʼ mu xtojobik li ta yakʼel chanubtasele. Li chol mantale jaʼ noʼox skʼan xkaltik batel jun aʼyej, yan li xchanubtasel krixchanoetik ta sventa li kʼusi melel ta stojolal Jeova xchiʼuk li kʼusi tskʼane, skʼan lek xkil jbatik xchiʼuk li buchʼu ta jchanubtastike (Mateo 28:19, 20). Ta sventa taje skʼan jchanbetik li Jesucristoe, li Mukʼta Jchanubtasvanej xchiʼuk li Jpasvanej ta Jchankʼopetike (Juan 13:13).
3. ¿Kʼusi ta jtatik mi chkakʼbetik yipal ta xchanbel stalelal Jesús kʼalal ta jpastik ta jchankʼop li krixchanoetike?
3 Mi jech chi jchanubtasvan kʼuchaʼal la spas Jesuse, jaʼ me jech yakal ta jchʼunbetik smantal li jtakbol Pablo ti xi laj yale: «Bijanic me cʼalal chachiʼinic li bochʼotic muʼyuc xchʼunojic Diose. Tunesic me lec li cʼacʼal chjelov avuʼunique. Li cʼusi chavalique oyuc me lec smuil, oyuc me lec xchiʼil. Nopo lec cʼusi chavalbeic li bochʼotic chataic ta cʼopanele», xi (Colosenses 4:5, 6). Ta melel, skʼan me tsots xkakʼ kiptik xchanbel stalelal Jesús kʼalal ta jpastik ta jchankʼop li krixchanoetike. Jaʼ me jech chi jtojobaj batel ta jchanubtasvanej, yuʼun jaʼ jech ta jchantik stakʼbel ti kʼuyelan skʼanik koltael li buchʼutik ta jkʼopontike.
Li Jesuse la stijbe yoʼonton krixchanoetik ti akʼo yal kʼusi tsnopike
4. ¿Kʼu yuʼun chkaltik ti snaʼ xchikinta li kʼusi chichʼ albel li Jesuse?
4 Ta sbikʼtal onoʼox nopem xaʼi xchikintael kʼusi ch-albat yuʼun yantik li Jesuse, xchiʼuk tstijbe yoʼonton ti akʼo xalik li kʼusi tsnopike. Jech, kʼalal lajcheb xaʼox sjabilale, te itaat yuʼun stot smeʼ xchiʼuk li jchanubtasvanejetik ta chʼulnae, «te chaʼay cʼusi chalic, xchiʼuc oy cʼusi te tsjaqʼuilan ec» (Lucas 2:46). Muʼyuk bat xkʼexlaltas ta sventa ti toj echʼem kʼusi xojtikine. Bat xchikinta li kʼusi chalik tee, jech noxtok un, oy kʼusitik la sjakʼ. Jech ta melel, ti jech lek xchikinta li kʼusi ch-albate jaʼ lek ilat-o yuʼun Dios xchiʼuk krixchanoetik (Lucas 2:52).
5, 6. ¿Kʼusi svinajeb ti la xchikinta Jesús li kʼusi albat yuʼun krixchanoetik ti la xchanubtase?
5 Kʼalal laj yichʼ voʼ xchiʼuk kʼalal laj yichʼ tʼujel ta Mesías li Jesuse, muʼyuk xchʼay ta yoʼonton xchikintael li kʼusi chichʼ albele. Muʼyuk bu solel mu xa xaʼi kʼoponel ta skoj ti batem yoʼonton ta chanubtasvaneje. Ep ta veltae, chpaj jlikeluk, tsjakʼbe kʼusi tsnop li krixchanoetike, vaʼun chchikinta lek ti kʼusi tstakʼike (Mateo 16:13-15). Jech kʼuchaʼal liʼe, kʼalal cham smuk li Martae, li Jesuse xi laj yalbee: «Scotol li bochʼotic cuxulic xa ta sventa ti xchʼunojicune, muʼyuc bu ta xchamic o sbatel osil», xi. Vaʼun xi to la sjakʼbee: «¿Me jech achʼunoj?», xut. Ta melel, la xchikinta li kʼusi laj yal Martae: «Jech Cajval. Jchʼunoj ti voʼot Cristoote, ti voʼot Xnichʼonot Dios[e]», xi (Juan 11:26, 27). ¡Solel van xmuyubaj Jesús kʼalal jech laj yilbe li xchʼunel yoʼontone!
6 Ta yan velta xtoke, kʼalal laj yil ti tsutik ta valopat li yajtsʼaklomtake, li Jesuse la skʼan la snaʼ li kʼusi tsnop yajtakboltake, jech oxal xi laj sjakʼanbee: «¿Me chasutic batel ec li voʼoxuque?», xut. Xi la stakʼ li Pedroe: «Cajval, ¿bochʼo yan chbat jchiʼincutic? Voʼot noʼox chavalbuncutic li cʼop sventa cuxlejal sbatel osile. Li vuʼuncutique laj xa jchʼunotcutic, laj xa jnaʼcutic ti voʼot Cristoote, ti voʼot Tʼujbilot yuʼun Diose», xi (Juan 6:66-69). ¡Xkuxet van tajmek yoʼonton laj yaʼi Jesús ta sventa taje! Ta melel, jaʼ jech chkaʼi jbatik ek kʼalal chvinaj xchʼunel yoʼonton ta sventa kʼusi chal li buchʼu ta jchanubtastik ta Vivliae.
Li Jesuse la stsak ta mukʼ li krixchanoetik la xchanubtase
7. ¿Kʼu yuʼun ep jsamaria krixchanoetik laj yakʼ xchʼunel yoʼontonik ta stojolal li Jesuse?
7 Oy kʼusi yan la spas Jesús sventa spas lek yuʼun li yabtel ta jpas jchankʼopetike: laj yakʼ ta yoʼonton li buchʼutik chchanubtase xchiʼuk la stsak ta mukʼ kʼalal chkʼopojike. Jnoptik avaʼi ti kʼalal laj yalbe mantal jun jsamaria ants ta stsʼel sposo Jacobe, ta slumal Sicar. Li Jesuse muʼyuk bu jaʼ te xvulvun-o, moʼoj, yuʼun laj yakʼ akʼo xkʼopoj ek li antse. Kʼalal la xchikintabe li kʼusi laj yale, laj yakʼ venta ti oy ta yoʼonton snaʼel li yichʼobil ta mukʼ Diose, jech oxal laj yal ti Diose jaʼ yakal tsaʼ li buchʼutik tskʼan chichʼik ta mukʼ ta espiritu xchiʼuk ta melele. Ta sventa ti ichʼvan ta mukʼ xchiʼuk ti oy ta yoʼonton krixchanoetik li Jesuse, li antse bat yalbe ta anil slakʼnatak, jaʼ yuʼun «ep samaria cristianoetic laj yichʼic ta mucʼ Jesús ta sventa li antse» (Juan 4:5-29, 39-42).
8. ¿Kʼuxi xuʼ xlik jloʼiltik ta chol mantal xchiʼuk li krixchanoetik ti lek xaʼiik yalel li kʼusi tsnopike?
8 Jtaleltik onoʼox jech ti lek xkaʼi chkaltik li kʼusi ta jnoptike. Jaʼ jechik li krixchanoetik ta Atenase. Ta melel, toj lek xaʼiik yalel li kʼusi tsnopike xchiʼuk toj lek xaʼiik li achʼ loʼiletike. Jech oxal, li Pabloe staʼo laj yil chal jun lekil mantal li ta lum taje, ti jaʼ ta Areopagoe (Hechos 17:18-34). Jaʼ jech li avi eke, kʼalal chi jkʼot ta jpʼej nae, xuʼ xi xkaltike: «Ta jkʼan ta jnaʼ kʼusi cha nop ta sventa li [alo jtosuk loʼil]». Kʼalal mi laj yal kʼusi tsnope, skʼan me jchikintabetik, mi laje kal jloʼiltik ta sventa li kʼusi tstakʼe o jakʼtik jtosuk ta sventa li kʼusi laj yale. Vaʼun, jaʼ me lek ti xkichʼ jpʼijiltik xkalbetik kʼusi chal Vivlia ta sventa taje.
Snaʼoj onoʼox kʼusi chal li Jesuse
9. ¿Kʼusi la spas Jesús kʼalal mu toʼox chalbe Cleófas xchiʼuk xchiʼil li «smelol scʼop Diose»?
9 Oy onoʼox sloʼil stekel ora li Jesuse. Maʼuk noʼox snaʼ lek xchikintael li kʼusi ch-albate, moʼoj, yuʼun snaʼoj kʼusi tsnop li buchʼutik ch-aʼibat sloʼile xchiʼuk snaʼoj lek xtok ti kʼusi skʼan xalbee (Mateo 9:4; 12:22-30; Lucas 9:46, 47). Kalbetik skʼoplal junuk. Kʼalal mu toʼox jaluk xchaʼkuxiel li Jesuse, te xbatik ta Emaús chaʼvoʼ yajtsʼaklomtak ti likik ta Jerusalene. Xi chal li Evanjelioe: «Cʼalal jaʼo chloʼilajique, te ital ta spatic li Jesuse. Jech te la xchiʼinic batel ta xanubal. Pero imacbat satic, muc xotquinic me jaʼ li Jesuse. Jech ijacʼbatic yuʼun li Jesuse: ¿Cʼusi ti chaloʼiltaic tal ta be laj caʼye?, xut. Te ivaʼiic, ep chat yoʼntonic. Li jun Cléofas sbie, itacʼov: ¿Me atuc xa noʼox van jʼechʼelbeot liʼ ta Jerusalén ti mu xanaʼ li cʼusitic jaʼ to noʼox icʼot ta pasel volje chabjee?, xut. Itacʼov li Jesuse: ¿Cʼusi icʼot ta pasel?», xi. La xchapbeik skʼoplal li Jesús ta Nazarete, ti lek la ojtikinbil ta sventa li chanubtaseletik yuʼune xchiʼuk li skʼelobiltak juʼelal la spase, ti laj la yichʼ milele, manchuk mi oy bu chalik ti laj xa la yichʼ chaʼkuxesele. Li Mukʼta Jchanubtasvaneje la xchikintabe li kʼusi chal Cleofase xchiʼuk li xchiʼile, vaʼun la xchapbe li kʼusi skʼan snaʼike, «laj [yalbe] smelol [li] scʼop Diose» (Lucas 24:13-27, 32).
10. ¿Kʼuxi xuʼ jnaʼtik kʼusi xchʼunoj li krixchanoetik ta jvulaʼantike?
10 Pe li voʼotike, ep ta velta mu jnaʼtik mi jsetʼuk kʼusi xchʼunojik li krixchanoetik ta jcholbetik mantale. ¿Kʼuxi xuʼ jnaʼtik ti kʼusi tsnopike? Jtos ti kʼusi xuʼ jpastike, jaʼ ti xkalbetik ti oy ta koʼontontik snaʼel li kʼusi tsnop krixchanoetik ta sventa li orasione. Vaʼun, xuʼ xi jakʼbetike: «¿Kʼu yelan chavil li voʼote? ¿Mi oy van buchʼu chchikinta li j-orasiontike?», xuʼ xkutik. Ta sventa ti kʼusi tstakʼe xuʼ van te xkakʼtik venta kʼusi tsnop xchiʼuk kʼuyelan chanubtasbil ta relijion. Mi oy ta yoʼonton mantale, xuʼ van xkalbetik mas smelolal, xuʼ xi jakʼbetike: «¿Mi tstakʼ van skotol orasion xa naʼ li Diose, o mi muʼyuk van chaʼi jlomuk?», xuʼ xi jchi. Li sjakʼobil taje, o yane, ta melel jaʼ me xuʼ chlik-o jloʼiltik xchiʼuk li krixchanoe. Mi staʼo ta alel chkiltik li kʼusi chal Vivliae, skʼan me pʼijukutik ta spasel, mu me jkontrainbetik li kʼusi xchʼunoje. Mi kʼupil chaʼi li krixchano ti ta jchiʼintik ta loʼile, xuʼ van mas oy ta yoʼonton tskʼan chbat jvulaʼantik yan velta. ¿Pe mi oy kʼusi la sjakʼbutik ti mu jnabetik stakʼobil une? Jaʼ lek ti xkalbetik ti jaʼ to chbat jtakʼbetik ta mas tsʼakale, mi laj xaʼox jchanbetik lek skʼoplale xchiʼuk mi lek xaʼox chapalutik ta yalbel «srazonal ti spatobil [koʼontontike]. Pero [ichʼvankutik] me ta mucʼ» (1 Pedro 3:15, Ti Achʼ Rextomento yuʼun ti Jesucristoe, ta skʼop Chamula).
Li Jesuse jaʼ chchanubtas li buchʼutik staʼo chile
11. ¿Kʼusi tskoltautik ta stael li krixchanoetik ti staʼo xichʼik chanubtasel ta Vivliae?
11 Tukʼil vinik echʼ li Jesuse, jech oxal, xil ta ora buchʼu staʼo xichʼ chanubtasel xchiʼuk buchʼu moʼoj. Jech ta melel, li voʼotike vokol ta jtatik li «bochʼotic scʼoplal onoʼox chcuxiic sbatel osile» (Hechos 13:48). Jaʼ jech kʼot ta stojolalik li jtakboletike, ti xi albatik yuʼun Jesuse: «Buyuc noʼox chaʼochic, me ta lumetic, me ta tsobtsobnaetic, qʼuelic li bochʼo lec yoʼntone», xi (Mateo 10:11). Jech kʼuchaʼal la spasik jtakboletike, li voʼotike skʼan jsaʼtik li krixchanoetik ti oy ta yoʼonton chchikintaik xchiʼuk chchanik li mantal ta Vivliae. Xuʼ ta jtatik mi ta jchikintabetik lek kʼusi chalik skotol li buchʼutik ta jcholbetik mantale xchiʼuk mi ta jkʼelbetik lek ti kʼuyelan stalelalik ta jujuntale.
12. ¿Kʼuxi xuʼ jkoltatik-o batel li buchʼutik oy ta yoʼontonik mantale?
12 Mi laj xaʼox jchiʼintik ta loʼil li buchʼutik oy ta yoʼonton li lekil aʼyej sventa Ajvalilal yuʼun Diose, ¿kʼusi skʼan jpastik? Skʼan jnopilantik kʼusitik skʼan xchan mas ta sventa li mantale. Jtos ti kʼusi xuʼ jpastik sventa jkoltatik-oe, jaʼ ti jtsaktik ta vun ti kʼusi laj kiltik ta sloʼile. Kʼalal chbat jvulaʼantik jujun veltae, skʼan me jchikintabetik lek li kʼusi chale, sventa xkojtikinbetik mas li kʼusitik xchʼunoje, li stalelale xchiʼuk ti kʼuyelan xkuxlejale.
13. ¿Kʼuxi xuʼ jtijbetik yoʼonton krixchanoetik ti akʼo yal li kʼusi tsnopik ta sventa Vivliae?
13 ¿Kʼuxi xuʼ jtijbetik yoʼonton li krixchanoetik ti akʼo yal li kʼusi tsnopik ta sventa li sKʼop Diose? Jtos ti kʼusi toj jtunel ta jlom lumetike jaʼ ti xi tsjakʼike: «¿Mi tsots ta aʼibel smelolal aviloj li Vivliae?», xiik. Ti kʼusi chalbutik ta sventa taje, jaʼ me chakʼ kiltik kʼusi tsnop ta sventa li mantale. Yan xtoke, jaʼ ti jkʼelbetik junuk teksto ta Vivliae xchiʼuk ti xi jakʼbetike: «¿Kʼu yelan chavaʼi taje?», xuʼ van xi jchi. Jech kʼuchaʼal li Jesuse, xuʼ me lek kʼusitik xkʼot ta pasel kuʼuntik ta chol mantal mi baʼyel lek ta jnoptik li kʼusi ta jakʼtike. Pe kʼuchaʼal ta jchantik batele, skʼan xkichʼ jpʼijiltik.
Pʼij kʼusitik la sjakʼ li Jesuse
14. ¿Kʼusi xuʼ jpastik sventa xalbutik kʼusi tsnop li krixchanoetik ti mu persauk te xi jakʼjunutik-oe?
14 Manchuk mi oy ta koʼontontik snaʼel li kʼusi tsnop krixchanoetike, mu me jkʼantik ti chopol xaʼi sbaike. Jech oxal, ta jchanbetik stalelal li Jesuse. Yuʼun li stuke muʼyuk ti ep tajmek kʼusi la sjakʼe. Moʼoj, yuʼun ti kʼusi la sjakʼe chakʼ abtejuk nopbenalil. Jech noxtok, ta slekil yoʼonton la xchikinta li kʼusi chal ta sjunul yoʼonton li krixchanoetike, xchiʼuk jun yoʼonton yuʼun xtok li krixchanoetike (Mateo 11:28). Skotol li krixchanoetike ta sjunul yoʼonton chalbeik Jesús ti kʼusi tsvul-o yoʼontonike (Marcos 1:40; 5:35, 36; 10:13, 17, 46, 47). Jaʼ jech li ta jtojolaltik eke: mi ta jkʼantik jamal xkʼopojik ta sjunul yoʼontonik li buchʼutik chkalbetik mantale xchiʼuk ti xalbutik kʼusi tsnopik ta sventa li Vivliae xchiʼuk li chanubtasel yuʼune, skʼan me mu teuk xi jakʼjunutik-o.
15, 16. ¿Kʼuxi xuʼ jtijbetik yoʼonton krixchanoetik sventa xalik kʼusi tsnopik ta sventa li relijionetike?
15 Sventa xlik jloʼiltik xchiʼuk li krixchanoetike, maʼuk noʼox xuʼ pʼij skʼan jtunestik li sjakʼobiltake, xuʼ oy kʼusi jamal xkaltik xtok ti kʼupil sbae, vaʼun jkʼeltik lek ti kʼuyelan chaʼi li krixchanoe. Jaʼ jech la spas Jesús kʼalal xi laj yalbe Nicodemoe: «Li bochʼo muʼyuc chchaʼvocʼ ta achʼe, mu xuʼ chichʼ ventainel yuʼun Dios», xut (Juan 3:3). Toj labal sba ti kʼusi laj yale, yuʼun li Nicodemoe lek laj yaʼi xchiʼuk la xchikinta-o li kʼusi chal Jesuse (Juan 3:4-20). Mi jaʼ jech ta jpastike, xuʼ me kʼun noʼox chlik jloʼiltik xchiʼuk li krixchanoetike.
16 Li ta namal balumiletik kʼuchaʼal África, Europa oriental xchiʼuk Latinoamericae jaʼ chalbeik tajmek skʼoplal ti ep chlokʼ tal achʼ relijionetike. Li ta lumetik taje xuʼ van xi ep xichʼ likesel loʼile: «Labal chkil ti ep tajmek relijionetike. Jech xtok un, jpatoj koʼonton ti poʼot xa stsob skotol krixchanoetik ta skotol lumetik li melel relijione. ¿Mi lek chavaʼi taje?», xuʼ van xiik. Kʼalal chkalbetik jlomuk skʼoplal li spatobil koʼontontik ti xuʼ chtijbat-o yoʼonton li krixchanoetike, xuʼ jaʼ ta xalik-o ti kʼusi tsnopike. Jaʼ van mas tstakʼik xtok mi jaʼ ta jakʼtik li kʼusi chib noʼox stakʼobile (Mateo 17:25). Kʼalal mi laj xaʼox stakʼike, xuʼ xkakʼbetik yil jun-chibuk teksto ta Vivlia sventa jech jtakʼbetik li sjakʼobile (Isaías 11:9; Sofonías 3:9). Mi oy ta koʼontontik xchikintael li kʼusi chalike xchiʼuk ti jkʼeltik lek ti kʼuyelan chaʼiike, xuʼ kak xkiltik kʼusi xuʼ xkalbetik ta yan velta.
La xchikintabe kʼusi chal ololetik li Jesuse
17. ¿Kʼusi svinajeb ti oy ta yoʼonton ololetik li Jesuse?
17 Maʼuk noʼox laj yakʼ ta yoʼonton mukʼta krixchanoetik li Jesuse. Yuʼun laj yakʼ ta yoʼonton xtok li ololetike, jaʼ yuʼun snaʼoj li kʼusitik chtajinik-oe xchiʼuk li kʼusitik chalike. Bateltik xtoke, laj yalbe ti akʼo xnopajik ta stojolale (Lucas 7:31, 32; 18:15-17). Li ta epal krixchanoetik ti la xchikintaik li kʼusi chal Jesuse, ep ololetik te ek. Xchiʼuk kʼalal oy jayibuk ololetik lik yalik ti jaʼ Mesías li Jesuse, maʼuk noʼox laj yal ti jeche, moʼoj, yuʼun laj yakʼ ta ilel ti jech onoʼox albil ta Tsʼibetike (Mateo 14:21; 15:38; 21:15, 16). Jech li avi eke, ep ololetik ti chkʼotik ta yajtsʼaklomtak Jesuse. ¿Kʼuxi xuʼ chkoltaatik yuʼun li stot smeʼike?
18, 19. ¿Kʼuxi xuʼ jkoltatik li kalab jnichʼnabtik sventa xchʼiik ta mantale?
18 Mi ta jkʼantik chchʼi ta mantal li kalab jnichʼnabtike, skʼan me jchikintabetik li kʼusi chalike. Skʼan me jkʼeltik lek mi oy kʼusi tsnopik ti skontrainoj li kʼusi tskʼan yoʼonton Jeovae. Kʼusiuk ti kʼusi ta xalike, lek me kʼusi skʼan jtakʼbetik. Vaʼun xuʼ jkʼelbetik tekstoetik ta Vivlia sventa xaʼibeik smelolal li kʼusi tsnop Jeova ta sventa li kʼusitike.
19 Akʼo mi jtunel ti oy kʼusi jakʼbetik li ololetike, mu me toj kʼupiluk sba chaʼiik ek ti te xi jakʼjunutike, jech kʼuchaʼal li mukʼtik krixchanoetike. Jaʼ yuʼun chaʼa, mu jlubtsantik ta sjakʼbel kʼusitik ti toj tsotsike, jaʼ lek kaltik jutukuk loʼiletik ta jventa jtuktik. Jaʼ ti kʼusi yakal cha loʼiltaike, li voʼote xuʼ xavalbe ti oy toʼox jech laj avat avoʼonton ta sventa jtosuk kʼusie o ti la muyubaj ta sventa jtosuk kʼusie, vaʼun xi xa jakʼbee: «¿Mi oy jech chavaʼi aba ek?», xuʼ xa vut. Li kʼusi tstakʼe, xuʼ van jaʼ xlik-o aloʼilik ta Vivlia ti tskolta xchiʼuk tspatbe yoʼonton li akerem o atsebe.
Jchanbetik-o me li Mukʼta Jpasvanej ta Jchankʼopetike
20, 21. ¿Kʼu yuʼun skʼan oyuk ta koʼontontik xchikintael kʼusi chi j-albat kʼalal ta jpastik jchankʼopetike?
20 Kʼuchaʼal laj xa jchantike, toj tsots skʼoplal ti jnaʼtikuk xchikintael li kʼusi chal kalab jnichʼnabtike o li yan krixchanoetik kʼalal ta jchiʼintik ta loʼil ta sventa jtosuk kʼusie. Jaʼ jech chkakʼtik ta ilel ti chi jkʼanvane, ti bikʼit chkakʼ jbatike xchiʼuk ti chi j-ichʼvan ta mukʼe. Jech ta melel, maʼuk noʼox skʼan xkaʼitik li kʼusi chkichʼtik albele, yuʼun skʼan jtsʼetan lek jchikintik xtok.
21 Kʼalal ta jcholtik mantal kʼuchaʼal yajtsʼaklomutik Cristoe, skʼan me oyuk ta koʼontontik xchikintael li kʼusi chi j-albate. Jaʼ me jech xuʼ xkakʼtik venta kʼusi jtosukal mantal ta Vivlia oy mas ta yoʼonton chaʼi li krixchanoetike. Vaʼun, oyuk ta koʼontontik skoltael, jchanbetik li jeltos kʼusitik la spas kʼalal ichanubtasvan li Jesuse. Mi jech ta jpastik kʼuchaʼal li Mukʼta Jpasvanej ta Jchankʼopetike, ta me xakʼ muyubajel xchiʼuk jun oʼontonal.
¿Kʼusi cha takʼ?
• ¿Kʼuxi la stijbe yoʼonton krixchanoetik ta yalel kʼusi tsnopik li Jesuse?
• ¿Kʼu yuʼun la xchikinta Jesús li kʼusi chalik li buchʼutik la xchanubtase?
• ¿Kʼuxi xuʼ jtunestik ta chol mantal li sjakʼobiltake?
• ¿Kʼuxi xuʼ jkoltatik sventa xchʼiik ta mantal li ololetike?
[Lokʼol ta pajina 26]
Mu me jchʼay ta joltik xchikintael li kʼusi chi j-albat kʼalal ta jcholtik mantale
[Lokʼol ta pajina 28]
Jech kʼuchaʼal la spas Jesuse ta jkoltatik sventa xchʼiik ta mantal li ololetike