Jchʼies jtalelaltik sventa jpastik ta jchankʼop li krixchanoetike

«Batanic me; bat pasic ta jchʼunolajel cuʼun li cristianoetic ta jujun banamile.» (MATEO 28:19.)

1. ¿Kʼusitik spʼijilik xchiʼuk stalelalik persa itun yuʼunik jlom yajtuneltak Dios ta voʼne?

SVENTA tspasik li kʼusi tskʼan Jeovae, bakʼintike li yajtuneltake skʼan xchʼies stalelalik xchiʼuk spʼijilik. Jech kʼuchaʼal liʼe, kʼalal la xchʼunik li kʼusi albatik yuʼun Jeova li Abraham xchiʼuk Sara ti akʼo xlokʼik batel li ta jkʼulej jteklum Ure, persa la xchʼies stalelalik xchiʼuk spʼijilik sventa xnakiik ta karpana (Hebreos 11:8, 9, 15). Li Josué eke, la skʼan stsatsal yoʼonton, spatel yoʼonton ta stojolal Jeova xchiʼuk yojtikinel lek li Mantal sventa chotes ta Albil Balumil li j-israeletike (Josué 1:7-9). Li Bezaleel xchiʼuk Aholiabe oy xa onoʼox van kʼusitik xtojobik spasel, pe la to slekubtasik mas ta skoltaobba li s-espiritu Diose; jaʼ jech koltavanik ta spasel li chʼulna pasbil ta nukule xchiʼuk yantik abtel sventa taje, tunik ta j-abteletik xchiʼuk ta jkʼel j-abteletik (Éxodo 31:1-11).

2. Ta sventa li abtelal ta spasel jchankʼopetike, ¿kʼusitik ta jtakʼtik li ta xchanobil liʼe?

² Kʼalal echʼ xaʼox ep sigloe, xi laj yakʼbe yabtel li yajchankʼoptak Jesuse: «Batanic me; bat pasic ta jchʼunolajel cuʼun li cristianoetic ta jujun banamile. [...] Chanubtasic lec ta xchʼunel scotol li jmantaltac laj calboxuc avaʼyique», xi (Mateo 28:19, 20). Jaʼ to sba velta chichʼ akʼel jun matanal abtel jech kʼuchaʼal taje. Pe ¿kʼusi talelalil skʼan kuʼuntik sventa ta jpastik ta jchankʼop li krixchanoetike? ¿Kʼuxi xuʼ jchʼiestik?

Jkʼantik ta sjunul koʼontontik li Diose

3. ¿Kʼusitik chkakʼtik ta ilel kʼalal ta jpastik li abtelal ta spasel jchankʼopetike?

³ Skʼan jkʼantik ta sjunul koʼontontik Jeova sventa jbeiltastik li krixchanoetike xchiʼuk ti kakʼbetik ta yoʼontonik ta yichʼel ta mukʼ li jun noʼox melel Diose. Xuʼ toʼox chakʼik ta ilel ti jech skʼanojik Dios li j-israeletik kʼalal chchʼunbeik smantaltake, kʼalal chakʼbeik matanaletik ti lek chile xchiʼuk ti tsmuyubtaik ta kʼejoje (Deuteronomio 10:12, 13; 30:19, 20; Salmo 21:13; 96:1, 2; 138:5). Jech li yajtsʼaklomutik Cristo eke chkakʼtik ta ilel ti jkʼanojtik Dios kʼalal ta jchʼunbetik smantaltake. Pe yan ti kʼuyelan chkakʼtik ta ilel noxtoke jaʼ ti kʼalal ta jpastik ta jchankʼop li krixchanoetike. Jaʼ yuʼun, kʼalal chkalbetik skʼoplal Jeova li krixchanoetike xchiʼuk li kʼusitik tspase, skʼan jpʼel chkaltik xchiʼuk jtʼujtik kʼusi chkaltik ti jaʼuk chakʼ ta ilel kʼu to yepal jkʼuxubinojtik li spatobil koʼontontik yakʼojbutike (1 Tesalonicenses 1:5; 1 Pedro 3:15).

4. ¿Kʼu yuʼun kʼupil laj yaʼi Jesús ti chalbe skʼoplal Jeova ta stojolal krixchanoetike?

⁴ Li Jesuse skʼanoj tajmek li Jeovae, jaʼ yuʼun toj kʼupil laj yaʼi ti chalbe skʼoplal li kʼusitik tspase, li Ajvalilal yuʼun Diose xchiʼuk li melel yichʼel ta mukʼ Diose (Lucas 8:1; Juan 4:23, 24, 31). Jech onoʼox, xi laj yal jun veltae: «Li jveʼele jaʼ ti ta jpasbe cʼusi tscʼan li Bochʼo la stacun tale, xchiʼuc ti acʼo jvuʼesbe li yabtele», xi (Juan 4:34). Jech xtok, kʼot ta pasel ta stojolal li kʼusi xi laj yal jtsʼibajom yuʼun Salmoe: «Dios cuʼun, jaʼ lec chavil ti jpas cʼusi chacʼane, ti oy ta coʼnton ta jchʼun li amantale, xichi. Laj cacʼ ta ilel cʼusi tucʼ ta pasel ta stojol li yepal avuʼuntaque; muʼyuc bu la jmac que. Mucʼul Dios, lec xanaʼ ti jech la jpase», xi (Salmo 40:8, 9; Hebreos 10:7-10).

5, 6. ¿Kʼusi talelalil toj tsots skʼoplal sventa jpastik ta jchankʼop li krixchanoetike?

⁵ Jlom krixchanoetik ti jaʼ to la xchanik li kʼusitik melel ta Vivliae skʼanojik tajmek li Diose. Ti jech skʼanojik tajmeke, chalbeik skʼoplal Jeova xchiʼuk li Ajvalilal yuʼune, ta sjunul yoʼonton chalik, ti jech tspasike yakʼojbeik ta yoʼonton ep krixchanoetik ti akʼo xchanik li Vivliae (Juan 1:41). Jech, li kʼusi mas tstij koʼontontik ta spasel jchankʼopetike jaʼ ti jkʼanojtik li Diose. Jaʼ yuʼun chaʼa, jchanilantik me li Vivliae xchiʼuk ti jnopbetik me skʼoplal sventa xmeʼin ta koʼontontik li kʼanelal taje (1 Timoteo 4:6, 15; Apocalipsis 2:4).

⁶ Ta melel, ta skoj ti skʼanoj Jeova li Jesuse jaʼ tijbat-o yoʼonton ti oy tajmek ta yoʼonton chchanubtasvane. Pe taje maʼuk noʼox srasonal ti jech lek tajmek kʼusitik kʼot ta pasel yuʼun li ta xcholbel skʼoplal Ajvalilal yuʼun Diose. ¿Kʼusi to yan stalelal koltaat sventa kʼot ta lekil jpas jchankʼopetik?

Kakʼtik ta ilel ti oy ta koʼontontik ta melel li jchiʼiltaktike

7, 8. ¿Kʼusi oy ta yoʼonton ta stojolal krixchanoetik li Jesuse?

⁷ Li Jesuse laj yat yoʼonton ta stojolal li krixchanoetike xchiʼuk laj yakʼ ta ilel ti oy tajmek ta yoʼontone. Jech xtok, kʼalal muʼyuk toʼox bu talem ta Balumile, kʼalal jaʼ toʼox «pʼijil j-abtel» yuʼun Diose, skʼanoj xa onoʼox skotol li kʼusitik ta sventa krixchanoetike (Proverbios 8:30,  NM, 31). Kʼalal kuxi ta Balumil kʼuchaʼal krixchanoe, la xkʼuxubin li buchʼutik oy ta spat xokone xchiʼuk la sta spatobil yoʼontonik li buchʼutik la xchiʼinik ta loʼile (Mateo 11:28-30). Toj lek ikʼanvan xchiʼuk toj lek ikʼuxubinvan jech kʼuchaʼal sTot li Jesuse, jaʼ yuʼun kʼupil laj yaʼiik chbat yichʼik ta mukʼ melel Dios li krixchanoetike. Kʼusiuk krixchanoal laj yaʼibeik li kʼusi chale, yuʼun oy ta yoʼonton ta melel li krixchanoetike xchiʼuk ti kʼusi tsnuptan ta xkuxlejalike (Lucas 7:36-50; 18:15-17; 19:1-10).

⁸ Kʼalal jakʼbat yuʼun jun vinik kʼusi skʼan spas sventa tsta kuxlejal sbatel osile, la skʼelbe sat li vinike xchiʼuk «icʼuxubaj ta yoʼnton» (Marcos 10:17-21). Ta yan loʼile chkiltik ti «Jesuse lec scʼanoj li Marta xchiʼuc li [Mariae] xchiʼuc li Lazaroe», yajchankʼoptak ti te nakalik ta Betaniae (Juan 11:1, 5). Ta skoj ti oy tajmek ta yoʼonton krixchanoetik li Jesuse, bakʼintike muʼyuk la xkux yoʼonton ta skoj ti chakʼbe xchanik li lekil aʼyeje (Marcos 6:30-34). Ti jech oy ta yoʼonton krixchanoetik li Jesuse xchiʼuk ti skʼanoj tajmeke jaʼ ti kʼusi pasat-o ta lekil jchanubtasvanej kʼalal laj yikʼ tal ta melel yichʼel ta mukʼ Dios li krixchanoetike.

9. ¿Kʼusi stalelal laj yakʼ ta ilel Pablo kʼalal la spas ta jchankʼop li krixchanoetike?

⁹ Li jtakbol Pabloe eke oy tajmek ta yoʼonton li krixchanoetik ti la xcholbe mantale. Jech kʼuchaʼal liʼe, li krixchanoetik ti ochemik xaʼox ta yajtsʼaklomtak Cristo ta Tesalonicae, xi laj yalbee: «Batsʼi ep jcʼanojotcutic. Mu jaʼuc noʼox oy ta coʼntoncutic ta jcholbotcutic li Lequil Aʼyeje; oy ta coʼntoncutic chcacʼ jbecʼtalcutic ta acojic noxtoc, yuʼun batsʼi ep jcʼanojotcutic ta jyalel», xi. Li kʼusi kʼot ta pasel ta skoj ti skʼanoj xchiʼuk oy ta yoʼonton jtesalonicaetik li Pabloe jaʼ ti oy jayibuk «laj [s]comtsanic yichʼel ta mucʼ li cʼusitic cuybilic ta diose, ti jaʼ [talik] ta stojol li batsʼi cuxul Diose» (1 Tesalonicenses 1:9; 2:8). Mi oy ta koʼontontik ta melel li krixchanoetik jech kʼuchaʼal la spas Jesús xchiʼuk Pabloe, xuʼ van jun koʼontontik chkaʼitik kʼalal tstijbe yoʼonton «bochʼotic scʼoplal onoʼox chcuxiic sbatel [osil]» li lekil aʼyeje (Hechos 13:48).

Mu me xkichʼ jbatik tajmek ta kʼux

10, 11. ¿Kʼu yuʼun skʼan mu xkichʼ jbatik tajmek ta kʼux kʼalal ta jpastik ta jchankʼop li krixchanoetike?

¹⁰ ¿Buchʼutik ti mas xtojobik ta spasel ta jchankʼop li krixchanoetike? Jaʼ li yajtsʼaklomtak Cristo ti muʼyuk bu chichʼ sbaik tajmek ta kʼuxe. Li stukike, maʼuk mas tsots skʼoplal chilik li saʼel kʼulejale. Ta melel, jech kʼuchaʼal laj yalbe li yajtsʼaklomtak Jesuse, «li jcʼulejetique toj vocol xuʼ ch-ochic yoʼ bu tspas mantal li Diose». Kʼalal jech laj yal Jesuse, toj labal sba laj yaʼi li yajtsʼaklomtake. Akʼo mi jech, xi to laj yal xtoke: «Jnichʼnabtac, li bochʼotic batem yoʼnton yuʼun scʼulejalique toj vocol ch-ochic yoʼ bu tspas mantal Dios. Jaʼ mu vocoluc chjelov jcot camello ta chac acuxa; jaʼ toj vocol ta xʼoch yoʼ bu tspas mantal Dios li jcʼulejetique», xi (Marcos 10:23-25). Ta skoj taje, li Jesuse laj yalbe yajchankʼoptak ti lekuk noʼox li xkuxlejalike sventa jaʼuk xakʼ ta yoʼontonik spasel ta jchankʼop li krixchanoetike (Mateo 6:22-24, 33). Pe ¿kʼu yuʼun skʼan mu xkichʼ jbatik tajmek ta kʼux kʼalal ta jpastik ta jchankʼop li krixchanoetike?

¹¹ Yakʼel ta chanel li kʼusitik laj yal komel Jesuse skʼan chkakʼbetik tajmek yipal ta jujuntal. Li yajtsʼaklomtak Cristo ti tskʼan tspasik ta jchankʼop li krixchanoetike chakʼbeik yipal ta yakʼbel chanubtasel ta Vivlia jujun xemana li buchʼutik oy ta yoʼontonik mantale. Jlome mu xa toj epuk ch-abtejik sventa xuʼ tstaik li krixchanoetik taje. Ta smilal noʼox yajtsʼaklomtak Cristoe chchanik yan kʼop sventa chcholbeik mantal li krixchanoetik ti yan-o stsʼunbalik te bu nakalike. Oy jlom xtoke chikta komel snaik sventa chbatik ta yan lum o ta yan balumil sventa chepajes li yabtelik ta kʼajoje (Mateo 9:37, 38). Sventa spas taje skʼan mu xkichʼ jbatik tajmek ta kʼux. Pe oy to kʼusi mas skʼan jpastik sventa spas kuʼuntik ta yajchankʼoptak Jesús li krixchanoetike.

Oyuk smukʼul koʼontontik, pe mu me jchʼaytik kʼakʼal

12, 13. ¿Kʼu yuʼun toj tsots skʼoplal ti oyuk smukʼul koʼontontik kʼalal ta jpastik ta jchankʼop li krixchanoetike?

¹² Yan talelalil ti tskoltautik ta spasel ta jchankʼop li krixchanoetike jaʼ li smukʼul oʼontonale. Skʼan kuʼuntik taje, yuʼun manchuk mi ta anil onoʼox skʼan chakʼ ta xkuxlejalik li mantal ta jcholtik li krixchanoetike, oy ep ti chjalijik sventa chakʼ sbaik ta stojolal li kʼusi melele (1 Corintios 7:29). Li Jesuse muʼyuk bu xtavan xaʼi ti muʼyuk bu ta ora ikʼot ta yajtsʼaklom li yitsʼine, li Santiagoe. Akʼo mi xojtikinbe lek yabtel ta chol mantal Jesús yaʼeluk li Santiagoe, te van kʼusi srasonal ti muʼyuk bu ikʼot ta ora ta yajtsʼaklome (Juan 7:5). Pe kʼot van ta jchʼunolajel ta sjabilal 33, jaʼo van li kʼu sjalil yiloj sbaik li slajel Cristo xchiʼuk li Pentecostese. Jaʼ jech ta jnoptik taje, yuʼun jech kʼuchaʼal chakʼ kaʼitik sKʼop Diose, li ta skʼakʼalil taje yakal xaʼox chkʼot ta tsobajel sventa tspasik orasion xchiʼuk li smeʼe, li xchiʼiltak ta vokʼele xchiʼuk li jtakboletike (Hechos 1:13, 14). Li Santiagoe chʼi ta mantal, ta mas tsʼakale oy kʼusitik tsots skʼoplal la sbain li ta stsobobbail yajtsʼaklom Cristoe (Hechos 15:13; 1 Corintios 15:7).

¹³ Jech kʼuchaʼal kʼunkʼun chchʼi li kʼusi tstsʼun jun jtsʼunolajele, jaʼ jech ek li kʼusi ta jtsʼuntik ta sventa krixchanoetike: li yaʼibel smelolal sKʼop Diose, li skʼanel Jeovae xchiʼuk ti kʼuyelan yoʼonton li yajtsʼaklom Cristoe. Jech oxal chaʼa, skʼan oyuk smukʼul koʼontontik. Xi la stsʼiba li Santiagoe: «Quermanotac, tsʼiquic me, oyuc me smucʼul avoʼntonic o cʼalal to chtal li Cajvaltique. Qʼuelavilic cʼu xʼelan li bochʼo ta xʼabteje, jun yoʼnton ta smala chlocʼ li cʼusi ta stsʼun liʼ ta banamile. Jun yoʼnton ta smala cʼusi ora chyal li voʼe. Jaʼuc me jechoxuc ec li voʼoxuque, oyuc me smucʼul avoʼntonic, junuc avoʼntonic, yuʼun jutuc xa scʼan xchaʼsut tal li Cajvaltique», xi (Santiago 5:7, 8). Li Santiagoe laj yalbe li yermanotak ta chʼunolajel ti «oyuc me smucʼul [y]oʼntonic o cʼalal to chtal li Cajvaltique». Mi oy kʼusi mu xaʼibeik smelolal li yajtsʼaklomtak Jesuse, ta smukʼul yoʼonton chalbe smelolal o chalbe skʼoplal ta lokʼolkʼop (Mateo 13:10-23; Lucas 19:11; 21:7; Hechos 1:6-8). Li avie kuxulutik xa ta skʼakʼalil ti liʼ xa oy li Kajvaltike. Pe toj jtunel to ti oyuk smukʼul koʼontontik kʼalal ta jchanubtastik li krixchanoetike, yuʼun jaʼ jech xuʼ chkʼotik ta yajtsʼaklom Cristo (Juan 14:9).

14. Manchuk mi oy smukʼul koʼontontik ta stojolal li jchanunetik ta Vivliae, ¿kʼusi ta jpastik sventa jtunestik lek li kʼakʼale?

¹⁴ Manchuk mi oy smukʼul koʼontontik, muʼyuk onoʼox bu tsatin ta stojolal skotol jchanunetik ta Vivlia li «ventainel yuʼun Diose» (Mateo 13:18-23). Chkakʼbetik yipal ta skoltaelik, pe mi mu satine, chkiktatik komel, vaʼun jaʼ ta jtunes lek jkʼakʼaltik ta saʼel li buchʼutik oy sbalil chaʼiik li kʼusitik melel ta Vivliae (Eclesiastés 3:1, 6). Pe skʼan teuk ta joltik xtok ti jlom krixchanoetik ti oy sbalil chaʼiik li kʼusi melele, oy ta yoʼontonik ti xkakʼbetik mas yorail ti kʼu onoʼox yelan nopem xkaʼitike sventa tsjel li snopbenike, li stalelalike xchiʼuk li kʼusitik mas tsots skʼoplal ta xkuxlejalike. Jaʼ yuʼun, ta jchanbetik li smukʼul yoʼonton Jesús ti laj yakʼ ta ilel ta stojolal yajtsʼaklomtak kʼalal vokol laj yaʼiik sjelel stalelalike (Marcos 9:33-37; 10:35-45).

Jchʼiestik li tojobel ta chanubtasvaneje

15, 16. ¿Kʼu yuʼun tsots skʼoplal ti lekuk xchapan sba xchiʼuk kʼunuk ta aʼibel smelolal li kʼusi chchanubtasvan li yajchankʼop Cristoe?

¹⁵ Mi ta jkʼan ta jpastik ta jchankʼop li krixchanoetike, tsots me skʼoplal ti akʼo jkʼantik li Diose, ti oyuk ta koʼontontik li krixchanoetike, ti mu xkichʼ jbatik tajmek ta kʼuxe xchiʼuk ti oyuk smukʼul koʼontontike. Jech xtok un skʼan ta jchʼies jpʼijiltik kʼuchaʼal jchanubtasvanej, yuʼun jaʼ noʼox jech xuʼ kʼun xchiʼuk jamal chkalbetik smelolal li kʼusi chkaltike. Jech kʼuchaʼal liʼe, li Mukʼta Jchanubtasvanej Jesuse, ep kʼusitik laj yal ti labal sba ta aʼiel ta skoj ti kʼun laj yalbe smelolale. Xvul van ta joltik liʼe: «Tsobo acʼulejalic te ta vinajel», «Mu me xavacʼbeic tsʼiʼetic li cʼusitic jaʼ yuʼun Diose», «Li bochʼo bije ta xvinaj ta sventa yabtel» xchiʼuk «Acʼbeic cʼusi jaʼ yuʼun li Cesare; acʼbeic noxtoc cʼusi jaʼ yuʼun li Diose» (Mateo 6:20; 7:6; 11:19; 22:21). Pe li Jesuse maʼuk noʼox tstunes komkom loʼiletik sventa chchanubtasvan. Kʼalal xuʼ chile, jal chchapbe smelolal, pe lek jamal ta aʼyel xtok un. ¿Kʼuxi xuʼ jchanbetik ti kʼu yelan ichanubtasvane?

¹⁶ Li kʼusi mas toj tsots skʼoplal sventa kʼun xchiʼuk jamal smelolal xi jchanubtasvane jaʼ ti lekuk jchapan jbatike. Li yajchankʼop Cristo ti muʼyuk lek chchapan sbae toj ep chkʼopoj. Chal skotol li kʼusi xojtikin ta jujutos loʼile, jech oxal li kʼusitik mas tsots skʼoplale chchʼay ta skoj li kʼusitik tsbusan ta alele. Yan li buchʼu lek chchapan sbae tsnopbe baʼyel skʼoplal li jchanune, tsnopbe lek skʼoplal li loʼil ti chchanike xchiʼuk jaʼ noʼox chalbe smelolal li kʼusi jtunele (Proverbios 15:28; 1 Corintios 2:1, 2). Oy ta sjol li kʼusi snaʼoj xa li jchanune xchiʼuk li kʼusitik mas chalbe skʼoplal kʼalal chchanunajike. Xuʼ van xojtikin ep kʼusitik, pe ta skoj ti mu jtuneluke muʼyuk bu chalbe skʼoplal, vaʼun jaʼ jech jamal chalbe smelolal.

17. ¿Kʼuxi xuʼ jkoltatik ta yaʼibel srasonal Vivlia li krixchanoetike?

¹⁷ Li Jesuse maʼuk noʼox kʼusi laj yakʼ ta naʼel, yuʼun koltavan ta yaʼibel srasonal xtok. Jech kʼuchaʼal liʼe, jun veltae xi la sjakʼe: «¿Cʼusi chanop, Simón? ¿Bochʼo ta scʼanbe taqʼuin li mucʼtic ajvaliletic liʼ ta banamile? ¿Me jaʼ ta scʼanbe li xnichʼnabe, o me yan cristianoetic ta scʼanbe?», xi (Mateo 17:25). Li avie, kʼalal chi jchanubtasvan ta Vivliae skʼan xkakʼtik akʼo yal kʼusi tsnop li krixchanoe o ti akʼo yalbe smelolal li kʼusi yakal ta jchantike. Sventa jech taje, skʼan spajes jbatik, mas to mi toj kʼupil chkaʼitik ta yalbel smelolal li kʼusitik melel ta Vivliae. Pe maʼuk skʼan xal xtok ti kʼusiuk xa noʼox jakʼbetik li jchanune, moʼoj, yuʼun lek noʼox smelolal kʼusi jakʼbetik o xkalbetik skoʼoltasobil ti lek nopbile. Mi jaʼ jech ta jpastike jaʼ me jech ta jkoltatik ta yaʼibel srasonaltak li kʼusi chal jvuntik ti lokʼesbil ta Vivliae.

18. ¿Kʼusi smakoj batel li «tojobel ta chanubtasvaneje»?

¹⁸ Li Vivliae chalbe skʼoplal li jpʼel kʼop «tojobel ta chanubtasvaneje» (2 Timoteo 4:2; Tito 1:9, NM). Li tojobel ta chanubtasvanej taje maʼuk noʼox sventa chkom ta sjol kʼusitik li jchanune. Li stu taje jaʼ ti akʼo yakʼ venta ti jelel li kʼusi melel xchiʼuk li kʼusi jecheʼe, li kʼusi leke xchiʼuk li kʼusi chopole xchiʼuk li pʼijilal xchiʼuk bolibele. Mi chkakʼbetik yipal spasel taje xchiʼuk mi chkakʼbetik ta yoʼonton li skʼanel Jeovae, xuʼ chaʼibe smelolal kuʼuntik ti kʼu yuʼun skʼan xchʼunbe smantal Diose.

Kakʼtik ta ilel ti oy ta koʼontontik spasel jchankʼopetike

19. ¿Kʼu yuʼun xuʼ xkaltik ti jkotoltik ta jkolta jbatik ta spasel jchankʼopetik li yajtsʼaklomutik Cristoe?

¹⁹ Li stsobobbail yajtsʼaklom Cristoe jaʼ jtsop krixchanoetik ti jun noʼox kʼusi skʼelojik batele: spasel ta jchankʼop li krixchanoetike. Jaʼ yuʼun chaʼa, kʼalal oy buchʼu ch-och ta jchankʼope, maʼuk noʼox xmuyubaj li buchʼu itavane xchiʼuk ti la xchanubtas ta Vivliae. Xkoʼolaj kʼalal chchapan sbaik jtsop krixchanoetik sventa tsaʼik jun olol ti chʼayeme. Manchuk mi jun noʼox ti buchʼu tstae, skotolik chmuyubajik ti kʼalal chbat sta stot smeʼ li olole (Lucas 15:6, 7). Jech, li spasel jchankʼopetike jaʼ jun komon abtel. Jkotoltik li yajtsʼaklomutik Cristoe chi jkoltavanutik ta saʼel krixchanoetik ti xuʼ chkʼotik ta yajchankʼoptak Jesuse. Jaʼ yuʼun kʼalal oy buchʼutik chlik kʼotikuk ta tsobajel ta Salon sventa Tsobobbaile, jkotoltik ta jkolta jbatik sventa skʼan batel mas li melel yichʼel ta mukʼ Diose (1 Corintios 14:24, 25). Jaʼ yuʼun jkotoltik li yajtsʼaklomutik Cristoe xi jmuyubajutik ti jujun jabil ta smilal noʼox krixchanoetik ch-ochik ta yajchankʼoptak Jesuse.

20. ¿Kʼusi skʼan cha pas mi oy ta avoʼonton cha chanubtas ta Vivlia junuk krixchanoe?

²⁰ Ep tukʼil ermanoetike yoʼontonikuk tajmek chaʼiik ti skoltaik junuk krixchano ta yojtikinel Jeovae xchiʼuk li melel yichʼel ta mukʼe, pe akʼo mi chakʼbeik tajmek yipal, muʼyuk bu tstaik. Mi jaʼ jech ta atojolale, chʼieso batel li kʼanelal avuʼun ta stojolal Jeovae, oyuk ta avoʼonton li krixchanoetike, mu xa xavichʼ aba tajmek ta kʼux, oyuk smukʼul avoʼonton xchiʼuk chʼieso apʼijil kʼuchaʼal jchanubtasvanej. Pe li kʼusi mas tsots skʼoplal ta skotole, jaʼ ti albo Jeova ti oy ta avoʼonton cha chanubtas ta Vivlia junuk krixchanoe (Eclesiastés 11:1, Ch). Mu me xchibaj avoʼonton. Vuleso ta ajol ti skotol li kʼusi cha pas ta yabtel Jeovae chkoltavan li ta abtelal ta spasel jchankʼopetike xchiʼuk tsmuyubta li Diose.

¿Mi xa naʼ yalbel smelolal?

• ¿Kʼu yelan ti chichʼ akʼel ta preva ti jkʼanojtik Dios li ta abtelal ta spasel jchankʼopetike?

• ¿Kʼusitik talelalil chtun sventa jpastik ta jchankʼop li krixchanoetike?

• ¿Kʼusi smakoj batel li «tojobel ta chanubtasvaneje»?

[Lokʼol ta pajina 15]

Li yajtsʼaklomutik Cristoe chkakʼtik ta ilel ti jkʼanojtik Dios kʼalal ta jpastik jchankʼopetike

[Lokʼol ta pajina 17]

¿Kʼu yuʼun skʼan oyuk ta koʼontontik li jchiʼiltaktik sventa jpastik ta jchankʼopetike?

[Lokʼol ta pajina 18]

¿Kʼusi talelaletik chtun sventa jpastik ta jchankʼop li krixchanoetike?