Kʼuxi ta tsʼunbel ta yoʼontonik skʼanel Dios li alab-nichʼnabiletike

LI AVI kʼakʼale mu toj kʼunuk ti lek tajmek xkil jbatik xchiʼuk Jeovae (Salmo 16:8). Jech onoʼox kʼuchaʼal laj yichʼ alele, ti kʼakʼal kuxulutik avie «xiʼbal sba, yuʼun naca vocol ta xvul ta loqʼuel», yuʼun mas ep li krixchanoetik ti jaʼ oy ta yoʼontonik li kʼusi tskʼan stukike ti mu jaʼuk li kʼusi tskʼan Diose (2 Timoteo 3:1-5, Ch). Jaʼ jech, li ta balumil avie mu xa toj kʼunuk ta tael junuk krixchano ti skʼanoj Dios ta melele.

Li totil meʼilutike mu me jpat koʼontontik ti ta jech noʼox chlik skʼanik Dios li kalab jnichʼnabtike. Moʼoj, yuʼun skʼan jtsʼunbetik ta yoʼontonik li kʼanelal taje. ¿Kʼuxi xuʼ spas kuʼuntik?

Jamal jchiʼintik ta loʼil

Jaʼ noʼox me ta jtsʼunbetik ta yoʼonton kalab jnichʼnabtik skʼanel Jeova mi oy tajmek ta koʼonton jtuktik skʼanel eke (Lucas 6:40). Li Vivliae xi chalbe smelolale: «Cʼano me ta scotol avoʼnton li Mucʼul Dios avuʼune, ta scotol achʼulel, xchiʼuc ta scotol atsatsal. Acʼo ta avoʼnton scotol li cʼusitic laj calbot liʼ ta orae. Chanubtaso scotol cʼacʼal li anichʼnabe», xi (Deuteronomio 6:4-7).

¿Kʼusi skʼan jpastik sventa jtsʼunbetik ta yoʼontonik skʼanel Dios li kalab jnichʼnabtike? Baʼyel, skʼan jkʼelbetik li kʼusi oy ta yoʼontonike, li xchibale jaʼ ti xkakʼtik ta ilel li kʼusi oy ta koʼontontike.

Kʼalal la sta ta be chaʼvoʼ yajchankʼoptak Jesús ti te xbatik ta sbelel Emause, baʼyel la stijbe yoʼonton sventa akʼo xalik li kʼusi tsnopike xchiʼuk li kʼusi chat-o yoʼontonike. Ti kʼalal lek xaʼox jlikel laj yaʼi li kʼusi tsnopike, la stukʼibtasbe li snopbenike, la xchapbe smelolal li kʼusitik chal Tsʼibetike. Ta mas jelavele, li chaʼvoʼ jchankʼopetike xi laj yalike: «Cʼalal yacal ta xiyalbotic talel ta be smelol ti cʼusi tsʼibabil ta chʼul cʼope, ¿mi mu lajuc caʼitic ta coʼntonic ta melel ti jun yutsile?», xiik. Ti vaʼ yelan iloʼilajike, toj lek me kʼusi xuʼ jchantik te ta sventa ti jamaluk xi jloʼilaje, yuʼun ta sjunul yoʼonton ikʼopojik (Lucas 24:15-32, Ch). Li voʼotike, ¿kʼuxi xuʼ jnaʼtik ta melel li kʼusi oy ta yoʼonton kalab jnichʼnabtike?

Jaʼtik to laj yichʼ jakʼbel jayibuk totil-meʼiletik kʼuxi laj yutik sventa lekuk jamal xchiʼinik ta loʼil yalab xnichʼnabik ti la stsʼitesike xchiʼuk ti lek ta chanbel stalelalik li alab-nichʼnabiletike. Glen,a ti nakal ta México ti oy chanvoʼ xnichʼnab ti mukʼtik xae, xi chale: «Ti jamal chloʼilaj xchiʼuk yalab xnichʼnab li totil-meʼiletike mu ta jechuk noʼox chkʼot ta pasel. Li voʼon xchiʼuk kajnile jaʼ muʼyuk xa ta jpaskutik li kʼusi mu toj tsotsuk skʼoplale sventa ta jchiʼinkutik ta loʼil li kalab jnichʼnabkutike. Kʼalal chexik toʼoxe, bateltike chi chotikutik xchiʼukik ta akʼobaltik, vaʼun oy jayibuk ora ta jloʼiltakutik li kʼusitik mas lek chaʼiike. Kʼalal jaʼo chi veʼkutike ta xkaʼibekutik noxtok li kʼusi chalike, pe mi chkaʼikutik ti oy kʼusi chopol tsnopike ta jtukʼibtaskutik, bateltike mu xakʼik venta ti kʼuyelan ta jpaskutike», xi.

Ti jamal chi jloʼilaj xtoke te me tsakal skʼoplal ti xkakʼtik ta ilel ti kʼusi oy ta koʼontontike. Li Jesuse xi laj yale: «Ti lequil tuqʼuil vinique, lec ti cʼusi ta xale, yuʼun oy ta yoʼnton ti cʼusi leque. [...] Ti cʼusi ta xloqʼuilan ta yeique, yuʼun jech onoʼox oy ta yoʼntonic», xi (Lucas 6:45). Li Toshikie oy oxvoʼ xnichʼnab, yoxvoʼalik te chtunik ta tsʼakal ora ta Japón. Xi chale: «Ep ta velta la jchapbeik smelolal kʼusi ti laj yakʼbun tajmek xchʼunel koʼonton ta stojolal Jeovae, kʼusi ti laj yakʼ jchʼun ti oy li Diose xchiʼuk kʼuxi yakʼojbun jchʼun skotol li kʼusi echʼem ta jkuxlejal ti jaʼ sKʼop Dios li Vivliae xchiʼuk ti stuk noʼox jech li beiltasel chakʼe», xi. Cindy ti nakal ta slumal Mexicoe, xi chale: «Li jmalale ta spasilan orasion xchiʼuk li ololetike, kʼalal ta xaʼiik ti ta sjunul yoʼonton tspase xchiʼuk ti lek jamal chale, te chakʼik venta ti oy ta melel li Jeovae», xi.

Tsots skʼoplal ti voʼotik xkakʼtik ta ilele

Mi oy sbalil li jkʼopojeltike mas to me li kʼusi ta jpastike, yuʼun jaʼ te chkakʼbetik yil kalab jnichʼnabtik ti kʼu to yepal jkʼanojtik li Diose. Jnoptik avaʼi li ta stojolal Jesuse. Kʼalal laj yil li krixchanoetik ti chchʼunbe smantal Jeovae, jaʼ te laj yakʼik venta ti kʼu to yepal skʼanoje. Xi laj yale: «Acʼo yilic scotol cristianoetic ti lec jcʼanoj ti Jtote, ti jaʼ ta jchʼunbe smantale», xi (Juan 14:31).

Gareth ti jaʼ yajrextiko Jeova ta Galese, xi chale: «Li kalab jnichʼnabtike skʼan xakʼik venta ti jkʼanojtik li Jeovae xchiʼuk ti jech ta jpastik ti kʼuyelan tskʼane. Jech kʼuchaʼal liʼe, li stukike chakʼik venta ti jamal chkal li kʼusi mu lekuk ta jpase, jech kʼuchaʼal chal Diose. Li stukike jaʼ jech chakʼik persa sventa jech spasik ek», xi.

Jun totil ti Greg sbie xi chale: «Ta jkʼankutik ti akʼo xakʼik venta li kalab jnichʼnabkutik ti jaʼ onoʼox chkakʼ ta jkuxlejalkutik li kʼusi melele. Kʼalal oy kʼusi ta jnopkutik ta sventa abtelal o ta sventa chʼayob oʼontonale, baʼyel ta jkʼelkutik kʼuyelan xuʼ tsmak li kʼusi jbainojkutik ta sventa yajtsʼaklom Cristoe. Xi muyubajkutik ti chkilkutik ti jaʼ jech tspas li jtsebkutik ti balunlajuneb jabil yichʼoj ti ch-abtej ta prekursora auksiliare», xi.

Jkoltatik ta yojtikinel lek Dios li kalab jnichʼnabtike

Mi mu xkojtikintik lek jun krixchanoe, muʼyuk onoʼox ta jkʼantik xchiʼuk muʼyuk ta jpat koʼontontik ta stojolal. Jaʼ yuʼun, kʼalal laj yil ti skʼan to skʼanik mas Jeova li yajtsʼaklomtak Cristo ta Filipose, li Pabloe xi la stsʼibae: «Ta jcʼanbe ep vocol Dios ti echʼem acʼo yepajesboxuc li cʼanvanej avuʼunique, xchiʼuc acʼo bijubanic lec, acʼo anaʼic yotquinel lec scotol», xi (Filipenses 1:9). Falconerio ti yakal stsʼites chanvoʼ xnichʼnab ta Perue, xi chale: «Ta jkʼelilan Vivlia xchiʼuk ta jchan xchiʼukik, vaʼun jaʼ tstsatsub-o li xchʼunel yoʼontonike. Bateltike muʼyuk ta jpas, pe kakʼoj venta ti tsikub li kʼanelal yuʼunik ta stojolal Diose», xi. Jun totil ti Gary sbie, ti ta Australia likeme, xi chale: «Ep tajmek ta jloʼiltabe jnichʼnab li sprevailtak albil kʼopetik ta Vivlia ti yakal xkʼot ta pasele. Jech noxtok lek ta xkalbeik ti oy sbalil mi chkakʼ ta jkuxlejaltik li beiltaseletik ta Vivliae. Ti jech mu xkiktakutik xchanilanel Vivlia xchiʼuk li kutsʼ kalale jaʼ tstsatsub-o li xchʼunel yoʼontonike», xi.

Mi oy noʼox tseʼeje xchiʼuk ti oy noʼox smelole, li olole jaʼ me tskʼupin-o xchanel kʼusi achʼik xchiʼuk stekel ti kʼusi chchane ta me xkʼot ta yoʼonton (Santiago 3:18). «Kʼalal chi chanunaj xchiʼuk kutsʼ kalalkutike, chkakʼkutik persa sventa mu xkutkutik li kalab jnichʼnabkutike, manchuk mi chtajinik jutuk —xi chalik li Shawn xchiʼuk Pauline, ti likemik ta Gran Bretaña ti chanvoʼ yalab xnichʼnabike—. Jech noxtok, ta jelulankutik ti kʼuyelan ch-echʼ li chanune. Bateltike, ta xkalbekutik ti jaʼ akʼo stʼujik junuk loʼil li ololetike. Jech noxtok ta jtuneskutik li videoetik yakʼoj s-organsasion Jeovae; bateltike ta jchaʼkʼelkutik jvokʼuk o ta jpajeskutik li pelikulae, vaʼun ta xkalbekutik jutukuk sloʼilal», xi. Jun meʼil ta Gran Bretaña ti Kim sbie, xi laj yale: «Lek tajmek ta jchapan jba sventa chi chanunaj xchiʼuk li kalabe, yuʼun lek xkaʼi ta sjakʼbel li kʼusi chakʼ abtejuk snopbenike. Ta melel, ta jkʼupinkutik tajmek taje. Chi tseʼinkutik tajmek», xi.

Stʼujbel xchiʼiltaktik

Mi jaʼ oy ta stojolal kalab jnichʼnabtik li buchʼutik yamigo Diose, jaʼ me jech xuʼ skʼanik li Jeovae xchiʼuk stsakik ta venta li melel yichʼel ta mukʼ Diose. Manchuk mi tsots ta sabel ti buchʼutik xuʼ xchiʼinik lek ta loʼile xchiʼuk ti xtajin xchiʼukike, tsots me skʼoplal ti jpastike. Jech noxtok, toj jtunel me ti xichʼ chapanbel yorail sventa akʼo xchiʼinik li yajrextikotak Jeova ti jaʼ yakʼoj ta xkuxlejalik spasbel yabtel Jeova ta tsʼakal orae. Li xchiʼinel yajtuneltak Dios ti oy tajmek ta yoʼontonik mantale ep me stijojbe yoʼonton kerem-tsebetik ti jech x-abtejik batel eke. Jun ermana ti och ta misioneroale xi chale: «Li jtot jmeʼe nopem xaʼiik yikʼel ta veʼel ta jnakutik li prekursoretike. Laj kakʼ venta ti xmuyubajik tajmek li ta yabtelike, ti jech xa ta jkʼan chi tun ta stojolal Dios laj kaʼi eke», xi.

Pe jech kʼuchaʼal jnaʼojtik noxtoke, li amigoiletike xuʼ chopol x-abtej ta stojolal li kalab jnichʼnabtike. Jaʼ yuʼun, li totil meʼilutike skʼan me jchabitik ti mu xamigoinik li buchʼutik chopolike, manchuk mi mu toj kʼunuk ta pasel (1 Corintios 15:33). Skʼan xi jtojob sventa jchanubtastik li chex kerem-tsebetik ti mu persauk xchiʼinik li buchʼutik mu skʼanik xchiʼuk mu xojtikinik li Jeovae (Proverbios 13:20). Shawn ti laj xa kalbetik skʼoplale xi chale: «La jchanunbtaskutik lek li kalab jnichʼnabkutik ti akʼo lekuk xil sba xchiʼuk li xchiʼiltakik ta chanune, pe jaʼ noʼox te taje. Li jkerem jtsebkutike laj yaʼibeik lek smelolal kʼu yuʼun ti mu stakʼ kʼusi spasik xchiʼuk li xchiʼiltakik ta chanun kʼalal maʼuk xa yorail chanune o ti mu stsal sbaik ta tajimol sventa chanune.

Li sbalil lekil chanubtasele

Mi ta jchanubtastik sventa xalbeik smelolal li kʼusi xchʼunoj kalab jnichʼnabtike, kʼupil me chaʼi chalik ti skʼanojik Diose. Mark, ti nakal ta Estados Unidose xi chale: «Ta jkʼankutik ti akʼo xakʼ venta li kalab jnichʼnabkutik ti xuʼ skʼupinik yalel ta buyukal li kʼusitik xchʼunojike, ti maʼuk noʼox kʼalal ta jcholtik mantal ta naetike. Jaʼ yuʼun kʼalal chi batkutik ta parkee, ta playae o kʼalal chi batkutik ta teʼtik junuk kʼakʼale, ta xkichʼkutik echʼel Vivlia xchiʼuk vunetik ti lokʼem sloʼilal ta Vivliae, vaʼun ta jchiʼinkutik ta loʼil li krixchanoetik ta sventa li kʼusi jchʼunojkutike. Li kerem-tsebetike lek tajmek chaʼiik kʼalal jech chkalkutik mantale. Ta onoʼox stikʼ sbaik ek li ta loʼile xchiʼuk chalik li kʼusitik xchʼunojike», xi.

Li jtakbol Juane la skolta ep krixchanoetik sventa skʼanik mas li Diose. Ta slajebal xa batel li snatil kuxlejale xi la stsʼibae: «Muʼyuc cʼusi yan ti toj xcuxet coʼnton yuʼune; jaʼ toj xcuxet coʼnton cʼalal chcaʼibe scʼoplal jnichʼnabtac [ta mantal] ti jaʼ tspasic cʼusi melele», xi (3 Juan 4). Mi ta jtsʼunbetik lek ta yoʼontonik skʼanel Dios li kalab jnichʼnabtike, jaʼ me jech xi jmuyubaj ta melel ek.

[Tsʼibetik ta yok vun]

[Lokʼol ta pajina 13]

❖ Ti jamal chi jloʼilaj ta sventa mantale mu ta jechuk noʼox chkʼot ta pasel

[Lokʼol ta pajina 14]

❖ Chanubtaso avalab anichʼnab ti akʼo yakʼik ta ilel ti skʼanojik Diose

[Lokʼol ta pajina 14]

Ta slekil yoʼonton Green Chimneys Farm