Mu jtosuk abtejebal xuʼ tstsalutik

«Muʼyuc spasojic jchopuc abtejebal ti xuʼ chayulesot oe.» (ISAÍAS 54:17.)

1, 2. ¿Kʼuxi kʼotem ta pasel ta stojolal yajrextikotak Jeova ta Albania li kʼusi chal Isaías 54:17?

LEʼ XA ta sjaylajunebal jabile, ta jun bikʼit balumil ti yalel muyeltik ti oy ta sureste yuʼun Europae, li jun ajvalilal ti tskʼan ti jmojuk kʼusitik yuʼunike (comunista) xchiʼuk ti chʼabal Dios chale, la spas bu kʼalal xuʼ yuʼun sventa tslajesbe skʼoplal jtsop yajtsʼaklomtak Cristo ti tsots yoʼontonike. Pe muʼyuk bu xlajesatik-o manchuk mi akʼbatik tsatsal majel, tsatsal abtel mi jaʼuk li chopol aʼyejetik ti lokʼesbat ta stojolalike. ¿Buchʼutik taje? Jaʼ li yajrextikotak Jeova ta Albaniae. Manchuk mi toj vokol sventa tstsob sbaik xchiʼuk chcholik mantal, ti jech kuchem tal yuʼunik jaylajunebuk xa jabile lekil kʼoptabil li yajtsʼaklomtak Cristoe xchiʼuk smukʼibtasojbeik skʼoplal li sbi Jeovae. Ta sjabilal 2006, kʼalal laj yichʼ akʼel ta stojolal Dios li achʼ Betel ta Albaniae, xi laj yal li jun Testigo ti ep xa jabil tukʼ yakʼoj sbae: «¡Manchuk mi tsots tajmek chakʼ yipal li Satanase, ta onoʼox stsalat, jaʼ tspas kanal li Jeovae!», xi.

² Li yajtsʼaklomtak Cristo taje jaʼ jun skʼelobil kʼotem li kʼusi yaloj ta melel Jeova ti te ta jtatik ta Isaías 54:17: «Muʼyuc spasojic jchopuc abtejebal ti xuʼ chayulesot oe. Voʼot chamacbe yeic li bochʼotic tstiqʼuic amule». Li kʼusitik kʼotem ta pasele jpʼel chakʼ ta ilel ti mu jtosuk kʼusi xuʼ spas Satanás sventa chikta sbaik ta yichʼel ta mukʼ Jeova li yajtuneltak ti yakʼoj sbaik ta stojolale.

Li kʼusitik tspas yaʼi Satanás ti muʼyuk juʼem yuʼune

3, 4. 1) ¿Kʼusi jaʼ jlomuk li yabtejeb Satanase? 2) ¿Kʼu yuʼun xuʼ xkaltik ti mu kʼusi stu li yabtejebtak Satanase?

³ Jlom abtejebal ti tunesbil ta skontra li yajtuneltak Jeovae jaʼ ti mu x-akʼbat spasik li yabtel Diose, krixchanoetik ti chmajvanike, chukel xchiʼuk nopbil mantaletik sventa chichʼik-o ilbajinel (Salmo 94:20). Jech, li ta ora ti yakalutik xchanel li mantal liʼe, ta junantik balumile yakal chil preva li stukʼil yoʼontonik ta stojolal Jeova li melel yajtsʼaklomtak Cristoe (Apocalipsis 2:10).

⁴ Jech kʼuchaʼal liʼe, jun snail tsʼibajom yuʼun yajrextikotak Jeovae laj yal ti ta jun noʼox jabile, 32 to la kʼopetik la snuptanik li yajtuneltak Dios kʼalal jaʼo yakal spas li yabtelik ta stojolal Diose. Jech xtok, li polisiaetike la xchukik 59 ta velta yajRextikotak Jeova —mol-meʼeletik xchiʼuk kerem-tsebetik, viniketik xchiʼuk antsetik— ti yakal chcholik mantale. Jlome ilbajinatik kʼuchaʼal jsaʼ muliletik: albatik akʼo yakʼ smeʼ skʼobik, lokʼtaatik, vaʼun tikʼatik ta chukel. Yantike albatik ti ch-akʼbat svokolike. Ta jun balumile aʼibil skʼoplal ti mas ta 1,100 kʼopetik snuptanoj li yajrextikotak Jeovae, laj yichʼik chukel, laj yakʼik multa o laj yil svokolik ta majel. Jech, mas ta 200 li kʼopetik taje, jaʼo ikʼot ta pasel kʼalal stsoboj sbaik sventa tsnabeik li slajel Jesuse. Pe li ta mukʼtik lumetik taje xchiʼuk li ta yantik xtoke, li Jeovae stunesoj xchʼul espiritu sventa tspoj li steklumal kʼalal kontrainbil ta jyalel yilele (Zacarías 4:6). Li stiʼemal sjol jkontrainvanejetike muʼyuk bu tsmakbe ye li buchʼutik tskʼupil kʼoptaik Jeovae. Jech, jpʼel ta koʼontontik ti mu jtosuk abtejebal xuʼ tsmak ta be li kʼusi tskʼan tspas Diose.

Ta jmakbetik ye jtikʼ muliletik

5. ¿Kʼusitik jut kʼopal laj yichʼ alel ta stojolal li yajtuneltak Jeova ta baʼyel sigloe?

⁵ Li Isaiase laj yal ti yajtuneltak Diose tsmakbe ye li buchʼutik chkontrainatike, jaʼ xkaltik, chakʼik ta ilel ti jaʼ jutkʼopetike. Li ta baʼyel sigloe, nopolik noʼox laj yichʼik chopol kʼoptael li yajtsʼaklomtak Cristoe, jech xtok ch-albat skʼoplalik ti chopol krixchanoetik lae. Li kʼusi chal Hechos 16:20, 21 jaʼ jun skʼelobil ti stalel onoʼox chi jlaj ta pakʼtaele: «Li [...] viniquetic liʼi jaʼ ta socbeic sjol cristianoetic liʼ ta jlumaltique. Oy yan cʼusi ta xaqʼuic ta chanel ti mu jechuc jtaleltic li vuʼutique. Mu xuʼ ta jchʼuntic, mu xuʼ ta jpastic jech, yuʼun vuʼutic romautic». Ta yan veltae, li jkontrainvanejetik ta relijione laj yalbeik li ajvaliletik ti akʼo skʼelik kʼusi xuʼ spasbeik li yajtsʼaklomtak Cristoe. Xi jpʼel laj yalike: «[Li] viniquetic ti jaʼ ta socbeic sjol cristianoetic ta sbejel banamile; vulemic xa liʼ ta jlumaltic noxtoc [...,] mu scʼan xchʼunic mantal yuʼun li Cesare», xiik (Hechos 17:6, 7). Li jtakbol Pabloe albat skʼoplal ti jaʼ la jun «vinic [...] ti jaʼ chacʼ ta chʼamel scʼaʼal chamele», xchiʼuk xtok laj yichʼ pakʼtael ta bankilal yuʼun jvokʼ krixchanoetik ti tstoy la sbaike (Hechos 24:2-5).

6, 7. Alo jtosuk kʼuxi tsmakbe ye yajkontraik li melel yajtsʼaklomtak Cristoe.

⁶ Jech oxal chaʼa, mu labaluk chkaʼitik ti chopol kʼoptabilik, pakʼtabilik xchiʼuk chichʼ alel ti chopol skʼoplalik li yajtsʼaklomtak Cristo avie. Pe, ¿kʼu yelan ta jmakbetik ye li jkontrainvanejetik taje? (Isaías 54:17.)

⁷ Li jlekil talelaltike stenoj batel li pakʼtael ta jkontratike xchiʼuk ti tskʼanik ti chopoluk jkʼoplaltike (1 Pedro 2:12). Kʼalal chilik krixchanoetik ti ta jchʼuntik mantale, ti oy lekil mantal kuʼuntik ta sventa jtalelaltike xchiʼuk ti oy ta koʼontontik li yantike, lek jamal chakʼ ta ilel ti naka jut kʼop li kʼusitik chalik ta jtojolaltike. Jaʼ chal jkʼoplaltik li jlekil talelaltike. Kʼalal chilik li kʼusitik lek ta jpastike, muʼyuk labal sba ta aʼiel ti oy buchʼutik chtijbat yoʼontonik ta smukʼibtasbel skʼoplal li jTotik ta vinajele xchiʼuk ti chalik ti mu kʼusi xkoʼolaj-o ti kʼuyelan xkuxlejal li yajtuneltake (Isaías 60:14; Mateo 5:14-16).

8. 1) ¿Kʼusi van persa skʼan jpastik sventa jpakbetik skʼoplal li kʼusi jchʼunojtik ta Vivliae? 2) Jech kʼuchaʼal Cristoe, ¿kʼu yelan ta jmakbetik ye li jkontrainvanejetike?

⁸ Maʼuk noʼox ta jlekil talelaltik ti xuʼ jpak jkʼoplaltike, yuʼun mi persa skʼan chkiltike ta stsatsal koʼontontik ta jpakbetik skʼoplal li kʼusitik jchʼunojtik ta Vivliae. Jtos ti kʼuyelan ta pasele jaʼ ti kʼalal chi jbat ta stojolal ajvaliletik o ta snail chapanobbailetike (Ester 8:3; Hechos 22:25-29; 25:10-12). Kʼalal liʼ toʼox oy ta Balumil li Jesuse, bakʼintike lek jamal la svulilan sba xchiʼuk li buchʼutik chchopol kʼoptaate. ¿Kʼu yuʼun? Sventa tspak skʼoplal (Mateo 12:34-37; 15:1-11). Jech kʼuchaʼal li Jesuse, li voʼotik eke lek jamal smelolal chkalbetik krixchanoetik li kʼusi jchʼunojtik mi xuʼ chkiltike (1 Pedro 3:15). Mu xkakʼtik akʼo spajtsanutik ta yalel kʼusi melel ta sKʼop Dios li naʼleel chkichʼtik ta chanob vun, ta kabteltik o li ta kutsʼ kalaltik ti maʼuk jchʼunolajeletike (2 Pedro 3:3, 4).

Jaʼ «jun mucʼ ta alal ton» li Jerusalene

9. ¿Kʼusi Jerusalenal ti lokʼolkʼoptabil ta «mucʼ ta alal ton» ta Zacarías 12:3, xchiʼuk buchʼutik vaʼanbil ta skʼoplal liʼ ta Balumile?

⁹ Jun albil kʼop yuʼun Zacariase chal kaʼitik kʼu yuʼun tskontrainik melel yajtsʼaklomtak Cristo li mukʼtik lumetike. Jkʼeltik avilik li kʼusi chal Zacarías 12:3 ta XChʼul Cʼop ti Jtotic Diose: «Ti jech yorail taje, scotol ti jteclumetique ta joybinbeic ta jun mucʼ ta alal ton yuʼunic ti jteclum Jerusalene», xi. ¿Kʼusi Jerusalenal yakal chalbe skʼoplal liʼe? Jaʼ li «Jerusalén te ta vinajel[e]», li Ajvalilal yoʼ bu ikʼbilik li yajtsʼaklomtak Cristo ti tʼujbilike (Hebreos 12:22). Oy to jayvoʼ skomenal ta Balumil li buchʼutik chuʼuninik li Ajvalilal yuʼun Mesiase. Leʼike xchiʼuk li xchiʼiltakik ti jaʼ li yan chijetike, chalbeik krixchanoetik ti akʼo xakʼ sbaik ta ventainel ta stojolal li Ajvalilal yuʼun Dios ti yoʼ to oy yoraile (Juan 10:16; Apocalipsis 11:15). ¿Kʼu yelan yaʼiojik li mukʼtik lumetik li takel ta ikʼel taje? ¿Xchiʼuk kʼusi jtosukal koltael chakʼbe yajtuneltak Jeova li avie? Sventa ta jnaʼtike, jkʼelbetik batel lek smelolal li kapitulo 12 yuʼun Zacariase. Jaʼ jech ta jnaʼtik lek ti mu junuk abtejebal tstsalatik li buchʼutik tʼujbilik yuʼun Diose xchiʼuk li xchiʼiltakik ti yakʼoj xa sbaik ta stojolal Diose.

10. 1) ¿Kʼu yuʼun tsaʼik ta kʼop steklumal Jeova li mukʼtik lumetike? 2) ¿Kʼusi kʼotem ta stojolal li buchʼutik yakʼojbeik yipal tstoyik li «mucʼ ta alal ton» sventa chkolik ta stojolale?

¹⁰ Ta Zacarías 12:3 chal ti mukʼtik lumetike «ta xyayijes o sba[ik]. ¿Kʼuxi chkʼot ta pasel taje? Veno, li Diose yaloj mantal ti akʼo xichʼ cholel li lekil aʼyej sventa Ajvalilal yuʼune, jech un li yajrextikotak Jeovae yichʼojik lek ta mukʼ li yabtelik taje. Pe kʼalal chichʼ cholel ti jaʼ noʼox xuʼ spat-o yoʼontonik ta stojolal Ajvalilal yuʼun Dios li krixchanoetike, jaʼ «jun mucʼ ta alal ton» chaʼiik li mukʼtik lumetike. Jaʼ yuʼun tskʼan tstoyik sventa chkolik ta stojolal, ep kʼusitik tspasik sventa tsmakik ta be li jchol aʼyejetik sventa Ajvalilal yuʼun Diose. Ta skoj taje, ta «xyayijes o sba[ik]», solel xtuchʼoj-o sbaik. Toj kʼexlal li skʼoplalike, yuʼun mu kʼusi stu li kʼusi yakʼojbeik yipal spasele. Mu xuʼ yuʼunik smakbel ye li yajtuneltak Diose, ti ep tajmek sbalil chilik li matanal abtelal ta xcholel li «Lequil Aʼyej sventa sbatel [osil]» ta sventa li Ajvalilal yuʼun sMesías Dios yoʼ to mu xtal slajeb li kʼusitik liʼe (Apocalipsis 14:6). Kʼalal laj yil kʼuyelan chilbajinbeik yajtuneltak Jeova li jun jchabi chukinab ta slumal Africae, xi laj yale: «Mu kʼusi ta jtatik mi ta jnutstik li krixchanoetik liʼe. Mu xakʼ-o sbaik ta tsalel maʼ li yajRextikotak Jeovae. Xchiʼuk yantik x-epajik», xi.

11. ¿Kʼuxi kʼotem ta pasel yuʼun Dios li kʼusi yaloj ta Zacarías 12:4?

¹¹ Kʼelo Zacarías 12:4. Tee, li Jeovae chal ta jun babakʼop ti tstupʼbe sat xchiʼuk tsyayijes ta «mucʼta xiʼel» o ti mu snaʼ kʼusi tspasik li buchʼutik tsaʼik ta kʼop li yaj-almantaltak Dios ti tsots yoʼontonike. Spasoj ta melel li kʼusi laj yale. Jech kʼuchaʼal liʼe, ta jun balumil ti bu mu toʼox x-akʼbat yichʼik ta mukʼ Diose, li jkontrainvanejetike muʼyuk bu xmak yuʼunik ti xkʼot ta skʼobik li veʼlil ta mantal li yajtuneltak Diose. Ta sventa taje, jlik periodikoe jpʼel laj yal ti laj la stunesik globo ti ta kas ch-abtej sventa chichʼik batel vunetik ti chalbe skʼoplal Vivlia li ta mukʼta lume. Jech, jaʼo yakal tspas Dios li kʼusi xi laj yal ta melele: «Ta xcacʼ lec jsat ta stojolic; yan li caʼetic yuʼun yantic banamile ta jtuʼpbe satic», xi. Ta skoj ti tupʼem sat ta stiʼemal sjolike, mu snaʼik bu beal tstamik batel li buchʼutik tskontrainik li Ajvalilal yuʼun Diose. Yan li voʼotike, jpʼel ta koʼontontik ti tspoj steklumal li Jeovae xchiʼuk ti tskʼel sventa lekuk oye (2 Reyes 6:15-19).

12. 1) ¿Kʼusi smelolal ti la stsan kʼokʼ Jesús kʼalal ay ta Balumile? 2) ¿Kʼuxi stsanojik kʼokʼ ta mantal li buchʼutik tʼujbilik ti liʼ to oyike, xchiʼuk kʼusi kʼotem ta pasel ta skoj taje?

¹² Kʼelo Zacarías 12:5, 6. Li jpʼel kʼop «banquilaletic ta Judae», ti xie, jaʼ chalbe skʼoplal li jkʼelvanejetik ta steklumal Dios ti tʼujbilike. Li Jeovae chakʼbe ti ta sjunuluk yoʼontonik tspakbeik skʼoplal li kʼusitik sventa Ajvalilal yuʼun Dios ta Balumile. Jun veltae, xi laj yalbe yajchankʼoptak li Jesuse: «Li vuʼune tal cacʼ tsanuc cʼocʼ liʼ ta banamil», xi (Lucas 12:49). Jaʼ jech la spas ta melel. Ti jech ta sjunul yoʼonton la xchol mantale, jamal laj yakʼ ta ilel ti toj tsots skʼoplal li Ajvalilal yuʼun Diose. Ta skoj taje, lik tsatsal vulajetel ta sjunul slumal judioetik (Mateo 4:17, 25; 10:5-7, 17-20). Jaʼ jech li avi eke, li buchʼutik tstsʼakliik batel Cristoe kolem kʼokʼ ta mantal yuʼunik yaʼeluk, «jaʼ jech ta xcʼotic [...] jech chac cʼu chaʼal yacʼalil cʼocʼ ti chac-uban lec yuʼun siʼile, xchiʼuc jaʼ jech chcʼot jech chac cʼu chaʼal toj ti cʼalal tsanem ta oʼlol taqui teʼel trigoe». Jech kʼuchaʼal liʼe, ta 1917, li livro The Finished Mysterya (Li kʼusi muʼyuk nabil ti lajem xae) xtiltun skʼakʼal laj yalbe smul li buchʼutik tskuy sbaik ta yajtsʼaklom Cristoe, ti itiʼo sjolik ta jyalel yuʼun li paleetike. Mu to jaluk yechʼel, li tratado Noticias del Reino num. 37, «¡Chnopaj xa slajeb li jecheʼ relijione!», yakʼojbe snop epal krixchanoetik kʼusi tspasik ta sventa li Ajvalilal yuʼun Diose, mi chakʼ sbaik ta stojolal o mi ta skontrainik.

Chichʼ pojel «li karpanaetik yuʼun Judae»

13. ¿Kʼusi smelolal li jpʼel kʼop «li karpanaetik yuʼun Judae», xchiʼuk kʼu yuʼun tspoj li Jeovae?

¹³ Kʼelo Zacarías 12:7, 8, NM. Li ta voʼneal Israele, stalel onoʼox ti oy karpanaetik ta yosilike, yuʼun jaʼtik onoʼox tstunesik li jkʼel chijetike xchiʼuk li jtsʼunolajeletike. Li stukike jaʼik onoʼox ti buchʼutik baʼyel skʼanik pojel mi oy ital saʼatuk ta kʼop yuʼun yan jkontrainvanej lum li Jerusalene. Li jpʼel kʼop «li karpanaetik yuʼun Judae», ti xie, chakʼ ta ilel ti buchʼutik liʼ to oyik avi ti chbatik ta vinajele muʼyuk nakalik ta lumetik ti lek smuroaltake. Chkaltike nakalik ta osiltik, ti bu mu xiʼik ta spakbel skʼoplal li kʼusitik sventa Ajvalilal yuʼun Mesiase. Li Jeovae «baʼyel tspoj li karpanaetik yuʼun Judae», yuʼun jaʼ li buchʼutik batsʼi kʼelbilik ti tsaʼatik ta kʼop yuʼun Satanase.

14. ¿Kʼusi smelolal ti chkaltik tspoj Jeova li buchʼutik nakalik ta «karpanaetik yuʼun Judae» xchiʼuk ti mu xakʼ akʼo spʼosi yakanike?

¹⁴ Ta melel, li kʼusitik echʼem tale yakʼoj ta ilel ti Jeovae yakal spakbe skʼoplal li tʼujbil j-etʼesej kʼopetik sventa Ajvalilal yuʼun Dios ti nakalik ta «karpana» ta osilaltike.b Mu xakʼ akʼo spʼosi yakanik xkaltik, yuʼun chakʼbe stsatsal yoʼontonik jech kʼuchaʼal li ajvalil soltaro Davide.

15. ¿Kʼu yuʼun tskʼan «ta [x]ules scotol li yantic banamil» li Jeovae, xchiʼuk kʼusi ora tspas?

¹⁵ Kʼelo Zacarías 12:9. ¿Kʼu yuʼun tskʼan «ta [x]ules scotol li yantic banamil» li Jeovae? Yuʼun solel yakʼoj ta yoʼontonik skontrainel li Ajvalilal yuʼun Mesiase. Chʼayel chbatik ta skoj ti tsnutsbe xchiʼuk chilbajinbe li steklumal Jeovae. Li sviniktak Satanase poʼot xa stsakik ta kʼop slajeb velta li melel yajtuneltak Diose, jun pas kʼop ti chbeiltasvan batel li ta kʼusi ch-echʼ ta sjunul balumil ti Armagedón sbi yuʼun li Vivliae (Apocalipsis 16:13-16). Vaʼun, li Mukʼta Jchapanvaneje chtal skolta li yajtuneltake xchiʼuk chchʼultajes sbi ta stojolal li mukʼtik lumetike (Ezequiel 38:14-18, 22, 23).

16, 17. 1) ¿Kʼusi jaʼ li matanal chakʼbe yajtuneltak Jeovae? 2) ¿Kʼusi chakʼ ta ilel ti chkuch kuʼuntik li kontrainel yuʼun Satanase?

¹⁶ Mi junuk yabtejeb Satanás xuʼ skʼunibtas-o li xchʼunel koʼontontike o ti xuʼ tstupʼbe li kʼusi xtiltun-o ta yoʼonton spasel li steklumal Dios ti jaʼ ojtikinbilik-oe. Li jlekilaltik ta mantale, ti xkojtikintik ti tspojutik ta sjuʼel li Diose, jaʼ li matanal yakʼojbutik Jeova ta skoj ti chi jtun ta stojolale (Isaías 54:17). Muʼyuk buchʼu xuʼ spojbutik li jun oʼontonal xchiʼuk li lekilal ta mantal ta jkʼupintike (Salmo 118:6). Li Satanase muʼyuk onoʼox me chkux ta stsanbel skʼakʼal li kontrainele xchiʼuk ti chakʼbe yipal ta yakʼel jvokoltike. Pe kʼalal tukʼ koʼonton chkuch kuʼuntik manchuk mi chkichʼtik chopol kʼoptaele, chkakʼtik me ta ilel ti te oy ta jtojolaltik li xchʼul espiritu Diose (1 Pedro 4:14). Ta spʼejel Balumil yakal xichʼ cholel li Ajvalilal yuʼun Dios ti vaʼanbil xae. Melel onoʼox, ta buyuk noʼox xtal kontrainel ta jtojolaltik li yajtunelutik Jeova ti xkoʼolaj kʼuchaʼal «sbecʼ» jimichʼe. Pe chkuch kuʼuntik skotol li kontrainel koliyal li kiptik chakʼbutik Diose (Zacarías 9:15). ¡Muʼyuk buchʼu xuʼ tsmakbe ye li buchʼutik tʼujbilik ti liʼ to oyik ta Balumile xchiʼuk li stukʼil chiʼiltakike!

¹⁷ Oy tajmek ta koʼontontik ti chkʼot skʼakʼalil xi jkol ta j-echʼel ta stojolal li kontrainel yuʼun Diabloe. Yoʼ to mu xkʼot skʼakʼalil taje, tspat tajmek koʼontontik li kʼusi xi jpʼel chalbutik Jeovae: «Muʼyuc spasojic jchopuc abtejebal ti xuʼ chayulesot oe. Voʼot chamacbe yeic li bochʼotic tstiqʼuic amule», xi.

[Tsʼibetik ta yok vun]

[Lokʼol ta pajina 23]

Li yajrextikotak Jeova ta Albaniae tukʼ kuch yuʼunik li kontrainel yuʼun Satanase

[Lokʼol ta pajina 25]

Li Jesuse la spak skʼoplal

[Lokʼol ta pajina 26]

Mi junuk abtejebal tstsalatik li buchʼutik chcholik lekil aʼyeje

[Lokʼol ta pajina 27]

¿Kʼusi cha takʼ?

• ¿Kʼusi chakʼ ta ilel ti mu kʼusi stu li yabtejebtak Satanase?

• ¿Kʼuxi chkʼot ta «jun mucʼ ta alal ton» li Jerusalén ta vinajele?

• ¿Kʼuxi tskolta «karpanaetik yuʼun [Judá]» li Jeovae?

• ¿Kʼusi jpʼel-o ta koʼontontik yoʼ to chnopaj tal li Armagedone?