«Acʼo me sventain lec li yabtel iʼacʼbat yuʼun Cajvaltique»
«Acʼo me sventain lec li yabtel iʼacʼbat yuʼun Cajvaltique, acʼo me cʼotuc ta pasel yuʼun.» (COL. 4:17.)
1, 2. ¿Kʼusi jbainojtik ta stojolal jchiʼiltaktik li yajtsʼaklomutik Cristoe?
TOJ tsots kʼusi jbainojtik ta stojolal li krixchanoetik ta jpat jxokontike, yuʼun ti kʼusi tsnop tspasik avie, yikʼal jaʼ ta xkuxiik-o, o jaʼ chchamik-o mi vul li tsatsal vokolile (Apo. 7:14, Ch). Xi chal li Proverbios ta Vivliae: «Pojo me li bochʼo ta xa xichʼ milele; coltao li bochʼo yuʼun xa chcham yuʼunique», xi. ¡Toj labal sba ta aʼyel taje! Li kʼusi melele, jaʼ ti xiʼel jkuchinbetik slajel li jun krixchano mi muʼyuk chkalbetik ti kʼusi skʼan spasike. Li stsʼak teksto taje xi onoʼox chale: «Yuʼun acʼo me tsʼacal chaval ti muc xavaʼye, pero snaʼoj li bochʼo yiloj cʼusi oy ta coʼntontique; xotquin li bochʼo tsqʼuel cʼu xijʼelanutique; jaʼ chacʼbe stojol cʼu xʼelan yabtel li jujun cristianoe», xi. Jamal ta aʼyel chaʼa, kʼuchaʼal yajtunelutik Jeovae mu me xuʼ xkaltik ti muʼyuk xkaʼitik li kʼusi xibal sba tsnuptan li krixchanoetik avie (Pro. 24:11, 12).
2 Ta sventa ti chkʼuxubin kuxlejal li Jeovae, chalbe yajtuneltak ti akʼo yakʼbeik yipal ti bu kʼalal xuʼ yuʼunik ta yalbel ep krixchanoetik ti kʼuxi xuʼ sta spojelike. Jkotoltik ti yajtunelutik Diose skʼan me xkakʼtik ta ojtikinel li yaʼyejal Vivlia sventa kolebale. Li kabteltike xkoʼolaj kʼuchaʼal jun jchabivanej ti chakʼ ta aʼiel li kʼusi poʼot xa xibal sba xkʼot ta pasele. Mu jkʼantik «chcom ta [jbatik] xchʼichʼal» li buchʼutik chchamike (Eze. 33:1-7). Jaʼ yuʼun tsots skʼoplal ti xkakʼbetik yipal ta «[xcholel] batel li scʼop Diose» (kʼelo 2 Timoteo 4:1, 2, 5).
3. ¿Kʼusitik ta jchantik li ta xchanobil liʼe xchiʼuk li chib xchanobil chtale?
3 Li xchanobil liʼe chal kaʼitik kʼuxi ta jtsaltik komel li kʼusi tsmak ta be li kabteltik ta stojolal Diose xchiʼuk kʼuxi xuʼ jkoltatik mas ep krixchanoetik. Li ta xchibal xchanobile ta jchantik kʼuxi xuʼ xi jtojob batel mas ta chanubtasvanej sventa x-al lek kuʼuntik li mantaletik tsots skʼoplal ta sKʼop Diose. Li ta yoxibale te chal kaʼitik li kʼusitik kʼupilik sba kʼotem ta pasel yuʼunik ta spʼejel Balumil li jchol mantaletik ta sventa li Ajvalilal yuʼun Diose. Pe kʼalal mu to ta jchantik taje, kaltik baʼyel kʼu yuʼun toj tsots li kuxlejal jtaojtik avie.
¿Kʼu yuʼun ep krixchanoetik chʼabal spatobil yoʼontonik?
4, 5. ¿Kʼusitik tsnuptan li krixchanoetike, xchiʼuk kʼusi tspasik li jlome?
4 Li kʼusitik chkʼotan ta pasel ta Balumile chakʼ ta ilel ti kuxulutik ta «slajebal cʼacʼale» xchiʼuk ti toj nopol xa li slajebal kʼusitike. Toj chopol xa noʼox li kʼusitik tsnuptan krixchanoetike, ti vaʼ yelan taje jaʼ svinajeb ti ta «slajebtic xa batel [kʼakʼal]» kuxulutik jech kʼuchaʼal laj yal Jesús xchiʼuk yajtsʼaklomtake. Jlom li kʼusitik chkil-o jvokoltik taje jaʼ li pas kʼope, viʼnal xchiʼuk nikeletik. Jech noxtok, ta buyuk noʼox chkiltik toybail, mu xichʼik ta mukʼ Dios xchiʼuk jaʼ noʼox skʼanoj sba stuk li krixchanoe. Ta melel, «xiʼbal sba, yuʼun naca vocol ta xvul ta loqʼuel», jech chkiltik ek, manchuk mi chkakʼbetik yipal xchʼunel li mantaletik ta Vivliae (Mat. 24:3, 6-8, 12; 2 Tim. 3:1-5, Ch).
5 Pe jutuk mu skotoluk li krixchanoetike mu snaʼik kʼusi svinajeb ti vi yelan chkʼot ta pasel ta Balumile. Jech oxal, toj ep noʼox maʼ ti buchʼutik tsvul tajmek yoʼontonik ta sventa li xchabielike xchiʼuk ta sventa xchabiel li yutsʼ yalalike, o mi moʼoje solel toj lajem chkom chaʼiik kʼalal oy buchʼu chcham yuʼunike o kʼalal tsnuptanik yan vokolile. Ta skoj ti mu snaʼik kʼu yuʼun jech chkʼot ta pasele xchiʼuk ti mu snabeik li xchapanobile chʼabal spatobil yoʼonton kuxulik (Efe. 2:12).
6. ¿Kʼu yuʼun muʼyuk skoltaoj krixchanoetik li «mucʼta [Babiloniae]»?
6 Li «mucʼta [Babiloniae]», li jventainvanej yuʼun skotol jecheʼ relijionetik ta spʼejel balumile, muʼyuk yakʼoj lek patob oʼontonal. Moʼoj, yuʼun ti kʼusie «yacuben [ta mulivajel]», jecheʼ xtamlajet yuʼun li krixchanoetike, chʼayemik ta mantal yuʼun. Xkoʼolaj kʼuchaʼal jun jmulivajel ants, ti sloʼlaojbe sjol xchiʼuk tspas ta mantal «li ajvaliletic ta banamile». Jech noxtok, sventa xchʼunbeik smantal ajvaliletik li krixchanoetike, stunesoj jecheʼ chanubtaseletik xchiʼuk kʼusitik sventa espiritismo. Jaʼ jech staoj sjuʼel xchiʼuk stsatsal li jecheʼ relijione, pe jaʼ spʼajoj ta j-echʼel li melel mantaletike (Apo. 17:1, 2, 5; 18:23, NM).
7. ¿Kʼusi chkʼot ta pasel ta stojolalik epal krixchanoetik, pe kʼuxi xuʼ xichʼik koltael?
7 Li Jesuse laj yal ti jaʼ ep krixchanoetik tstamik batel li sbelel lajelale (Mat. 7:13, 14). Jlom krixchanoetike te oyik li ta be taje yuʼun jaʼ ti yalel spʼajojik li melel mantaletik ta Vivliae. Pe li yantike, yuʼun loʼlabilik, akʼbil xchʼunik ti jaʼ la jech tskʼan Dios ti kʼuyelan kuxulike. Pe oy buchʼutik xuʼ tsjel stalelalik mi chkakʼbetik yilik ta Vivlia ti jech skʼan spasike. Yan li buchʼutik te oyik-o ta stojolal mukʼta Babiloniae xchiʼuk ti mu skʼan stsakik ta mukʼ li mantaletik ta Vivliae mu me bu kuxul chkomik li ta tsatsal vokolile (Apo. 7:14, Ch).
Mu jkomtsantik xcholel li mantale
8, 9. ¿Kʼusi la spasik li yajtsʼaklomtak Cristo ta baʼyel siglo kʼalal laj yilik kontrainele, xchiʼuk kʼu yuʼun?
8 Li Jesuse laj onoʼox yal komel ti chcholik lekil aʼyej sventa Ajvalilal yuʼun Dios xchiʼuk tspasik ta jchankʼop krixchanoetik li yajtsʼaklomtake (Mat. 28:19, 20). Ta sventa li melel yajtsʼaklomtak Cristoe, li xcholel mantale jaʼ jtos abtelal ti toj tsots skʼoplal sventa chakʼik ta ilel li stukʼil yoʼontonik ta stojolal Diose xchiʼuk li xchʼunel yoʼontonike. Jaʼ jech chkaʼibetik smelolal kʼu yuʼun muʼyuk xikta sbaik ta chol mantal li baʼyel yajtsʼaklomtak Jesuse, manchuk mi laj yilik kontrainel, moʼoj, yuʼun xi laj yalbeik li Jeovae: «Acʼbun lec stsatsal coʼntoncutic ti jamal acʼo calcutic o acʼop[e]», xiik. Akʼbatik ep chʼul espiritu, vaʼun jaʼ jech tsots yoʼonton laj yalik batel li skʼop Diose (Hech. 4:18, 29, 31).
9 ¿Mi chibaj yoʼontonik li jchankʼopetik kʼalal ikʼataj ta majbail li kontrainele? Mi jutebuk. Jkʼeltikik kʼusi kʼot ta pasel. Li jbabeetik ta relijion yuʼun judioetike, ti ilinemik ta jyalel ta sventa li chol mantal tspas jtakboletike, la xchukik, la sibtasik xchiʼuk la smajik. Akʼo mi jech, «muc scomtsanic xcholbel scʼoplal li Jesucristoe», yuʼun snaʼojik lek ti «jaʼ tsots scʼoplal baʼyuc ta [xchʼunbeik] smantal Dios[e]; mu jaʼuc tscʼan baʼyuc ta [xchʼunbeik] smantal cristiano» (Hech. 5:28, 29, 40-42).
10. ¿Kʼusitik prevail ta jnuptantik li yajtsʼaklomutik Cristoe avie, pe kʼusi xuʼ lek chkʼot ta pasel yuʼun li jlekil talelaltike?
10 Jutuk mu jkotoltikuk li yajtunelutik Dios avie, muʼyuk chkil jvokoltik ta majel, mi jaʼuk chkichʼtik chukel ta skoj ti ta jcholtik mantale. Manchuk mi jech, ta onoʼox xkiltik yan prevaetik o yan vokoliletik. Jech kʼuchaʼal liʼe, ta sventa ti chanem jol koʼontontik ta Vivliae xuʼ jelel jtalelaltik ti muʼyuk lek chil yantike o yan-o chilik ta skoj ti jelele. Li jchiʼiltaktik ta abtel, ta chanun o li jlakʼnataktike xuʼ van tsnopik ti jot-o jtalelaltike, ta skoj ti jech ta jpastik kʼuchaʼal chal li beiltaseletik ta Vivliae. Pe taje skʼan me mu xchibajes koʼontontik. Li yajtunelutik Diose skʼan me jechuk jxojobaltik «cʼu chaʼal luz» li ta Balumil ti solel oy ta ikʼ osil ta mantale (Fili. 2:15). Yikʼaluk van oy krixchanoetik ti lek yoʼontonik ti chilik li jlekil abteltike, chilbeik sbalil, vaʼun jaʼ jech tskʼupil kʼoptaik li Diose (kʼelo Mateo 5:16).
11. 1) ¿Kʼu yelan chaʼiik jlom krixchanoetik li chol mantale? 2) ¿Kʼusi kontrainel laj yil li Pabloe, xchiʼuk kʼusi la spas?
11 Ta melel, skʼan tsotsuk koʼontontik ta xcholel-o li yaʼyejal Ajvalilal yuʼun Diose. Jlom krixchanoetike, ti jaʼ kutsʼ kalaltik li jlome, tslabanutik o tspasik yan kʼusitik sventa chchibajes koʼontontik yalojik (Mat. 10:36). Jech kʼuchaʼal liʼe, li jtakbol Pabloe ep ta velta la smajik ta skoj ti tukʼ tspasbe yabtel Diose. Pe jkʼeltikik kʼuyelan laj yil: «Xanaʼic ti laj quichʼcutic utsʼintael, laj quichʼcutic qʼuexlaltasel[e], pero laj yacʼbun lec stsatsal coʼntoncutic li Dios cuʼuntique, jech te cʼot jcholcutic avaʼyic li scʼope, acʼo me toj ep laj quichʼcutic contrainel», xi (1 Tes. 2:2). Mu van toj kʼunuk laj yaʼi Pablo ta xcholel mantal ti baʼyel la stsakike, ti la slokʼbeik jutuk mu skotoluk skʼuʼ spokʼe, ti la sjisbeik teʼe xchiʼuk ti la stikʼik ta chukele (Hech. 16:19-24). ¿Kʼu yuʼun tsots-o yoʼonton la xchol mantal? Yuʼun ti kʼusi mas tsots skʼoplal laj yaʼie, jaʼ ti xchol batel li mantal ti akʼbil sbainoj yuʼun Diose (1 Cor. 9:16).
12, 13. ¿Kʼusi vokolal tsnuptanik jlom yajtsʼaklomtak Cristo xchiʼuk kʼuxi yakʼojbeik yipal ta stsalel?
12 Yan ti kʼusi xuʼ tsmak koʼontontik ta xcholel mantale, jaʼ ti mu skʼan xaʼibeik yaʼyejal Ajvalilal yuʼun Dios li krixchanoetike o jaʼ ti jutuk mu skotoluk velta chʼabal te ta snaike. ¿Kʼusi xuʼ jpastik mi jech ti bu ta jcholtik mantale? Skʼan stsak yip koʼontontik, vaʼun jcholtik mantal ta buyuk noʼox. Jech noxtok, yikʼaluk van skʼan jelbetik yorail li chol mantal ta jpastike o jaʼ xkakʼbetik yipal mas xcholel mantal ti bu ep krixchanoetik ta jtatike (koʼoltaso xchiʼuk Juan 4:7-15; Hechos 16:13; 17:17).
13 Yan ti kʼusi chmakatik ta chol mantal yantik xtoke, jaʼ li malubel xchiʼuk li chamele; taje xuʼ jaʼ tsjutukajesbat-o li yabteltik ta chol mantale. Mu me xchibaj avoʼonton mi jaʼ jech ta atojolale. Snaʼoj me lek Jeova ti bu kʼalal xuʼ avuʼune xchiʼuk ta stsak ta venta skotol li kʼusi xuʼ avuʼun spasele (kʼelo 2 Corintios 8:12). Kʼusiuk ti vokolal anuptanoje —mi kontrainel, mi mu skʼanik li mantale o jaʼ ti ip noʼox chavaʼie—, akʼbo me yipal ti bu kʼalal xuʼ avuʼun ta xcholel li lekil aʼyeje (Pro. 3:27; koʼoltaso xchiʼuk Marcos 12:41-44).
Jventaintik me lek li kabtel akʼbilutike
14. ¿Kʼusi ti toj lek ta chanbel Pablo laj yilik li yermanotake, xchiʼuk kʼusi tojobtasel laj yakʼ?
14 Li jtakbol Pabloe la stsak lek ta mukʼ li chol mantal tspase xchiʼuk jaʼ jech laj yalbe yermanotak ti akʼo jech spasik eke (Hech. 20:20, 21; 1 Cor. 11:1). Jun veltae xi laj yalbe echʼel jun ermanoe, jun yajtsʼaklom Cristo ti Arquipo sbie. Li ta skarta sventa yajtsʼaklomtak Cristo ta Colosase, xi laj yal li Pabloe: «Albeic Arquipo ti acʼo me sventain lec li yabtel iʼacʼbat yuʼun Cajvaltique, acʼo me cʼotuc ta pasel yuʼun», xi (Col. 4:17). Mu jnaʼtik buchʼu jaʼ ti Arquipoe xchiʼuk ti kʼusi tsnuptan ta xkuxlejale, pe xkiltik ti xchʼamoj jun abtelal ta stojolal Diose. Mi kakʼoj jkuxlejaltik ta stojolal Jeovae, jchʼamojtik me jun abtelal ta stojolal Dios ek. ¿Mi nopolik noʼox ta jkʼeltik o ta jventaintik sventa lek xkʼot ta pasel kuʼuntik?
15. ¿Kʼusi chkakʼtik ta ilel kʼalal chkakʼ jbatik ta stojolal Jeovae, xchiʼuk kʼusitik ta jakʼtik?
15 Kʼalal muʼyuk toʼox chkichʼtik voʼe, baʼyel laj kakʼ jkuxlejaltik ta stojolal Jeova ta jun orasion ti la jpastik ta sjunul koʼontontike, vaʼun jaʼ jech laj kakʼtik ta ilel ti oy ta koʼontontik spasbel li kʼusi tskʼan yoʼontone. Jech oxal, lek me ti xi jakʼbe jbatike: «¿Mi jaʼ mas tsots skʼoplal ta jkuxlejal ta melel li spasel kʼusi tskʼan yoʼonton Diose?». Yikʼaluk van ep kʼusitik jbainojtik spasel ti chal Vivlia ti skʼan jpastike, jech kʼuchaʼal li smakʼlinel kutsʼ kalaltike; mi jaʼ jeche, ta me xalbutik Jeova ti akʼo jech jpastike (1 Tim. 5:8). ¿Pe kʼuxi ta jtunes li yan jkʼakʼaltik xchiʼuk kipaltik une? ¿Kʼusi ti mas tsots skʼoplal ta jkuxlejaltike? (Kʼelo 2 Corintios 5:14, 15.)
16, 17. ¿Kʼusi xuʼ tsnop tspasik li kerem-tsebetik yajtsʼaklomtak Cristoe o li buchʼutik jutuk noʼox kʼusi sbainojik spasele?
16 ¿Mi keremot o mi tsebot ti avakʼoj xa akuxlejal ta stojolal Jeovae? ¿Mi vaxaklajuneb xa van ajabilal batel ti tsuts xa li achanuntake, o mi jutuk xa van skʼan? Yikʼaluk van muʼyuk to kʼusi tsots abainoj ta avutsʼ avalal. Mi jaʼ jeche, ¿kʼusi anopoj cha pas ta akuxlejal? Ta sventa ti avalojbe ta melel Jeova ti cha pasbe li kʼusi tskʼan yoʼontone, ¿kʼusitik van skʼan xa nop sventa jech xkʼot ta pasel avuʼun? Ep kerem-tsebetike xchapanoj lek kʼusi tspasik sventa xuʼ yuʼunik li prekursorale, jun tajmek yoʼontonik ta sventa ti vaʼ yelan tspasike (Sal. 110:3; Ecl. 12:1).
17 Jech noxtok, yikʼaluk chex vinikot xa ti sjunul kʼakʼal cha abteje xchiʼuk ti muʼyuk van mas kʼusitik abainoje, ti jaʼtik noʼox skʼan xa kʼel aba atuke. Ta melel, ta van xa kʼupin spasel li abtelaletik ta tsobobbail ti bu kʼalal xakʼ yorail chavile. Pe ¿mi xuʼ to van xa muyubaj mas? ¿Mi oy anopoj chavepajes li avabtel ta stojolal Diose? (Sal. 34:8; Pro. 10:22.) Ta yantik ti butikuk chichʼ cholel mantale toj ep to abtelal skʼan sventa li xcholbel mantal skotol krixchanoetike. ¿Mi oy van kʼusi stakʼ xa jel ta akuxlejal sventa xavepajes li avabtel ta chol mantale? Jech kʼuchaʼal liʼe, ¿mi xuʼ van xa bat ta yan lum ti bu chtun tajmek jchol mantaletike? (Kʼelo 1 Timoteo 6:6-8.)
18. ¿Kʼusi la sjel ta xkuxlejalik jun nupul tsʼakal ti kerem-tsebik toe, xchiʼuk kʼusi kʼotem ta pasel ta skoj?
18 Jkʼelbetik skʼoplal Kevin xchiʼuk Elena ta Estados Unidos, jun nupul tsʼakal ti kerem-tsebik toe.a Ta sventa ti jech nopemik spasel li krixchanoetik tee, yalojik li Kevin xchiʼuk Elenae skʼan sman snaik ek, vaʼun jaʼ jech la spasik. Sjunul kʼakʼal ch-abtej xchaʼvoʼalik, jech oxal lek xkuxlejalik ta takʼin. Pe ta skoj li yabtelike xchiʼuk li kʼusitik skʼan pasel ta snaike, muʼyuk xa xokolik sventa chcholik mantal. Te van bu orae, laj yakʼik venta ti jaʼ chbat-o skʼakʼalik xchiʼuk yipik ta skʼelel li kʼusitik oy yuʼunike. Pe kʼalal laj yakʼik venta ti xmuyubajik noʼox jun nupul tsʼakal ti lek noʼox sba xkuxlejalik ti ch-abtejik ta prekursore, la sjel li kʼusitik mas tsots skʼoplal ta xkuxlejalike. Kʼalal la skʼoponik Jeova sventa xbeiltasatike, la xchon li snaike, batik ta jpʼej na ti bikʼit noʼoxe. La stsules li kʼu sjalil ch-abtej Elenae, vaʼun och ta prekursora. Li Kevine itijbat yoʼonton yuʼun li kʼusitik lek chkʼot ta pasel ta chol mantal yuʼun yajnile, laj yikta li yabtel ta sjunul kʼakʼale, vaʼun lik abtejuk ta prekursor ek. Ta mas tsʼakale bat tunikuk ta jun lum ta Sudamérica ti bu ep chtun jchol mantaletike. «Xi muyujbajkutik onoʼox li ta jnupunelkutike —xi li Kevine—, pe mas to xi muyubajkutik tajmek ti kʼalal laj kakʼbekutik yipal ta stael li abtelaletik ta mantale», xi (kʼelo Mateo 6:19-22).
19, 20. ¿Kʼu yuʼun jaʼ jun abtelal toj tsots skʼoplal chichʼ pasel avi li chol mantale?
19 Li xcholel lekil aʼyeje jaʼ li abtelal ta Balumil ti mas tsots skʼoplal chichʼ pasele (Apo. 14:6, 7). ¿Kʼu yuʼun? Yuʼun chakʼ ta ichʼbel ta mukʼ o chchʼultajesbe li sbi Jeovae (Mat. 6:9). Jech noxtok, li aʼyej ta Vivliae tslekubtasbe xkuxlejal li krixchanoetike xchiʼuk xuʼ jaʼ chkolik-o. Jech onoʼox, ta smilal noʼox krixchanoetik chchʼamik mantal jujun jabil. Pe jech kʼuchaʼal la sjakʼ li jtakbol Pabloe: «¿Cʼu xʼelan xuʼ chaʼibeic scʼoplal me muʼyuc bochʼo chcholbat yaʼyique?» (Rom. 10:14, 15). Vokol, ¿jechuk? Jaʼ yuʼun chaʼa, ¿kʼu yuʼun mu xavakʼbe yipal ta spasel li avabtel ta stojolal Diose?
20 Oy to kʼusi yan stakʼ jpastik sventa jkoltatik ta yaʼibel smelolal krixchanoetik kʼu yuʼun toj tsots li kuxlejal avie xchiʼuk ti kʼusi xuʼ chkʼot ta pasel ta sventa li kʼusi tsnop tspasike. ¿Kʼusi jaʼ? Jaʼ ti xi jpʼijub batel mas ta chanubtasvaneje. Li ta yan xchanobile chal kaʼitik kʼuxi ta pasel.
[Tsʼibetik ta yok vun]
a Jelbil li biiletike.
[Lokʼol ta pajina 5]
Skʼan oyuk stsatsal koʼontontik ta xcholel mantal kʼalal ta jnuptantik kontrainele
[Lokʼol ta pajina 7]
¿Kʼusi xuʼ xa pas mi jutuk mu skotoluk velta chʼabal te ta sna li krixchanoetik bu cha chol mantale?
[Lokʼol ta pajina 7]
¿Kʼusi cha takʼ?
• ¿Kʼusi jbainojtik ta stojolal jchiʼiltaktik li yajtsʼaklomutik Cristoe?
• ¿Kʼuxi xuʼ jtsaltik komel li kʼusitik tsmak ta be kabteltik ta chol mantale?
• ¿Kʼuxi xuʼ chkʼot ta pasel kuʼuntik li kabteltik jchʼamojtike?