Kʼuxi ta tsalel li vokolil ta chol mantal ta naetike
«Laj yacʼbun lec stsatsal coʼntoncutic li Dios cuʼuntique, jech te cʼot jcholcutic avaʼyic li scʼope, acʼo me toj ep laj quichʼcutic contrainel.» (1 TES. 2:2.)
1. ¿Kʼusi vokolil la snuptan li Jeremiase, xchiʼuk kʼuxi tsal yuʼun?
LI JEREMIASE jaʼ jech laj yaʼi sba kʼuchaʼal voʼotike. Kʼalal laj yichʼ biiltasel yuʼun Jeova ta «jʼalcʼop ta jujun banamil[e]», xi laj yale: «Ay, Cajval, Mucʼul Dios, mu to jnaʼ xiloʼilaj, yuʼun queremun to», xi. Akʼo mi jech, la spat yoʼonton ta stojolal Dios xchiʼuk la xchʼam li abtelale (Jer. 1:4-10). Mas ta 40 jabil la stsʼik ti mu skʼanik mantal li krixchanoetike, li pʼajele, li labanele xchiʼuk laj yichʼ majel noxtok (Jer. 20:1, 2). Oy bakʼintik ti mu xa stsʼik laj yaʼie, pe laj yakʼbe-o yipal li xcholel mantale akʼo mi jaʼ ep li judioetik ti mu skʼan xaʼiike. Ta sjuʼel Dios ipas yuʼun Jeremías li kʼusi mu onoʼox spas yuʼun ta stuke (kʼelo Jeremías 20:7-9).
2, 3. ¿Kʼusi vokolal tsnuptanik avi li yajtuneltak Dios jech kʼuchaʼal la snuptan Jeremiase?
2 Ep yajtunelutik Dios avi ti jech chkaʼi jbatik kʼuchaʼal Jeremiase. Kʼalal laj kakʼtik venta ti skʼan jcholtik mantal ta naetike, xi laj kaltik jlomutike: «Mi jaʼuk onoʼox spas kuʼun jech maʼ voʼone». Pe kʼalal laj kaʼibetik smelolal ti jaʼ jech tskʼan yoʼonton Jeovae la jtsaltik li xiʼele xchiʼuk lik jcholtik li mantale. Pe eputik ti oy kʼusi la jnuptantik ti jaʼ laj yakʼ ta preva mi jech-o ta jpastike. Mu xuʼ jmuktik, yuʼun vokol onoʼox tajmek ti kʼalal chlik jcholtik mantal ta naetike, xchiʼuk ti jech-o ta jpastik kʼalal ta slajebe (Mat. 24:13).
3 ¿Mi jaljal xa yakal xa chan Vivlia xchiʼuk li yajrextikotak Jeovae xchiʼuk ti cha kʼotilan ta tsobajele, pe ti mu to bu anopoj chlik achol mantal ta naetike? O mi avichʼoj xa voʼe, ¿mi tsots chavaʼi spasel li abtelal taje akʼo mi muʼyuk bu ipot? Li avie ep krixchanoetik ti jeltos bu likemik ti tsalem yuʼunik li vokolil ta chol mantal ta naetike. Naʼo me lek ti ta skoj li koltael chakʼ Jeovae ta me spas avuʼun ek.
Oyuk me stsatsal koʼontontik
4. ¿Kʼusi koltael laj yichʼ li jtakbol Pablo sventa tsotsuk yoʼonton xchol mantale?
4 Jnaʼojtik onoʼox jkotoltik ta melel ti maʼuk ta spʼijil o ta sjuʼel krixchanoetik ti lek kʼusi kʼotem ta pasel kuʼuntik li ta chol mantal ta spʼejel balumile, moʼoj, yuʼun jaʼ koliyal ti tskoltautik li xchʼul espiritu Diose (Zac. 4:6). Jaʼ jech xuʼ xkaltik li ta kabteltik ta chol mantal ta jujuntal eke (2 Cor. 4:7). Jnopbetik skʼoplal avaʼi li jtakbol Pabloe. Xi la stsʼibabe skʼoplal kʼalal oy kʼusi chopol pasbatik yuʼun yajkontraik xchiʼuk yan misioneroe: «Xanaʼic ti laj quichʼcutic utsʼintael, laj quichʼcutic qʼuexlaltasel ta Filipose, pero laj yacʼbun lec stsatsal coʼntoncutic li Dios cuʼuntique, jech te cʼot jcholcutic avaʼyic li scʼope, acʼo me toj ep laj quichʼcutic contrainel», xi (1 Tes. 2:2; Hech. 16:22-24). Mu stakʼ lek chʼunel yaʼel ti vokol laj yaʼi ta yalel lekil aʼyej li jun vinik ti oy tajmek ta yoʼonton chol mantal kʼuchaʼal Pabloe, pe yuʼun me melel un. Jech kʼuchaʼal Pabloe, skʼan me skoltautik Jeova sventa oyuk stsatsal koʼonton jcholtik li mantale (kʼelo Efesios 6:18-20). ¿Kʼuxi xuʼ jchanbetik li stalelale?
5. ¿Kʼusi chakʼ stsatsal koʼontontik sventa jcholtik li mantale?
5 Jtos ti kʼusi tskoltautik sventa jtsak kipaltike jaʼ li orasione. Xi laj yal jun prekursora ta sventa taje: «Ta jpas orasion sventa oyuk stsatsal koʼonton xi kʼopoj, ta jpas orasion sventa xkʼot ta yoʼonton mantal kuʼun li krixchanoetike, ta jpas orasion sventa jkʼupin li kabtele. Yuʼun ti kʼusie jaʼ yabtel Jeova, maʼuk kabtel jtuktik. Jaʼ yuʼun mi muʼyuk bu tskoltautike mu me kʼusi spas kuʼuntik», xi (1 Tes. 5:17). Jtekeltik skʼan jkʼanilanbetik Dios ti akʼo skoltautik li xchʼul espiritu sventa oyuk stsatsal koʼontontik xi jkʼopoje (Luc. 11:9-13).
6, 7. 1) ¿Kʼusi laj yil li Ezequiele, xchiʼuk kʼusi skʼan xal? 2) ¿Kʼusi chakʼ jchantik avi li kʼusi laj yil Ezequiele?
6 Li slivroal Ezequiele oy kʼusi chalbutik ek ti tskoltautik ti oyuk stsatsal koʼontontik xi jkʼopoje. Ti kʼusi laj yil li j-alkʼope, jaʼ ti akʼbat yuʼun Jeova jun balbal vun ti tsʼibabil xchaʼjotal ti oy «xcʼuxul vocol, oqʼuel, xchiʼuc avanel[e]», xchiʼuk albat ti akʼo sloʼe. Xi albate: «Xnichʼon cristiano, bicʼan batel li vun liʼi; nojeso o lec achʼut», x-utat. ¿Kʼusi skʼan xal li kʼusi laj yile? Li Ezequiele skʼan sbikʼ ta melel li aʼyej ti skʼan xale. Jaʼ ti skʼan teuk oy ta stojolal xkaltike, xchiʼuk ti xkʼot ta mas yutil yoʼontone. Xi la xchap stuke: «Jech la jloʼ, toj lec chiʼ laj caʼay jech chac cʼu chaʼal pom», xi. Toj kʼupil sba laj yaʼi Ezequiel ti chakʼ ta ojtikinel li smantaltak Diose; xkoʼolaj kʼuchaʼal spasel preva pom laj yaʼi. Jaʼ jun lekilal laj yaʼi li j-alkʼop ti jaʼ jkʼopojel yuʼun Jeovae xchiʼuk ti spas li kʼusi albate, akʼo mi jaʼ chalbe tsatsal mantal jun jteklum ti mu xchʼamik leke (kʼelo Ezequiel 2:8–3:4, 7-9).
7 Li yajtunelutik Dios avie oy kʼusi tsots skʼoplal chakʼ jchantik li kʼusi laj yichʼ ilel taje, yuʼun skʼan xkalbetik jun tsatsal aʼyej ek li krixchanoetik ti oy mu stsakik ta mukʼ li kabteltike. Sventa jaʼo jun matanal xkiltik li chol mantal yakʼojbutik Jeovae, skʼan me jmakʼlin jbatik lek ta mantal. Mi bakʼintik noʼox ta jchantik o jaʼ noʼox ta jbaba kʼeltike, mu me bu ta jbalintik lek stekel li mantal oy ta sKʼop Diose. ¿Mi xuʼ van xa tojobaj mas ta skʼelel avun xchiʼuk ti nopolik noʼox xa pase xchiʼuk ti xavepajes li xchanel Vivliae? ¿Kʼu yuʼun mu xa nopbe mas skʼoplal li kʼusi cha kʼele? (Sal. 1:2, 3.)
Kʼuxi chlik jloʼiltik ta Vivlia
8. ¿Kʼusi koltabilik-o junantik jchol mantaletik sventa xlik sloʼilik ta sventa Vivlia li ta chol mantal ta naetike?
8 Ep jchol mantaletike jaʼ mas vokol chaʼiik ta likesel sloʼilik li ta chol mantal ta naetike. Yuʼun onoʼox melel ti oy bu ta jcholtik mantal ti vokol tajmeke. Oy jlom ermanoetike jaʼ mas jun yoʼonton chaʼiik ti jaʼ chlik yalik li kʼusi snopojik leke, mi laj une chakʼik jlikuk tratado, jech kʼuchaʼal chichʼ alel ta rekuadroe. Li sbi vun xchiʼuk li kʼupilik sba skoloraltak lokʼole jaʼ van xuʼ xtijbat-o yoʼonton li buchʼu ta jchiʼintik ta loʼile, vaʼun jaʼ jech xuʼ jchapbetik jlikeluk ti kʼu yuʼun chi jvulaʼanvane xchiʼuk ti oyuk kʼusi jakʼbetike. Jech xtok, stakʼ xkakʼbetik yil oxlik o chanlikuk tratado xchiʼuk ti xkalbetik ti akʼo stʼuj ti bu mas lek chile. Melel onoʼox chaʼa, maʼuk skʼan xal ti jaʼ noʼox ta jpuktik echʼel tratadoe o ti jaʼ noʼox chkakʼtik echʼel ta naetike, moʼoj, yuʼun ti kʼusie jaʼ ti xlik jloʼiltik ta sventa Vivliae xchiʼuk ti jlikestik junuk chanubtasele.
9. ¿Kʼu yuʼun tsots skʼoplal ti jchapan jbatik leke?
9 Kʼuk yelan ti ta jcholtik mantale, pe skʼan me jnaʼtik ti kʼalal lek ta jchapan jbatike jaʼ me jun koʼontontik yuʼun xchiʼuk xi jmuyubaj me li ta chol mantal ta naetike. Xi laj yal jun prekursore: «Jaʼ mas ta jkʼupin li kabtel kʼalal lek chapalune yuʼun ta xa jkʼan ta jtunes ta anil kaʼi ti kʼuyelan jchapanoj jbae», xi. Yan prekursor xtoke xi laj yale: «Mi jnaʼoj lek li kʼusi chal li vune jaʼ jun koʼonton ta xkakʼ», xi. Akʼo mi lek onoʼox ti jnop ta joltik kʼalal ta jchapan jbatike, oy jlom ermanoetike jaʼ mas lek chaʼiik ti tsots chalik ti kʼalal chchanike. Jaʼ me jech tsnaʼik lek ti toj lek tspasbeik li yabtel Jeovae (Col. 3:23; 2 Tim. 2:15).
10. ¿Kʼuxi ta pasel sventa jtuneluk tajmek li tsobajel sventa chol mantale?
10 Li tsobajeletik ta sventa chol mantal ti te chichʼ alel li kʼusi xuʼ xkaltike ta me skoltautik ti masuk xi jtojobe xchiʼuk ti jkʼupintik mas li chol mantal ta naetike. Mi jaʼ skʼoplal chol mantal li teksto ta jujun kʼakʼale, xuʼ xichʼ kʼelel xchiʼuk xkalbetik sloʼilal jlikeluk. Akʼo mi jech, li buchʼu tskʼel taje skʼan me xakʼbe lek yorail ta skʼelel o xichʼ akʼel ta ilel jlikeluk kʼuxi ta cholel mantal ti bu jaʼ staʼo li bu chichʼ cholel mantale o ti xichʼ alel ti kʼusi stakʼ alel li kʼakʼal taje. Mi jaʼ jech chichʼ pasele jaʼ me jech lek chapalik ta yalel mantal li buchʼutik tee. Mi lek chchapan sbaik li moletik xchiʼuk li yantik ti oy ta sbaik li tsobajel taje, ta me spas yuʼunik xchiʼuk ta yorail noʼox me chnel yuʼunik (Rom. 12:8).
Oy sbalil kʼalal ta xkaʼitike
11, 12. Albo skʼelobiltak ti jaʼ mas lek chkʼot ta yoʼonton mantal kuʼuntik li krixchanoetik kʼalal chkaʼibetik ta slekil koʼontontik li kʼusi chalike.
11 Mi ta jkʼan ta jlikes jloʼiltik xchiʼuk jlakʼnataktike xchiʼuk ti xkʼot ta yoʼonton kuʼuntik li kʼusi chkalbetike, maʼuk noʼox me skʼan jchapan jbatik lek; skʼan me xkakʼ ta koʼontontik ta melel xtok. Ti vaʼ oy ta koʼontontik une ta me xvinaj ti kʼuyelan ta xkaʼibetik li kʼusi chalike. Xi laj yal jun jkʼelvanej ta sirkuitoe: «Ti oy noʼox smalael kuʼuntike xchiʼuk ti oy ta koʼontontik chkaʼibetik li kʼusi chalike toj tsots me sjuʼel sventa xnopajik-o talel xchiʼuk jaʼ jech chkakʼtik ta ilel ti oyik ta koʼontontike», xi. Jaʼ me ta jambetik-o yoʼonton krixchanoetik mi ta slekil koʼontontik ta xkaʼibetik li kʼusi chalike, jech kʼuchaʼal chakʼ kiltik li kʼusi chkaltik echʼel liʼe.
12 Li periodiko Le Progrès ta Saint-Étienne ta Franciae, jamal laj yalbe skʼoplal skarta jun ants ti cham stseb ti oxib u yichʼoje. Li ta skartae te laj yal ti kʼalal mu toʼox jaluk yechʼel li vokolil taje, chaʼvoʼ la krixchanoetik kʼotik ta stiʼ sna. «Ta anil laj kil ti jaʼik yajrextikotak Jeovae —xi la stsʼiba—. Lek noʼox smelol laj kalbeik ti muʼyuk ta koʼontone, pe jaʼ to kile, li foyeto yakalik spukele jaʼ chalbe skʼoplal ti kʼu yuʼun chakʼ to akʼo oyuk vokolil li Diose. Vaʼun laj kakʼ ochikuk ta jna, pe ti kʼusi oy ta koʼontone jaʼ ti ta jipbe echʼel li kʼusi chalike. [...] Mas van ta jun ora te la xchiʼinukun ta loʼil xchiʼuk ta slekil yoʼonton la xchikintaik li kʼusi laj kale. Kʼalal ta xaʼox xbatike, lek xaʼox tajmek laj kaʼi jba, jaʼ yuʼun laj kalbeik ti akʼo to xtalik yan veltae.» (Rom. 12:15.) Kʼot yorail ti la xchʼam jun chanubtasel ta Vivlia li ants taje. Lek ta alel ti maʼuk kom ta sjol li kʼusi laj yalik li yajrextikotak Jeova taje, moʼoj, yuʼun jaʼ ti kʼuyelan aʼibat li kʼusi laj yale.
13. ¿Kʼuxi xuʼ jech jpastik ti kʼuyelan chtun yuʼun li krixchanoetik bu ta jcholtik mantale?
13 Mi ta slekil koʼontontik ta xkaʼibetik li kʼusi chal krixchanoetike, jaʼ me jech jnaʼojtik kʼusi chtun yuʼunik xchiʼuk mas lek xchapbe kuʼuntik smelolal kʼuxi xuʼ xkoltaatik li Ajvalilal yuʼun Diose. Avakʼoj onoʼox van venta ti buchʼutik jaʼik lekil jchol mantaletike snaʼik xchikintael li kʼusi ch-albatike (Pro. 20:5). Li ermanoetik taje oy ta yoʼontonik ta melel li krixchanoetik ti tsvulaʼanike. Maʼuk noʼox tstsakbeik sbi xchiʼuk ti bu stukʼil nakale, yuʼun chakʼik venta xtok li kʼusi oy ta yoʼontone xchiʼuk ti kʼusi chtun yuʼune. Mi oy buchʼu chal ti oy skʼope, ta sabeik echʼel mantal xchiʼuk chichʼbeik noʼox echʼel. Jaʼ jech chalik ti kʼusi chtun yuʼun li krixchanoetik chchiʼinik ta loʼile, jech kʼuchaʼal la spas li jtakbol Pabloe (kʼelo 1 Corintios 9:19-23). Jaʼ chnopaj-o ta mantal krixchanoetik ti kʼalal oyik ta koʼontontik ta melele xchiʼuk jaʼ jech lek chvinaj ti «cʼuxutic ta yoʼnton li Dios cuʼuntique» (Luc. 1:78).
Junuk me koʼontontik
14. ¿Kʼuxi xuʼ xkakʼbetik ta ilel stalelal Dios kʼalal ta jcholtik mantale?
14 Li Jeovae la stsak ta mukʼ krixchanoetik ti kʼalal la spas ti akʼo xtojobik ta stʼujel stukik li kʼusi tspasike. Akʼo mi jaʼ li Dios ti stekel xuʼ yuʼune, muʼyuk bu tsuj ta persa sventa xtunik ta stojolal, moʼoj, yuʼun ta kʼanelal ta xikʼ tal xchiʼuk chakʼbe bendision li buchʼutik tstojik ta vokol li lekil matanaletik yakʼoj Diose (Rom. 2:4). Ti jchol mantalutik yuʼun Diose, skʼan onoʼox me chapalutik ta xcholel li lekil aʼyej sventa xvinaj xkʼuxul yoʼonton li Diose (2 Cor. 5:20, 21; 6:3-6). Melel onoʼox chaʼa, sventa spas kuʼuntike skʼan me junuk koʼontontik kʼalal ta jcholbetik mantal li krixchanoetik bu ta jcholtik mantale, pe jaʼ van ti kʼusi tsots chkaʼitik une. ¿Kʼusi tskoltautik sventa jechuk jtalelaltik kʼuchaʼal taje?
15. 1) ¿Kʼusi skʼan spasik li yajtakboltak Jesús mi tspʼaj mantal li krixchanoetike? 2) ¿Kʼuxi xuʼ xkakʼ ta koʼontontik stael li buchʼutik lek yoʼontonike?
15 Li Jesuse laj yalbe yajtakboltak ti akʼo mu masuk chopoluk xaʼiik mi oy buchʼu tspʼaj li aʼyeje. Ti kʼusi skʼan spasike jaʼ ti akʼo yakʼ lek ta yoʼontonik ti buchʼu lek yoʼonton o ti staʼoe (kʼelo Mateo 10:11-15). ¿Kʼuxi xuʼ jech jpastik ek? Jaʼ ti chkakʼ ta koʼontontik stael li kʼusi kʼun ta taele. Jech kʼuchaʼal liʼe, jun ermano ti tskoʼoltas sba ta jsaʼ kʼanal takʼine xi nopem xaʼi chale: «Jpatoj koʼonton ti ta jta jutukuk kʼanal takʼin li avie», xi. Yan yajtsʼaklom Cristo xtoke oy ta yoʼonton ta jujun xemana ti akʼo sta junuk krixchano ti x-aʼibat li kʼusi chale xchiʼuk ti xbat noʼox svulaʼan sventa oyuk-o ta yoʼonton mantal kʼuchaʼal ta slikebale. Oy jlom jchol mantaletike chakʼ yipalik ti skʼelik batsʼi junuk versikulo ta Vivlia li ta jujupʼej na mi stakʼe. ¿Kʼusi stakʼ xavakʼ ta avoʼonton stael li voʼote?
16. ¿Kʼusi srasonal oy kuʼuntik ti ta jcholtik-o mantale?
16 Ti lek chkʼot ta pasel kuʼuntik li chol mantal ta naetike, maʼuk noʼox ta skoj ti kʼuyelan chil mantal li krixchanoetike. Melel, li chol mantal ta jpastike jaʼtik onoʼox tsta-o spojelik li krixchanoetik ti tukʼ yoʼontonike, pe oy to kʼusitik tsots skʼoplal chkʼot ta pasel yuʼun xtok. ¿Kʼusitik jaʼ? Jaʼ ti chkakʼtik-o ta ilel ti jkʼanojtik li Jeovae (1 Juan 5:3). Jech xtok, ta skoj li chol mantale muʼyuk ta jtaʼo jmultik kʼalal oy buchʼu lajel chbate (Hech. 20:26, 27). Xchiʼuk chtun sventa chkalbetik chopol krixchanoetik ti «laj xa sta yorail chchapanvan» li Diose (Apo. 14:6, 7). Pe li kʼusi mas to tsots skʼoplale jaʼ ti chichʼ ichʼbel-o ta mukʼ sbi Dios ta spʼejel Balumile (Sal. 113:3). Jaʼ yuʼun chaʼa, akʼo mi mu skʼan xaʼiik kʼusi chkalbetik li krixchanoetike skʼan me jcholtik-o li aʼyej sventa Ajvalilal yuʼun Diose. Mu me xchʼay ta joltik ti oy tajmek sbalil chil Jeova ti chkakʼtik persa yalel echʼel li lekil aʼyeje (Rom. 10:13-15).
17. ¿Kʼusi ti poʼot xa persa chakʼ venta li krixchanoetike?
17 Jaʼ ep li krixchanoetik ti mu skʼan xaʼiik li aʼyej chkalbetike, pe poʼot xa me xjel li snopbenik ta sventa taje (Mat. 24:37-39). Li Jeovae laj yalbe Ezequiel ti kʼalal mi kʼot yorail li chapanel ti albat chalbe skʼoplale, li j-israeletike ta «snaʼic ti oy jun jʼalcʼop te ta stojolique» (Eze. 2:5). Jaʼ me jech ek un, kʼalal mi tal xchapan chopol krixchanoetik li Jeovae, jaʼ to me te chakʼik venta ti jaʼ ta melel yajkʼopojel jun noʼox melel Dios li yajrextikotak Jeovae xchiʼuk chilik xtok ti likem talel ta stojolal Dios li mantal la xcholik ta buyuk noʼoxe xchiʼuk li ta naetike. ¡Jaʼ jun mukʼta matanal jtaojtik ti kichʼojbetik sbi Jeovae xchiʼuk ti chkakʼtik ta ojtikinel li smantal avi ti toj tsots skʼoplale! Jechuk-o me jpastik chaʼa, jsaʼ me kipaltik ta sjuʼel Dios sventa stsal kuʼuntik li vokolil ta jtatik ta xcholel mantal ta naetike.
¿Kʼusi cha takʼ?
• ¿Kʼuxi xuʼ oyuk stsatsal koʼontontik jcholtik mantal?
• ¿Kʼusi tskoltautik sventa xlik jloʼiltik ta sventa Vivlia li ta chol mantal ta naetike?
• ¿Kʼuxi chkakʼtik ta ilel ti oy ta koʼontontik ta melel li krixchanoetike?
• ¿Kʼusi skʼan jpastik sventa junuk koʼontontik jcholbetik mantal li krixchanoetik bu ta jcholtik mantale?
[Lokʼol ta pajina 9]
Kʼuxi xuʼ xlik jloʼiltik ta Vivlia
Slikebal:
◼ Kʼalal mi laj xaʼox akʼopon chaʼoxpʼeluk li krixchanoe, xuʼ xavakʼbe jlikuk tratado xchiʼuk xi xavalbee: «Tal jvulaʼanot, yuʼun oy ta koʼonton chkalbot li kʼusi xuʼ tspat koʼontontik ta sventa li kʼusi toj tsots skʼoplal chal liʼe».
◼ O xuʼ van cha kʼan chavakʼbe li tratadoe xchiʼuk ti xi xavalbee: «Tal jvulaʼanot jlikeluk, yuʼun ta jkʼan ta jnaʼ kʼusi cha nop ta sventa li kʼusi chal liʼe».
Mi la xchʼam tratado li krixchanoe
◼ Jakʼbo kʼusi tsnop ta sventa li sbi tratadoe.
◼ Tsʼetanbo lek xchikinal li kʼusi chale xchiʼuk akʼo lek venta li kʼusi tsnope. Koliyal xavalbe li sloʼil chale xchiʼuk tsako me ta venta.
Sventa cha loʼilaj-o echʼele
◼ Kʼelo xchiʼuk chapbo smelolal junuk versikulo o mas. Jaʼ jech xavalbe li kʼusi chtun yuʼune xchiʼuk li kʼusi tskʼane.
◼ Mi oy ta yoʼonton chavile akʼbo jlikuk vun, xchiʼuk mi jech skʼan chavile akʼbo yil kʼuxi ta pasel li chanubtasel ta Vivliae. Albo ti chbat avulaʼan yan kʼakʼale.
[Lokʼol ta pajina 11]
¿Kʼusi cha takʼ?
• ¿Kʼuxi xuʼ oyuk stsatsal koʼontontik jcholtik mantal?
• ¿Kʼusi tskoltautik sventa xlik jloʼiltik ta sventa Vivlia li ta chol mantal ta naetike?
• ¿Kʼuxi chkakʼtik ta ilel ti oy ta koʼontontik ta melel li krixchanoetike?
• ¿Kʼusi skʼan jpastik sventa junuk koʼontontik jcholbetik mantal li krixchanoetik bu ta jcholtik mantale?