Kerem-tseb, vuleso ta ajol avi li Mukʼta Jpasvanej vuʼune
«Ti cʼalal achʼiumalic to tale, naʼic me ti oy Bochʼo la spasoxuque.» (ECL. 12:1.)
1. ¿Kʼuxi jnaʼojtik ti spatoj yoʼonton Jeova ta stojolal li kerem-tsebetik ti chtunik ta stojolale?
LI Jeovae toj ep sbalil chil li kerem-tsebetike, jech chil kʼuchaʼal tsʼujul ti siket yutsile. Laj yal ta jun albil kʼop ti ta «yutsil yoʼnton chacʼ sbaic ta [skʼob]» Cristo li keremetik xchiʼuk tsebetik sventa chtunik ta stojolal kʼalal jaʼo «yorail chvinaj ch-abtej li [sjuʼel]» xNichʼone (Sal. 110:3). Veno, pe li albil kʼop taje jaʼo la chkʼot ta pasel kʼalal jutuk mu skotoluk krixchanoetik chʼabal chakʼ xchʼunel yoʼontonik ta stojolal li Diose, jaʼ noʼox tstoy sbaik, tsnopik ta sventa takʼin xchiʼuk ti jaʼ noʼox chbat ta yoʼonton sba stukike. Pe li Jeovae snaʼoj ti jelel li kerem-tsebetik ti ch-ichʼat ta mukʼe. ¡Toj echʼem spatoj yoʼonton ta stojolal li kerem-tsebetike!
2. ¿Kʼusi smakoj ti ta jvules ta joltik li Jeovae?
2 Jnoptik ti kʼu to yelan xmuyubaj Dios kʼalal ep kerem-tsebetik tsvules ta sjolik li Jeovae, li Mukʼta Jpasvanej yuʼunike (Ecl. 12:1). Jech ta melel, ti ta jvules ta joltik li Jeovae maʼuk noʼox ta jnoptik ta stojolal. Moʼoj, yuʼun oy kʼusi skʼan jpastik: jaʼ ti jpastik ti kʼusi lek chile xchiʼuk chkakʼtik akʼo sbeiltasutik jujun kʼakʼal ta jkuxlejaltik li smantale xchiʼuk li tojobtaseletik chakʼe. Ta me jpat-o koʼontontik ta stojolal xtok, ti jaʼ tskʼan ta melel li kʼusi lek ta jtojolaltike (Sal. 37:3; Isa. 48:17, 18). Kerem-tseb, ¿mi jaʼ jech chavil li Mukʼta Jpasvanej avuʼune?
«Pato avoʼnton ta stojol li Mucʼul Diose»
3, 4. ¿Kʼuxi laj yakʼ ta ilel Jesús ti spatoj yoʼonton ta stojolal li Jeovae, xchiʼuk kʼu yuʼun toj tsots skʼoplal ti jechuk jpastik eke?
3 Li buchʼu toj lek xuʼ jchanbetik ti kʼuyelan la spat yoʼonton ta stojolal Diose, jaʼ li Jesucristoe. Yuʼun jech yelan tajmek ikuxi kʼuchaʼal chal Proverbios 3:5, 6: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be». Kʼalal mu toʼox jaluk yechʼel ti laj yichʼ voʼ li Jesuse, akʼat ta preva yuʼun li Satanase, ch-akʼbat ox li juʼelale xchiʼuk li ichʼel ta mukʼ liʼ ta balumile (Luc. 4:3-13). Pe li Jesuse muʼyuk xakʼ sba ta loʼlael. Yuʼun snaʼoj ti jaʼ noʼox ta jtatik melel kʼulejal, ichʼel ta mukʼ xchiʼuk li kuxlejal mi «chquichʼtic lec ta mucʼ li Mucʼul Diose, me biqʼuit chcacʼ jbatic ta stojole» (Pro. 22:4).
4 Li balumil avie jaʼ ventainbil yuʼun li xpichʼetel oʼontonale xchiʼuk li kʼusi tskʼan stukike. Ta skoj ti kʼuyelan li kuxlejal ta jpat jxokontike, toj tsots me skʼoplal ti jechuk jtalelaltik kʼuchaʼal Jesuse. Vuleso me ta ajol kerem-tseb, li Satanase solel yakʼojbe yipal ta skʼejavesel ta sbikʼit belel kuxlejal li yajtuneltak Jeovae. Yuʼun li stuke jaʼ xmuyubaj-o ti jkotoltikuk jaʼ jtamtik echʼel li smukʼta sbelel lajelale. ¡Mu me xavakʼ akʼo sloʼlaot! Jaʼ lek akʼo ta avoʼonton svulesel ta ajol li Mukʼta Jpasvanej avuʼune. Ta sjunuluk avoʼonton xa pat avoʼonton ta stojolal xchiʼuk akʼbo yipal stael li mero kuxlejale, jaʼ xkaltik, li kuxlejal ta melele. Jpʼeluk me ta avoʼonton ti poʼot xa xkʼot ta pasel li spatobil koʼontontik taje (1 Tim. 6:19).
Pʼijanik me kerem-tsebetik
5. ¿Kʼusi cha nop ta sventa li kʼusi chkʼot ta pasel ta stojolal li balumil liʼe?
5 Li kerem-tsebetik ti tsvules ta sjolik li Mukʼta Jpasvanej yuʼunike jaʼ mas toj pʼijik, jaʼ muʼyuk li yan kerem-tsebetik ti koʼol sjabilal xchiʼukike (kʼelo Salmo 119:99, 100). Ta sventa ti snaʼojik li kʼusi oy ta yoʼonton tspas Jeovae, snaʼojik ti mu kʼusi lek chkʼot ta stojolal li balumil liʼe. Manchuk mi mu to jaluk achʼiel tal, avakʼoj van venta ta melel ti yantik x-ayan xiʼel chaʼi li krixchanoetike xchiʼuk ti chat yoʼontonike. Avabinoj van ta melel xtok ti tsokesik tajmek li balumile, ti yantik xa xkʼakʼub batel li vinajel-balumile (calentamiento global), ti chichʼ chikʼel o lomesel teʼetike xchiʼuk yantik kʼusitik kʼuchaʼal taje. Taje toj ep krixchanoetik chat-o yoʼontonik, akʼo mi jech, kʼajomal noʼox li yajrextikoutik Jeova jnaʼojtik ti jaʼ jlom senyail ti yuʼun chakʼ ta aʼiel ti chlaj xa li slumal Satanase (Apo. 11:18).
6. ¿Kʼuxi yakʼoj sbaik ta loʼlael jlom kerem-tsebetik?
6 Kʼux ta alel, pe oy jlom kerem-tsebetik yajtsʼaklomtak Cristoe muʼyuk bu skʼeloj sbaik xchiʼuk xchʼayoj ta yoʼontonik ti mu xa jaluk yorail li balumil liʼe (2 Ped. 3:3, 4). Li yantike tsots spasoj smulik ta skoj ti jaʼ chchiʼinik li buchʼutik mu lekuk ta chiʼinele o ta skoj ti tskʼelik pornografiae (Pro. 13:20). ¡Toj kʼux ta alel ti mu xa lekuk xilutik Dios ti kʼalal nopol xa ta jyalel li slajebal kʼusitike! Sventa mu jechuk xkʼot ta jtojolaltike, kakʼtik venta ti kʼusi kʼot ta stojolal li j-israeletik ta stenlejaltik Moabe. Ta sjabilal 1473 kʼalal maʼuk toʼox jkʼakʼaliltike, jaʼo ti kʼalal jutuk xaʼox skʼan x-ochik li ta Albil Balumile. ¿Kʼusi kʼot ta pasel?
La spʼosi yokik kʼalal jutuk xaʼox skʼan xkʼotike
7, 8. 1) ¿Kʼusi pʼijil loʼlael la stunes Satanás li ta stenlejaltik Moabe? 2) ¿Kʼusi pʼijil loʼlael tstunes li Diablo avie?
7 Li Satanase solel laj yakʼbe tajmek yipal ta smakel ta be li j-israeletike sventa mu xichʼ li smoton albilike. Ti kʼusi baʼyel la spase jaʼ ti la stunes j-alkʼop Balaam sventa xchopol kʼopta li jteklume, pe mukʼ xkʼot ta pasel yuʼun. Vaʼun la stunes jun pʼijil loʼlael: la stikʼbe ta yoʼontonik ta sloʼlabel sjol j-israeletik li kʼupil sba antsetik ta Moabe, sventa jech xpʼajatik yuʼun li Jeovae. Xkaltikuke tun li petsʼ taje, yuʼun ep buchʼutik imulivajik xchiʼuk li antsetik ta Moabe xchiʼuk la snijan-skejan sbaik ta stojolal li Baal ta Peore. Manchuk mi toj jutuk xaʼox skʼan xichʼik li matanal ti toj ep sbalile, te van 24,000 j-israeletik ichamik. ¡Toj chopol xa noʼox! (Núm. 25:1-3, 9.)
8 Li voʼotik eke toj jutuk xa me skʼan xkichʼ jmotontik ti mas to toj echʼem sbalile, ti jaʼ mu sta li Albil Balumil taje: jaʼ li achʼ balumil yuʼun Diose. Jech, sventa tsokesbe steklumal Dios li Satanase jaʼ tstunes xtok li mulivajele. Li mantal sventa stalelal krixchanoetik avie solel chʼabal xa sbalil, lek xa noʼox chilik li mulivajele, jech xtok ti chchiʼin sbaik ta vayel naka viniketik o naka antsetike jaʼ la tsnop stukik mi jech tskʼanik. Xi laj yal jun jchʼunolajel meʼile: «Jaʼ noʼox chaʼjot ti bu chaʼi kalab ti chopol chil Dios li chiʼinejbail ti maʼuk ta nupunele xchiʼuk ti chchiʼin sbaik ta vayel naka viniketik o naka antsetike: ta jnakutik xchiʼuk ta Salon sventa Tsobobbail», xi.
9. ¿Kʼusi vokolal xuʼ chtal ta skoj ti muʼyuk to echʼem li yorail xnichimal stsebal o skeremal li jun krixchanoe, xchiʼuk kʼuxi xuʼ tstsal yuʼunik li kerem-tsebetike?
9 Li kerem-tsebetik ti tsvules ta sjolik li Mukʼta Jpasvanej yuʼunike, snaʼojik ti jaʼ jun chʼul matanal yakʼoj Dios li lutsʼbaile, ti tsakal skʼoplal ta kuxlejal xchiʼuk ti ch-epaj-o batel krixchanoetike. Jaʼ yuʼun stsakojik lek ta mukʼ li kʼusi yaloj Jeovae: li lutsʼbaile jaʼ noʼox sventa li buchʼutik nupunemike (Heb. 13:4). Skʼan me jamal xkaltik xtok, ti kʼalal muʼyuk to echʼem li yorail xnichimal stsebal o skeremal li jun krixchanoe, jaʼ xkaltik, ti kʼalal solel tskʼan tajmek chiʼinejbail ta vayele, taje xuʼ me jaʼ jun tsatsal preva chaʼi sventa sakuk xakʼ sba (1 Cor. 7:36, NM). ¿Kʼusi skʼan xa pas mi oy kʼusi chopol chtal ta ajole? Kʼanbo vokol Jeova ti akʼo skoltaot ta snopel li kʼusitik leke. Mi ta sjunul koʼontontik chi jnopaj ta stojolal li Jeovae ta onoʼox me xaʼi (kʼelo Lucas 11:9-13). Toj jtunel me avuʼun xtok ti oy buchʼu xa chiʼin ta loʼil ta sventa kʼusitik leke.
Tʼujo lek li kʼusi cha kʼan cha tae
10. ¿Kʼusitik ti mu lekuk xa nope, xchiʼuk kʼusitik xuʼ xa jakʼbe aba?
10 Ep li kerem-tsebetik avie muʼyuk spajebik, jaʼ noʼox tsnopik li kʼusitik tskʼan tskʼupinike. Taje jaʼ ta skoj jlomuk ti chʼabal «tojobtasel» ta stojolalike, jaʼ xkaltik, ti muʼyuk beiltasbilik yuʼun Diose xchiʼuk ti chʼabal spatobil yoʼontonik ta mas tsʼakale (Pro. 29:18, Ch). Jaʼ jechik kʼuchaʼal li jtoyba j-israeletik ta skʼakʼalil Isaiase, ti laj yakʼ yoʼontonik ta saʼel li xkuxetel oʼontonale xchiʼuk tseʼej noʼox xaʼiik, jaʼ noʼox bat ta yoʼontonik stiʼel tibol xchiʼuk yuchʼel yaʼlel tsʼusub (Isa. 22:13). Mu itʼixuk xavaʼi li krixchanoetik taje, jaʼ lek nopo li spatobil oʼontonal yakʼoj Jeova ta sventa li buchʼutik tukʼ yoʼonton chakʼ sbaike. Xi xa jakʼbe abae: «¿Mi ta jkʼan tajmek ti akʼo xvul li achʼ balumile? ¿Mi chkakʼbe yipal ti lekuk jnopben kuxulun ti kʼalal yakal ta jmala li kʼupil sba spatobil oʼontonal chakʼ Jeovae?» (Tito 2:12, 13). Li kʼusitik cha takʼ ta sventa taje, ta me xvinaj ta sventa ti kʼusitik cha pase xchiʼuk ti kʼusitik baʼyel chavakʼ ta akuxlejale.
11. ¿Kʼu yuʼun toj tsots skʼoplal ti akʼo yakʼbeik yipal chanun li ololetik xchiʼuk kerem-tsebetik ti jaʼ to yorail chanun yuʼunike?
11 Li balumile tstijbe yoʼonton kerem-tsebetik ta stunesel skotol yipalik ta stael lekil abtelaletik. Veno, pe mi tikʼilot to ta chanune, skʼan xavakʼbe yipal ta stabel lek sbalil li chanubtasel cha akʼbate. Yuʼun maʼuk noʼox cha kʼan cha ta avabtel, moʼoj, yuʼun ti kʼusie, skʼan cha tun lek ta tsobobbail xchiʼuk ti lekuk xa tojob ta chol mantale. Sventa jech xkʼot ta pasel avuʼune, skʼan me ta smeloluk noʼox xkʼot ta nopel avuʼun li kʼusitike, lek xa tojob xa kʼopoj, lek noʼox xa rasonaj xchiʼuk li krixchanoetike xchiʼuk ti lek chavichʼan ta mukʼe. Pe li lekil chanubtasel xuʼ chavichʼe, jaʼ li chanubtasel ta Vivliae. Mi cha chan lek xchiʼuk mi chavakʼbe yipal ta yakʼel ta akuxlejal li beiltasel chakʼe, ta me xa tojob batel ta akuxlejal xchiʼuk toj lek me kʼusi amalaoj cha ta ta tsʼakal sventa sbatel osil (kʼelo Salmo 1:1-3).a
12. ¿Buchʼutik skʼan xchanbeik stalelal li utsʼ-alaliletik yajtsʼaklomtak Cristoe?
12 Li ta Israele toj tsots skʼoplal ilbil li xchanubtasel ololetike. Li chanubtasel ti chakʼ stot smeʼike, te smakoj batel jutuk mu skotoluk kʼusitik ta xkuxlejalik, pe li kʼusi mas toj tsots skʼoplale jaʼ li chanubtasel ta smantal Diose (Deu. 6:6, 7). Li j-israel ololetik ti chchikintaik li kʼusi chal stot smeʼike xchiʼuk li yantik krixchanoetik ti chiʼtaik Diose jaʼ me chojtikinik-o lek ti kʼusitik chtun yuʼunike. Pe koliyal li chanubtasel chakʼ Dios xtoke, ta me x-ayan stalelalik ti jutuk tajmek chkiltik avie, jech kʼuchaʼal li pʼijilale, li snaʼel skʼelel kʼusi lek xchiʼuk kʼusi chopole, li yaʼibel smelolale xchiʼuk ti snaʼel lek snopele (Pro. 1:2-4; 2:1-5, 11-15). Li avie, li utsʼ-alaliletike skʼan me tsotsuk skʼoplal chilik ek li chanubtasele.
Aʼibo kʼusi chal li buchʼutik skʼanojot ta melele
13. ¿Kʼusi tojobtasel chichʼik jlom kerem-tsebetik, xchiʼuk kʼu yuʼun skʼan xichʼ spʼijilik?
13 Ep buchʼutik chtojobtasatik li kerem-tsebetike, jech kʼuchaʼal li jtojobtasvanejetik ta sventa chanune, ti jaʼ mas tsots skʼoplal chaʼiik ti xkuch batel yuʼunik liʼ ta balumile. Jech oxal, kʼanbo Jeova ti akʼo xa stojobtase xchiʼuk koʼoltaso li tojobtasel cha albat xchiʼuk li kʼusi chal Vivliae xchiʼuk li vunetik chakʼ tukʼil j-abtele. Ta sventa ti cha chan lek li Vivliae, anaʼoj ti jaʼ akʼbil satilalik yuʼun Satanás li kerem-tsebetike xchiʼuk li buchʼutik mu xtojobike. Vuleso ta ajol li kʼusi kʼot ta pasel ta nichimaltik Edene. Li Eva ti mu xtojob leke, jaʼ la xchʼunbe li kʼusi laj yal Satanase, manchuk mi mu xojtikin xchiʼuk ti mu kʼusi lek spasoj ta stojolale. ¡Toj jelel me skotol jechuk ti lajuk xchikinta li kʼusi laj yal Jeovae! Yuʼun kʼanbil toʼox yuʼun Jeova xchiʼuk lek yoʼonton ta stojolal, jech xtok ep ta tos kʼuyelan laj yilbe slekil yoʼonton (Gén. 3:1-6).
14. ¿Kʼu yuʼun skʼan xa chikinta li kʼusi chal Jeova xchiʼuk li kʼusi chal atot ameʼe?
14 Li Mukʼta Jpasvaneje skʼanojot ek, jech xtok li slekil yoʼonton chakʼ ta ilele mu me jaʼuk ti yuʼun oy kʼusi tskʼane. Maʼuk noʼox tskʼan ti xa muyubaj li avie, yuʼun tskʼan xtok ti xa muyubaj sbatel osile. Jaʼ yuʼun, jech slekil yoʼonton kʼuchaʼal jun totil xi chalbot li jpʼel-chaʼpʼel kʼop liʼe, ti jech chalbe ek li yantik yajtuneltake: «Liʼ xabatique, jaʼ liʼ li lequil bee», xa yut (Isa. 30:21). Mi jaʼik tukʼil yajtuneltak Jeova li atot ameʼe, jaʼ me yan bendision ataoj xtok. Lek xa chikinta li kʼusi cha yalbeike xchiʼuk tsakbo me ta mukʼ li tojobtaseletik cha yakʼbeik kʼalal cha nop kʼusi cha kʼan tae xchiʼuk kʼalal cha nop kʼusi baʼyel chavakʼ ta akuxlejale (Pro. 1:8, 9). Yuʼun li kʼusi tskʼanik ta melele, jaʼ ti xa ta akuxlejal sbatel osile, ti jaʼ toj echʼem sbalile, ti jaʼ mu sta li kʼulejale o li ojtikinel liʼ ta balumile (Mat. 16:26).
15, 16. 1) ¿Kʼusi ti jpatoj-o lek koʼontontik ta stojolal Jeovae? 2) ¿Kʼusi toj ep sbalil xuʼ jchantik ta sventa ti kʼusi kʼot ta stojolal li Baruque?
15 Ti buchʼutik tsvules ta sjolik li Mukʼta Jpasvanej yuʼunike lek noʼox me sba li xkuxlejalike, yuʼun spatoj yoʼontonik ta stojolal Jeova ti muʼyuk ch-iktaatike xchiʼuk ti muʼyuk bu chkomtsanatike (kʼelo Hebreos 13:5). Pe toj jelel tajmek li snopben balumile. Jech oxal, skʼan me jchabi jbatik sventa mu x-abtej ta jtojolaltik (Efe. 2:2). Jnoptik avaʼi li kʼusi kʼot ta pasel ta stojolal yajtsʼibajom Jeremías ti Baruc sbie. Li yajtunel Dios taje te naki ta Jerusalén kʼalal toj tsots tajmek li kuxlejal ti tsuts kʼalal laj yichʼ jinesel li jteklum ta sjabilal 607 kʼalal maʼuk toʼox jkʼakʼaliltike.
16 Li Baruque tskʼan ox lek xkuxlejal yileluk xchiʼuk jaʼ tskʼan ti muʼyuk noʼox kʼusi chat-o yoʼontone. Pe li Jeovae laj yal ti chopol taje xchiʼuk laj yalbe ti akʼo mu xa saʼ li kʼusitik «tsots scʼoplal» chaʼie. Li Baruque bikʼit xchiʼuk pʼij laj yakʼ sba xchiʼuk la xchikintabe li Jeovae, ta skoj ti jech la spase kuxul ikom kʼalal laj yichʼ jinesel li Jerusalene (Jer. 45:2-5). Yan li xchiʼiltake la staik li kʼusitik «tsots scʼoplal» chaʼiike, li skʼulejalike xchiʼuk la xchʼay ta yoʼontonik li Jeovae. Pe mu jaluk te oy ta skʼobik, yuʼun chʼay yuʼunik, pojbatik batel yuʼun li jcaldeaetik o li jbabiloniaetike xchiʼuk toj ep ichamik (2 Cró. 36:15-18). Li kʼusi kʼot ta stojolal Baruque chakʼ kiltik ti jaʼ mas toj tsots skʼoplal ti lekuk xkil jbatik xchiʼuk Diose, ti jaʼ muʼyuk ti oy jkʼulejaltike xchiʼuk ti tsots jkʼoplaltik liʼ ta balumile.
Lekil talelaletik ti xuʼ jechuk xa chane
17. ¿Kʼu yuʼun toj lek xuʼ xchanbeik stalelal Jesús, Pablo xchiʼuk Timoteo li yajtuneltak Dios avie?
17 Sventa jaʼuk-o te xi jxanav li ta sbelel kuxlejale, li sKʼop Diose ep tajmek chalbutik stalelal krixchanoetik ti toj lek ta chanbele. Jech kʼuchaʼal li Jesuse. Manchuk mi jaʼ toj pʼij echʼ ta skotolal krixchanoetik, pe jaʼ laj yakʼ ta yoʼonton li spasel abtelal ti chakʼbe slekilal sbatel osil li krixchanoetike: jaʼ ti la «[xcholbe] yaʼyic li Lequil Aʼyej ta sventa ventainel yuʼun Diose» (Luc. 4:43). ¿Kʼusi xuʼ xkaltik ta stojolal li jtakbol Pabloe? Jaʼ la skʼan laj yakʼbe Jeova li kʼusi toj lek ta stojolale, jech oxal la sten komel li yabtel ti ep toʼox kʼusi ch-akʼbate xchiʼuk jaʼ laj yakʼbe lek yorail xchiʼuk la stunes lek yipal ta sventa li xcholel lekil aʼyeje. Li Timoteo ti mero nichʼonil ta sventa ti la xchʼun li sKʼop Diose, la xchanbe li slekil talelal Pabloe (1 Tim. 1:2). ¿Mi chopol laj yaʼi Jesús, Pablo xchiʼuk Timoteo ti jech la stunes xkuxlejalike? Muʼyuk. Jech ta melel, li Pabloe laj yal ti jaʼ la «cʼaʼep» laj yil li kʼusi chakʼ balumil kʼalal la skoʼoltas xchiʼuk li matanal ti chi jtun ta stojolal li Diose (Fili. 3:8-11).
18. ¿Kʼusi la sjel ta xkuxlejal ta jyalel jun kerem, xchiʼuk kʼu yuʼun muʼyuk bu chopol chaʼi?
18 Ep kerem-tsebetik avie xchanojbeik xchʼunel yoʼonton Jesús, Pablo xchiʼuk Timoteo. Jech kʼuchaʼal jun ermano ti lek toyol stojol ta yabtele, xi laj yale: «Ta sventa ti jech jkuxlejal kʼuchaʼal chal li beiltaseletik ta Vivliae, ep ta velta laj yakʼik lek kabtel. Pe akʼo mi lek li jtojol chi akʼbate, muʼyuk kʼusi yakalun stael ta jyalel laj kaʼi. Kʼalal laj kalbe li jbabeetik ta abtelal ti ta jkʼan chi tun ta yabtel Dios ta tsʼakal orae, ta anil noʼox laj yalbikun ti tstoyik to mas jtojole, yuʼun tskʼanik ti jel li kʼusi la jnop ta jpase. Pe li voʼone jnopoj xa onoʼox ti kʼusi ta jpase. Ep krixchanoetik muʼyuk laj yaʼibeik smelolal ti kʼu yuʼun ta xkikta li jlekil abtel ta skoj li yabtel Dios ta tsʼakal orae. Li stakʼobil taje jaʼ ti ta jkʼan ta jpas li kʼusi laj kalbe Dios kʼalal laj kakʼ jba ta stojolale. Li avie jaʼ xa ta jpas ta jkuxlejal skotol li kʼusitik ta mantale, jaʼ yuʼun xi muyubaj xchiʼuk jun tajmek koʼonton, taje mu me jsetʼuk ta jta ta stojolal li takʼine xchiʼuk li ojtikinele», xi.
19. ¿Kʼusi pʼijil tojobtasel chkalbetik li kerem-tsebetik ti akʼo snop spasike?
19 Ta smilal noʼox kerem-tsebetik ta sjunul balumil pʼij yakʼoj ta ilel stalelalik xchiʼuk jech spasojik kʼuchaʼal taje. Jaʼ yuʼun kerem-tseb, kʼalal cha nop kʼusi cha pas ta sventa li akuxlejale, mu me xa chʼay ta ajol ti toj nopol xa li skʼakʼalil Jeovae (2 Ped. 3:11, 12). Mu me itʼixuk xavaʼi li buchʼutik yakʼojbeik yipal ta stunesel li kʼusi chakʼ balumile. Moʼoj, yuʼun ti kʼusie jaʼ chikintao li kʼusi cha yalbeik li buchʼutik skʼanojote. Jaʼ me toj lek mi cha tsob akʼulejal ta vinajele, yuʼun jaʼ noʼox xuʼ chakʼbot li lekilaletik ta sbatel osile (Mat. 6:19, 20; kʼelo 1 Juan 2:15-17). Vuleso ta ajol li Mukʼta Jpasvanej avuʼune, vaʼun ta me xavakʼ venta kʼuyelan cha yakʼbot sbendision.
[Tsʼibetik ta yok vun]
a Mi cha kʼanbe to mas yaʼyejal li chanun ta universidad xchiʼuk li abtelaletike, kʼelo La Atalaya 1 yuʼun oktubre ta 2005, paj. 26-31
¿Mi xvul ta ajol?
• ¿Kʼuxi chkakʼtik ta ilel ti jpatoj koʼontontik ta stojolal Diose?
• ¿Kʼusi jaʼ li chanubtasel ti toj echʼem leke?
• ¿Kʼusi xuʼ jchantik ta stojolal li Baruque?
• ¿Buchʼutik toj lek xuʼ jchanbetik stalelal, xchiʼuk kʼu yuʼun?
[Lokʼol ta pajina 13]
Jaʼ me toj echʼem slekil li chanubtasel chakʼbutik Jeovae
[Lokʼol ta pajina 14]
[Lokʼol ta pajina 15]
Li Baruque la xchikinta li kʼusi laj yal Jeovae xchiʼuk muʼyuk xcham kʼalal laj li Jerusalene. ¿Kʼusi xuʼ xa chanbe?