Poʼot xa spojutik li Ajvalilal yuʼun Diose
«Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele.» (MAT. 6:10.)
1. ¿Kʼusi jaʼ li chanubtasel laj yakʼ Jesús ti mas tsots skʼoplale?
LI TA Mantaletik ta Vits laj yal Jesuse te laj yakʼbe xchan jun orasion li yajtsʼaklomtake, ti jaʼ chal ta jaypʼeluk noʼox kʼop li chanubtasel ti mas tsots skʼoplal laj yale: «Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele», xi (Mat. 6:9-13). Xanav ta «yantic lum xchiʼuc ta tsobtsobnaetic li Jesuse. La xchol batel li Lequil Aʼyej ta sventa ventainel yuʼun Diose» (Luc. 8:1). Xchiʼuk xi laj yalbe li yajchankʼoptake: «Baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane», xi (Mat. 6:33). Kʼalal ta jchantik li xchanobil liʼe, jkʼeltik lek kʼuyelan ta jtunestik ta chol mantal li kʼusi chale. Jnoptik kʼuyelan ta jtakʼtik li sjakʼobiltak liʼe: ¿Kʼu to yepal sbalil li mantal sventa Ajvalilal yuʼun Diose? ¿Kʼu yuʼun skʼan xichʼ pojel li krixchanoetike? Xchiʼuk, ¿kʼuxi tspojutik li Ajvalilal yuʼun Diose?
2. ¿Kʼu to yepal sbalil li aʼyej sventa Ajvalilal yuʼun Diose?
2 Xi onoʼox laj yal li Jesuse: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale», xi (Mat. 24:14, Ch). Li aʼyej sventa Ajvalilal yuʼun Diose toj tsots skʼoplal; jaʼ noʼox stuk toj tsots skʼoplal. Jaʼ yuʼun, te van vukubuk miyon yajrextikotak Jeova ti oyik mas ta sien mil tsobobbailetik ti yakal tspas yabtelik ta chol mantal ti mu bu jech pasbil-o ta spʼejel balumile xchiʼuk chalik echʼel ti vaʼanbil xa ta vinajel li Ajvalilal yuʼun Diose. Jaʼ jun lekil aʼyej taje, yuʼun skʼan xal ti jaʼ tsventain Dios spʼejel balumil ta stojolal li Ajvalilal yuʼune. Li ta Ajvalilal taje, chkʼot ta pasel yuʼun ta Balumil li kʼusi tskʼan yoʼonton Jeova jech kʼuchaʼal ta vinajele.
3, 4. ¿Kʼusi chkʼot ta pasel kʼalal mi kʼot ta pasel li kʼusi tskʼan yoʼonton Dios liʼ ta Balumile?
3 ¿Kʼusi tspas ta stojolal krixchanoetik li Jeova kʼalal mi kʼot ta pasel li kʼusi tskʼan yoʼonton ta Balumile? «Ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay.» (Apo. 21:4.) Muʼyuk buchʼu ta x-ipaj xchiʼuk chcham ta skoj li mulil jkuchojtik tale xchiʼuk ti chʼabal jtukʼiltike. Li animaetik ti te oy ta snopben Diose, xuʼ me tsta xkuxlejalik sbatel osil, yuʼun li Vivliae xi chale: «Ta xchaʼcuxiic li bochʼotic lequique xchiʼuc li bochʼotic chopolique», xi (Hech. 24:15). Chchʼay li pas kʼopetike, li chameletike xchiʼuk li viʼnale, vaʼun tspas ta paraiso spʼejel li Balumile. Li chonbolometik ti xibalik sba avie, jun yoʼonton chkuxiik xchiʼuk li krixchanoetike, jech li stukik eke (Sal. 46:9; 72:16; Isa. 11:6-9; 33:24; Luc. 23:43).
4 Ta sventa ti toj kʼupilik sba li kʼusitik taje, mu labaluk chkaʼitik jun albil kʼop ta Vivlia ti jaʼ chalbe skʼoplal li kuxlejal ta stojolal Ajvalilal yuʼun Diose, tspat tajmek oʼontonal ti kʼusi chale: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o», xi. ¿Pe kʼusi van chkʼot ta pasel ta stojolalik li buchʼutik tsaʼik kʼop une? Xi chal li albil kʼope: «Mu xa jaluc liʼ oyic li bochʼotic chopolique», xi. Kʼajomal noʼox ta xuʼuninik balumil li buchʼutik spatoj yoʼontonik ta stojolal Jeovae (Sal. 37:9-11).
5. ¿Kʼusi chkʼot ta stojolal li balumil liʼe?
5 Pe kʼelavil, sventa xkʼot ta pasel skotol taje skʼan me xchʼay baʼyuk li balumil liʼe, ti chʼakajtik yuʼun krixchanoetik ta skoj politika, ta skoj relijion o ta skoj takʼin. Taje jaʼ me oy ta sba li Ajvalilal yuʼun Diose. Li j-alkʼop Daniele xi akʼbat snaʼ yuʼun Diose: «Cʼalal jaʼo ochemic ta ajvalilal li ajvaliletic leʼe [li ajvaliletik avie], li Dios te oy ta vinajele ta sliques jun ajvalil [ta vinajel]; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil», xi (Dan. 2:44). Vaʼun ch-ayan «achʼ vinajel» (jaʼ li achʼ ajvalilal ta vinajel yuʼun Diose) ti ch-ajvalilaj ta «achʼ banamil[e]» (li achʼ jnaklejetik ta balumile) xchiʼuk «ti bu puru tucʼ xa cʼusitic te oye» (2 Ped. 3:13).
Mas to skʼan pojelal li avie
6. ¿Kʼusi chal Vivlia ta sventa li choplejal liʼ ta balumile?
6 Kʼalal la stoy sbaik ta stojolal Dios li Satanás, Adán xchiʼuk Evae xchiʼuk ti la skʼan tsnop stukik li kʼusi lek xchiʼuk li kʼusi chopole, laj yakʼik ta vokol stekel li krixchanoetike. Mas ta 1,600 jabil ta tsʼakale, li ta skʼakʼalil Noee, «epaj smulic li cristianoetic ta banamile, xchiʼuc ti jaʼ noʼox batem ta yoʼntonic o snopel li cʼusitic chopole» (Gén. 6:5). Tsatsaj li kuxlejal kʼalal echʼ xaʼox 1,300 jabile, yuʼun li Salomone xi la stsʼibae: «Jaʼ toj lec chilic li bochʼotic chamenic xae, ti jaʼ abul sbaic li bochʼotic cuxulic toe», xi, xchiʼuk xi to laj yal xtoke: «Jaʼ toj ven lec chilic li bochʼotic muʼyuc to voqʼuemique, yuʼun muʼyuc to yiloj li cʼusitic chopol chichʼ pasel liʼ ta banamile», xi (Ecl. 4:2, 3). Echʼem xa mas ta oxmil jabil un, pe jaʼ ch-ajvalilal-o li choplejale.
7. ¿Kʼu yuʼun mas chtun kuʼuntik li pojelal yuʼun Dios avie?
7 Akʼo mi melel onoʼox ti oy xa ta sjaymilal jabil likem talel li choplejale, jaʼ avi ti mas ta jkʼantik pojel yuʼun li Ajvalilal yuʼun Diose. Mu bu jech-o ta kuxlejal ti toj chopol li kʼuchaʼal 100 jabil echʼem tale, pe mas to yakal tsok talel. Jech kʼuchaʼal liʼe, jun aʼyej yuʼun Instituto Worldwatch xi laj yale: «Li ta pas kʼopetik ti echʼ [ta siglo 20] jaʼ oxib to velta x-echʼ yepal ti jayib ichamik ta skotolal pas kʼopetik ti lik tal taj to ta siglo 1 kʼalal to ta sjabilal 1899 kʼalal echʼ xaʼox li Cristoe», xi. Leʼ xa onoʼox ta 1914 xtale, mas ta sien miyon krixchanoetik chamemik ta skoj pas kʼopetik. Jech kʼuchaʼal chal jlik ensiklopediae, te van 60 miyon ichamik li ta Xchibal Mukʼta Pas kʼop ta spʼejel Balumile. Li avie ep mukʼtikil lumetik ti oy xa yuʼunik bomba atomikae, ti xuʼ yuʼun tslajes ep lumetik ta Balumile. Akʼo mi toj ep xa kʼusi chanbil li ta siensiae xchiʼuk li kʼusitik sventa poxile, li chamele te van voʼobuk miyon ololetik tsmil jujun jabil (kʼelo li kapitulo 9 ta livro ¿Kʼusi chchanubtasvan ta melel li Vivliae?).
8. ¿Kʼusi yakʼojik ta ilel ti ep xa ta mil jabil tspasik tal mantal li krixchanoetike?
8 Li krixchanoe mi jaʼuk xpaj yuʼun li choplejale. Li politikaetike, li relijionetike xchiʼuk li kʼusitik sventa takʼine mi jaʼuk xuʼ yuʼunik yakʼbel lekilal, muyubajel xchiʼuk mu xuʼ yuʼun ta spajesbel svokol ta chamel li krixchanoetike. Mi jaʼuk bu chapem yuʼunik li kʼusitik chkil-o jvokoltike, moʼoj, mas tsatsajem yuʼunik. Ti ta smilaltak xa jabil ch-ajvalilaj tal li krixchanoetike, lek yakʼoj ta ilel ti melel li kʼusi xi albile: «Muc sventainojuc stuc yorail li cristianoe, ti mu xuʼ yuʼun tspas mantal stuc li cʼusi chcʼot ta pasel ta stojole», ti xie (Jer. 10:23). Jaʼ jech ta melel, «ta xpechʼ ta teqʼuel xchiʼil li cristianoe» (Ecl. 8:9). Jaʼ yuʼun «scotol li jujuchop cʼusitic spasoj Diose ta jnaʼtic ti toj cʼux svocol chaʼyic cʼalal to tanae. Jaʼ jech xʼayetic ta svocolic o batel jech chac cʼu chaʼal jun ants ti xʼayet ta xcʼuxul xchʼut cʼalal yuʼun xa ta xcuxe» (Rom. 8:22).
9. ¿Kʼusi la chkʼot ta pasel ta «slajebtic xa batel ti [kʼakʼal]» jech kʼuchaʼal lek jnaʼojtik li yajtsʼaklomutik Cristoe?
9 Li Vivliae xi laj yalbe skʼoplal jkʼakʼaliltike: «Cʼalal slajebtic xa batel ti cʼacʼale, xiʼbal sba, yuʼun naca vocol ta xvul ta loqʼuel», xi. Kʼalal laj xaʼox yal kʼuyelan li kuxlejal kʼalal jaʼo ch-ajvalilaj li krixchanoetike, xi pʼijubtasvane: «Ti buchʼu toj chopol xaʼi sbaique, xchiʼuc ti jloʼlavanejetique, yacalic ta soquel batel», xi (kʼelo 2 Timoteo 3:1-5, 13, Ch). Li yajtsʼaklomutik Cristoe mu labaluk chkiltik ti jech chkʼot ta pasele, yuʼun jnaʼojtik «ti oyic ta scʼob pucuj scotol li yan cristianoetic liʼ ta banamile» (1 Juan 5:19). Pe oy lekil aʼyej: li Diose poʼot xa tajmek spoj lokʼel ta chopol balumil li yajtuneltake, yuʼun toj anil yakal tsok echʼel.
Ti kʼusi noʼox xuʼ jpat-o koʼontontik tspojutike
10. ¿Kʼu yuʼun chkaltik ti jaʼ noʼox xuʼ jpat-o koʼontontik ti jaʼ tspojutik li Jeovae?
10 Kʼalal cha chol li lekil aʼyeje, albo smelolal ti jaʼ noʼox Jeova xuʼ tspojutike. Jaʼ noʼox stuk xuʼ yuʼun xchiʼuk oy tajmek ta yoʼonton tspoj lokʼel ta vokolil ta jyalel li yajtuneltake (Hech. 4:24, 31; Apo. 4:11). Xuʼ jpat koʼontontik ti tspoj steklumal li Jeovae xchiʼuk ti chkʼot ta pasel skotol li kʼusi yaloje, yuʼun xi yaloj ta melele: «Li cʼusi nopbil cuʼune persa chcʼot ta pasel», xi. Li kʼusi chale «muc xocoluc tsut batel ta [stojolal]» (kʼelo Isaías 14:24, 25; 55:10, 11).
11, 12. ¿Kʼusi chalbe yajtuneltak li Jeovae?
11 Skotol onoʼox velta kʼalal chakʼbe stoj smul chopol krixchanoetik li Jeovae, ta onoʼox spoj li yajtuneltake. Kʼalal la stak echʼel j-alkʼop Jeremías li Jeova sventa chchapan li chopol krixchanoetike, xi laj yalbee: «Mu me xaxiʼ», xut, xchiʼuk xi laj yalbe ta melele: «Vuʼun chajcoltaot», xut (Jer. 1:8). Jech xtok, kʼalal mu to tslajes li chopol jteklum Sodoma xchiʼuk Gomorrae, li Jeovae la stak echʼel chaʼvoʼ anjel sventa xbat slokʼesik talel li Lot xchiʼuk yutsʼ yalale. Vaʼun «li Mucʼul Diose laj yacʼ tal cʼocʼ xchiʼuc azufre» ta stojolal li jteklumetik taje (Gén. 19:15, 24, 25).
12 Akʼo mi smakoj spʼejel Balumil li chapanel chakʼ Diose, xuʼ xpojatik yuʼun Jeova li buchʼutik chchʼunbeik smantale. Kʼalal la slajes ta nojelal ta voʼ li chopol lum ta voʼnee, «icol [yuʼun] li Noé xchiʼuc yan vucub xchiʼiltaque, yuʼun laj yal ta jamal cʼusi tucʼ ta pasel» (2 Ped. 2:5). Kʼalal mi kʼot skʼakʼalil tslajes Jeova li chopol balumil liʼe, tspoj xtok li buchʼutik tukʼike. Jaʼ yuʼun xi chalbutik mantal li sKʼope: «Voʼoxuc ti toj biqʼuit chaʼilatic liʼ ta banamile jaʼ saʼic li Mucʼul Diose. [...] Jaʼ pasic li cʼusitic tuqʼue, mucʼuc noʼox avoʼntonic, naca me jech colem chacʼotic cʼalal tsta scʼacʼalil ch-ilin li Mucʼul Diose», xi (Sof. 2:3). Ta sventa ti chkʼot ta spʼejel balumil li lajelal taje, li chopol krixchanoetike chichʼik nutsel lokʼel li ta balumile. Yan li buchʼu tukʼike jaʼ chuʼuninik li balumile (Pro. 2:21, 22).
13. ¿Kʼuxi tspoj li yajtuneltak Jeova ti chamemik xae?
13 Pe li avie, ep tajmek yajtunel Dios ti chamemik xa ta skoj chamele, ta skoj kontrainel o ta skoj yan kʼusitik (Mat. 24:9). ¿Kʼusi chkʼot ta pasel ta stojolalik? Ta xichʼik pojel ek. ¿Kʼu yelan? Jech kʼuchaʼal laj xa kaltike, ta «xchaʼcuxiic li bochʼotic lequique» (Hech. 24:15). ¡Jaʼ jun muyubajel ti jnaʼojtik ti mu kʼusi xuʼ xmakat-o Jeova sventa tspoj li yajtuneltake!
Jun tukʼil ajvalilal
14. ¿Kʼu yuʼun jpatoj-o tajmek koʼontontik ti tukʼ li Ajvalilal yuʼun Diose?
14 Li ta chol mantale alo ti tukʼ li Ajvalilal ta vinajel yuʼun Jeovae, yuʼun jaʼ chakʼ ta ilel li stalelaltak Diose, jech kʼuchaʼal li tukʼilal xchiʼuk kʼanelale (Deu. 32:4; 1 Juan 4:8). Jaʼ yakʼojbe sbain Ajvalilal li buchʼu mas lek chapal ta sventainel li Balumile: li Jesucristoe. Jech noxtok, yaloj ti chichʼik kuxlejal ta vinajel 144,000 tʼujbil jchʼunolajeletike xchiʼuk ti tskʼelik li Balumil xchiʼuk Cristo ti koʼol kʼusi tsta xchiʼukike (Apo. 14:1-5).
15. ¿Kʼusi jelel-o li Ajvalilal yuʼun Dios xchiʼuk li ajvalil krixchanoetike?
15 Li ajvalilal tspas Jesús xchiʼuk li 144,000 jelel me tajmek, mu me xkoʼolaj kʼuchaʼal li jpas mulil ajvalil krixchanoetike. Ep li jbabeetik liʼ ta balumile toj chopolik xchiʼuk xjochojik echʼel ta pas kʼop li buchʼutik tsventainike, ta skoj taje ta smiyonal noʼox chchamik. Jaʼ yuʼun chalbutik Vivlia ti mu jpat-o koʼontontik li krixchanoetike, yuʼun «mu xuʼ yuʼun chcoltavanic» (Sal. 146:3). Yan li ajvalilal tspas Cristoe, jaʼ chakʼ ta ilel li kʼanelale xchiʼuk li slekil oʼontonale. Xi laj yal li Jesuse: «Laʼic ta jtojol acotolic, voʼoxuc ti lubenoxuc yuʼun li tsatsal abtele, xchiʼuc li alal icatsile, vuʼun ta xcacʼ acux avoʼntonic. Jaʼ cuchic li icatsil cuʼune, jaʼ chanic cʼu xʼelan coʼnton yuʼun toj lec coʼnton, biqʼuit cacʼoj jba. Me jech chapasique, jech cux xi avoʼntonic. Yuʼun li abtel cuʼune, muʼyuc tsots ta pasel, li icatsil cuʼune, muʼyuc ol ta cuchel», xi (Mat. 11:28-30).
Poʼot xa stsuts li «slajebal cʼacʼale»
16. ¿Kʼu yelan tstsuts li «slajebal cʼacʼale»?
16 Leʼ xa onoʼox ta 1914 ti ta slajeb xa kʼakʼal oy li balumile. Jaʼ jech, ti vaʼ ora taje jaʼo lik talel ti oyutik ta «slajebal kʼusitik chkʼotanuk ta pasele» (Mat. 24:3, NM). Li «tsots [vokol]» laj yal Jesuse poʼot xa me tajmek xkʼot ta pasel (kʼelo Mateo 24:21). Jaʼ jun mukʼta vokolil ti mu kʼusi xkoʼolaj-oe, ti tslajesbe skʼoplal skotol li kʼusitik ta slumal Satanase. Pe ¿kʼuxi chlik? ¿Xchiʼuk kʼuxi tstsuts?
17. ¿Kʼusi chal Vivlia ta sventa li slikebal tsatsal vokolile?
17 Ta anil me chlik li tsatsal vokolile. Ta melel, mu nabajuk li «scʼacʼalil ta xtal ti Cajvaltique [li Jeovae]», jaʼo «ti cʼalal xi ta xalic ti jnaclejetic ta banomile: “Lamajem cʼop, muʼyuc xiʼel, lec oy scotol”», ti xiike (kʼelo 1 Tesalonicenses 5:2, 3, Ch). Li tsatsal vokolil albile jaʼo chlik kʼalal yuʼun xa chchap yuʼunik jlomuk li tsatsal kʼopetik yalojik li mukʼtik lumetike. Li «mucʼta [...] Babilonia[e]», li jventainvanej yuʼun skotol jecheʼ relijionetik ta spʼejel balumile, ta anil noʼox chichʼ lajesel, jaʼ yuʼun chʼayem yoʼonton chtaat spʼejel li balumile. Li ajvaliletik xchiʼuk yantik krixchanoetike labal to chilik ti kʼuyelan chichʼ chapanel li jventainvanej taje (Apo. 17:1-6, 18; 18:9, 10, 15, 16, 19).
18. ¿Kʼusi van tspas Jeova kʼalal tstsakat ta kʼop yuʼun Satanás li steklumale?
18 Kʼalal mi kʼot yorail une, «ta xvinaj sqʼuelubil ta cʼacʼal, ta u, xchiʼuc ta cʼanaletic» xchiʼuk «ta xvinaj tal senyail ta vinajel ti Xnichʼon cristiano[e]». Vaʼun «teteuc me [jsatik], yuʼun poʼot xa [xi jpoje]» (Luc. 21:25-28; Mat. 24:29, 30). Li Gog, ti jaʼ li Satanase, tstsak ta kʼop xchiʼuk yajsoltarotak li steklumal Diose. ¿Kʼusi van tspas Jeova ta skoj taje? Xi chale: «Bochʼouc noʼox ta xutsʼinta li jteclumale, jaʼ ta xutsʼintabun o li yuninal jsate», xi (Zac. 2:8). Ta anil noʼox oy kʼusi tspas sventa tspoj yajtuneltak li Jeovae, li Mukʼul Ajvalil ta vinajel-balumile. Manchuk mi tslajesvan yaʼi li Satanase, muʼyuk bu chjuʼ yuʼun (Eze. 38:9, 18).
19. ¿Kʼu yuʼun xuʼ jpat-o lek koʼontontik ta melel ti tslajesbeik slumal Satanás li yajsoltarotak Diose?
19 Kʼalal oy kʼusi tspasbatik yuʼun Dios li mukʼtik lumetike, jaʼ me jech tsnaʼik-o ti jaʼ li Jeovae (Eze. 36:23). Li Dios ti skotol xuʼ yuʼune tstak talel soltarotak sventa tslajesvanik, ti jaʼik li epal miyon anjeletik ti beiltasbilik yuʼun li Jesucristoe sventa tslajesik li kʼusitik to yuʼun Satanase (Apo. 19:11-19). Jvules ta joltik ti jaʼ noʼox itun jun anjel sventa «la smil voʼob slajunvinic ta mil (185,000)» yajkontratak Dios ta jun akʼobale. Jamal ta aʼiel chaʼa, ti muʼyuk bu vokol chaʼi ta milel stekel li kʼusitik ta slumal Satanás li yajsoltarotak Dios kʼalal mi tsuts ta Armagedón li tsatsal vokolile (2 Rey. 19:35; Apo. 16:14, 16). Li Satanás xchiʼuk spukujtake ta xichʼik tikʼel ta xab jmil jabil, mi laj une ta xichʼik lajesel (Apo. 20:1-3).
20. ¿Kʼusi chkʼot ta pasel yuʼun Jeova ta sventa li Ajvalilal yuʼun Diose?
20 Jaʼ jech, muʼyuk xa me choplejal liʼ ta Balumile xchiʼuk xuʼ me te xkuxiik-o sbatel osil li buchʼutik tukʼike. Jech noxtok, te chvinaj ta melel ti jaʼ Mukʼta Jpojvanej li Jeovae (Sal. 145:20). Ta sventa li Ajvalilal yuʼun Diose ta xchaʼta yav li mukʼul pas mantal yuʼune, ta xchʼultajes li sbie xchiʼuk ta xkʼot ta pasel yuʼun li kʼusi toj lek tskʼan ta sventa Balumile. Jtekeltik xi jmuyubaj ti chkakʼtik ta aʼiel li lekil aʼyejetik taje xchiʼuk ti jkoltatik li «bochʼotic scʼoplal onoʼox chcuxiic sbatel [osil]» sventa xaʼibeik smelolal ti poʼot xa xi spojutik li Ajvalilal yuʼun Diose (Hech. 13:48).
¿Mi xvul ta ajol?
• ¿Kʼuxi laj yal Jesús ti toj tsots skʼoplal li Ajvalilal yuʼun Diose?
• ¿Kʼu yuʼun mas to ta jkʼantik pojel yuʼun Dios li avie?
• ¿Kʼusitik xuʼ jmalaojtik chkʼot ta pasel kʼalal jaʼo yakal li tsatsal vokolile?
• ¿Kʼuxi chakʼ ta ilel Jeova ti jaʼ Mukʼta Jpojvaneje?
[Lokʼol ta pajina 12]
Li sKʼop Diose yaloj onoʼox ti ta jkʼakʼaliltike ta xichʼ pasel jun abtelal ta spʼejel balumil sventa chol mantal ti mu bu jech pasbil-oe
[Lokʼol ta pajina 15]
Jech kʼuchaʼal la spoj Noé xchiʼuk yutsʼ yalal li Jeovae, jech xuʼ tspojutik ek
[Lokʼol ta pajina 16]
Li Jeovae «ta scusbe loqʼuel scotol yaʼlel satic, jech muʼyuc xa bochʼo chcham» (Apo. 21:4)
[Lokʼol ta pajina 16]