Tunan ta stojolal Jeova avi ti kerem-tsebot toe
«Jaʼ me tamo o batel li cʼusi laj achane. Yuʼun xanaʼ lec ti jaʼ melele.» (2 TIM. 3:14.)
1. ¿Kʼu yelan chil Jeova ti chtun li kerem-tsebetik ta yajrextikotake?
LI JEOVAE toj tsots skʼoplal chil li chʼul abtel tspas kerem-tsebetike, jaʼ yuʼun laj yakʼ ta naʼel jun albil kʼop ta sventaik. «Li avinictaque yutsil yoʼnton chacʼ sbaic ta acʼob ti cʼalal yorail chvinaj ch-abtej li avuʼele —xi laj yal li jtsʼibajom yuʼun salmoe—. Jaʼ jech chtalic ta atojol jech chac cʼu chaʼal li job osil chyal ta poʼot saque; jaʼ jech chtalic ta atojol li querem soldadoetic avuʼune.» (Sal. 110:3.) Ta melel, toj ep sbalil chil Jeova li kerem-tsebetik ti oy ta yoʼontonik chtunik ta stojolale.
2. ¿Kʼusi vokolal ch-akʼbatik yuʼun balumil li kerem-tsebetik ta sventa li kʼusi tspasik ta tsʼakale?
2 Li voʼote kerem o tseb ta tsobobbail, ¿mi avakʼoj xa aba ta stojolal Jeova? Ep buchʼutik vokol chaʼiik ta snopel spasel taje, yuʼun li bankilaletik ta empresa, jchanubtasvanejetik, xchiʼuk bakʼintike yutsʼ yalalik xchiʼuk yamigotakik li kerem-tsebetike jaʼ chtijbat yoʼontonik ta saʼel li kʼulejale. Kʼalal jaʼ chakʼ ta yoʼonton stael kʼusitik ta mantal li jun kerem o tsebe, ta onoʼox xpʼajat yuʼun li balumile. Akʼo mi jech, li buchʼutik chakʼ xkuxlejal sventa chtunik ta stojolal li melel Diose, jaʼ me yakalik spasel li kʼusi mas toj leke (Sal. 27:4). Jchanbetik skʼoplal avi li oxib sjakʼobil liʼe: ¿Kʼu yuʼun skʼan xa tun ta stojolal li Jeovae? ¿Kʼusi tskoltaot sventa jechuk xvinaj ta akuxlejal ti avakʼoj aba ta stojolale, manchuk mi oy kʼusi chalboxuk o tspasboxuk li yantike? ¿Kʼusitik kʼupilik sba abtelaletik ta stojolal Dios xuʼ cha ta?
Skʼan xtun ta stojolal Jeova li jchʼunolajele
3. ¿Kʼusi van skʼan jpastik kʼalal chkilbetik spasbentak li Jeovae?
3 ¿Kʼu yuʼun skʼan xa tun ta stojolal li melel Dios ti kuxule? Apocalipsis 4:11 xi chal kaʼitik li srasonal ti mas tsotse: «Cajval, voʼot Diosot cuʼuncutic, voʼot noʼox atuc oy ta aventa albel alequilal, ichʼel ta mucʼ, xchiʼuc voʼot noʼox atuc oy avuʼel. Yuʼun voʼot laj apas scotol li cʼusitic oye, yuʼun jech la scʼan avoʼnton ti jech oye, ti jech iʼayin scotole», xi. Li Jeovae jaʼ li Mukʼul Jpasvanej yuʼun skotol li kʼusitik oye. ¡Toj kʼupil xa noʼox sba yutsil li jBalumiltike! Oy teʼetik, nichimetik, chonbolometik, nabetik, vitsetik, ukʼumetik ti xchajet noʼox yok chyale...: jaʼ spasoj skotol li Jeovae. Xi laj yalbe Jpasvanej li jtsʼibajom yuʼun salmoe: «Li banamile noj ta sventa scotol li cʼusitic apasoje», xut (Sal. 104:24). ¡Chkalbetik tajmek koliyal li Jeovae, yuʼun ta xkʼuxul yoʼonton laj yakʼ jbekʼtaltik xchiʼuk jnopbentik sventa jkʼupintik lek li Balumile xchiʼuk skotol li kʼusitik lek oy ta stojolale! Jaʼ me skʼan stij koʼontontik jechuk ta spasbel yabtel Jeova ti ta jkʼan chkalbetik koliyale, ¿mi mu jechuk xa naʼ?
4, 5. ¿Kʼusitik la spas Jeova ti jaʼ tijbat-o yoʼonton Josué ta spatel lek yoʼonton ta stojolale?
4 Yan srasonal ti kʼu yuʼun skʼan xi jtun ta stojolal Jeovae, jaʼ ti kʼusi albatik yuʼun Josué li steklumal Dios kʼalal jutuk xaʼox skʼan xchame: «Acʼo cʼotuc lec ta ajol ta avoʼntonic ti icʼot ta pasel scotol li cʼusi yalojboxuc Mucʼul Dios cuʼuntique. Me jbeluc muʼyuc cʼusi ti muc spase», x-utatik. ¿Kʼu yuʼun jech laj yal li Josuee? (Jos. 23:14.)
5 Laj onoʼox van yaʼi Josué ta sbikʼtal ti kʼalal te toʼox nakalik ta Egipto ti albat ch-akʼbatik yuʼun Jeova sbalumil stukik li j-israeletike (Gén. 12:7; 50:24, 25; Éxo. 3:8). Kʼalal mukʼta krixchano xaʼox li Josuee, laj yil kʼuyelan lik kʼotuk ta pasel yuʼun Jeova li kʼusi yaloj ta melele, la stak tal lajuneb vokolil ta stojolal li Egiptoe xchiʼuk la suj ta persa ti akʼo xakʼ lokʼuk j-israeletik li faraon ti simaron ta jyalele. Te echʼ xtuchʼ Tsajal nab ek li Josué xchiʼuk li j-israeletike xchiʼuk laj yil kʼuxi bikʼat yalel yuʼun voʼ li faraon xchiʼuk yajsoltarotake. Jech xtok, kʼalal xanavik ta yosilal Sinaí «ta mucʼta xocol banamil ti toj xiʼbal sbae» laj yil Josué ti akʼbatik yuʼun Jeova li kʼusi chtun yuʼunik li j-israeletike: muʼyuk buchʼu xcham yuʼunik ta viʼnal mi jaʼuk ta takitiʼil (Deu. 8:3-5, 14-16; Jos. 24:5-7). Kʼalal kʼot skʼakʼalil ti tspasik ta kanal li tsatsal lumetik ta Canaane xchiʼuk ti xuʼuninik li Albil Balumile, te laj yakʼ venta stuk Josué ek ti yakal chkoltaatik yuʼun li Dios ti chichʼik ta mukʼ li j-israeletike (Jos. 10:14, 42).
6. ¿Kʼusi tskoltaot sventa oyuk ta avoʼonton spasbel yabtel li Diose?
6 Snaʼoj lek Josué ti la spas Jeova li kʼusitik yaloje. Jech oxal xi laj yale: «Li vuʼun jchiʼuc cajnil jnichʼnabe jaʼ noʼox chituncutic o yuʼun li Mucʼul Diose», xi (Jos. 24:15). ¿Li voʼot une, kerem-tseb? Kʼalal cha nopbe skʼoplal li kʼusitik yaloj melel Dios ti kʼotem xa ta pasel yuʼune xchiʼuk li kʼusitik skʼan to xkʼot ta pasele, ¿mi oy ta avoʼonton cha tun ta stojolal Jeova yaʼel jech kʼuchaʼal la spas Josuee?
7. ¿Kʼu yuʼun toj tsots skʼoplal li ichʼ voʼe?
7 Kʼalal chavilbe li kʼusitik spasoj xchiʼuk kʼalal cha nopbe lek skʼoplal li kʼusitik kʼupil sba yaloj ti xuʼ cha pat-o lek avoʼontone, jaʼ me skʼan xakʼ mas ta avoʼonton ti cha kʼan chavakʼbe akuxlejal li Jeovae xchiʼuk ti chavakʼ ta ilel kʼalal chavichʼ voʼe. Liʼe toj tsots me skʼoplal skʼan jech spas ti buchʼu tskʼan chtun ta stojolal Diose, jech kʼuchaʼal laj yakʼ ta ilel li Jesuse, li Buchʼu ta jchanbetik stalelale. Kʼalal mu toʼox chlik spas yabtel kʼuchaʼal Mesías li Jesuse, bat ta stojolal Juan J-akʼvanej ta voʼ sventa x-akʼbat yichʼ voʼ. ¿Kʼu yuʼun? «Liyal tal liʼ ta banamile, mu jaʼuc tal jpas li cʼusi tscʼan coʼnton jtuque. Jaʼ tal jpasbe cʼusi tscʼan li Bochʼo la stacun tale», xi (Juan 6:38). Jech chaʼa, ti laj yichʼ voʼe jaʼ svinajeb ti tspasbe li kʼusi tskʼan sTote (Mat. 3:13-17).
8. ¿Kʼu yuʼun la snop chichʼ ta mukʼ Dios li Timoteoe, xchiʼuk kʼusi skʼan xa pas jechuk ek?
8 Jkʼelbetik skʼoplal li Timoteo eke, jun jchʼunolajel kerem ti akʼbat epal abtelal yuʼun Jeovae xchiʼuk matanaletik ti kʼalal echʼ batel ti jabile. ¿Kʼu yuʼun la snop chichʼ ta mukʼ melel Dios li Timoteoe? Li Vivliae chal kaʼitik ti la xchan xchiʼuk la xchʼun ti jaʼ melele (2 Tim. 3:14). Mi achanoj li sKʼop Diose xchiʼuk mi achʼunoj ti melel li chanubtaseletik yuʼune, jaʼ jechot kʼuchaʼal Timoteo unbi. Jaʼ xa me yorail ti xa nop kʼusi cha pase. ¿Kʼu yuʼun mu xa loʼilaj xchiʼuk atot ameʼ ta sventa ti kʼusi cha kʼan cha pase? Li atot ameʼ xchiʼuk li moletik ta tsobobbaile ta me xa skoltaik ta yaʼibel lek smelolal li kʼusi skʼan pasel chal Vivlia sventa xuʼ chavichʼ voʼe (kʼelo Hechos 8:12).
9. ¿Kʼusi van xuʼ snop yantik ta sventa ti chavichʼ voʼe?
9 Mi la avichʼ voʼe, jaʼ me jech toj alakʼ sba chlik batel avuʼun li avabtel ta stojolal melel Diose. Xkoʼolaj kʼuchaʼal chlik anilajan batel ta nom, li matanal cha ta avie jaʼ li muyubajel ta spasbel yabtel Diose, pe ta mas tsʼakale jaʼ li kuxlejal sbatel osile (Heb. 12:2, 3). Jech xtok, xmuyubaj me avuʼun li avutsʼ avalal ti jech ch-anilajik batel eke xchiʼuk li avamigotak ta tsobobbaile. Pe li kʼusi mas toj leke jaʼ ti xmuyubaj avuʼun Jeova kʼalal chavichʼ voʼe (kʼelo Proverbios 23:15). Melel onoʼox ti oy buchʼutik mu xaʼibeik smelolal ti kʼu yuʼun laj anop chavichʼ ta mukʼ li Jeovae xchiʼuk chchibal kʼoptaik ti kʼusi cha pase. Yikʼaluk xa skontrainik xtok. Pe xuʼ me stsal avuʼun li prevaetik taje.
Kʼalal chchibal kʼoptaik li kʼusi cha pase o ti cha skontrainike
10, 11. 1) ¿Kʼusi xuʼ xa sjakʼbeik ta sventa ti laj anop cha pasbe yabtel li Diose? 2) ¿Kʼuxi xuʼ xa chanbe stalelal Jesús kʼalal cha takʼ li kʼusitik tsjakʼik ta sventa li kʼusi achʼunoje?
10 Ti laj anop cha tun ta stojolal Jeovae xuʼ van labal tajmek chaʼiik jlom achiʼiltak ta chanun, avutsʼ avalal xchiʼuk li alakʼnatake. Yikʼaluk van tsjakʼboxuk kʼu yuʼun ti jech cha pase xchiʼuk ti kʼusitik achʼunoje. ¿Kʼuxi van skʼan xa takʼav un? Veno, sventa xa tojob yalbel lek srasonal ti kʼu yuʼun jech cha pase, skʼan xa naʼ lek baʼyuk ti kʼusi cha nope xchiʼuk ti kʼusi oy ta avoʼontone. Kʼalal chavalbe smelolal li kʼusi achʼunoje, jaʼ xa chanbe stalelal li lekil jchanubtasvanej Jesuse.
11 Kʼalal la sjakʼbeik Jesús ta sventa chaʼkuxesel li jbabeetik ta relijion yuʼun judioetike, li Jesuse laj yalbe chaʼoxpʼeluk skʼoplal li Tsʼibetik ti muʼyuk bu skʼelojbeik skʼoplale (Éxo. 3:6; Mat. 22:23, 31-33). Kʼalal jakʼbat yuʼun jun jchanubtasvanej ti kʼusi la mantalil mas toj tsots skʼoplale, li Jesuse laj yakʼbe yil jayibuk loʼiletik ta Vivlia, vaʼun laj yal koliyal li vinik taje (Lev.19:18; Deu. 6:5; Mar. 12:28-34). Ti kʼuyelan ikʼopoj xchiʼuk ti la stunes li Tsʼibetike jaʼ «chaʼoxvocʼ icʼotic ta scoj li Jesuse», pe mu kʼusi x-utat yuʼun li yajkontratake (Juan 7:32-46). ¿Kʼuxi xuʼ xa chanbe stalelal Jesús kʼalal oy kʼusi tsjakʼboxuk ta sventa li kʼusi achʼunoje? Sventa cha takʼe tuneso li Vivliae xchiʼuk «ichʼ[o] ta mucʼ [li krixchanoe] mu me tsotsuc xata[kʼav]» (1 Ped. 3:15, Ti Achʼ Rextomento yuʼun ti Jesucristoe, ta skʼop Chamula). Mi mu xa nabe stakʼobil jlomuk ti kʼusi tsjakʼike, jamal xaval xchiʼuk alo ti cha sabe li stakʼobile. Sabo skʼoplal ta Índice de las publicaciones Watch Tower o ta CD-ROM Watchtower Library. Mi lek cha chapan abae, xa naʼ me kʼuyelan cha takʼav (Col. 4:6).
12. ¿Kʼu yuʼun skʼan mu xchibaj avoʼonton mi chavil kontrainele?
12 Yikʼaluk van mu jaʼuk noʼox tsjakʼik kʼusi achʼunoj li krixchanoetik xchiʼuk ti kʼu yuʼun cha tun ta stojolal Diose. Teuk me ta ajol ti jaʼ sventainoj balumil li Satanás Diabloe, li yajkontra Diose (kʼelo 1 Juan 5:19). Mu me stakʼ xa pat avoʼonton ti lek xa chil skotol krixchanoetik li kʼusi cha pase o ti cha yalbeik ti xavakʼbe yipale. Moʼoj, yuʼun ti kʼusie xuʼ cha ta kontrainel xtok. Yikʼaluk van oy buchʼu nopolik noʼox cha xchopol kʼopta (1 Ped. 4:4). Pe mu me xchʼay ta ajol ti mu atukuke. Laj yil kontrainel ek li Jesuse. Jaʼ jech la snuptan ek li jtakbol Pedroe, jaʼ yuʼun xi laj yale: «Voʼoxuc ti lec jcʼanojoxuque, mu me chʼayeluc chcʼot avoʼntonic ta sventa li tsatsal vocol chavichʼique, yuʼun jaʼ sventa chichʼ qʼuelel avoʼntonic. Mu me xanopic ti atuquic xa noʼox jech chavichʼic vocole. Jaʼ tscʼan cuxetuc noʼox avoʼntonic, yuʼun coʼol chavichʼic vocol jech chac cʼu chaʼal laj yichʼ vocol li Cristoe», xi (1 Ped. 4:12, 13).
13. ¿Kʼu yuʼun xuʼ xmuyubaj li jchʼunolajeletik kʼalal chkontrainatike?
13 Mi chavil nutsel o kontrainel ta skoj ti jchʼunolajelote, jaʼ sventa cha muyubaj-o. ¿Kʼu yuʼun? Yuʼun mi lek noʼox chilot li balumile jaʼ svinajeb ti yuʼun jaʼ avakʼoj ta akuxlejal li smantaltak Satanase, ti maʼuk li smantaltak Diose. Xi la spʼijubtasutik li Jesuse: «Toj abul abaic voʼoxuc ti lec chayiloxuc scotol cristianoetique, yuʼun li smoltotaquic ta voʼone li cristianoetic ti lec chayiloxuque jaʼ jech lec laj yilic ec li jloʼlavanej jʼalcʼopetique», xi (Luc. 6:26). Li utsʼintael chavile, jaʼ me svinajeb ti ilinem ta atojolal li Satanás xchiʼuk sbalumil ta skoj ti cha tun ta stojolal Jeovae (kʼelo Mateo 5:11, 12). Ti kʼalal «chaxchopolcʼoptaoxuc ta scoj li Cristoe» jaʼ me jun slekil rasonal sventa cha muyubaj-o (1 Ped. 4:14).
14. ¿Kʼusitik lek chkʼot ta pasel kʼalal tukʼ chakʼ sba ta stojolal Jeova li jun krixchano akʼo mi chil kontrainele?
14 Oy chanib, akʼo mi oy mas, li kʼusi toj lek chkʼot ta pasel mi tukʼ chavakʼ aba ta stojolal Jeova kʼalal chavil kontrainel o nutsele. Baʼyel, chavalbe skʼoplal Dios xchiʼuk xNichʼon. Xchibal, ti tukʼ chkuch avuʼune xmuyubaj-o yoʼonton avuʼun li ermanoetike. Yoxibal, ti kʼalal chil jlom krixchanoetik ti mu xojtikinik Jeova ti tukʼ chavakʼ abae, yikʼaluk van tskʼan chojtikinik ek (kʼelo Filipenses 1:12-14). Xchanibal, ta skoj ti chavakʼ batel venta ti kʼuyelan chakʼ avip Jeova sventa chkuch avuʼun li prevaetike mas to me cha kʼan batel.
«Ijam lec tiʼna» ta atojolal
15. ¿Kʼusi smelolal ti «ijam lec tiʼna» ta stojolal li jtakbol Pabloe?
15 Li jtakbol Pabloe xi la stsʼiba ta sventa li yabtel ta stojolal Dios ta Efesoe: «Ijam lec tiʼna, lec xuʼ ep chiʼabtej», xi (1 Cor. 16:8, 9). Ijam lek tiʼna ta stojolal ta sventa jun mukʼta abtelal ta misioneroal: xcholel lekil aʼyej xchiʼuk spasel ta yajtsʼaklom Cristo li krixchanoetik tee. Kʼalal och batel li ta tiʼna taje, jaʼ xkaltik, ti la xchʼam li kʼusi akʼbate, li Pabloe la skolta ep krixchanoetik ta yojtikinel Jeova xchiʼuk ti akʼo xichʼik ta mukʼe.
16. ¿Kʼusi smelolal ti ochik ta «jamal xa lec tiʼna» ta 1919 li buchʼutik chbatik ta vinajel ti liʼ to oyike?
16 Ta sjabilal 1919, li Jesuse «jamal xa lec tiʼna» yuʼun ta sventa li buchʼutik chbatik ta vinajel ti liʼ to oyike (Apo. 3:8). Li stukike jelavik li ta tiʼna taje xchiʼuk lik xcholik li lekil aʼyeje, mas to ta sjunul yoʼontonik lik yakʼik ta chanel li kʼusitik melel ta Vivliae. ¿Kʼusi kʼotem ta pasel yuʼunik? Kʼotem xa ta stiʼiltak Balumil li lekil aʼyeje, vaʼun jutuk xa mu vukub miyon krixchanoetik spatoj yoʼonton tsta xkuxlejalik sbatel osil li ta achʼ balumil yuʼun Diose.
17. ¿Kʼuxi xuʼ cha och li ta mukʼta «tiʼna, [ti] lec xuʼ ep [cha abteje]»?
17 Skotol li yajtuneltak Jeovae «[jamal] lec tiʼna [ta stojolalik], lec xuʼ ep [ch-abtejik]». Li buchʼutik ch-ochik li ta tiʼna taje xchiʼuk ti chcholik mas mantale xmuyubajik xchiʼuk jun tajmek yoʼontonik. Li voʼot une kerem-tseb, ¿kʼusi xuʼ xkaltik ta atojolal? ¿Kʼu yepal sbalil chavil li jun matanal ti mu kʼusi xkoʼolaj-o ta skoltael li jchiʼiltaktik sventa «[x]chʼunic li Lequil Aʼyeje»? (Mar. 1:14, 15.) ¿Mi anopoj cha tun ta prekursor auksiliar o ta regular? Yan abtelaletik ti xuʼ cha pas xtoke, jaʼ li svaʼanel Salonetik sventa Tsobobbaile, xa tun ta Betel o ta misioneroal. Ta skoj ti mu xa jaluk liʼ oy li xchopol balumil Satanase, mas to me toj tsots skʼoplal ti jpastik xa noʼox ta anil li abtelaletik taje. ¿Mi cha och li ta mukʼta tiʼna yoʼ to jamale?
«Qʼuelavilic, pasic preva avaʼyic, toj lec li Mucʼul Diose»
18, 19. 1) ¿Kʼusi koltaat-o David ti jech oy tajmek ta yoʼonton chtun ta stojolal Jeovae? 2) ¿Kʼuxi jnaʼojtik ti muʼyuk chopol xaʼi David ti itun ta stojolal Diose?
18 Li David jtsʼibajom yuʼun salmoe xi akʼbat snaʼ yuʼun Dios li mantal liʼe: «Qʼuelavilic, pasic preva avaʼyic, toj lec li Mucʼul Diose», xi (Sal. 34:8). Kʼalal jaʼ toʼox jun uni jkʼel chij li Davide —ti kʼot ta ajvalil yuʼun li j-israeletik ta voʼnee—, ikoltaat yuʼun Jeova li ta jtiʼval chonbolometike. Ikoltaat xtok kʼalal la stsal sbaik xchiʼuk li Goliate xchiʼuk koltaat ta yan epal vokoliletik (1 Sam. 17:32-51; Sal. 18, ta sba tsʼib). Li slekil yoʼonton Diose la stijbe yoʼonton David ta stsʼibael liʼe: «Mucʼul Dios, Dios cuʼun, toj ep xa li cʼusitic labalic sba laj apase; liʼ oy o avoʼnton ta jtojolcutic. Muʼyuc bochʼo yan coʼol jech chac cʼu chaʼal voʼot», xi (Sal. 40:5).
19 La skʼan ta sjunul yoʼonton Jeova li Davide xchiʼuk oy ta yoʼonton tskʼupil kʼopta ta sjunul yoʼonton xchiʼuk ta skotol snopben (kʼelo Salmo 40:8-10). Mi jutebuk bu chopol laj yaʼi ti itun ta stojolal melel Dios ta sjunul xkuxlejale. Li kʼusi mas tsots skʼoplal laj yaʼie xchiʼuk li kʼusi mas xmuyubaj-oe, jaʼ ti laj yakʼ ta xkuxlejal yichʼel ta mukʼ Diose. Xi laj yal li David kʼalal mol xaʼoxe: «Li voʼote Mucʼul Dios, voʼot smucʼul stsatsal coʼnton cʼotemot; ta jbicʼtal onoʼox jchʼunoj ti jbel scʼoplal chacoltaune. Acʼo me molun xa, me sac xa jol, pero mu me xacomtsanun, Dios cuʼun», xi (Sal. 71:5, 18). Jech onoʼox kakʼtik ti kʼunibem xaʼox yok skʼobe, pe ti kʼuyelan laj yil sba xchiʼuk Jeova xchiʼuk ti spatoj yoʼonton ta stojolale jaʼ itsatsub-o.
20. ¿Kʼu yuʼun jaʼ toj lek ta jkuxlejaltik li spasbel yabtel Diose?
20 Li xkuxlejal Josué, David xchiʼuk Timoteoe jaʼ me chakʼ ta ilel ti jaʼ mas toj lek ta jkuxlejaltik ti chi jtun ta stojolal Jeovae. Li sbaliltak kʼusi chakʼ balumil ti mu jaluk chtune mi jaʼuk jsetʼuk xkoʼolaj-o xchiʼuk li kʼusi jal tajmek sbalil tstaik li buchʼutik chtunik ta stojolal Dios ta skotol snopbenik xchiʼuk yoʼontonike (Jos. 22:5). Mi muʼyuk avakʼoj aba ta stojolal Jeova ta orasione, xi xa jakʼbe abae: «¿Kʼusi tsmakun ti mu xi kʼot ta yajrextiko Jeovae?». Mi avichʼoj xa voʼe, ¿mi cha kʼan cha muyubaj mas? Mi jeche, epajeso li avabtel ta stojolal Diose xchiʼuk chʼian batel mas ta mantal. Li ta yan xchanobile chakʼ avil kʼuxi xuʼ spas avuʼun kʼalal cha chanbe echʼel stalelal li jtakbol Pabloe.
¿Kʼusi cha takʼ?
• Albo chibuk srasonal ti kʼu yuʼun skʼan xi jtun ta stojolal Diose
• ¿Kʼusi koltaat-o Timoteo sventa jaʼ spasbe li yabtel Diose?
• ¿Kʼu yuʼun skʼan tukʼ xavakʼ aba kʼalal chavil kontrainele?
• ¿Kʼusitik abtelaletik ta stojolal Dios xuʼ cha ta?
[Lokʼol ta pajina 18]
Jaʼ toj lek ta jkuxlejaltik li spasbel yabtel Diose
[Lokʼol ta pajina 19]
¿Mi xtakʼ avuʼun li kʼusitik tsjakʼik ta sventa li kʼusi achʼunoje?
[Lokʼol ta pajina 20]