«Jchʼultajes jbatik ta [jkuxlejaltik] ta xiʼelal yuʼun Dios»

LI Vivliae xi chal kaʼitik ti chʼul ta jyalel li Jeova Diose: «Jaʼ Chʼul Dios, Jaʼ Chʼul Dios, Jaʼ Chʼul Dios li Mucʼul Dios[e]», xi (Isa. 6:3; Apo. 4:8). Li jpʼel kʼop ta Griego xchiʼuk ta Hebreo ti jelubtasbil kʼuchaʼal chʼul, ti xie, jaʼ skʼan xal ti muʼyuk yikʼobale o ti sak ta sventa relijione, ti muʼyuk tskap sba ta kʼusi chopole. Ti chʼul ti Diose jaʼ chakʼ ta ilel ti solel tukʼ ta jyalel li stalelale.

¿Mi mu jechuk tskʼan li chʼul Dios Jeova ti akʼo chʼulikuk ek li buchʼutik ch-ichʼat ta mukʼe, jaʼ xkaltik, ti sakuk ta sbekʼtalik, ta stalelalik xchiʼuk li ta mantale? Lek jamal ta aʼiel, li Tsʼibetike chal ti tskʼan chʼuluk steklumal li Jeovae. Ta 1 Pedro 1:16 ta Traducción del Nuevo Mundo xi chale: «Skʼan chʼulukoxuk, yuʼun chʼulun li voʼone», xi. ¿Mi stakʼ chʼulutik kʼuchaʼal Jeova li jpas mulil krixchanoutike? Stakʼ, akʼo mi mu onoʼox spas kuʼuntik kʼuchaʼal li stuke. Chʼul chilutik Dios mi sakutik ti kʼuyelan chkichʼtik ta mukʼe xchiʼuk mi nopol kakʼoj-o jbatik ta stojolale.

Vaʼun chaʼa, ¿kʼu yelan ti stakʼ chʼulutik ta jun balumil ti ikʼ stalelale? ¿Kʼusitik ti skʼan mu jpastike? ¿Kʼusi van talelalil skʼan jeltik xchiʼuk ti kʼu yelan chi jkʼopoje? Jkʼeltikik kʼusi xuʼ jchantik ti kʼusi kʼanbatik yuʼun Jeova li judioetik kʼalal lokʼik ta Babilonia ti sut batel ta slumalik ta sjabilal 537 kʼalal maʼuk toʼox jkʼakʼaliltike.

«Ta xlic yichʼ jamel lec be [...], jaʼ “chʼul be” sbi chcʼot»

Li Jeovae laj onoʼox yalbe skʼoplal ti tsutik echʼel ta slumalik li steklumal ti mosoinbilik ta Babiloniae. Kʼalal laj yichʼ alel ti chchaʼta yav ti kʼu toʼox yelane, xi patbat yoʼontonik xtoke: «Ta xlic yichʼ jamel lec be [...], jaʼ “chʼul be” sbi chcʼot», xi (Isa. 35:8 sbavokʼal). Taje maʼuk noʼox laj yakʼ ta aʼiel ti chjambat sbeik yuʼun Jeova sventa tsutik echʼel ta slumalik li judioetike, moʼoj, yuʼun albatik ti chchabiatik kʼalal chanavik echʼele.

Ta sventa li yajtuneltak Jeova avi ta Balumile, sjamojbe «chʼul be», ti jaʼ lokʼesatik-o li ta Mukʼta Babiloniae, li jventainvanej yuʼun skotol jecheʼ relijionetik ta spʼejel balumile. Li ta sjabilal 1919 la slokʼes ta mosoil ta jecheʼ relijion li jchʼunolajeletik ti tʼujbilike, vaʼun li stukike kʼunkʼun isakubtasatik tal ti kʼuyelan chichʼik ta mukʼ Dios li ta loʼlael yakʼoj relijionetike. Li yajtunelutik Jeova avi kʼakʼale, lek ti kʼuyelan oyutik ta mantale, sak ti kʼuyelan chkichʼtik ta mukʼ Diose, lek xkil jbatik xchiʼuk Jeova xchiʼuk li jchiʼiltaktike.

Li juteb chijetik ti jaʼik li tʼujbil jchʼunolajeletike xchiʼuk li epal krixchanoetik ti yakal ch-epaj tajmek ti jaʼik li ta yan chijetike, jaʼ stʼujojik li chʼul bee xchiʼuk chalbeik yantik ti akʼo te xbatik eke (Luc. 12:32; Apo. 7:9; Juan 10:16). Xuʼ me stamik echʼel «chʼul be» ek skotol li buchʼutik tskʼan chakʼbeik sventain Dios li sbekʼtalike, ti jaʼ kuxul xchiʼuk ti chʼul matanal chkʼote ti xkuxet noʼox yoʼonton Dios chchʼame (Rom. 12:1).

«Li bochʼotic oy yiʼlalique [yikʼobalik] mu xuʼ chjelovic te»

Oy kʼusi tsots skʼoplal skʼan spasik li judioetik ti sut batel ta slumalik ta sjabilal 537 kʼalal maʼuk toʼox jkʼakʼaliltike. Li kʼusi chkʼanbatik li buchʼutik chanavik li ta «chʼul be» sbie, xi chal li Isaías 35:8 ta xchaʼvokʼale: «Li bochʼotic oy yiʼlalique mu xuʼ chjelovic te; mu xuʼ chanovic te li bochʼotic bol yoʼntonique», xi. Ti sutik batel ta Jerusalene, jaʼ sventa xchaʼta yav yuʼunik yichʼel ta mukʼ li Jeovae, jaʼ yuʼun mu me stakʼ te oy ti buchʼutik jaʼ noʼox tskʼan slekilal stukike, ti buchʼutik mu xichʼik ta mukʼ li kʼusitik chʼule o ti buchʼutik ikʼik ta mantale. Li buchʼutik tsutik echʼel tee, skʼan me xchʼunik li tsatsal mantaletik yuʼun Jeovae. Mi ta jkʼantik lek chilutik Dios li avie, skʼan me jech jpastik ek. Skʼan me «jchʼultajes jbatik ta [jkuxlejaltik] ta xiʼelal yuʼun Dios» (2 Cor. 7:1, NM). Vaʼun chaʼa, ¿kʼusi ibalik sba ti skʼan mu jpastike?

Xi la tstsʼiba li jtakbol Pabloe: «Li yabtel jbecʼtaltique lec stacʼ otquinel. Jaʼ jech chac liʼi: mulivajel, spasel cʼusitic toj chopol, spasel cʼusitic cʼupil chaʼay jbecʼtaltic», xi (Gál. 5:19). Mulivajel skotol li kʼusitik chichʼ pasel ti bu chichʼ tunesel li jkʼuniltik ti maʼuk ta nupunele. Li kʼusi kʼupil chaʼi jbekʼtaltike te smakoj ti «muʼyuk pajesej baile [...], ti kʼusiuk noʼox xichʼ pasel ta kuxlejale, ti jaʼ batem ta oʼontonal spasel kʼusi chopole». Li mulivajel xchiʼuk li kʼusi noʼox tskʼan bekʼete skontrainoj ta jyalel ti kʼuyelan chʼul li Jeovae. Jaʼ yuʼun chaʼa, ti buchʼutik mu xiktaik spasel taje mu me stakʼ te oyik li ta stsobobbail yajtsʼaklom Cristoe, chichʼ nutsel lokʼel. Jaʼ me jech tspasbatik ek li buchʼutik tspasik li kʼusitik toj echʼ xa noʼox ibal sbae, ti xi tsbiiltas li Vivliae: «Scotol li cʼusitic chopol ta pasele», xi (Efe. 4:19).

Kʼusitik ibal sba: jaʼ jpʼel kʼop ti te smakoj ep ta chop muliletike. Li jpʼel kʼop ti chichʼ toʼox tunesel ta griegoe jaʼ chalbe smelolal ti oy yikʼobale o ti muʼyuk sak jtosuk kʼusie, mi jaʼ sventa talelalil, ta kʼopojel, ta mantal o ta sventa relijion. Te smakoj kʼusitik ibal sba chichʼ pasel ti yikʼaluk van mu persauk xichʼ chapanele.a ¿Pe mi chʼul van xkuxlejal li buchʼu tspas kʼusitik ibal sbae?

Jnoptik ti mukul chlik skʼel pornografia jun yajtsʼaklom Cristoe. Ta kʼunkʼun chlik skʼan li kʼusitik ibal sbae, vaʼun chjutukaj echʼel ti tskʼan sak-o ta stojolal Jeovae. Yikʼaluk van muʼyuk bu kʼotem ti bu toj echʼ xa noʼox ibal sbae, pe muʼyuk bu jech ta xkuxlejal li kʼusitik leke, li kʼusitik lek skʼoplale xchiʼuk ti kʼusitik stakʼ pasele (Fili. 4:8). Li pornografiae ibal sba xchiʼuk tsokesutik ta stojolal Dios. Mu me stakʼ jloʼiltatik jtosuk li kʼusi ibal sbae (Efe. 5:3).

Kalbetik yan skʼelobil. Kaltik noʼox ti chlik nopuk yaʼi yixtolanel skʼunil stuk (masturbación) jun yajtsʼaklom Cristoe, jaʼ xkaltik, ti tspikulan sba ta jyalel sventa yakal xa ta lutsʼbail chaʼie, mi tskʼel pornografia o mi muʼyuk. Manchuk mi chʼabal ta Vivlia li jpʼel kʼop chixtolan skʼunil xie, ¿mi mu van jnaʼtik ti tsokesat ta stalelal xchiʼuk ta snopbene? ¿Mi mu van bu tsok ta jyalel ti kʼuyelan oy ta stojolal Jeova mi jech-o tspas li jun krixchano taje? ¿Mi mu van bu ibal sba ta stojolal Dios ta skoj taje? Jtsaktik ta mukʼ li tojobtasel chal Pablo liʼe: «Tscʼan acʼo me jqʼuel jbatic ta sventa li cʼusi tsoques jbecʼtaltic xchiʼuc coʼntontique», xi. Xchiʼuk xi chal xtoke: «Tscʼan jʼechʼel chamenoxuc o ta sventa li cʼusi sventa noʼox banamile: jaʼ li mulivajele, li cʼusitic toj chopolique, li cʼusi tscʼan abecʼtalique, li cʼusitic chopol oy ta avoʼntonique, xchiʼuc li xpichʼetel avoʼntonique», xi (2 Cor. 7:1; Col. 3:5).

Li balumil ti pasbil ta mantal yuʼun Satanase lek noʼox chil li kʼusitik ibal sbae xchiʼuk pʼolem tajmek yuʼun xtok. Yikʼaluk van toj tsots chkaʼitik sventa mu xi jpʼaj li ta chopol talelalil taje. Pe li yajtsʼaklomtak Cristoe «mu xa me jechuc [tspasik] jech chac cʼu chaʼal li yantic [xchiʼiltakik] ti mu xotquinic Diose, ti muʼyuc stu cʼusitic tsnopique» (Efe. 4:17). Jaʼ noʼox me chi jxanav ta «chʼul be» yuʼun Jeova mi muʼyuk ta jpastik li kʼusi ibal sbae, mi ta sat yantik o mi ta mukul.

«Me jcotuc león mu xbat te»

Sventa lek x-ilvan li chʼul Dios Jeovae, yikʼaluk van skʼan sjel ta jyalel stalelalik li jlom krixchanoetike xchiʼuk ti kʼuyelan chkʼopojike. Isaías 35:9 xi chale: «Me jcotuc león mu xbat te; me jcotuc jtiʼval chonbolometic mu xnopajic batel» li ta «chʼul be[e]», xi. Ta lokʼol kʼop xkaltike, li krixchanoetik ti tsaʼik kʼop ta skʼopojel xchiʼuk ta stalelale chichʼik koʼoltajesel ta jtiʼval chonbolometik. Jamal xkaʼitik ti chʼabal yavilik li ta tukʼil achʼ balumil chakʼ Diose (Isa. 11:6; 65:25). Jaʼ yuʼun chaʼa, li buchʼutik tskʼan lek x-ilatik yuʼun Diose persa skʼan xiktaik li stalelal chonbolometik taje xchiʼuk ti chʼuluk li xkuxlejalike.

Xi chalbutik mantal li Tsʼibetike: «Jipic loqʼuel ta atojolic li cʼusitic toj cʼuxic chavalbe abaique, li scʼacʼal avoʼntonique, li sbicʼtal avoʼntonique, xchiʼuc ti xacʼaqʼuet noʼox chacʼopojique, xchiʼuc li chopolcʼoptavaneje, xchiʼuc li cʼusitic yantic chopole», xi (Efe. 4:31). Xi ta jchantik ta Colosenses 3:8: «Comtsanic scotol li cʼusitic chopole: jaʼ ti stsoqʼuet noʼox avoʼntonique, ti ta anil noʼox chaʼilinique, ti xcupet noʼox scʼacʼal avoʼntonique, ti chachopolcʼopojique, xchiʼuc li cʼusiticʼ muʼyuc stu chlocʼ ta aveique», xi. Li jpʼel kʼop ti «chachopolcʼopojique» ti xie, ti tstunes li chib versikulo liʼe jaʼ chalbe skʼoplal ti kʼusi chopol chlokʼ ta ketike, ti kʼexlal sbae xchiʼuk ti tskajtsan mulile.

Li ta jkʼakʼaliltike stalelal onoʼox ti kʼux ta aʼiel chkʼopoj li krixchanoetike xchiʼuk ti bol kʼusitik chalike, manchuk mi ta sna chalik. Jaʼ jech tskʼopon sbaik li nupul-tsʼakale xchiʼuk jaʼ jech tskʼopon li yalab xnichʼnabike, toj kʼexlal sba, toj kʼux xchiʼuk chyayijesvan. Li saʼ kʼop ta jkʼopojeltike muʼyuk me yavil jechuk li ta yutsʼ yalal jchʼunolajele (1 Cor. 5:11).

Jaʼ jun bendision ti ta «jxiʼtatic ti Diose yoʼ lec ta qʼuelel ti jcuxlejaltique»

¡Jaʼ jun mukʼta matanal ti chi jtun ta stojolal li Chʼul Dios Jeovae! (Jos. 24:19.) Toj ep me sbalil li lekilal ta mantal ti bu yakʼojutik batele. Jaʼ jun lekil kuxlejal ta melel mi chʼul-o jtalelaltik ta sat Jeovae.

Poʼot xa me tajmek xkʼot ta pasel li Paraiso liʼ ta Balumil jech kʼuchaʼal yaloj onoʼox Diose (Isa. 35:1, 2, 5-7). Li buchʼutik oy ta yoʼonton taje xchiʼuk ti lek chichʼik ta mukʼ Dios ta xkuxlejalike ta me xichʼik bendision, jaʼ ti ch-akʼbat yavilik tee (Isa. 65:17, 21). Jaʼ yuʼun kakʼ kipaltik ti sakukutik ta mantal xkichʼtik ta mukʼ li Diose xchiʼuk ti nopoluk oyutik ta stojolale.

[Tsʼibetik ta yok vun]

[Lokʼol ta pajina 26]

¿Kʼusi skʼan spasik li judioetik sventa xanavik li ta «chʼul be[e]»?

[Lokʼol ta pajina 27]

Li pornografiae tsokes ti kʼuyelan xil sba xchiʼuk Jeova li jun krixchanoe

[Lokʼol ta pajina 28]

«Jipic loqʼuel ta atojolic [...] ti xacʼaqʼuet noʼox chacʼopojique, xchiʼuc li chopolcʼoptavaneje»