Tsotsik manchuk mi kʼunik

YIKʼALUK van oy akʼuniltak ti cha slubtsanot chavaʼie, ti te oy-o ta atojolal chavaʼie xchiʼuk ti muʼyuk bu tstsal avuʼun chavaʼie. Yikʼaluk van cha koʼoltas aba xchiʼuk yantik krixchano, vaʼun mu kʼusi xa tun-o chavaʼi xchiʼuk muʼyuk abalil chavaʼi kʼuchaʼal li yan krixchanoe. Xuʼ van cha skʼunibtas jtosuk chamel, ti chʼabal xa avip yuʼune xchiʼuk ti mu xa xa kʼan xa kuxi yaʼele. Kʼusiuk ti avokole, chʼabal xa xpoxil chavil. Yikʼaluk van jech chavaʼi aba kʼuchaʼal laj yaʼi sba Jobe, ti xi la skʼanbe Diose: «Oyuc cʼuxi xanacʼun ta yavil animaetique yuʼun acʼo jelovuc baʼyuc li scʼacʼal avoʼntone; xuʼ chavacʼbe yorail ti cʼusi ora chlic to anaʼune», xi (Job 14:13).

¿Kʼuxi xuʼ cha kol lokʼel li ta mukʼta vokolil taje? Akʼo mi toj tsots, pe skʼan xa chʼak lokʼel jlikeluk ta anopben li avokoltake xchiʼuk ti xa kʼelbe lek skʼoplal yan kʼusitike, jech kʼuchaʼal li kʼusitik la sjakʼbe Job li Jeova ti jaʼ li tukʼil yajtunele: «¿Li voʼote bu oyot ti cʼalal lic jnacan li banamile? Albun tal me ta melel bijote. ¿Bochʼo la sbis cʼu smucʼul? ¿Bochʼo la snit li chʼojon cʼalal laj yichʼ bisele?», xut (Job 38:4, 5). Kʼalal ta jnopbetik lek smelolal ti kʼusitik smakoj batel li sjakʼobiltak taje, ta me xakʼ kiltik ta melel ti toj echʼem spʼijil xchiʼuk sjuʼel li Jeovae xchiʼuk chkiltik xtok ti oy lek srasonal yuʼun ti jech to oy vokolil li ta balumil avie.

«Chʼix pajal vul ta jbecʼtal»

Li jtakbol Pabloe, yan yajtunel Jeova ta voʼne ti tukʼ laj yakʼ sbae, oxib velta la skʼanbe vokol Jeova ti akʼo xlokʼesbat li «chʼix pajal vul ta [sbekʼtale]», jaʼ xkaltik, jun vokolil o jtos preva ti «yan sba xcʼuxul ta jʼechʼele». Mu jnaʼtik kʼusi vokolal, pe ta skoj ti jech smatsʼmum kʼuchaʼal jun chʼixe, xuʼ van muʼyuk mas xmuyubaj-o itun ta stojolal Dios li jtakbole. Xi la stakʼ Jeova ta sventa li kʼusi la skʼane: «Jaʼ jelavem tsots scʼoplal ta xtun avuʼun ti syail xcʼuxul coʼntone, yuʼun ta xvinaj ti jmucʼul jtsatsal ta stojol ti buchʼu muʼyuc yipal yuʼun[e]», xut. Muʼyuk onoʼox bu slokʼesbe chʼix ta stojolal Pablo li Jeovae, jech oxal skʼan stsʼik yuʼun, pe xi laj yal li jtakbole: «Cʼalal muʼyuc xa yipal cuʼune, xʼechʼ to oy yipal cuʼun», xi (2 Cor. 12:7-10, Ch). ¿Kʼusi la skʼan laj yal?

Muʼyuk xchʼay echʼel ta anil svokol li Pabloe, manchuk mi jech, muʼyuk xmake ta be stael kʼusitik lek ta yabtel Dios. La spat yoʼonton ti chkoltae yuʼun Jeovae, jaʼ yuʼun la skʼanilanbe vokol (Fili. 4:6, 7). Jech oxal xi laj yal kʼalal poʼot xaʼox xlaj xkuxlejal liʼ ta balumile: «Ivuʼ xa cuʼun stsalel li cajcontrae. Icuch xa cuʼun li tsots anil jbatsʼil toʼoxe. Staoj yav oy xchʼunojel coʼnton o», xi (2 Tim. 4:7).

Sventa tspas li kʼusi tskʼan Jeovae tstunes jpas mulil krixchanoetik xchiʼuk ti oy svokolike, jech oxal jaʼ staʼo ichʼel ta mukʼ li Jeovae. Chbeiltasatik xchiʼuk ch-akʼbat spʼijilik sventa stsal yuʼun li svokolike xchiʼuk sventa xmuyubaj xtunik ta stojolal. Jech, li Jeovae xuʼ tstunes jpas mulil krixchanoetik sventa tspasik kʼusitik mukʼtik abtelaletik manchuk mi kʼunik noʼox.

Li Pabloe laj yal ti muʼyuk slokʼesbat yuʼun Dios li chʼix ta stojolal yoʼ jech mu stoy sbae (2 Cor. 12:7). Li «chʼix» taje, jaʼ chvulesbat-o ta sjol ti oy noʼox spajeb li kʼusi spas yuʼune xchiʼuk jaʼ bikʼit laj yakʼ-o sba. Ta baʼyel jutuke, xi onoʼox yaloj li Jesuse: «Li bochʼo mucʼ chacʼ sbae, jaʼ ta sbicʼtajesat. Yan li bochʼo biqʼuit chacʼ sbae, jaʼ ta xʼacʼat ta ichʼel ta mucʼ», xi (Mat. 23:12). Li vokolil chil yajtuneltak Diose jaʼ sventa bikʼit xakʼ-o sbaik xchiʼuk ti akʼo xaʼibeik smelolal ti skʼan spat yoʼontonik ta stojolal Jeova sventa tukʼ xkuch yuʼunike. Jech kʼuchaʼal Pabloe, xuʼ mukʼ skʼoplalik ta sventa Jeova (1 Cor. 1:31).

Mu xvinaj ti kʼunutike

Oy jlom krixchanoetike mu snaʼik mi oy kʼusi chopol ta yoʼontonik, o mi moʼoje vokol chaʼiik ta chʼunel ti jeche. Jech kʼuchaʼal liʼe, oy yantike spatoj tajmek yoʼonton ta stukik xchiʼuk ta spʼijilik (1 Cor. 10:12). Yantike tskʼan smukʼulalik, jtos kʼunilal ti ep krixchanoetik jech tspasike.

Jkʼelbetik skʼoplal Joab. Kʼot ta bankilal ta yajsoltarotak ajvalil David, laj yichʼ ojtikinel ti toj lek tsots yoʼontone, ti tspas li kʼusi tskʼane xchiʼuk ti pʼij ta spasele. Pe oy kʼusitik toj chopol la spas, ti jaʼ vinaj-o ti jtoybae xchiʼuk ti oy kʼusi tskʼan tajmeke. Jech kʼuchaʼal liʼe, toj echʼ noʼox chopol kʼuyelan la smil chaʼvoʼ bankilal soltaroetik. Baʼyel, sventa spak li kʼusi pasbat yuʼun Abnere, la smil, laje bat skʼopon li sprimo ti Amasa sbie, sventa tstsʼutsʼ yileluke la stsakbe yisim ta sbatsʼi kʼob vaʼun la spajbe espada ta xchʼut ti stsakoj ta stsʼet kʼobe (2 Sam. 17:25; 20:8-10). ¿Kʼu yuʼun ti jech la spas li Joabe? Yuʼun li Amasae jaʼ ochem ta xkʼexol ta bankilal soltaro, jech oxal li Joabe la smil li yajkontrae, yikʼaluk van yoʼ jech xchaʼoch ta bankilal soltaro yaloj. Jamal xvinaj ti muʼyuk stsal yuʼun Joab li kʼusi tskʼan tajmeke xchiʼuk ti jaʼ noʼox oy ta yoʼonton sba stuke. Muʼyuk xkʼuxul yoʼonton ti jech la spase xchiʼuk muʼyuk bu chopol laj yaʼi jutukuk. Kʼalal poʼot xaʼox xcham li ajvalil Davide, laj yalbe mantal li xnichʼon ti Salomón sbie, ti akʼo xakʼbe stoj smul Joab ta skoj li xchopolale (1 Rey. 2:5, 6, 29-35).

Jamal xvinaj ti skʼan me mu xkakʼ spasutik ta mantal li kʼusi chopol ta jkʼantike: xuʼ ta jpastik ta mantal. Ti kʼusi baʼyel skʼan jpastike, jaʼ ti xkakʼtik venta ti kʼusitike vaʼun jpastik ti kʼusi skʼan pasel sventa stsal kuʼuntike. Xuʼ nopajtik noʼox jkʼopontik Dios sventa skoltautik ta stsalel li jchopolaltike xchiʼuk ti baxbolukutik ta xchanel Vivlia sventa jchantik spasel ta mantal li jchopolaltike (Heb. 4:12). Skʼan nopolik noʼox xkakʼbetik yipal stsalel li jchopolaltike xchiʼuk mu me xi jchibaj, yuʼun li pas kʼop kuʼuntik ta stojolale yikʼaluk me mu to bu chpaj ti kʼalal chʼabal to jtukʼiltike. Jaʼ jech laj yil ta stojolal Pablo kʼalal xi laj yale: «Mu jaʼuc chcʼot ta pasel cuʼun li cʼusi ta jcʼan ta jpase; jaʼ chcʼot ta pasel cuʼun li cʼusi chopol chquile», xi. Pe jnaʼojtik ti muʼyuk slubtsaj li Pabloe, yuʼun snaʼoj ti xuʼ tspas ta mantale. Moʼoj, yuʼun ti kʼusie, laj yakʼbe yipal stsalel li skʼuniltake, la spat yoʼonton ti xuʼ chkoltae yuʼun Dios ta stojolal Jesucristoe (Rom. 7:15-25). Xi laj yal ta yan skarta li Pabloe: «Tsots chcacʼbe mantal li jbecʼtale, vuʼun ta jmozoin. Yuʼun naca me jaʼ noʼox vuʼun la jbijubtas li yantique, ti tsʼacal vuʼun muc xuʼ cuʼun jtuque», xi (1 Cor. 9:27).

Li krixchanoutike toj nopem xkaʼitik yalel ti chʼabal jmultike. Pe sventa stsal kuʼuntik taje, jech me skʼan jnoptik kʼuchaʼal Jeovae xchiʼuk ti jchʼuntik li tojobtasel laj yalbe jchʼunolajeletik li Pabloe: «Contrainic li cʼusitic chopole; jaʼ acʼo avoʼntonic spasel li cʼusitic leque» (Rom. 12:9). Li ta pas kʼop kuʼuntik ta sventa stsalel jkʼuniltike skʼan me tukʼuk koʼontontik, jkuch jvokoltik xchiʼuk jpas jbatik ta mantal jtuktik. Xi la skʼanbe Jeova li Davide: «Chajo ta qʼuelel avil cʼusi jnopoj ta mero yut li coʼntone», xi (Sal. 26:2). Snaʼoj ti xil lek Dios kʼusi li jchopolaltik ta mas to yutil koʼontontike xchiʼuk ti chakʼbutik li koltael chtun kuʼuntike. Mi ta jchʼamtik li beiltasel chakʼ Jeova ta sKʼop xchiʼuk li xchʼul espiritue, ta me stsal kuʼuntik ta kʼunkʼun li jkʼuniltaktike.

Yikʼaluk van li jlom krixchanoetike mu snaʼ kʼusi tspasik, yuʼun mu xchapaj chil li svokolike. Kʼalal jech taje, xuʼ me chkoltavanik ta slekil yoʼontonik xchiʼuk spatik oʼontonal li moletik ta tsobobbaile (Isa. 32:1, 2). Pe skʼan onoʼox me oyuk ta joltik xtok un ti oy jlom vokoliletik ti mu xchapaj lek kʼalal mu to chlaj li kʼusitik liʼe. Manchuk mi jech, ep buchʼutik ti xchanojik ta stsʼikel batele, vaʼun jaʼ jech lek kʼusitik kʼotem ta pasel ta xkuxlejalik.

Chal ti tskoltautik li Jeovae

Kʼusiuk vokolal ta jnuptantik avi li ta tsatsal kuxlejale, li Jeovae ta me xalbutik ti tsbeiltasutike xchiʼuk ti mu xakʼ xi jlome. Xi chalbutik mantal li Vivliae: «Jaʼ yuʼun biqʼuit me xavacʼ abaic ta stojol li Dios ti echʼem stsatsale, jech chayacʼoxuc ta ichʼel ta mucʼ ti cʼalal ta sta yoraile. Acʼbeic sventain Dios scotol li sloʼil avoʼntonique, yuʼun oy ta yoʼnton tscʼan ta scoltaoxuc», xi (1 Ped. 5:6, 7).

Jun ermana ti Kathy sbie, kʼalal ep xaʼox jabil chtun ta Betele, laj yaʼi ti ip ta Alzheimer (ti kʼunkʼun chipajes jchinamtike) chamel li smalale, yaloje muʼyuk chkuch yuʼun li kʼusitik tsnuptan ta skoj taje. Toj tsots skʼoplal chaʼi ti skʼanbe Jeova li spʼijil xchiʼuk yip yoʼonton jujun kʼakʼale. Kʼalal yantik x-ipaj echʼel mas li smalale, li ermanoetike ta slekil yoʼontonik la xchʼakbeik yorail ta sjakʼel kʼuxi ta kʼelel li chamel taje, jech li ermanaetik eke la spatik oʼontonal. Koltae yuʼun Jeova xchiʼuk akʼbat stsatsal yoʼonton ta sventa li ermanoetik taje, vaʼun li Kathy kuch yuʼun xchabiel buluchib jabil li smalale, jaʼ to ti kʼalal ichame. Xi chale: «Ta sjunul koʼonton xchiʼuk ta yaʼlel jsat chkalbe koliyal li Jeova ti la skoltaun sventa mu xi lubtsaje. Kaloj mi muʼyuk jal chkuch echʼel kuʼun ti kʼalal chʼabal xa tajmek yipal kuʼun laj kaʼie», xi.

Li koltael sventa stsal kuʼuntik li jkʼuniltike

Kʼalal muʼyuk sbalil chaʼi sba jun krixchanoe, yikʼaluk van tsnop ti muʼyuk chaʼi Jeova mi tskʼanbe koltael kʼalal oy svokole. Mi jeche, toj tsots me skʼoplal ti akʼo jnopbetik lek skʼoplal li kʼusi laj yal David kʼalal chopol tajmek laj yaʼi li smul la spas xchiʼuk Betsabee: «Chʼul Dios, mu xaten mu xabaj ti buchʼu juteb xa tsacal ta xaʼi ti yoʼnton une» (Sal. 51:17, Ch). Sutesoj yoʼonton ta melel li Davide xchiʼuk snaʼoj ti xuʼ chnopaj ta stojolal Dios xchiʼuk ti spat yoʼonton li ta xkʼuxul yoʼontone. Li Jesuse jaʼ laj yakʼ ta ilel li kʼusi oy ta yoʼonton sTote. Li j-al lekil aʼyej Mateoe xi laj yalbe skʼoplal Jesús ti jaʼ li kʼusitik laj yal Isaiase: «Mu jaʼuc chtal xchaʼcʼas li aj ti vochʼem xae, mu jaʼuc chtal stuʼp li mecha ti chtuʼp xae», xi (Mat. 12:20; Isa. 42:3). Kʼalal liʼ toʼox oy ta balumil li Jesuse, la xkʼuxubin li buchʼutik bikʼit chakʼ sbaike xchiʼuk li buchʼutik abol sbaike. Muʼyuk la stupʼ xkaltik mi juteb xa tsakal xkuxlejal li jun krixchanoe, ti xkoʼolaj kʼuchaʼal xmechail jun lampara ti chtupʼ xae. Moʼoj, yuʼun ti kʼusie, ta xkʼuxul yoʼonton la skʼel sventa chakʼbe yan velta yip xkuxlejal li buchʼutik chat yoʼontonike. Mi jech la xkʼuxubin krixchanoetik ti vaʼ ora taje, ¿mi mu jechuk-o xa naʼ li Jesuse xchiʼuk ti xaʼibe smelolal li jkʼuniltike? Li ta Hebreos 4:15 chal kaʼitik ti «snaʼ cʼu xʼelan jvocoltic» li Jesuse.

Kʼalal laj yalbe skʼoplal «chʼix [ti] pajal vul ta [s]becʼtal» li jtakbol Pabloe, laj yal xtok ti koltae yuʼun li smukʼul stsatsal Cristoe (2 Cor. 12:7-9). Li jtakbole laj yaʼi ti chkoltae yuʼun Dios ta stojolal Cristoe, ti xkoʼolaj kʼuchaʼal oy ta yut jpʼej karpana jun krixchano ti muʼyuk chil svokol ta sik, ta ikʼ o ta kʼusi yantike. Jech kʼuchaʼal li Pabloe, mu xkakʼ spasutik ta mantal li jkʼuniltike xchiʼuk li vokoliletike. Sventa tsotsukutik ta mantale, xuʼ me jtunestik skotol li kʼusi yakʼoj Jeova ta stsobobbail liʼ ta Balumile. Kakʼbetik me yipal ti bu kʼalal xuʼ kuʼuntike xchiʼuk jpat me koʼontontik ti chal Jeova tsbeiltasutike. Kʼalal chkiltik kʼuxi tsjutukajes jkʼuniltik li sjuʼel Diose, xuʼ me xi chkaltik ek kʼuchaʼal laj yal jtakbol Pabloe: «Cʼalal muʼyuc xa yipal cuʼune, xʼechʼ to oy yipal cuʼun», xuʼ xi jchi (2 Cor. 12:10).

[Lokʼol ta pajina 3]

Nopajtik noʼox tskʼopon Jeova li Pabloe sventa xkoltae li ta yabtele

[Lokʼol ta pajina 5]

Li ajvalil Davide laj yakʼ kʼotuk ta bankilal soltaro li Joabe

[Lokʼol ta pajina 5]

Li Joabe la smil li Amasae, ti jaʼ kʼotem ta xkʼexole

[Lokʼol ta pajina 6]

Li moletike ta slekil yoʼonton tskoltautik ta Vivlia sventa stsʼik batel kuʼuntik li vokolile