Li jkʼel vunetike tskʼan snaʼik
Mi jaʼ tukʼil vinik toʼox li Adane, ¿kʼuxi xa noʼox la spas smul?
Xuʼ jech xkʼot ta pasel taje, yuʼun xuʼ tsnop stuk kʼusi tskʼan tspas kʼalal laj yichʼ pasel yuʼun Dios li Adane. Ti vaʼ xuʼ tsnop stuk kʼusi tskʼan tspas li Adane, maʼuk tspas-o ta jsaʼ mulil. Jech xtok, skʼan me teuk ta joltik ti jaʼ noʼox stuk Dios ti buchʼu solel tukʼ tajeke (Deuteronomio 32:3, 4; Salmo 18:30; Marcos 10:18). Skotol li yan kʼusitike oy noʼox spajeb li stukʼilike. Jech kʼuchaʼal, li jun kuchilue chtun lek sventa ta jbojtik-o bekʼet, pe ¿mi jaʼ van ta jtunestik sventa ta jlup-o jveʼeltik? Jaʼ yuʼun chaʼa, li krixchanoetik xchiʼuk li kʼusitike, mi jaʼ tspasik li kʼusi stu yichʼojik-o pasele xuʼ lek tukʼ chbatik unbi.
¿Kʼusi stu la spas Adán li Diose? La spas sventa jaʼuk baʼyel stsʼunubal krixchanoetik ti lek pʼijik xchiʼuk ti xuʼ tsnop stukik li kʼusi tskʼan spasike. Xuʼ xakʼik ta ilel ta yoʼonton stukik ti skʼanojik Dios kʼalal ta xchʼunbeik li smantaltake. Ta melel, li Diose muʼyuk la spas li krixchanoetik sventa akʼo persa xchʼunbat li kʼusi tskʼan yoʼonton stuke. Skʼan xlokʼ ta yoʼonton stukik li xchʼunbel smantal Diose (Deuteronomio 10:12, 13; 30:19, 20). Jaʼ yuʼun ti lajuk yichʼ pasel Adán sventa noʼox chchʼun-o mantale, ti mu xuʼ stʼuj stuk li kʼusi xuʼ spase, muʼyuk lek tsʼakal ti jechuke; jaʼ xkaltik, muʼyuk tukʼ. ¿Kʼuxi la stunes Adán ti xuʼ snop stuk li kʼusi tskʼan tspase? Li Vivliae ta xal ti jech la spas kʼuchaʼal li yajnile xchiʼuk muʼyuk la xchʼun li smantal Dios ta sventa «li jpets teʼ ti jaʼ sventa chacʼ ta naʼel cʼusi lec, xchiʼuc cʼusi chopole» (Génesis 2:17; 3:1-6).
Vaʼun chaʼa, kʼalal laj yichʼ pasel li Adane ¿mi oy van kʼusi jutuk muʼyuk laj yichʼ akʼbel sventa mu xtojob-o snopel o stʼujel kʼusi lek o kʼusi chopol o ti mu xkoltaat-o sventa tstsal yuʼun li kʼusi chopole? Moʼoj. Kʼalal muʼyuk toʼox saʼoj smul li Adane, li Jeovae la skʼel lek li kʼusitik la spasanan liʼ ta Balumile —te kapal skʼoplal li baʼyel chaʼvoʼ krixchanoetike— xchiʼuk laj yal ti «toj lec» skotol li kʼusitik la spase (Génesis 1:31). Jaʼ yuʼun, kʼalal la saʼ smul li Adane, li Diose maʼuk la snop ti muʼyuk lek tsʼakal li kʼuyelan la spase. Moʼoj, jaʼ laj yakʼbe smulin li Adane, xchiʼuk oy lek srasonal yuʼun (Génesis 3:17-19). Li kʼanelal yuʼun ta stojolal Dios xchiʼuk ta stojolal li beiltaseletik yuʼune, jaʼ muʼyuk xakʼ xtijbat-o yoʼonton sventa chchʼunbe smantal Dios ta skotolal.
Jnoptik ta sventa li Jesuse, ti jaʼ jun tukʼil vinik echʼ ta Balumil jech kʼuchaʼal li Adane. Jech, ta skoj ti ayan ta svuʼel chʼul espiritu li Jesuse, koʼol kʼuchaʼal li Adane, akʼbat stʼuj li kʼusi tskʼan yoʼonton stuke, mi jaʼ li kʼusi leke o mi jaʼ li kʼusi chopole (Lucas 1:30, 31; 2:21; 3:23, 38). Manchuk mi jech, mu koʼoluk stalelal xchiʼuk li Adane, yuʼun li Jesuse la snop stuk ti ta spʼaj skotol li tsatsal kontraineletik xchiʼuk ti lek tukʼ yoʼonton chakʼ sba ta stojolal li sTote. Jaʼ yuʼun chaʼa, jamal ta ilel ti Adane jaʼ ta smul stuk ti tsʼuj ta mulile, yuʼun jaʼ la stunes snopben stuk sventa muʼyuk la xchʼunbe li smantal Diose.
Vaʼun chaʼa, ¿kʼu yuʼun jech la spas taje? ¿Mi yuʼun van la snop ti jaʼ lek-o chbat li xkuxlejale? Moʼoj, yuʼun li jtakbol Pabloe la stsʼiba ti «mu jaʼuc ilaj ta loʼlael li Adane» (1 Timoteo 2:14). Yuʼun ta melel la snop stuk ti jaʼ ta spas li kʼusi tskʼan yoʼonton li yajnile, ti sloʼoj xaʼox li sat teʼ ti albatik mu xuʼ sloʼike. Li Adane mas tsots skʼoplal laj yaʼi ti jaʼ ta spas li kʼusi tskʼan yajnile, jaʼ mu toj tsotsuk skʼoplal laj yaʼi li xchʼunbel smantal li Jpasvanej yuʼune. Kʼalal akʼbat yuʼun Eva li sat teʼ ti mu xuʼ sloʼike, li Adane la snop jechuk ti tsokesbat ti kʼuyelan xil sbaik xchiʼuk li Jeovae. Li kʼanelal yuʼun ta stojolal Jeovae muʼyuk kʼotem lek ta yutil to yoʼonton xchiʼuk muʼyuk toj tsots, ta skoj taje itsʼuj-o ta mulil; jaʼ yuʼun la xchʼunbe li yajnile.
Li Adane tsʼuj ta mulil kʼalaluk chʼabal toʼox xnichʼnabtake, jaʼ yuʼun jkotoltik jkuchojtik tal li mulile. Manchuk mi jech, jech kʼuchaʼal li Adane, xuʼ jnop jtuktik li kʼusi ta jpastike. Jaʼ yuʼun chaʼa, li kʼusi mas lek xuʼ jpastike jaʼ ti jnoptik ta sventa slekil yoʼonton Jeovae xchiʼuk ti chkakʼtik akʼo chʼiuk li kʼanelal kuʼuntik ta stojolale. Ta melel, jaʼ noʼox stuk Jeova sta-o ti xi jtun ta stojolale xchiʼuk ti jchʼunbetik smantal ta sjunul koʼontontike (Salmo 63:6; Mateo 22:36, 37).