Jkoltatik ti buchʼutik xchʼakoj sbaik ta xchijtak Diose
«Cuxetuc me avoʼntonic ec, yuʼun laj xa jta li jcot jchij ichʼaye.» (LUC. 15:6.)
1. ¿Kʼuxi laj yakʼ ta ilel Jesús ti skʼanoj li xchijtak kʼuchaʼal jun jchabi chije?
LI JESUCRISTO ti jaʼ sba xNichʼon Jeovae, «Banquilal Jchabichij» sbiinoj (Heb. 13:20). Jech onoʼox kʼuchaʼal kak albil ta Vivliae, ay ta Balumil li Jesuse xchiʼuk stuk noʼox jech echʼ ta lekil jchabi chij, yuʼun laj yakʼbe yipal ta saʼel li «Israele yuʼun chʼayemic ta be jech chac cʼu chaʼal chijetic» (Mat. 2:1-6; 15:24). Maʼuk noʼox taje, xuʼ chakʼ xkuxlejal xtok sventa chchabi li xchijtak jech kʼuchaʼal tspas li jchabi chijetike; jech, laj yakʼ xkuxlejal Jesús sventa tspoj li manxo krixchanoetik ti xkoʼolajik kʼuchaʼal chijetik ti oy ta yoʼontonik stabel sbalil li matanal taje (Juan 10:11, 15; 1 Juan 2:1, 2).
2. ¿Kʼu yuʼun yiktaoj sbaik ta mantal jlom yajtsʼaklomtak Cristo?
2 Kʼux ta alel, oy jlom krixchanoetike tsots toʼox skʼoplal laj yilik li matanal laj yakʼ Jesuse xchiʼuk laj yakʼ xkuxlejalik ta stojolal Dios, pe muʼyuk xa bu yakal ch-abtejik li ta stsobobbail jchʼunolajeletike. Yikʼaluk van jaʼ chibajik-o xchiʼuk namajik-o ta tsobobbail li at-oʼontone, li chamele o yan kʼusitik. Pe skʼan me jvules ta joltik ti jaʼ noʼox xuʼ xkuxet yoʼontonik xchiʼuk xmuyubajik kʼuchaʼal laj yal David ta Salmo 23 mi teik-o xchiʼuk li xchijtak Diose. Xi la skʼejinta li Davide: «Li Mucʼul Diose jaʼ chixchabiun jech chac cʼu chaʼal jchabichij; muʼyuc cʼusi yan ta jcʼan o», xi (Sal. 23:1). Melel, li buchʼutik te ta xchijtak Diose oy-o kʼusi yuʼunik ta sventa mantal, pe kʼux ta alel un, mu me xuʼ jech xkaltik ta stojolalik li jchʼayel chijetike. ¿Buchʼutik xuʼ xkoltavanik? ¿Kʼusi koltael skʼanik? ¿Kʼusi skʼan pasel sventa sutik tal li bu oy yan xchijtak Diose?
¿Buchʼutik xuʼ xkoltavanik?
3. ¿Kʼusi skʼan xichʼ pasel sventa sut tal ti bu oy xchijtak Dios li jchʼayel chijetike, xchiʼuk kʼuxi la skoʼoltas li Jesuse?
3 Skʼan xichʼ akʼel persa sventa sut tal ti bu oy xchijtak Dios li jchʼayel chijetike (Sal. 100:3). Xi la skoʼoltas li Jesuse: «Me oy jun vinic chcʼot ta voʼvinic (100) ta cot xchije, pero me chchʼay jcotuque, ¿me mu teuc ta scomtsan li balunlajuneb yoʼvinic (99) ta cote, yuʼun jaʼ chbat stʼun tal li jcot ichʼaye? Cʼalal me la stae, melel chacalboxuc, toj echʼem xcuxet yoʼnton; jaʼ mu sta jech xcuxet yoʼnton yuʼun li balunlajuneb (99) yoʼvinic muʼyuc xchʼaye. Jaʼ jech ec li Jtotic te oy ta vinajele, mu scʼan me chchʼay junuc li ololetic liʼi», xi (Mat. 18:12-14). ¿Buchʼu xuʼ skolta li buchʼu xchʼakoj sba ta xchijtak Diose?
4, 5. ¿Kʼu yelan skʼan stalelalik li moletik ta stojolal xchijtak Diose?
4 Melel, li jkʼelvanejetike xuʼ skoltaik li jchʼayel chijetike. Jaʼ yuʼun skʼan svules ta sjolik ti chijetik taje jaʼik krixchanoetik ti yakʼoj xkuxlejalik ta stojolal Jeovae. Jech, jaʼ xchijtak Dios ti ep sbalil chile xchiʼuk ti tskʼele (Sal. 79:13). Li kʼanbil chijetik taje skʼan xichʼik kʼuxubinel, jaʼ yuʼun li jchabi chijetike skʼan oyuk ta yoʼontonik xchiʼuk xkʼuxubinik. Toj ep me sbalil chaʼiik li vulaʼanele, yuʼun li spatobil yoʼonton chichʼike xuʼ jaʼ stsatsubik-o ta mantal xchiʼuk xuʼ xtijbat yoʼontonik sventa sutik echʼel li bu oy xchijtak Diose (1 Cor. 8:1).
5 Li jchabi chijetik ta xchijtak Diose jaʼ oy ta sbaik saʼel li jchʼayel chijetike xchiʼuk ti skoltaike. Li Jtakbol Pabloe la svulesbe ta sjol moletik ta voʼneal Éfeso kʼusi jaʼ li yabtelik kʼuchaʼal jchabi chijetike: «Kʼelo me abaik li voʼoxuke xchiʼuk skotol li chijetike, ti te la avichʼik biiltasel lokʼel yuʼun chʼul espiritu sventa cha kʼotik ta jkʼelvanejetike, sventa cha chabiik li tsobobbail yuʼun Diose, ti jaʼ la sman ta xchʼichʼel xNichʼone» (Hech. 20:28, NM). Jech xtok, li jtakbol Pedroe xi laj yalbe mantal li tʼujbil moletike: «Chabiic me li xchijtac Dios ti acʼbil aventainique. Mu me ta sujeluc xapasic; yutsiluc me avoʼnton xapasic jech chac cʼu chaʼal tscʼan li Diose. Mu me jaʼuc ta scoj ti xpichʼet avoʼntonic yuʼun taqʼuine. Scotoluc avoʼnton xapasic li avabtelique. Mu me xacuy abaic ta jpasmantal ta stojol li bochʼotic aventainojique. Jaʼ tscʼan voʼoxuc chavaqʼuic ta ilel cʼusi lec ta pasel ta stojolic» (1 Ped. 5:1-3).
6. ¿Kʼu yuʼun mas to tsots skʼoplal akʼo skoltabeik xchijtak Dios li jchabi chijetike?
6 Li jchʼunolajeletik ti jchabi chijetike skʼan xchanbeik stalelal li Jesús ti jaʼ «lequil jchabichije» (Juan 10:11). Oy tajek ta yoʼonton li xchijtak Diose. Xchiʼuk laj yal ti toj tsots skʼoplal skʼan chabiel kʼalal xi laj yalbe Simón Pedroe: «Qʼuelbun tucʼulanbun ti jchijtaque» (kʼelo Juan 21:15-17, Ch). Li uni chijetik avie mas to skʼanik chabiel, yuʼun li Diabloe mas to yakʼojbe yipal ta sokesbel stukʼil yoʼontonik ta stojolal Dios. Jaʼ xa tstunes li kʼusi lek xkaʼitik spasele xchiʼuk tstunes li balumil sventa jsaʼ jmultik yuʼune (1 Juan 2:15-17; 5:19). Li buchʼutik yiktaoj sbaik ta mantale jaʼ me toj kʼunik ta ilbajinel; jaʼ yuʼun skʼan xichʼik koltael sventa «[s]pasic cʼusi tscʼan li Chʼul Espiritue» (Gál. 5:16-21, 25). ¿Kʼusi van skʼan spasik li moletik sventa tskoltaike? Jaʼ ti skʼanbeik xchʼul espiritu Dios, ti xbeiltasatike xchiʼuk ti xtojobikuk lek stunesel li Vivliae (Pro. 3:5, 6; Luc. 11:13; Heb. 4:12).
7. ¿Kʼu to yepal sbalil chil moletik li xchabiel chijetik ti jaʼ akʼbil sbainike?
7 Li jchabi chijetik ta voʼneal Israele ta sbeiltasik ta jun natil lukluk teʼ li xchijike. Kʼalal tstikʼik o tslokʼesik ta koral li xchijike, te chjelav yuʼunik ta «yolon steʼik» sventa chchapik xchiʼuk sventa chilik mi tsʼakal (Lev. 27:32, NM; Miq. 2:12; 7:14). Jaʼ jech li jchabi chijetik yuʼun yajtsʼaklomtak Cristo eke, skʼan me xojtikinbeik lek li xchijtak Dios ti akʼbil sbainik skʼelele xchiʼuk ti teuk me satik ti kʼusitik tsnuptanike (koʼoltaso xchiʼuk Proverbios 27:23). Jaʼ yuʼun tsots skʼoplal chil moletik li svulaʼanel ermanoetike xchiʼuk oy kʼusi tspasik sventa tskoltaik li buchʼutik xchʼakoj sbaike. Yaloj onoʼox Jeova ti tsaʼ stuk li xchijtake xchiʼuk ti chchabi ti kʼuyelan chtun yuʼunike (Eze. 34:11). Jaʼ yuʼun kʼupil me sba chil ti jaʼ jech tspasik ek li moletike xchiʼuk ti tskoltaik li jchʼayel chijetik ti akʼo sutikuk tal ti bu oy xchiʼiltakike.
8. ¿Kʼusitik xuʼ spasik li moletik sventa skoltaik ta jujuntal li chijetike?
8 Kʼalal ch-ipaj jun jchʼunolajele, xuʼ me xmuyubaj-o xchiʼuk stsatsub-o mi chbat vulaʼanatuk yuʼun jun jchabi chij yuʼun Diose. Jaʼ me jech xuʼ xkaltik ta stojolal jun ermano kʼalal chichʼ koltael ta stuk ti ip ta mantale. Jlom ti kʼusi xuʼ spasik li moletike jaʼ ti skʼelbeik jayibuk versikulo ta Vivliae, xchaʼkʼelik junuk mantal ta revista, sloʼiltaik jtosuk ti kʼusi tsots skʼoplal echʼ ta tsobajele xchiʼuk ti spas orasion xchiʼukike. Xuʼ xalbeik xtok ti xmuyubajik tajek li ermanoetik ti xbat yan velta li ta tsobajeletike (2 Cor. 1:3-7; Sant. 5:13-15). Yikʼaluk me toj tsots skʼoplal chil li ermano ti xichʼ vulaʼanele, ti xichʼ kʼoponel echʼel ta telefonoe o ti xichʼ takbel echʼel jlikuk kartae. Jech xtok, kʼalal chichʼ koltael jun jchʼayel chije ep me ch-akʼbat muyubajel li jchabi chije.
Komon abtel
9, 10. ¿Kʼu van yuʼun xa naʼ ti maʼuk noʼox skʼan oyuk ta yoʼontonik moletik ta skoltael li chijetik ti xchʼakoj sbaike?
9 Toj tsots me li kʼakʼal kuxulutik avie xchiʼuk mu noʼox xi jxokob jtekeltik, jaʼ yuʼun yikʼaluk van mu xkakʼtik venta ti yakal chnamaj lokʼel ta tsobobbail junuk ermanoe (Heb. 2:1). Akʼo mi jech, li Jeovae yiloj lek, yuʼun toj tsots skʼoplal chil li xchijtake. Toj tsots skʼoplal chil ta jujuntal, jech kʼuchaʼal toj tsots skʼoplal chkiltik li jujutos kʼusitik ta jbekʼtaltike. Jech oxal, jkotoltik me skʼan oyuk ta koʼontontik li kermanotaktike xchiʼuk ti koʼol jchabi jbatike (1 Cor. 12:25). ¿Mi jaʼ jech chavil li avermanotake?
10 Akʼo mi jaʼ li moletik ti baʼyel skʼan saʼik xchiʼuk skoltaik li buchʼutik xchʼakoj sbaike, maʼuk noʼox me stukik ti skʼan oyuk ta yoʼontonike. Jtekeltik me xuʼ kuʼuntik xchiʼuk skʼan jkoltatik li moletik sventa jpatbetik xchiʼuk jtsatsubtasbetik yoʼonton ta mantal li ermanoetik yoʼ jech sutik tal li bu oy xchijtak Diose. ¿Kʼuxi xuʼ spas kuʼuntik?
11, 12. ¿Kʼusi van xuʼ xkichʼtik albel sventa xichʼ koltael li buchʼu yiktaoj sba ta mantale?
11 Mi tskʼan koltael li buchʼu yiktaoj sba ta mantale, yikʼaluk van xkʼot ta nopel yuʼun moletik ti jaʼ akʼo vulaʼanvanuk junuk jchol mantal ti lek chaneme, sventa xchan jlikuk vun xchiʼuk. Li kʼusi ta jkʼantik ta sventa taje jaʼ ti xchaʼkʼanik Jeova kʼuchaʼal ta slikebale (Apo. 2:1, 4). Jtos ti kʼusi xuʼ stsatsubtasate jaʼ ti xchanik li mantaletik ti muʼyuk xaʼi kʼalal jaʼo nom oy ta stojolal tsobobbaile.
12 Mi la albat yuʼun moletik ti akʼo xbat avulaʼan junuk li ermano taje, kʼanbo me Jeova ti akʼo xa sbeiltasote xchiʼuk ti akʼo yakʼbot sbendisione. «Acʼbo sventain Mucʼul Dios scotol li cʼusitic chapase, jech lec chbat li cʼusitic chanope.» (Pro. 16:3.) Nopbo skʼoplal tekstoetik ta Vivlia xchiʼuk ti kʼusitik tspat oʼontonal ti xuʼ xa tunes sventa xa tsatsubtasbe li xchʼunel yoʼonton avermanoe. Nopbo skʼoplal li slekil talelal jtakbol Pabloe (kʼelo Romanos 1:11, 12). Li stuke oy ta yoʼonton tskʼel li jchʼunolajeletik ta Romae xchiʼuk chakʼbe matanaletik sventa mantal yoʼ jech stsatsubike. Xchiʼuk snaʼoj lek ti parejo tspatbe sba yoʼontonike. ¿Mi mu jechuk skʼan jtalelaltik ek kʼalal ta jkʼan ta jkoltatik li buchʼutik namajemik ta xchijtak Diose?
13. ¿Kʼusi van xuʼ xa loʼilta xchiʼuk li jun ermano ti yiktaoj sba ta mantale?
13 Kʼalal cha chanunajike xuʼ xa jakʼbe kʼuxi laj yojtikin mantal li ermanoe. Loʼiltaik li kʼusi voʼne xa jelaveme, li kʼusitik koʼol la apasik ta yabtel Diose xchiʼuk tijbo yoʼonton ta snopel ti toj kʼupil sba li tsobajeletike, li mukʼta tsobajeletike xchiʼuk li chol mantale. Albo ti xa muyubaj tajek ti nopol oyot ta stojolal Jeovae (Sant. 4:8). Albo ti xa muyubaj tajek ta sventa ti ep kʼusitik chakʼbe steklumal li Jeovae, pe mas to li spatobil oʼontonale xchiʼuk ti tspat koʼontontik kʼalal chkil jvokoltike (Rom. 15:4; 2 Cor. 1:3, 4).
14, 15. ¿Kʼusitik van bendisional xuʼ jvulesbetik ta sjol li buchʼutik yiktaoj sbaik ta mantale?
14 Jtos ti kʼusi toj jtunele jaʼ ti jvulesbetik ta sjol jlom bendisionetik la sta kʼalal nopol toʼox oy ta tsobobbaile. Jlom ti kʼusi taje jaʼ ti yantik xojtikin echʼel jujun kʼakʼal li sKʼop Diose xchiʼuk li kʼusi snopoj tspase (Pro. 4:18). Jech, ta skoj ti kuxul toʼox ta sventa espiritue mas toʼox me kʼun chaʼi ta tsalel li muliletike (Gál. 5:22-26). Koliyal taje xuʼ toʼox sak sjol yoʼonton skʼopon Dios xchiʼuk oy yuʼun li «jun oʼntonal chacʼ [Dios ti] echʼem to xjelov jech chac cʼu chaʼal ta jnop[tike]» xchiʼuk ti chchabi koʼontontik xchiʼuk kʼusitik ta jnoptike (Fili. 4:6, 7). Kʼalal cha chiʼin ta loʼil li ermanoe, skʼan me oyuk ta ajol liʼe, akʼo ta ilel ti akʼanoj ta melele xchiʼuk ta slekiluk me avoʼonton xavalbe ti akʼo sut batel li bu oy xchijtak Diose (kʼelo Filipenses 2:4).
15 Kaltik noʼox ti jaʼot jun mol ta tsobobbaile xchiʼuk ti yakal cha vulaʼan jun nupul-tsʼakal ti yiktaoj sbaik ta mantale. Xuʼ van xa vulesbe ta sjolik ti kʼuyelan laj yaʼi sbaik kʼalal laj yojtikinik li kʼusitik melel ta sKʼop Diose. ¡Toj alakʼ sba laj yilik li kʼusi melel ta Vivliae xchiʼuk oy lek srasonal laj yilik! ¡Muyubaj-o ta xkuxlejalik xchiʼuk lokʼesatik-o ta mosoil yuʼun li mantale! (Juan 8:32.) Ta melel, xmuyubajik van tajek ta sventa li kʼusitik la xchanik ta sventa Jeovae, li kʼanelal yuʼune xchiʼuk li kʼusitik labalik sba yaloj tspase (koʼoltaso xchiʼuk Lucas 24:32). Vulesbo ta sjol xtok ti jtaoj jun jmotontik li yajtunelutik Diose; jaʼ ti xuʼ jkʼopontik ta orasione xchiʼuk ti lek tajek xkil jbatik xchiʼuke. Albo ti akʼo xchʼamik yan velta «li Lequil Aʼyej ti toj jun yutsile», ti jaʼ yuʼun li Jeova «Dios ti echʼem slequile» (1 Tim. 1:11).
Akʼo-o ta ilel ti akʼananoje
16. Albo junuk skʼelobil ti toj lek kʼusi chkʼot ta pasel kʼalal chichʼ koltael li buchʼutik yiktaoj sbaik ta mantale.
16 ¿Mi ta melel oy kʼusi lek chkʼot ta pasel yuʼun li kʼusitik laj kaltike? ¡Oy kʼuxi un! Jun kerem ti lik xchol mantal kʼalal yichʼoj lajcheb jabile, laj yikta sba ta mantal kʼalal lapal xaʼox ta voʼlajuneb jabile. Akʼo mi jech, ta sjalile isut tal li ta tsobobbaile, avi une mas xa ta 30 jabil ch-abtej ta yabtel Jeova ta tsʼakal ora. Ti jech isut tal ta mantale jaʼ mas ta sventa ti koltaat yuʼun jun mol ta tsobobbaile. ¡Koliyal tajek chal ta sventa ti laj yichʼ koltaele!
17, 18. ¿Kʼusitik jtalelaltik skʼan sventa jkoltatik li buchʼutik xchʼakoj sbaik ta mantale?
17 Jaʼ me tstij koʼontontik li kʼanelal sventa jkoltatik yoʼ sutik tal ta tsobobbail li buchʼutik yiktaoj sbaik ta mantale. Xi laj yalbe yajtsʼaklomtak li Jesuse: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque», xi (Juan 13:34, 35). Jech, jaʼ ch-ojtikinatik-o li melel jchʼunolajeletik ti skʼanoj sbaike. ¿Mi mu jechuk skʼan jkʼantik li ermanoetik ti yiktaoj sbaik ta mantale? ¡Jaʼ jech ta melel! Melel onoʼox un, sventa jkoltatike skʼan me xkakʼtik ta ilel yan talelaletik sventa jchʼunolajel.
18 ¿Kʼusi talelaletik taje? Maʼuk noʼox li kʼanbaile, yikʼaluk van skʼan oyuk xkʼuxul koʼontontik, slekil koʼontontik, jmanxoaltik xchiʼuk oyuk smalael kuʼuntik. Bakʼintik xtoke skʼan van ti jnaʼtikuk yakʼel pertone. Xi la stsʼiba li Pabloe: «Lec xavil abaic, cʼux xavaʼay abaic ta jujuntal. Talbat xapasbeic abaic perdón jech chac cʼu chaʼal la spasboxuc perdón Dios ta sventa li Cristoe». «Lapic o li slequil avoʼntonique, li cʼuxubinvaneje, ti biqʼuit chavacʼ abaique, ti mansooxuc noʼoxe, li yutsil avoʼntonique, xchiʼuc li smucʼul avoʼntonique. Yuʼun tʼujbiloxuc xa yuʼun li Diose, yuʼunoxuc xa, lec scʼanojoxuc. [...] Li cʼusi tsots scʼoplal ta scotole, jaʼ ti oyuc ta avoʼntonic o li cʼanvaneje, yuʼun jaʼ mero jpasvanej ta jun.» (Efesios 4:32; Col. 3:12,14.)
19. ¿Kʼu yuʼun toj ep sbalil ti xkakʼ kipaltik ta skoltael li uni chijetik ti akʼo sutik tal ti bu oy xchijtak Diose?
19 Li ta yan xchanobile ta xichʼ kʼelel kʼu yuʼun ti chnamajik lokʼel jlome xchiʼuk chal xtok ti xuʼ spat yoʼontonik ti lek chʼambilik mi sutik tal li bu oy xchijtak Diose. Kʼuchaʼal chakʼ ta ilel li xchanobil liʼe xchiʼuk li yan chtale, oy tajek sbalil ti chkakʼ kiptik ta skoltael li uni jchʼayel chijetike. Li ta kuxlejal avie, ep krixchanoetik ti jaʼ noʼox batem ta yoʼontonik tspasik ta jkʼulej ti kʼu sjalil kuxulike, pe li xkuxlejal jun krixchanoe x-echʼ to skʼoplal kʼuchaʼal skotol kʼanal takʼin ti oy ta balumile. Jaʼ jech laj yakʼ ta ilel Jesús kʼalal la xchapbe skʼoplal li jchʼayel chije (Mat. 18:12-14). Mu me xchʼay ta ajol li kʼusi laj kaltike xchiʼuk paso-o me persa ta anil sventa xa kolta li skʼanbil chijtak Jeova ti chʼayemik ta bee.
¿Kʼusi cha takʼ?
• ¿Kʼusi sbainoj li jchabi chij yajtsʼaklomtak Cristo ta sventa li chijetik ti xchʼakoj sbaike?
• ¿Kʼuxi xuʼ jkoltatik li buchʼutik muʼyuk xa bu yakal ch-abtejik ta tsobobbaile?
• ¿Kʼusitik jtalelaltik skʼan sventa jkoltatik li buchʼutik xchʼakoj sbaik ta xchijtak Diose?
[Lokʼol ta pajina 10]
Li jchabi chij yajtsʼaklomtak Cristoe ta xakʼbeik yipal ta slekil yoʼontonik ta skoltael ti buchʼu xchʼakoj sbaik ta xchijtak Diose