¿Mi tukʼ-o avoʼonton chavakʼ aba akʼo mi oy kʼusi xkʼot ta pasel?

«Muʼyuc ta jcomtsan o cʼu xʼelan [stukʼil] coʼnton cʼalal to chicham.» (JOB 27:5.)

1, 2. 1 ¿Kʼusi skʼan oyuk ta koʼontontik stael? 2) ¿Kʼusitik sjakʼobiltak ta jchanbetik echʼel skʼoplal?

NOPO avaʼi ti yakal cha kʼelbe splanoal ti kʼuyelan cha vaʼan anae. Toj lek xchiʼuk toj jtunel ti kʼuyelan chichʼ pasele, vaʼun chlik anop ti lek tajek cha kuxi xchiʼuk avutsʼ avalal tee. Pe ¿kʼusi skʼan xa pas sventa xkʼot ta pasel li kʼusi anopoje? Ti kʼusie, jaʼ ti skʼan xa vaʼan li anae, ti xa jelav echʼel ta naklej tee xchiʼuk ti xa kʼel ti akʼo lekuk-oe.

² Jaʼ jech ek ta sventa li stukʼil koʼontontike. Jkotoltik jnaʼojtik ti toj tsots skʼoplal li stukʼil koʼontontike, ti ta jtabetik sbalil jtuktike xchiʼuk ti ta stabe sbalil ek li kutsʼ kalaltike. Pe mu me baluk noʼox ti ta jkʼantik ti lek tukʼ koʼontontik ta stojolal Diose; yuʼun skʼan xkakʼbetik yipal sventa xkʼot ta pasel taje. Tsots onoʼox skʼan xkakʼbetik yipal xchiʼuk ep chlaj takʼin mi ta jkʼan ta jvaʼantik jpʼejuk nae (Luc. 14:28, 29). Jaʼ jech ek, ti xvinajuk ti tukʼ koʼonton ta jkuxlejaltike skʼan me tsots xkakʼbetik yipal xchiʼuk jal skʼan, pe taje toj ep me sbalil. Li avie ta jchanbetik skʼoplal oxib sjakʼobil: ¿Kʼusi skʼan pasel sventa tukʼuk koʼontontike? ¿Kʼuxi xuʼ tukʼ-o koʼontontik ta stojolal Dios akʼo mi chkil jvokoltik? ¿Mi oy to van kʼusi xuʼ spasik li buchʼutik muʼyuk xa tukʼ yoʼontonike?

¿Kʼusi skʼan pasel sventa tukʼuk koʼontontike?

3, 4. 1) ¿Kʼuxi tskoltautik Jeova sventa tukʼuk-o koʼontontike? 2) ¿Kʼuxi chchanubtasutik li stalelal Jesús yoʼ tukʼuk-o koʼontontike?

³ Jech kʼuchaʼal laj kiltik ta yan xchanobile, li Jeovae chakʼ jtʼuj jtuktik mi ta jkʼan tukʼ koʼontontik o mi moʼoj. Toj lek mi jech ta jpastike, yuʼun koltabilutik yuʼun Jeova. Jech, li Jeovae chchanubtasutik sventa tukʼukutik ta stojolal xchiʼuk ta slekil yoʼonton chakʼbutik li xchʼul espiritu sventa tskoltautik ta yakʼel ta jkuxlejaltik li kʼusi ta jchantike (Luc. 11:13). Chchabiutik ta mantal jkotoltik xtok mi chkakʼbetik yipal ti akʼo tukʼuk-o koʼontontike (Pro. 2:7).

⁴ ¿Kʼusi spasoj Jeova sventa chchanubtasutik yoʼ tukʼuk koʼontontike? Ti kʼusi mas tsots skʼoplale jaʼ ti la stak tal li xNichʼon ta Balumile. Tukʼ tajek la xchʼunbe smantal sTot li Jesuse; «la xchʼun mantal, la xchʼun milel noxtoc» (Fili. 2:8). Akʼo mi jaʼo tsots tajek svokol, xi laj yalbe sTot li Jesuse: «Mu me xcʼot ta pasel cʼusi tscʼan coʼnton jtuc. Jaʼ acʼo cʼotuc ta pasel li cʼusi tscʼan avoʼntone», xut (Luc. 22:42). Skʼan me xi jakʼbe jbatik ta jujuntale: «¿Mi jech jtalelal ek kʼuchaʼal taje?». Mi ta jkʼan tukʼuk koʼontontike skʼan me ta sjunul koʼonton jchʼunbetik smantal li Diose. Jchanbetik skʼoplal jlom kʼusitik ti chakʼ kiltik ti jaʼ toj tsots skʼoplal li xchʼunel mantale.

5, 6. 1) ¿Kʼuxi tsots laj yalbe skʼoplal David ti skʼan tukʼuk koʼontontik kʼalal jtuk oyutike? 2) ¿Kʼusi xuʼ tsnuptanik avi li yajtsʼaklomtak Cristo kʼalal stuk oyike?

⁵ Baʼyel, skʼan jchʼunbetik smantal Jeova kʼalal jtuk oyutike. Li ajvalil Davide laj yal ti toj tsots skʼoplal ti tukʼuk koʼontontik kʼalal jtuk oyutike (kʼelo Salmo 101:2). Jech, ta skoj ti kʼusitik sbainoj ta yabtele ep kʼusitik ta sat krixchanoetik tspas xchiʼuk nopem van xaʼi xtok ti chkʼopoj ta sat ta sienal o ta smilal noʼox krixchanoetike (koʼoltaso xchiʼuk Salmo 26:12). Skʼan lek xakʼ ta ilel stalelal ta stojolal krixchanoetik kʼalal jech tspase (Deu. 17:18, 19). Pe li David xtoke snaʼoj ti skʼan tukʼuk yoʼonton kʼalal stuk te oy «ta [s]pasubmantale». ¿Li voʼotik une?

⁶ Xi ta jchantik li kʼusi laj yal David ta Salmo 101:3: «Mu jcʼan xcacʼ jsat o ta sventa li cʼusi muʼyuc tuqʼue», xi. Li avie ep xa bu ta jtatik ta kʼelel li kʼusitik muʼyuk tukʼe, mas to ti kʼalal jtuk oyutike. Ep yajtsʼaklomtak Cristoe jaʼ jun preva chilik li stunesel Internete, yuʼun xuʼ te stsʼujik-o ta skʼelel li lokʼoletik ti tstij oʼontonal ta lutsʼbaile o li skʼelel pornografiae. Ti jech stsʼuj li jun yajtsʼaklom Cristo ta skʼelel taje, ¿mi xuʼ van chal ti yakal chchʼun li kʼusi yakʼoj ta naʼel Dios ta Salmo 101:3? Li pornografiae toj chopol, yuʼun tsokesvan, tstij koʼontontik ta skʼanel li kʼusi maʼuk kuʼuntike, tsokes jol-koʼontontik xchiʼuk chakʼbe svokol li buchʼu nupul-tsʼakalike (Pro. 4:23; 2 Cor. 7:1; 1 Tes. 4:3-5).

7. ¿Kʼusi tekstoal xuʼ skoltautik sventa tukʼuk koʼontontik kʼalal jtuk oyutike?

⁷ Li yajtunelutik Jeovae muʼyuk bu jtuk oyutik ta melel. Li jTotik ta vinajel ti skʼanojutik tajeke skʼelojutik lek (kʼelo Salmo 11:4). Nopo xa noʼox avaʼi kʼu to yelan xmuyubaj kʼalal chil ti tstsal kuʼuntik li akʼel ta prevae xchiʼuk ti kʼalal ta jchʼuntik li beiltasel ti te tsakal skʼoplal ta sventa ti kʼusi laj yal Jesús ta Mateo 5:28. Jaʼ yuʼun jpʼeluk ta avoʼonton ti mu xa kʼel li kʼusitik xuʼ tstij oʼontonal ta spasel mulile. Mu xa sokes ti kʼu xa sjalil tukʼ avoʼonton ta stojolal Jeova ta skoj ti cha kʼel li pornografia ti toj kʼexlal sbae.

8, 9. 1) ¿Kʼusi vokolal la snuptanik li Daniel xchiʼuk xchiʼiltake? 2) ¿Kʼuxi xuʼ smuyubtabeik yoʼonton Jeova xchiʼuk yermanotakik li kerem-tsebetik ti jaʼik yajtsʼaklomtak Cristoe?

⁸ Xchibal, skʼan me tukʼ koʼontontik xchiʼuk jchʼunbetik smantal Dios kʼalal te jchiʼuktik krixchanoetik ti mu jmojuk kʼusi jchʼunojtike. Jnopbetik skʼoplal avaʼi Daniel xchiʼuk li oxvoʼ xchiʼiltake, ti laj yichʼik ikʼel echʼel ta Babilonia kʼalal chexik toʼoxe. Kʼalal kʼotike te la staik krixchanoetik ti maʼuk jchʼunolajeletike xchiʼuk ti mu snaʼik jsetʼuk ta sventa Jeovae. Kʼalal laj yichʼik sujel sventa slajesik li veʼlil ti yaloj sMantal Dios ti mu stakʼ slajesike, kʼun kʼusi la spak-o skʼoplalik jechuk sventa mu xchʼunbeik smantal Jeovae. Yuʼun mi jaʼuk bu ilbilik yuʼun li stot smeʼike, li moletik xchiʼuk li paleetik ta Israele. ¿Mi oy van buchʼu chaʼi ti kʼusi tspasike? Oy, jaʼ li Jeovae. Jaʼ yuʼun laj yakʼ ta yoʼontonik ti tukʼ laj yakʼ sbaike xchiʼuk ti la xchʼunbeik smantal Diose, akʼo mi laj yichʼik sujel xchiʼuk ti xuʼ sta-o svokolike (Dan. 1:3-9).

⁹ Li kerem-tsebetik ti jaʼik yajtsʼaklomtak Cristo avie jaʼ jech ta spasik ek: chichʼbeik ta mukʼ li smantaltak Diose xchiʼuk muʼyuk tspasik li kʼusi ch-albat yuʼun xchiʼiltakike. Kʼalal muʼyuk cha lajesik droga li voʼoxuke kerem-tsebetik, ti muʼyuk cha ochik ta majbail, ti muʼyuk chavalik chopol kʼopetik xchiʼuk ti muʼyuk cha mulivajike, yakal me cha chʼunbeik smantal li aDiosike, vaʼun jaʼ me jech tukʼ avoʼontonik. Maʼuk noʼox me cha tabeik sbalil atukik, moʼoj, yuʼun cha lekubtasbeik yoʼonton li Jeovae xchiʼuk li avermanotakike (Sal. 110:3).

10. 1) ¿Kʼusi ti muʼyuk lek tsnopbeik skʼoplal sventa mulivajel li jlom kerem-tsebetik ti jaʼ tijbat-o yoʼontonik ta spasel li kʼusitik muʼyuk tukʼe? 2) ¿Kʼu yelan chilik mulivajel li buchʼutik tukʼ yoʼontonik ta melele?

¹⁰ Yoxibal, skʼan jchʼunbetik smantal Dios kʼalal ta jchiʼintik ta loʼil krixchanoetik ti maʼuk jchiʼiltik ta antsil o ta vinikale. Jnaʼojtik ti chal Vivlia ti mu stakʼ xi jmulivaje. Pe xuʼ van mu toj chopoluk xlik kiltik bakʼintik li kʼusi chopole. Jech kʼuchaʼal liʼe, oy jlom kerem-tsebetike chixtolanbe sba skʼunilik, o mi moʼoje, chixtolanbe sba ta yeik li skʼunilike o chixtolanbe sbaik ti bu chlokʼ yikʼobalike, yuʼun chalik ti mu toj chopoluk li kʼusi tspasike jaʼ ti yuʼun muʼyuk tslutsʼ sbaike. Pe li kʼusi chchʼay ta sjolik taje —o ti yolbaj tskʼan chchʼay ta sjolike— jaʼ ti te smakoj skotol muliletik li jpʼel kʼop tstunes Vivlia ta sventa li mulivajele xchiʼuk ti xuʼ chichʼ lokʼesel ta tsobobbail li jun yajtsʼaklom Cristo mi tspas jtosuk taje.a Pe li kʼusi mas toj chopole, muʼyuk bu tukʼ yoʼontonik ti kʼalal jech tspasike. Li buchʼutik tskʼan tukʼ yoʼontonike muʼyuk bu tsaʼ kʼusi tspoj-o sbaik sventa mu xchʼunbeik smantal li Diose. Muʼyuk bu chnopajik echʼel xtok li ta mulil ti muʼyuk bu tstsʼuj yalojike. Maʼuk noʼox tsnopik ti xuʼ xichʼik mantal mi jech tspasike, yuʼun jaʼ mas chakʼ ta yoʼontonik ti xuʼ chopol chil Jeova li kʼusi tspasike xchiʼuk ti xuʼ tsyayijesbeik yoʼontone. Muʼyuk bu yantik xa xnopajik echʼel li ta mulile, yuʼun nom chakʼ sbaik ta sventa li kʼusi chopole xchiʼuk chjatavik ta stojolal li mulivajele (1 Cor. 6:18). Taje jaʼ me skʼan xal ti tukʼ koʼonton chkakʼ jbatike.

Kʼuxi xuʼ tukʼ-o koʼontontik akʼo mi xkiltik prevaetik

11. ¿Kʼu yuʼun tsots skʼoplal ti jchʼunbetik-o batel smantal Diose? Koʼoltaso.

¹¹ Kʼuchaʼal laj xa kiltike, mi ta jchʼuntik mantale tukʼ koʼontontik, jaʼ yuʼun mi ta jkʼan oyuk stukʼil koʼontontik ta jkuxlejaltike skʼan me jchʼuntik-o mantal. Yikʼaluk van muʼyuk sbalil yilel kʼalal jun noʼox velta ta jchʼuntik mantale, pe mi ta jchʼunilantik li mantale ta me stsob sba echʼel ta sjalil. Sventa jkoʼoltastike, kalbetik skʼoplal jpʼej ladriyo. Kʼalal uni jpʼej noʼoxe yikʼaluk van mu kʼusi xtun-o yilel, pe kʼalal ep ta jlatstik muyele xuʼ me jvaʼantik-o jpʼejuk alakʼ sba na. Jaʼ jech ek mi ta jchʼunbetik-o smantal Dios skotol orae ta me spas kuʼuntik ti oyuk stukʼil koʼontontik ta jkuxlejaltike (Luc. 16:10).

12. ¿Kʼusi lek laj yakʼ ta ilel David ti kʼalal laj yichʼ ilbajinele xchiʼuk ti kʼalal oy kʼusitik muʼyuk tukʼ laj yichʼ pasbele?

¹² Kʼalal ta jnuptantik vokoliletik, kontrainel o li kʼusitik muʼyuk tukʼ kʼusi chi jpasbate jaʼo me te chvinaj mas ti tukʼ koʼontontike. Jkʼelbetik skʼoplal David. Kʼalal kerem toʼox li Davide laj yichʼ nutsel yuʼun li buchʼu tʼujbil yuʼun Jeovae, ti jaʼ li ajvalil Saule. Kʼalal jech yakal tspas li Saúl taje muʼyuk xaʼox bu lek ch-ile yuʼun Dios, solel ch-itʼixaj ta jyalel ta stojolal li Davide, ti jaʼ lek ilbil yuʼun Diose. Jal echʼ ta ajvalil li Saule xchiʼuk la stunes li soltaroetik ta Israel sventa tsnuts li Davide. ¿Mi ilin van David ta skoj ti jal laj yakʼ Jeova ti muʼyuk kʼusi tukʼ xichʼ pasbele? ¿Mi la van snop ti muʼyuk sbalil ti xkuch yuʼun li prevae? Moʼoj ta melel. Ta sjunul yoʼonton laj yichʼ ta mukʼ Saúl ta skoj ti tʼujbil yuʼun Jeovae, jaʼ jech laj yakʼ ta ilel ti kʼalal muʼyuk la smil kʼalal och ox ta skʼobe (1 Sam. 24:2-7).

13. ¿Kʼuxi xuʼ xkakʼtik ta ilel stukʼil koʼontontik ta stojolal Dios kʼalal oy buchʼu tsyayijes o chchibajes koʼontontik ta skoj kʼusi tspase?

¹³ ¡Toj lek xa noʼox ta chanbel stalelal li Davide! Li ta organisasion bu oyutike naka jpas mulil krixchanoetik, jaʼ yuʼun oy jlom jchiʼiltaktike yikʼaluk van mu jechuk tspas stalelalik ti kʼuchaʼal skʼan pasele. Yikʼaluk van chopol kʼusi tspasbutik o ti chiktaik li mantale. Pe li kʼusi tspat koʼontontike jaʼ ti tukʼ chakʼ sba li steklumal Jeovae (Isa. 54:17). Pe ¿kʼusi van ta jpastik kʼalal mi li jchibaj yuʼun o mi la syayijes koʼontontik ta skoj li kʼusi tspas jun ermanoe? Mi chkakʼtik sokesutik li skʼakʼal koʼontontike, xuʼ me muʼyuk xa tukʼ koʼonton xkakʼ jbatik. Ti kʼuyelan stalelalik li yantike maʼuk me skʼan xal ti xuʼ xi j-ilin ta stojolal Diose o ti mu tukʼuk xkakʼ jbatik ta stojolale (Sal. 119:165). Mi chkuch kuʼuntik li prevaetik taje jaʼ me jech chkakʼtik ta ilel ti tukʼ koʼontontike.

14. ¿Kʼu yelan chaʼiik li jchʼunolajeletik ti tukʼ yoʼontonik kʼalal oy kʼusi chjel ta sventa chanubtasel xchiʼuk ta sventa organisasione?

¹⁴ Yan xtok ti kʼuyelan xuʼ xkakʼtik ta ilel ti tukʼ koʼontontike jaʼ ti muʼyuk ta jchopol loʼiltatik li kʼusitik chjel ta organisasione. Teuk me ta joltik ti kʼalal tukʼ chkakʼ jbatik ta stojolale, jaʼ jech tukʼ oyutik ta stojolal Jeova ek. Li avie toj echʼem me chakʼbe bendision li steklumale, xchiʼuk toj kajal me oy skʼoplal li ichʼel ta mukʼ chichʼ Jeova avie, ti muʼyuk bu jech ilbil-oe (Isa. 2:2-4). Kʼalal chichʼ chapbel yan smelolal junuk teksto o kʼalal oy kʼusi chichʼ jelel ta organisasione, jaʼ lek ti jchʼamtike. Toj labal sba ta melel ti kʼuyelan yakal chichʼ aʼibel batel mas smelolal jujun kʼakʼal li mantale (Pro. 4:18). Jaʼ yuʼun chaʼa, mi toj tsots chkaʼitik ta yaʼibel smelolal ti kʼu yuʼun oy kʼusi laj yichʼ jelele, jkʼanbetik Jeova ti akʼo skoltautik ta xchʼamele, pe skʼan me jchʼuntik-o echʼel li mantale xchiʼuk ti tukʼuk koʼontontike.

¿Mi oy to van kʼusi xuʼ spasik li buchʼutik muʼyuk xa tukʼ yoʼontonike?

15. ¿Buchʼu oy ta sba ti tukʼuk yoʼonton li yajtsʼaklom Cristoe?

¹⁵ Toj tsots me skʼoplal maʼ liʼe, ¿mi mu jechuk? Jech kʼuchaʼal laj kiltik li ta yan xchanobile, toj tsots me skʼoplal ti tukʼuk koʼontontike, yuʼun jaʼ noʼox me jech xuʼ lek xilutik li Jeovae xchiʼuk ti teuk-o li spatobil koʼontontike. Mu me xchʼay ta ajol liʼe: li buchʼu noʼox xuʼ tsokes ta be li stukʼil avoʼontone jaʼ noʼox me li voʼote. Snaʼoj lek Job maʼ taje, jaʼ yuʼun xi laj yale: «Muʼyuc ta jcomtsan o cʼu xʼelan [stukʼil] coʼnton cʼalal to chicham», xi (Job 27:5). Mi jaʼ jech jpʼel ta avoʼonton taje xchiʼuk mi nopol oyot ta stojolal Jeovae, muʼyuk me cha sokes ta be li stukʼil avoʼontone (Sant. 4:8).

16, 17. 1) ¿Kʼusi mu stakʼ spas jun yajtsʼaklom Cristo mi la saʼ tsots smule? 2) ¿Kʼusi van skʼan spas un chaʼa?

¹⁶ Akʼo mi jech, oy jlom jchʼunolajeletik ti tsokes ta be li stukʼil yoʼontonike. Oy jlome tsots tspas smulik, jech kʼuchaʼal kʼot ta pasel ta skʼakʼalil jtakboletike. Mi jaʼ jech kʼotem ta atojolale, ¿mi jaʼ van skʼan xal ti muʼyuk xa kʼusi stakʼ xa pase? Mu jechuk ta jyalel. ¿Kʼusi skʼan xa pas un chaʼa? Jkʼeltik baʼyel li kʼusi mu stakʼ xa pase. Li kʼusi onoʼox nopem xkaʼitike jaʼ ti muʼyuk buchʼu jamal chkalbe li jmultike: mi jaʼuk li jtot jmeʼtike, li moletike xchiʼuk mi jaʼuk li yan ermanoe. Pe jaʼuk li Vivliae xi tsvules ta joltike: «Li bochʼo ta smuc smule muʼyuc lec chbat; yan li bochʼo jamal chal, xchiʼuc me tscomtsane, chʼaybil chcʼot smul» (Pro. 28:13). Li buchʼutik tsmuk smulike toj chopol li kʼusi tspasike, yuʼun muʼyuk kʼusi xuʼ jmuktik maʼ ta sat Jeovae (kʼelo Hebreos 4:13). Oy buchʼutik ti chaʼtos kʼusi tspas ta xkuxlejalike, yileluke chtunik ta stojolal Dios, pe tspas smulik ta stojolal xtok un. Taje maʼuk me svinajeb ti tukʼ koʼonton ta jkuxlejaltike. Li Jeovae muʼyuk me ta xchʼam ti kʼuyelan ch-ichʼvanik ta mukʼ li buchʼutik tsmuk stsatsal mulike; ch-ib-o yoʼonton ta melel ti jech tskuy sbaike (Pro. 21:27; Isa. 1:11-16).

¹⁷ Kʼalal tsots tspas smul li jun yajtsʼaklom Cristoe, jamal ta aʼiel lek li kʼusi skʼan spase: skʼan xalbe li moletike. Li Jeovae xchapanoj jun koltael ta sventa li buchʼutik tsots ipik ta mantale (kʼelo Santiago 5:14). Mu me jaʼuk xa xiʼo sventa xa tsak avip yan velta ta mantal ti chavichʼ tojobtasel o tukʼibtasele. Jech onoʼox, mi tsots iputik o mi persa skʼan xkichʼtik akuxa o junuk operasion sventa xi jkole, ¿mi muʼyuk van ta jchʼamtik ta skoj ti toj kʼuxe? (Heb. 12:11.)

18, 19. 1) ¿Kʼuxi chakʼ ta ilel li kʼusi kʼot ta stojolal David ti xuʼ xtukʼib koʼontontik mi la jpas jmultike? 2) ¿Kʼusi skʼan oyuk ta koʼontontik spasel jkotoltik?

¹⁸ ¿Mi xuʼ to van stsak yip yan velta li jun yajtsʼaklom Cristo ti tsots la saʼ smule? ¿Mi xuʼ van xtukʼib yoʼonton yan velta? Jkʼelbetik skʼoplal yan velta li Davide. Li stuke toj tsots la saʼ smul: kʼot ta yoʼonton jun ants ti oy smalale, mulivaj xchiʼuk laj yal ti akʼo smilbeik li smalale. Jamal xvinaj ti muʼyuk bu tukʼ yoʼonton David ti kʼalal jech la spase. Akʼo mi jech, taje maʼuk skʼan xal ti muʼyuk xa xpoxile. Melel onoʼox ti skʼan xichʼ tsots mantale. Pe koliyal ti la sutes yoʼonton ta melele la sta kʼuxubinel yuʼun Jeova. Li Davide laj yaʼibe smelolal li mantal laj yichʼe, la stukʼibtas li stalelale xchiʼuk la xchʼunbe-o smantal Dios ti kʼu to sjalil kuxie. Jaʼ jech vinaj ta xkuxlejal ti melel li kʼusi chal Proverbios 24:16: «Acʼo me chyal ta lum vucubuc velta li bochʼo tucʼ yoʼntone, ta onoʼox stam sba liquel yan velta». Kʼalal chamem xaʼox li Davide, li Jeovae laj yalbe Salomón kʼusi tsnop ta sventa li Davide (kʼelo 1 Reyes 9:4). Jaʼ jech, li Diose snaʼoj ti tukʼ yoʼonton echʼ li Davide. Jamal ta kʼelel ti chakʼbe perton li buchʼu tsots saʼoj smul ti tsutes yoʼontone (Isa. 1:18).

¹⁹ Ta slajebale, mi cha kʼan tukʼ avoʼontone skʼan me ta sjunul avoʼonton xa chʼunbe smantal li Diose. Tukʼuk avoʼonton xkuch batel avuʼun, mi oy bu tsots la apas amule suteso avoʼonton ta melel. ¡Toj tsots skʼoplal ti tukʼ koʼontontike! Jchanbetik stalelal David ti xi laj yale: «Li vuʼune tucʼ [koʼonton] cʼusitic jpasoj ta atojol», xi (Sal. 26:11).

[Tsʼibetik ta yok vun]

¿Kʼusi cha takʼ?

• ¿Kʼusi skʼan pasel sventa tukʼuk koʼontontike?

• ¿Kʼuxi xuʼ tukʼ-o avoʼonton ta stojolal Dios akʼo mi xavil avokol?

• ¿Mi xuʼ to van xtukʼib yoʼonton yan velta li buchʼu saʼoj smule?

[Lokʼol ta pajina 8]

«TOJ YAN SBA YUTSIL LI KʼUSI LA SPAS LI TSEBE»

Jaʼ jech laj yal jun ants sventa chalbe slekil xchiʼuk stukʼil yoʼonton jun krixchano ti mu xojtikine. Li ants ti oy xaʼox ta svoʼobal u xchiʼuk yole, chʼay ta sjol yav stakʼin ta jun snail yuchʼobil kafe ti te tikʼil 2,000 dolare, jaʼo ep yichʼoj batel stakʼin. Xi laj yalbe jun j-al-loʼil ta periodiko ta slumale: «Mu xa jnaʼ kʼusi ta jpas». Pe lek kʼejbil maʼ li stakʼine. Jun tseb la sta li yav takʼin taje, vaʼun lik sabe li yajvale. Ta skoj ti muʼyuk la stae, bat yakʼbe polisia, vaʼun jaʼ xa lik saʼik li antse. «Toj yan sba yutsil li kʼusi la spas li tsebe», xi laj yal ta mas tsʼakal li yajval takʼine. Pe ¿kʼu yuʼun laj yakʼ persa sabel yajval takʼin li tseb taje? Li periodikoe laj yal ti jaʼ la yajrextiko Jeovae xchiʼuk ti «chanubtasbil [la] ta srelijion chʼi tal ti skʼan tukʼuk yoʼontone».

[Lokʼol ta pajina 9]

Li kerem-tsebetike xuʼ me tukʼ yoʼonton xakʼ sbaik akʼo mi xlajik ta sujel

[Lokʼol ta pajina 10]

La stsak yip yan velta li Davide, akʼo mi muʼyuk tukʼ yoʼonton laj yakʼ sba ta stojolal Dios