¿Kʼu yuʼun skʼan tukʼuk koʼontontik li jchʼunolajelutike?

«Chapanun me ta sventa ti cʼu yepal lec cʼusi jnopoje [Jeova].» (SAL. 7:8.)

1, 2. ¿Kʼusi xuʼ xil-o preva stukʼil yoʼonton li yajtsʼaklom Cristoe?

JUN kerem yajtsʼaklom Cristoe te joybil yuʼun xchiʼiltak sventa tsaʼik kʼop. ¿Mi chlik van spak skʼoplal ek, ti chlik utvanuk o chlik majvanuke? ¿Mi ta van spajtsan sba xchiʼuk chchʼak sba lokʼel? Jun vinik ti oy yajnil ti stuk te oy ta snae yakal tsaʼ jtos aʼyej ta Internet. Ta anil noʼox te lokʼ talel jun kuadro ti bu ch-ikʼvan echʼel ta skʼelel mulivajel li ta komputadorae. ¿Mi ta van sjam o mi ta van smak batel? Jun ermanae yakal chloʼilaj xchiʼuk yamigatak. Ta anil noʼox sok ta be li sloʼilike, oy june lik chopol kʼopojuk ta stojolal jun ermana. ¿Kʼusi van tspas li ermanae? ¿Mi jech chlik loʼilajuk kʼuchaʼal li yamigatake o mi ta van sjel li loʼile?

² Li oxtos kʼusi chkʼot ta pasel taje xkoʼolajtik: ta jujuntal li yajtsʼaklom Cristoe skʼan xakʼik persa sventa tukʼuk-o yoʼontonik. Kʼalal ta jpastik batel li kʼusi jbainojtik ta jkuxlejaltike xchiʼuk ti ta jsaʼtik batel li kʼusitik chtun kuʼuntik jujun kʼakʼale, ¿mi jnaʼojtik lek ti skʼan tukʼuk koʼontontike? Jutuk mu skotoluk li krixchanoetike chat yoʼontonik ta sventa li chameletike, li ta spat xokonike, li ta yabtelike, li ta yamigotakike xchiʼuk ta sventa li skʼanel jun vinik o jun antse. Pe li yajtsʼaklomutik Cristoe jaʼ mas skʼan xkat-o koʼontontik li stukʼil koʼontontike, yuʼun kʼalal tskʼelutik lek li Jeovae jaʼ tskʼel li koʼontontike (Sal. 139:23, 24).

3. 1) ¿Kʼusi chakʼ jpastik ta jujuntal li Jeovae? 2) ¿Kʼusi ta jkʼelbetik batel skʼoplal li ta xchanobil liʼe?

³ Ep yakʼojbutik bendision li Jeovae, yakʼojbutik «scotol li cʼusi leque xchiʼuc li cʼusitic lec tu[kʼe]» (Sant. 1:17). Jaʼ yakʼojbutik li jbekʼtaltike xchiʼuk li jnopbentike, jech kʼuchaʼal ti lek noʼox oyutike xchiʼuk li kʼusitik xi jtojob spasele (1 Cor. 4:7). Akʼo mi jech, li Jeovae muʼyuk bu tsujutik ti akʼo tukʼuk koʼontontik ta stojolale. Moʼoj, yuʼun chakʼ ti akʼo jnoptik ta jujuntale (Deu. 30:19). Tana une ta jkʼeltik batel kʼusi jaʼ li tukʼil oʼontonale xchiʼuk ta jkʼelbetik batel oxtos srasonal ti kʼu yuʼun skʼan tukʼuk koʼontontik li yajtsʼaklomutik Cristoe.

¿Kʼusi jaʼ li tukʼil oʼontonale?

4. ¿Kʼusi smakoj li tukʼil oʼontonale, xchiʼuk kʼusi ta jchantik li ta mantal laj yakʼ Jeova ta sventa li xchikʼbel smotone?

⁴ Ep krixchanoetike mu xaʼibeik smelolal kʼusi smakoj li tukʼil oʼontonale. Oy ajvaliletik ti tstoy sbaik ta skoj ti tukʼ yoʼonton chalike, taje jaʼ kʼalal tskʼan chalik ti lek jamal snaʼ xkʼopojike. Melel onoʼox chaʼa, tsots skʼoplal ti lek jamal jnaʼ xi jkʼopoje, pe taje jaʼ noʼox jtos te tsakal skʼoplal ta stukʼil oʼontonal. Jech kʼuchaʼal lek jamal chakʼ ta ilel li Vivliae, li krixchanoetik ti tukʼ yoʼontonike jaʼ ti buchʼu muʼyuk spaltail ta xkuxlejalike, jaʼ ti buchʼu tukʼ stalelale. Li kʼopetik ta hebreo ti te tsakal skʼoplal li «tukʼil oʼontonal» taje, jaʼ jun yibel kʼop ti skʼan xal «tsʼakal», «muʼyuk pikbil», «chʼabal xchopolil o chʼabal sbolil». Jtos li hebreo kʼop taje jaʼ chichʼ tunesel kʼalal chichʼ albel skʼoplal li chonbolom chichʼ akʼbel Jeovae. Sventa xchʼam Jeova li chonbolom taje, skʼan ti muʼyukuk ipe xchiʼuk ti chʼabaluk xchopolile (kʼelo Levítico 22:19, 20). Jaʼ yuʼun chopol tajek chil Jeova li buchʼutik mu xchʼunik li mantal taje, yuʼun chakʼik chonbolometik ti koxoe, ti ipe o ti maʼsate (Mal. 1:6-8).

5, 6. 1) ¿Kʼusi chakʼ kiltik ti lek tsʼakal ta jkʼantik li kʼusitike? 2) ¿Kʼu yuʼun mu persauk skʼan ti tukʼil krixchanoutik ta jyalel sventa tukʼuk li koʼontontike?

⁵ Stalel onoʼox ti lek tsʼakal o ti sjunul ta jkʼantik li kʼusitike. Jnopbetik skʼoplal jun vinik ti toj lek xaʼi stsob voʼneal livroetike, vaʼun la sta jlik livro ta xchonobil livroetik ti voʼne xa yakal tsaʼe. ¿Kʼusi van tspas mi laj yil ti skʼan to jayibuk pajina ti toj tsots skʼoplale? Yikʼaluk van xchibaj yoʼonton ta smanel. Jnopbetik skʼoplal jun ants avaʼi xtok ti chbat sman tal slumal semete. Labal to sba chil ti yan sba yutsiltake xchiʼuk ti ep tajeke, tstʼujilan xchiʼuk tskʼelbe lek spat xokontak ta jujuntal. ¿Bu van junukal tstʼuj echʼel xa naʼ? Jaʼ chichʼ echʼel li bu muʼyuk jepem o tsikʼeme. Jaʼ jechtik tspas li Dios eke: jaʼ tsaʼ li krixchanoetik ti tukʼ yoʼontonike, ti lek tsʼakal xkaltike (2 Cró. 16:9).

⁶ Pe yikʼaluk van jakʼbe jbatik mi persa skʼan tukʼil krixchanoutik ta jyalel sventa tukʼuk li koʼontontike. Ta skoj ti jpas mulilutike xuʼ van jnoptik ti xi jkoʼolaj kʼuchaʼal jun livro ti muʼyuk tsʼakale o ti xi jkoʼolaj kʼuchaʼal jun lumal semet ti jepeme. ¿Mi oy jech avaʼioj aba junuk velta? Mi jeche, vuleso me ta ajol ti muʼyuk me batsʼi tukʼ tskʼanutik li Jeovae; muʼyuk tskʼanbutik li kʼusi mu spas kuʼuntike (Sal. 103:14; Sant. 3:2).a Li kʼusi noʼox tskʼane jaʼ ti tukʼuk li koʼontontike. ¿Kʼusi jelel-o un chaʼa li tukʼil krixchano ta jyalel xchiʼuk li tukʼil oʼontonale? Kalbetik skʼoplal. Jnopbetik skʼoplal jun kerem ti poʼot xa xnupune. Mu me lekuk ti tukʼ xa ta jyalel tskʼan li buchʼu chikʼe. Pe lek me ti tskʼan ti akʼo xkʼanat ta sjunul yoʼontone xchiʼuk ti jaʼuk noʼox stuk xkʼanate. Jaʼ jechtik ta stojolal li Jeova eke: «Toj itʼix [y]oʼnton me yan cʼusi [chkichʼtik] ta muqʼue» (Éxo. 20:5). Akʼo mi muʼyuk tskʼan ti tukʼil krixchanoutik xa ta jyalele, pe tskʼan ti akʼo jkʼantik ta sjunul koʼontontike xchiʼuk ti jaʼ noʼox xkichʼtik ta mukʼe.

7, 8. 1) ¿Kʼu yuʼun chkaltik ti toj lek ta chanbel stukʼil yoʼonton li Jesuse? 2) ¿Kʼusi skʼan xal ta Vivlia li tukʼil oʼontonale?

⁷ Yikʼaluk van xvul ta joltik li kʼusi la stakʼ Jesús kʼalal jakʼbat bu jtosukal mantal ti mas tsots skʼoplale (kʼelo Marcos 12:28-30). Maʼuk noʼox laj yal bu junukal li mantale, moʼoj, yuʼun lek tukʼ la xchʼun xtok. Muʼyuk buchʼu yan, jaʼ noʼox Jesús la skʼan ta sjunul yoʼonton li Jeovae, ta sjunul xkuxlejal, snopben xchiʼuk yip. Ta stalelal laj yakʼ ta ilel ti maʼuk noʼox ta xvinaj ta jkʼopojeltik li tukʼil oʼontonale, moʼoj, yuʼun skʼan xvinaj ta kʼusitik ta jpastik xchiʼuk laj yakʼ ta ilel ti jaʼ skʼan stijutik ta spasel kʼalal sak koʼontontike. Jech oxal, mi ta jkʼan tukʼ koʼontontike toj tsots me skʼoplal ti jchanbetik stalelal li Cristoe (1 Ped. 2:21).

⁸ Xkaltik leke, li stukʼil oʼontonal chal ta Vivliae jaʼ skʼan xal ti muʼyuk kʼusi jmalaoj chi j-akʼbat sventa chkichʼtik ta mukʼ li jTotik ta vinajele xchiʼuk ti solel jaʼ noʼox tukʼ koʼontontik ta stojolal li kʼusitik tskʼane xchiʼuk ta sventa li kʼusi tspase. Li krixchanoetik ti tukʼ yoʼontonike jaʼik li buchʼutik chakʼbeik yipal ti akʼo lekuk xil Jeova li kʼusitik tspasike, ti jaʼ tsots skʼoplal chilik ek li kʼusi tsots skʼoplal chil Jeovae. Tana un, jkʼelbetik oxibuk srasonal kʼu yuʼun toj tsots skʼoplal ti tukʼuk koʼontontike.

9. ¿Kʼuxi chkakʼtik ta ilel ti te oyutik ta stojolal li mukʼul pas mantal yuʼun Jeovae?

⁹ Li sderecho ta ajvalilal li Jeovae maʼuk me ta skoj ti tukʼ koʼontontike. Kʼusiuk xalik o kʼusiuk spasik li kʼusitik spasojane, jaʼ onoʼox stuk Mukʼul Jpas mantal ta sjunul vinajel-balumil xchiʼuk muʼyuk-o spajeb jech tspas. Pe oy kʼusitik chopol albil ta vinajel xchiʼuk ta Balumil ta stojolal li Diose xchiʼuk li mukʼul pas mantal yuʼune. Jech oxal, li mukʼul pas mantal yuʼune skʼan me xichʼ pakbel skʼoplal, jaʼ xkaltik, skʼan me jamal snaʼ skotol li kʼusitik pʼij kuxajtik ti jaʼ noʼox oy sderecho ta Mukʼta Jpas mantal li Jeovae, ti lek onoʼox tukʼ snaʼ x-ajvalilaje xchiʼuk ti ta slekil yoʼonton tspase. Li yajrextikoutik Jeovae toj kʼupil chkaʼitik yalbel krixchanoetik li mukʼul pas mantal yuʼun Diose. Pe ¿kʼuxi chkakʼtik ta ilel ti te oyutik ta stojolal li Jeovae xchiʼuk ti jtsakojtik lek ta mukʼ kʼuchaʼal Mukʼta Jpas mantal kuʼuntike? Jaʼ ti tukʼuk jtalelaltik xchiʼuk koʼontontike.

10. ¿Kʼusi chopol chal ta jtojolaltik li Satanase, xchiʼuk kʼusi cha pas ta sventa li jutbil kʼope?

¹⁰ ¿Kʼuxi te tsakal skʼoplal li stukʼil koʼontontik xchiʼuk li mukʼul pas mantal yuʼun Diose? Li Satanase chal ti muʼyuk la junuk krixchano tukʼ chakʼ sba li ta mukʼul pas mantal yuʼun Jeovae xchiʼuk ti muʼyuk la buchʼu chtun ta stojolal ta slekil yoʼontone. Xi laj yalbe Dios ta sat epal anjeletike: «Xuʼ chacʼ cʼusitic yan ta sventa chcʼuxubin sbecʼtal stuc. Yuʼun li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque» (Job 2:4). Mi chkakʼtik lek ventae, maʼuk noʼox la sabe smul li tukʼil Jobe, yuʼun la sabe smul skotol li krixchanoetike. Jaʼ yuʼun «jticʼmulil yuʼun jchʼunolajeletic» sbi ch-albat li ta Vivliae (Apo. 12:10). Tslaban Jeova kʼalal chal ti muʼyuk buchʼu tukʼ chakʼ sba ta stojolale. Jech, li Satanase chal ti ta xkiktatik Jeova sventa ta jpoj jkuxlejaltike. ¿Kʼu yelan chavaʼi yaʼel li jutbil kʼop taje? ¿Mi mu tauk xa kʼan xavakʼ ta ilel yaʼel ti jaʼ jun jut kʼop li Satanase? Xuʼ chavakʼ ta ilel kʼuxi un: jaʼ ti kʼalal tukʼ avoʼontone.

11, 12. 1) ¿Buchʼutik laj kalbetik skʼoplal ti chakʼ kiltik ti tsakal skʼoplal li stukʼil koʼontontik xchiʼuk li kʼusitik ta jnop ta jpastik jujun kʼakʼale? 2) ¿Kʼusi matanal ta jtatik mi tukʼ koʼontontike?

¹¹ Ta sventa ti kʼusi laj kaltike, tsots me skʼoplal ti lekuk kʼusi xkʼot ta nopel kuʼuntik li ta jkuxlejaltik jujun kʼakʼale. ¿Mi xvul ta ajol li oxtos kʼusi laj kalbetik skʼoplal ta slikebal xchanobile? ¿Kʼusi van tspas ta skoj ti vaʼ yelan chkʼot ta pasel li jun krixchano ti tukʼ yoʼontone? Li kereme tskʼan tspak sutel li kʼusi chal xchiʼiltake, pe la snop ti tskʼej sba lokʼele yuʼun vul ta sjol li mantal liʼe: «Voʼoxuc ti lec jcʼanojoxuque, mu me xapac acʼoplal atuquic. Jaʼ acʼbeic spac sutel stuc li Diose. Yuʼun jech tsʼibabil ta scʼop Dios: “Vuʼun oy ta jventa ta xcacʼbe spacol; vuʼun jtuc ta xcacʼbe stoj”» (Rom. 12:19). Li malalil yajtsʼaklom Cristo ti tskʼel aʼyejetik ta Internete xuʼ me xlik skʼel lokʼoletik ti tstij oʼontonal ta lutsʼbaile, pe chvul ta sjol li beiltasel chal Job liʼe: «Li vuʼune calojbe coʼnton o ti muʼyuc ta jpichʼ-oʼnta tsebetique» (Job 31:1). Jaʼ yuʼun la snop ti muʼyuk tskʼel li kʼusitik taje xchiʼuk la sten komel ti xkoʼolaj kʼuchaʼal veneno laj yile. Li ermana ti bu xchiʼuk yan antsetik ti chlik xchopol loʼiltaik yan krixchanoe chvul ta sjol li mantal liʼe: «Li jujunutique jaʼ acʼo jpastic li cʼusi jaʼ sventa slequilal yantique, ti jaʼ sventa tstsatsub o yoʼntonique» (Rom. 15:2). Snaʼoj ti muʼyuk lek chil Jeova li loʼiletik taje, yuʼun maʼuk sventa tstsatsubtasvan xchiʼuk xuʼ sokesbe skʼoplal li jun krixchanoe. Jaʼ yuʼun muʼyuk bu jech xlik loʼilajuk kʼuchaʼal yamigatake, la sjel li loʼile.

¹² Ta jujuntal li yajtsʼaklom Cristo liʼe laj yakʼik ta ilel ti jaʼ Mukʼta Jpas mantal yuʼunik li Jeovae xchiʼuk ti tskʼan tslekubtasbeik yoʼontone. ¿Mi jaʼ jech cha pas ek kʼalal cha nop li kʼusi cha kʼan cha pase? Mi jech cha pase, yakal me cha chʼun li kʼusi chkʼot ta koʼontontik yalojbutik Jeova liʼ ta Proverbios 27:11: «Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale». ¡Jaʼ jun mukʼta matanal ti xkuxet yoʼonton kuʼuntik li Jeovae! ¿Mi mu jechuk ti toj ep sbalil ti chkakʼbetik yipal ti tukʼuk koʼontontike?

13. ¿Kʼuxi laj yakʼ ta ilel Job xchiʼuk David ti jaʼ tskʼel stukʼil koʼontontik sventa chchapanutik li Jeovae?

¹³ Kʼuchaʼal chkakʼtik ventae yakal me chkakʼtik ta ilel ti te oyutik ta stojolal mukʼul pas mantal yuʼun Jeova kʼalal tukʼ koʼontontike. Pe oy to yan srasonal ti kʼu yuʼun skʼan tukʼuk koʼontontike, yuʼun me jaʼ tstsak ta venta Jeova kʼuyelan jtalelaltik kʼalal chchapanutike. Jaʼ jech laj yaʼibe smelolal li Jobe (kʼelo Job 31:6, Ch). Snaʼoj onoʼox ti tspʼisatik yuʼun Jeova li krixchanoetik «ta jun sbisobil ti jbel xale», jaʼ xkaltik, tstunes li stukʼilal ta jyalel sventa tskʼel mi tukʼ koʼontontike. Jaʼ jechtik laj yal David kʼuchaʼal taje: «Mucʼul Dios, voʼot ti chachapan scotol cristianoetique, chapanun me ta sventa ti cʼu yepal lec cʼusi jpasoje, chapanun me ta sventa ti cʼu yepal lec cʼusi jnopoje. Dios, voʼot ti tucʼ avoʼntone, aviloj scotol cʼusitic ta jnopcutic, xanaʼ cʼusi oy ta yut coʼntoncutic» (Sal. 7:8, 9). Jnaʼojtik ti yiloj lek Dios ti kʼukelantike, ti snaʼ kʼusi oy ta jnopbentik xchiʼuk kʼalal to yutil koʼontontike. Mu me jchʼay ta joltik li kʼusi tskʼel Jeovae chaʼa: kʼuchaʼal laj yal Davide jaʼ tskʼel li stukʼil koʼontontike xchiʼuk jaʼ me jech chchapanutik ti kʼuyelan chile.

14. ¿Kʼu yuʼun mu stakʼ jnoptik ti xuʼ tsmak ta be stukʼil koʼontontik ti jpas mulilutike?

¹⁴ Jnoptik avaʼi ti yakal tskʼelbe lek yoʼonton ta smilal xa noʼox miyon jnaklometik ta Balumil li Jeovae (1 Cró. 28:9). ¿Mi mu jechuk ti muʼyuk ep krixchanoetik ti tukʼ yoʼontonik ta stojolale? Jvules ta joltik ti xuʼ me tukʼ koʼontontik ek akʼo mi jpas mulilutike. Jech kʼuchaʼal Job xchiʼuk Davide, oy me lek srasonal kuʼuntik sventa jpat lek koʼontontik ti tukʼ koʼonton chilutik Jeova akʼo mi jpas mulilutike. Jech xtok, ti buchʼu tukʼ ta jyalele, maʼuk me skʼan xal ti yuʼun tukʼ-o yoʼontone. Ti kʼu sjalil tal li kuxlejale, oxvoʼ noʼox krixchanoetik tukʼik ta jyalel, pe muʼyuk tukʼ yoʼonton laj yakʼ sbaik chaʼvoʼ, jaʼ li Adán xchiʼuk Evae. Akʼo mi jech, ta smiyonal noʼox krixchanoetik ti jpas muliletike tukʼ yoʼonton tunemik tal ta stojolal Jeova. Jaʼ yuʼun spas me avuʼun ek.

15. ¿Kʼuxi laj yakʼ ta ilel David ti toj tsots skʼoplal li tukʼil oʼontonal sventa xkiltik xkʼot ta pasel li kʼusi chtale?

¹⁵ Toj tsots me skʼoplal ti tukʼuk koʼontontike, yuʼun me jaʼ tstsak ta venta kʼuyelan jtalelaltik kʼalal chchapanutik li Jeovae; vaʼun jaʼ noʼox me jech xuʼ jpat koʼontontik stael li kʼusi chtale. Jaʼ jech laj yaʼibe lek smelolal David li kʼusi melel taje (kʼelo Salmo 41:12). Spatoj lek yoʼonton ti lek ch-ile yuʼun Dios sbatel osile. Jech kʼuchaʼal li melel jchʼunolajeletik avie, li Davide spatoj yoʼonton chkuxi sbatel osil sventa chtun ta stojolal Dios xchiʼuk ti chnopaj mas ta stojolal jujun kʼakʼale. Yuʼun snaʼoj onoʼox ti chkʼot ta pasel li kʼusi smalaoj mi tukʼ-o yoʼontone. Xuʼ me jpat koʼontontik ti tskoltautik, tsbeiltasutik xchiʼuk chakʼbutik sbendision Jeova mi tukʼ koʼontontik ta stojolal eke.

16, 17. 1) ¿Kʼu yuʼun cha kʼan ti tukʼuk avoʼontone? 2) ¿Kʼusitik chichʼ takʼel li ta yan xchanobile?

¹⁶ Jech li avi eke, li spatobil koʼontontike tskoltautik sventa xi jmuyubaj. Xuʼ chakʼbutik muyubajel sventa stsal kuʼuntik li vokoliletik ta jnuptantike xchiʼuk xuʼ me chchabi li jnopbentike. Jvules ta joltik liʼe, li Vivliae tskoʼoltas ta «smac joltic» li spatobil oʼontonale (1 Tes. 5:8). Jech kʼuchaʼal chmakbat sjol yuʼun skasko li soltaroe, li spatobil koʼontontik eke jaʼ tsmak joltik sventa mu x-och ta joltik li kʼusitik chopole xchiʼuk ti mu jechuk xlik jnoptik kʼuchaʼal li mol balumil ti tijbil yoʼonton yuʼun Satanase. Ti chʼabaluk spatobil koʼontontike chʼabal sbalil jechuk li jkuxlejaltike. Jaʼ yuʼun toj lek me ti ta sjunuluk koʼontontik ti jkʼel kʼukelantike sventa xkakʼtik venta mi tukʼ koʼontontik xchiʼuk mi kuxul li spatobil koʼontontike. Mu me jchʼay ta joltik ti jaʼ jech chkakʼtik ta ilel ti te oyutik ta stojolal li mukʼul pas mantal yuʼun Jeova mi tukʼ koʼontontike xchiʼuk jaʼ me jech te kuxul-o kuʼuntik li spatobil koʼontontik ti toj leke. ¡Tukʼuk-o me koʼontontik ta stojolal Dios!

¹⁷ Ta skoj ti toj tsots skʼoplal ti tukʼuk koʼontontike, li ta yan xchanobile te chalbe lek skʼoplal li sjakʼobiltak liʼe: ¿Kʼusi skʼan pasel sventa tukʼuk koʼontontike? ¿Kʼuxi xuʼ tukʼ-o koʼontontik ta stojolal Dios akʼo mi chkil jvokoltik? ¿Mi oy van kʼusi xuʼ spasik li buchʼutik muʼyuk xa tukʼ yoʼontonike?

[Tsʼibetik ta yok vun]

¿Kʼusi cha takʼ?

• ¿Kʼusi jaʼ li tukʼil oʼontonale?

• ¿Kʼuxi te tsakal skʼoplal li stukʼil koʼontontik xchiʼuk li mukʼul pas mantal yuʼun Jeovae?

• ¿Kʼu yuʼun toj tsots skʼoplal li tukʼil oʼontonal sventa xkiltik xkʼot ta pasel li kʼusi chtale?

[Lokʼol ta pajina 4]

1. Li stukʼil koʼontontik xchiʼuk li mukʼul pas mantal yuʼun Jeovae

[Lokʼol ta pajina 5]

Skotol kʼakʼal chil preva li stukʼil koʼontontike

[Lokʼol ta pajina 6]

2. Jaʼ tskʼel stukʼil koʼontontik sventa chchapanutik li Jeovae

[Lokʼol ta pajina 6]

3. Toj tsots skʼoplal li tukʼil oʼontonal sventa xkiltik xkʼot ta pasel li kʼusi chtale