Mu me xi jtsʼuj yuʼun li kʼusi tspukbe skʼoplal Satanase
«MU XA loʼla abaik. Muʼyuk bu tskoltaoxuk maʼ li aDiosik leʼe. Akʼo abaik ta tsalel, mi moʼoje mas to me tsots chavil avokolik.» Jaʼ jech albatik yuʼun Rabsaces (Rabsaqué) li krixchanoetik ta Jerusalene, ti jaʼ takbil batel yuʼun li ajvalil Senaquerib ta Asiriae. Li soltarotak ajvalil taje laj xaʼox stsalik li slumal Judae, jaʼ yuʼun li kʼusi laj yal li j-ichʼ kʼope jaʼ sventa tsibtas li jnaklejetik ta Jerusalene xchiʼuk ti akʼo yakʼ sbaik ta tsalele (2 Rey. 18:28-35).
Lek ojtikinbil li krixchanoetik ta Asiria ta skoj ti toj echʼem xa noʼox xmajvanik xchiʼuk ti muʼyuk xkʼuxul yoʼontonike. Tstikʼbeik xiʼel ta yoʼonton li yajkontratakike, yuʼun bikʼitik xa chalbeik skʼoplal ti toj echʼ xa noʼox chopol chutik li buchʼutik chchukike. Jech kʼuchaʼal chal li j-al-loʼil Philip Taylore, «ti kʼusi oy ta yoʼontonik kʼalal toj chopol chalbeik skʼoplal ti kʼuyelan ch-ajvalilajik xchiʼuk ti kʼusitik tspukbeik skʼoplale jaʼ ti akʼo xakʼ sbaik ta pasel ta mantal li lumetik ti yichʼojik xa tsalele xchiʼuk sventa tsibtas li yajkontratakik ti xuʼ stsakatik ta kʼope, tspukbeik skʼoplal kʼusitik toj xibal xa noʼox sba xchiʼuk tstikʼbe ta snopben yajkontratakik ti toj echʼ xa noʼox chilbajinike». Jech ta melel, xkoʼolaj kʼuchaʼal jun tsatsal abtejebal li kʼusitik chichʼ pukbel skʼoplale, yuʼun «jaʼ sventa chbat ta jnopbentik» kʼuchaʼal laj yal Taylore.
Li yajtsʼaklomutik Cristo avie «maʼuc ta jpastic cʼop jchiʼuctic li bochʼo oy sbecʼtal, oy xchʼichʼalique. Jaʼ ta jtsal jba jchiʼuctic li pucujetic [...] ti ta icʼ chanovique», jaʼ xkaltik, li chopol kuxlejaletik ti mu xvinaj ta kʼelel ti la stoy sbaik ta stojolal Diose (Efe. 6:12). Jaʼ jbabe yuʼunik li Satanase, yuʼun tsibtasvan ek xchiʼuk oy kʼusitik tspukbe skʼoplal.
Li Diabloe chal ta melel ti chkʼot la ta pasel yuʼun ti muʼyuk tukʼ chkakʼ jbatik ta stojolal Dios jtekeltike. Xi xa onoʼox laj yalbe Jeova ta skʼakʼalil moltotil Jobe: «Li cristianoe xuʼ chacʼ scotol cʼusi oy yuʼun, jaʼ noʼox venta me cuxul chcom stuque». Xkaltikuke laj yal ti muʼyuk xa tukʼ chakʼ sba li krixchanoetik mi ep kʼusi chopol laj yichʼik pasbele (Job 2:4). Pe ¿mi jech van xal? ¿Mi oy noʼox van bu kʼalal xkuch yuʼun li krixchanoe, ti tsvalopatin komel li mantaletik ta Vivlia yoʼ jech kuxul-oe? Veno, taje jaʼ li kʼusi chakʼ akʼo jchʼuntik li Satanase. Jech tspas kʼalal oy kʼusi kʼunkʼun tspukbe skʼoplal ti tsokesvane, ti kʼunkʼun tsokes batel li jnopbentike. Jkʼelbetik skʼoplal jlomuk li kʼusitik tspas o tstunese xchiʼuk jkʼeltik batel kʼuxi xuʼ stsal kuʼuntik.
Krixchanoetik ti «vuchul ta ba pucuctique»
Li Satanase la stunes Elifaz —jun li ta yoxvoʼal amigoiletik ta alel ti ay svulaʼan Jobe— sventa chakʼ ta aʼiel ti toj kʼun li krixchanoetike, jech oxal mu la xkuch yuʼunik prevaetik. Laj yal Elifaz ti «pasbilic ta lum ta achʼel jech chac cʼu chaʼal na pasbil ta achʼel, ti vuchul ta ba pucuctique», xchiʼuk xi to laj yale: «Cʼunic ta vochʼel jech chac cʼu chaʼal cʼusi ochem xjochʼe. Ta jun noʼox cʼacʼal xuʼ lajem scotolic; jʼechʼel chbatic o sbatel osil, muʼyuc xa bochʼo tsnaʼ o» (Job 4:19, 20).
Jech ta melel, li Vivliae tskoʼoltasutik onoʼox ta «lum jech chac chaʼal [li] bine» (2 Cor. 4:7). Ti jech kʼunutike jaʼ ta skoj ti jkuchojtik talel mulil xchiʼuk ti muʼyuk jtukʼiltike (Rom. 5:12). Jaʼ yuʼun mu me xkuch kuʼuntik li kontrainel chakʼ Diablo mi chi jkomtsanat jtuktike. Pe mu me jchʼay ta joltik ti tskoltautik Jeova li yajtsʼaklomutik Cristoe. Oy tajek jbaliltik chil, akʼo mi ep jpaltailtik (Isa. 43:4). Xchiʼuk chakʼbutik xchʼul espiritu xtok mi ta jkʼanbetike (Luc. 11:13). Li chʼul espiritue jaʼ chakʼbutik li «svuʼel stuc li Diose», vaʼun jaʼ jech chkuch kuʼuntik li kontrainel chakʼ Satanase (2 Cor. 4:7; Fili. 4:13). Ta me xakʼ kipaltik Dios xchiʼuk staoj-o me yav koʼontontik mi ta jpastik li kʼusi chichʼ alel liʼe: «Contrainic li pucuje, jʼechʼel oyuc o xchʼunojel avoʼntonic» (1 Ped. 5:8-10). ¡Muʼyuk srasonal ti ta jxiʼtatik li Diabloe!
Li krixchanoe «yuchʼum o cʼotem li cʼusi chopol[e]»
Xi laj yal ta mas jelavel li Elifaze: «Me junuc cristiano muʼyuc bochʼo tucʼ ta stojol Dios; me junuc bochʼo voqʼuem ta jun ants ti muʼyuc smul ta stojol Diose». Vaʼun xi to laj yale: «Me jaʼuc yajʼalmantaltac ti solel lec xa chile, me jaʼuc vinajel ti lec xa oy ta stojole. Jech ¡buuc xa li cristiano ti batsʼi chopol, ti boliben o stalele; ti jaʼ yuchʼum o cʼotem li cʼusi chopol jech chac cʼu chaʼal chuchʼ voʼe» (Job 15:14-16). Li kʼusi la skʼan laj yalbe Job li Elifaze jaʼ ti mu junuk krixchano tukʼ ch-ilat yuʼun Jeovae. Tstunes kʼusitik chopol ta jnoptik xtok li Diabloe. Jaʼ xa tskʼan ti jvul-o tajek koʼontontik li kʼusi chopol jpasojtik ta voʼnee, ti tsots tajek ta jchopol kʼopta jbatike xchiʼuk ti ta jnoptik ti mu xa xi jtukʼibe. Xchiʼuk tskʼan xtok ti akʼo jnoptik ti jpʼel xal li Diose, ti chʼabal xkʼuxul yoʼontone, ti muʼyuk slekil yoʼontone xchiʼuk ti mu skʼan skoltautike.
Melel onoʼox ti «scotol cristiano jpasmuliletic, batsʼi nom oy ta stojolic slequilal li Diose». Muʼyuk onoʼox bu tukʼ xa tajek tspas kuʼuntik li smantaltak Jeova ta skoj ti chʼabal jtukʼiltike (Rom. 3:23; 7:21-23). Pe taje maʼuk skʼan xal ti mu jsetʼuk jbaliltik chile. Li jTotik ta vinajele «snaʼ ti lum achʼelutic noʼoxe», jech oxal oyutik ta yoʼonton xchiʼuk «mu jʼechʼeluc ch-ilin o ta jtojoltic» (Sal. 103:8, 9, 14). Jech xtok un, snaʼoj ti oy buchʼu lek xa chil ti jech jpas mulilutike: «Jaʼ li chon ta voʼonee, jaʼ li banquilal pucuje, jaʼ li Satanase» (Apo. 12:9, 10).
Li Jeovae «toj ep perdón yuʼun» ta stojolal li buchʼutik chopol kʼusi tspas ta xkuxlejalike. Pe taje jaʼ to me mi chiktaike, mi tsutes yoʼontonik xchiʼuk mi bikʼit chakʼ sbaike (Isa. 55:7; Sal. 51:17). «Acʼo me batsʼi cuxul tsoj li [s]mulique, sac chcom jech chac cʼu chaʼal tayo.» (Isa. 1:18.) ¡Taje tspat tajek koʼontontik ti akʼo xkakʼbetik-o yipal spasel li kʼusi tskʼan yoʼonton jTotike!
Mu me xuʼ xkamigointik Dios ta kipal jtuktik ta skoj ti jpas mulilutike. Chʼay yuʼunik tukʼilal xchiʼuk kuxlejal sbatel osil li Adán xchiʼuk Evae, jech oxal chʼayem kuʼuntik jkotoltik ek (Rom. 6:23). Pe ta skoj ti skʼanojutik tajek li Jeovae, oy kʼusi spasoj sventa xichʼ pasel ta perton jmultik mi chkakʼ xchʼunel koʼontontik ti laj yakʼ sba ta matanal li xNichʼone (Mat. 20:28; Juan 3:16). ¡Toj mukʼ xa noʼox laj «yacʼ ta ilel li slequil yoʼnton Diose»! (Tito 2:11.) ¡Oy me xpoxil ti kʼuyelan oyutike! Vaʼun chaʼa, ¿kʼu yuʼun chkakʼ akʼo stikʼ ta jnopbetik Diablo ti mu xa jtatik pertone?
«Picbo avil li sbaquil xchiʼuc li sbecʼtal stuque»
Li Satanase laj yal ta melel ti ta la sten komel Dios li Job mi ipaje. Xi chopol kʼusi laj yalbe li Jeovae: «Picbo avil li sbaquil xchiʼuc li sbecʼtal stuque; te chavil me mu xlic chopolcʼopojuc ta atojol» (Job 2:5). Li Satanás avi eke jaʼ tstunes li kʼusitik kʼuxik chkaʼitike, tskʼan ti akʼo mu xa kʼusi xi jtun-o chkaʼi jbatik ta skoje.
Muʼyuk me bu tspʼajutik Jeova mi mu xa spas kuʼuntik li yabtel jech kʼuchaʼal ta olon tale. Jnoptik avaʼi kʼusi ta jpastik mi oy kʼusi la spasbeik jun kamigotik ti yayijem kome. ¿Mi mas xa van jutuk ta jkʼantik ta skoj ti mu xa jechuk kʼusi spas yuʼun kʼuchaʼal toʼoxe? ¡Moʼoj kʼuxi un! Jech ta jkʼantik-o xchiʼuk ta jchabitik, mas to mi yuʼun jaʼ ta skoj ti tskʼan tskoltautik ti jech yayije. Vaʼun chaʼa, ¿mi mu van jechuk tspas ta jtojolaltik li Jeovae? Xi jamal tstakʼ li Vivliae: «Li Diose tucʼ cʼusi tspas. Mu xchʼay ta yoʼnton ti lec avabtelique, ti chacʼuxubinvanique» (Heb. 6:10).
Li Vivliae chalbe skʼoplal «jun meʼon ants [ti] solel muʼyuc cʼusi oy yuʼun[e]», oy xa van ta sjayibal jabil tskolta sba li ta yichʼel ta mukʼ melel Diose. Li Jesuse laj yil ti «chaʼsep bicʼtal taqʼuin laj yacʼ» ta jun xkaxail matanal takʼine, pe ¿mi laj van yal ti chʼabal sbalil li meʼon antse xchiʼuk ti chʼabal sbalil li matanal laj yakʼe? ¡Muʼyuk kʼuxi un! La skʼupil kʼopta ta skoj ti la spas bu kʼalal xuʼ yuʼun li ta yichʼel ta mukʼ Jeovae (Luc. 21:1-4).
Xuʼ me jnaʼtik ta melel ti muʼyuk yikʼobal xkaltik ti kʼuyelan xkil jbatik xchiʼuk Dios mi tukʼ chkakʼ jbatik ta stojolale, akʼo mi oy vokolil ta skoj chamel, malubel xchiʼuk li yan vokoliletik ta skoj ti jpas mulilutike. Muʼyuk me bu chiktautik Jeova mi tsmakutik jutuk ta yichʼel ta mukʼ ta skoj li vokoliletike (Sal. 71:9, 17, 18).
«Aqʼuic me li smac ajolique, jaʼ ti achʼunoj ti chacolique»
¿Kʼuxi xuʼ jchabi jbatik ta skoj li kʼusi tspukbe skʼoplal Satanase? Jaʼ ti xkakʼ ta jkuxlejaltik li kʼusi chal Pablo liʼe: «Oyuc me lec atsatsalic ta sventa ti jun oyoxuc xchiʼuc li Cajvaltique, xchiʼuc ta sventa li svuʼel ti toj echʼem stsatsale. Lapic me scotol li amaquic, li avabtejebic yacʼoj Diose, yuʼun jech chcuch avuʼunic li loʼlael chacʼ tal li pucuj ti toj lec yaʼyele». Jtos li kabtejebtik ta mantal ti toj tsots skʼoplale jaʼ liʼe: «Li smac ajolique, jaʼ ti achʼunoj ti chacolique» (Efe. 6:10, 11, 17). Sventa mu xi jtsʼuj yuʼun li kʼusitik tspukbe skʼoplal Satanase skʼan me jlap li smak joltik o kasko taje xchiʼuk ti jtunestik-oe. Jech kʼuchaʼal lek makal-o sjol jun soltaro ta skaskoe, «ti jun coʼnton ta jmalatic chijcolutique» —jaʼ xkaltik, ti jpatoj lek koʼontontik ti chkʼot ta pasel yuʼun Dios li jun lekil achʼ balumile— jaʼ me chchabi jnopbentik ta skoj li loʼlael chakʼ Satanase (1 Tes. 5:8). Skʼan baxbolukutik ta xchanel Vivlia sventa kuxuluk ta koʼontontik li spatobil koʼontontike.
¿Kʼu yuʼun kuch yuʼun li tsatsal ilbajinel akʼbat yuʼun Satanás li Jobe? Yuʼun spatoj lek yoʼonton ti oy chaʼkuxesele. Ta skoj ti xchʼunoj leke maʼuk xa laj yikta-o Jeova ti yikʼaluk ox xchame. Moʼoj, yuʼun xi laj yale: «Voʼot cha ikʼvan, voʼon ta jtakʼbot. Oy ta avoʼonton cha chaʼkʼel li yabtel akʼobe» (Job 14:15, NM). Manchuk mi xcham ta skoj ti tukʼ yoʼontone, spatoj lek yoʼonton ti chchaʼakʼbe xkuxlejal tukʼil yajtuneltak Jeova ta skoj ti skʼanojane.
Jaʼ me jech skʼan jpat koʼontontik ta stojolal li melel Diose. Xuʼ me chchʼayes skotol li kʼusitik ta jnuptantik ta skoj Satanás xchiʼuk sviniktake. Mu me jchʼay ta joltik li kʼusi laj yal jtakbol Pablo liʼe: «Li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic» (1 Cor. 10:13).
[Lokʼol ta pajina 20]
Toj ep sbalil chil Jeova ti tukʼ avoʼonton cha pas avabtel ta stojolale
[Lokʼol ta pajina 21]
Jchʼamtik me li smak joltike, ti jaʼ ti jchʼunoj chi jkolutike xchiʼuk jlaptik-o me