Li kʼusi chanubtasvan Jesús ta sventa skʼoplal stuke

«Li Jesuse lek xojtikin sba stuk, snaʼ lek ti bu lik talele, ti kʼu yuʼun tal ta Balumile xchiʼuk snaʼoj ti kʼusi tsnuptane.» (HERBERT LOCKYER, JTSʼIBAJOM)

SVENTA oyuk xchʼunel koʼontontik ta stojolal Jesús xchiʼuk li chanubtaseletik yuʼune, skʼan xkojtikintik lek baʼyel. Skʼan jnaʼtik buchʼu jaʼ, bu lik talel xchiʼuk li kʼusi snutsoj li ta xkuxlejale. Li ta Evanjelio yuʼun Mateo, Marcos, Lucas xchiʼuk Juane te ta jtabetik stakʼobiltak li kʼusitik laj kaltik nakatoe, li kʼusi labal sbae, jaʼ ti ta ye stuk Jesús laj yale.

Oy xa onoʼox kʼalal skʼan toʼox xtal ta Balumile Xi laj yal jun velta li Jesuse: «Cʼalal muʼyuc toʼox li Abrahame, te onoʼox oyun li vuʼune» (Juan 8:58). Li Jesuse vokʼ kʼalal chaʼmil xaʼox jabil xchamel li Abrahame, mi jeche, ¿kʼu yuʼun chkaltik ti oy xa onoʼox kʼalal skʼan toʼox xvokʼ li moltotil taje? «Yuʼun [...] liyal tal liʼ ta banamile», xi laj yalbe smelolal (Juan 6:38).

XNichʼon Dios Manchuk mi ep xnichʼnabtak Dios ti jaʼik li anjeletike, li Jesuse mu xkoʼolaj xchiʼuk li yan anjeletik taje. Li stuke laj yal sba ti jaʼ «li jun noʼox Xnichʼon Diose» (Juan 3:18). Ta skoj ti stuk la spas Dios li Jesuse, jaʼ yuʼun jaʼ li jun noʼox xNichʼon Diose. Skotol li kʼusitik laj yichʼ pasel ta tsʼakale laj skolta xa sba ta spasel li Jesuse (Colosenses 1:16).

«Xnichʼon cristiano» Li jpʼel kʼop taje jaʼ li mas la stunes sventa chalbe sba skʼoplal stuke (Mateo 8:20). Jech laj yakʼ ta aʼyel ti jaʼ batsʼi krixchanoe, maʼuk noʼox jun anjel ti yichʼoj sbekʼtal stakopale, o ti jech noʼox yichʼ sbekʼtal ti jaʼ kʼataj tal li Diose o junuk kuxlejal ti mu xvinaj ta kʼelele. Li Diose la stunes xchʼul espiritu sventa tsjelubtasbe xkuxlejal xNichʼon ta yalajeb jun tojol tseb ti María sbie. Li Jesuse te toʼox kuxul ta vinajel, vaʼun tal vokʼuk ta Balumil kʼuchaʼal jun tukʼil krixchano, jaʼ xkaltik ti chʼabal smule (Mateo 1:18; Lucas 1:35; Juan 8:46).

Mesías ti albil onoʼox skʼoplale Kʼalal xi albat yuʼun jun jsamaria antse: «Caʼbinoj scʼoplal ta xtal ti Mesiase», li Jesuse xi la stakʼbee: «Taje, vuʼunun ti liʼ yacal ta xicʼopoj ta atojole» (Juan 4:25, 26, Ch). Li kʼopetik mesías xchiʼuk cristo, xie, koʼol skʼan xal: «li buchʼu tʼujbile». Jaʼ xkaltik, li Jesuse jaʼ laj yichʼ tʼujel yuʼun Dios sventa xichʼ tsots yabtel li ta kʼusitik yaloj onoʼox tspas Diose.

Li kʼusi tsots yabtel yichʼoje Laj yal stuk li kʼusi yabtel yichʼoje: «Yuʼun chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale» (Lucas 4:43). Akʼo mi melel ti ep kʼusitik lek la spas li Jesuse, li kʼusi mas tsots skʼoplal laj yaʼie jaʼ ti chchol batel li aʼyej ta sventa li Ajvalilal yuʼun Diose. Pe jaʼ to jloʼiltatik ta mas tsʼakal li kʼusi chanubtasvan ta sventa li Ajvalilal taje.

Kʼuchaʼal la jchantik xa tale, chakʼ ta ilel ti maʼuk noʼox kʼuchaʼal yan krixchano li Jesuse.a Jech xtok, ta jchanbetik batel skʼoplal ti mas to ep sbalil li kʼusitik laj yakʼ ta chanel liʼ ta Balumil ta skoj ti te toʼox oy ta vinajele. Jaʼ yuʼun kʼotem ta yutil to yoʼontonik li epal miyon krixchanoetik ta spʼejel Balumil li aʼyejetik laj yale.

[Tsʼib ta yok vun]