Li chʼul espiritu xchiʼuk li kʼusi tskʼan tspas Jeovae

«Li jcʼop chlocʼ ta quee, [...] chcʼot ta pasel scotol.» (ISA. 55:11)

1. Alo kʼuxi jelel kʼalal jpʼel skʼoplal jech tspas ti kʼuyelan snopoj tspas li jun krixchanoe xchiʼuk ti kʼalal oy buchʼu xuʼ sjel sbe ta skoj ti jaʼ mas yakʼoj ta yoʼonton li kʼusi tskʼan tspase.

NOPBO skʼoplal avaʼi chaʼvoʼ jtsʼot karo ti chapalik xa lek sventa chlokʼik batel ta xanbal xchiʼuk skaroik ta jujuntale. Li jun krixchanoe tskʼelbe lek tajek smelolal bu jotukal ch-echʼ batel sventa xkʼot ti bu tskʼan chbat ti muʼyuk tsjel sbee. Li jun eke snaʼoj lek ti bu chbate, pe snaʼoj ti oy jayibuk be xuʼ stam echʼele xchiʼuk oy ta yoʼonton chkʼejpʼuj mi oy kʼusi la snuptane. Taje chakʼ kiltik ti jelel kʼalal jpʼel skʼoplal jech tspas ti kʼuyelan snopoj tspas li jun krixchanoe, jaʼ xkaltik, ti jun noʼox be tstam batele, jelel kʼalal oy buchʼu xuʼ sjel sbe ta skoj ti jaʼ mas yakʼoj ta yoʼonton li kʼusi tskʼan tspase.

2, 3. 1) ¿Kʼusi smakoj li kʼusi tskʼan tspas Diose, xchiʼuk kʼusi la spas Jeova ta skoj ti la stoy sbaik li Adán xchiʼuk Evae? 2) ¿Kʼu yuʼun jech skʼan jpastik ti kʼuyelan chalbutik Jeova ta sventa li kʼusi tskʼan tspase?

² Sventa chkʼot ta pasel yuʼun Jeova li kʼusi tskʼan yoʼontone maʼuk me skʼan xal ti mu xa stakʼ sjel jsetʼuk ti kʼuyelan snopoj tspase (Efe. 3:11). Li kʼusi tskʼan tspas taje te tsakal skʼoplal li kʼusi onoʼox tskʼan ta slikebale: ti xkʼataj ta jun paraiso li Balumile xchiʼuk ti akʼo te xnakiik sbatel osil li krixchanoetik xchiʼuk ti te tskʼupinik lekilal, muyubajel xchiʼuk tukʼilale (Gén. 1:28). Pe kʼalal la spas smul li Adán xchiʼuk Evae oy kʼusi laj yal sventa chakʼ ta aʼyel ti persa chkʼot ta pasel li kʼusi tskʼane (kʼelo Génesis 3:15, Ch). Laj yal ti ch-ayan «snitilul ti antse», ti jaʼ li yajnil Jeova xkaltike, jun Nichʼonil ti jaʼ chakʼbe slajeb li buchʼu la slikes toybaile, li Satanase xchiʼuk ti jaʼ tstukʼibtas li kʼusi sokesoj tale (Heb. 2:14; 1 Juan 3:8).

³ Muʼyuk jtosuk juʼelal ta vinajel o ta Balumil ti xuʼ tsmak ta be sventa mu xkʼot ta pasel li kʼusi tskʼan tspas Jeovae (Isa. 46:9-11). «Chcʼot ta pasel scotol» yuʼun (Isa. 55:10, 11). ¿Kʼu yuʼun? Yuʼun oy jun juʼelal ti toj echʼ xa noʼox tsots sventa xkʼot ta pasel yuʼune, jaʼ li chʼul espiritue. Ta skoj ti te tsakal skʼoplal jkuxlejaltik ta jelavel sventa li kʼusi tskʼan tspas Diose, toj lek me ti jkʼeltik lek ti kʼuyelan chkʼot ta pasele xchiʼuk ti jaʼ jech jpastik ti kʼuyelan chalbutik Jeova ta sventa taje. Jech xtok ta me stsatsubtas xchʼunel koʼontontik mi ta jkʼeltik kʼuxi tstunes xchʼul espiritu li Jeovae. Jaʼ yuʼun chaʼa, jkʼeltik kʼusi yabtel li chʼul espiritu ta voʼnee, kʼusi yabtel li avie xchiʼuk kʼusi yabtel ta jelavel ta sventa li kʼusi tskʼan tspas Diose.

Li yabtel spasoj ta voʼne li chʼul espiritue

4. ¿Kʼuxi yakʼoj tal ta ojtikinel Jeova li kʼusi tskʼan tspase?

⁴ Li ta skʼakʼalil Vivliae kʼunkʼun laj yakʼ tal ta ojtikinel Jeova li kʼusi tskʼan tspase. Ta slikebale «muʼyuc bochʼo la [snaʼ]» buchʼu jaʼ li albil Nitilulale (1 Cor. 2:7). Laj yakʼ echʼuk chaʼmil jabil, vaʼun jaʼ to lik yalbe skʼoplal yan velta taje. Jaʼo kʼalal oy kʼusi laj yalbe ta melel Abraham ti te la sjambe mas smelolale (kʼelo Génesis 12:7; 22:15, 16 xchiʼuk 22:17; 18, NM). Kʼalal «ta sventa ti anitilulale», ti xi laj yale chakʼ ta ilel ti jaʼ skʼoplal jun krixchanoe xchiʼuk ti jaʼ te chlik tal ta yutsʼ yalal li moltotile. Xuʼ jchʼuntik ta melel ti la stsʼetanbe lek xchikinal Satanás li kʼusi laj yichʼ alele xchiʼuk la skʼel lek kʼuxi xuʼ sokes o smak ta be li snitilul Abraham sventa mu xkʼot ta pasel li kʼusi tskʼan tspas Diose. Pe taje mu xmak ta be yuʼun, yuʼun yakal ch-abtej li sjuʼel Diose. ¿Kʼuxi?

5, 6. ¿Kʼuxi la stunes xchʼul espiritu Jeova sventa chchabibe junantik smoltotak li Nitilulale?

⁵ La stunes xchʼul espiritu Jeova sventa chchabi li utsʼ-alaliletik ti bu chvul ta lokʼel li Nitilulale. Jaʼ yuʼun xi laj yalbe li Abrahame (ti Abram toʼox sbie): «Vuʼun jchabivanejun avuʼun» (Gén. 15:1). Pe mu jecheʼuk noʼox laj yal. Jnoptik avaʼi li kʼusi kʼot ta pasel ta 1919 kʼalal maʼuk toʼox jkʼakʼaliltike. Kʼalal batik ta naklej xchiʼuk yajnil ta Gerar kʼuk sjalil li Abrahame, li ajvalil Abimeleque laj yikʼ echʼel li Sarae, yuʼun chikʼ yaʼi ta skoj ti mu snaʼ mi malijeme. ¿Mi jaʼ van junuk spetsʼ Satanás sventa mu xil junuk yalab xnichʼnabik li Abraham xchiʼuk Sarae? Muʼyuk bu tsjambe smelolal Vivlia taje, pe ti kʼusie chakʼ kiltik ti oy kʼusi la spas Dios xchiʼuk laj yalbe ta xvayich li ajvalil ti mu me kʼusi spasbe li antse (Gén. 20:1-18).

⁶ Pe taje maʼuk noʼox jun velta jech la spas Jeova sventa tskolta li Abraham xchiʼuk yutsʼ yalale (Gén. 12:14-20; 14:13-20; 26:26-29). Jaʼ yuʼun oy lek srason li jtsʼibajom yuʼun salmo kʼalal xi laj yale: «Li Mucʼul Diose mucʼ xacʼ lajicuc ta utsʼintael [li Abraham xchiʼuk li snitilultake]; laj yalbe tsots mantal li mucʼtic ajvaliletique, jech laj yalbe: “Mu me xavacʼ acʼobic ta stojol li cuʼuntaque; mu me cʼusi chopol xapasbeic li jʼalcʼopetic cuʼune”» (Sal. 105:14, 15).

7. ¿Kʼuxi la xchabi Jeova li steklumal Israele?

⁷ Jech xtok, la stunes xchʼul espiritu Jeova sventa chchabi li steklumal Israel ta voʼne ti jaʼ te chvokʼ li albil Nitilulale. Baʼyuke laj yakʼ ta naʼel li sMantal Moisés sventa jech oyuk-o li melel relijione xchiʼuk jaʼ chchabi-o steklumal xtok sventa mu sokik ta mantal, ta stalelalik xchiʼuk ta sbekʼtal stakopalik (Éxo. 31:18; 2 Cor. 3:3). Jech li ta skʼakʼalil jchapanvanejetik xtoke laj yakʼbe xchʼul espiritu jlom viniketik sventa skoltaik li steklumal Israel ta skoj li yajkontraike (Jue. 3:9, 10). Ti jayib to siglo echʼ tal jaʼ to ti kʼalal vokʼ li Jesuse —li bankilal nitilulale—, ta batsʼi melel la stunes xchʼul espiritu Jeova sventa te oyuk-o li Jerusalén, Belén xchiʼuk chʼulna, lumetik ti te skʼoplal li ta albil kʼopetik ta sventa Mesiase.

8. ¿Kʼusitik chakʼ kiltik ti abtej ta xkuxlejal xNichʼon Dios li chʼul espiritue xchiʼuk li ta chol mantal la spase?

⁸ Li chʼul espiritue tsots yabtel la spas li ta xkuxlejal Cristoe xchiʼuk li ta chol mantal la spase. Veno, tsots abtej kʼalal oy kʼusi la spasbe ta yalajeb li tojol tseb Mariae, yuʼun oy kʼusi kʼot ta pasel yuʼun ti muʼyuk bu xkaʼitik-o jeche: ti la xchiʼin xchiʼuk ti la svokʼes jun tukʼil olol jun jpas mulil antse, li olol taje muʼyuk xkuchoj mulil xchiʼuk muʼyuk bu xkuchoj li lajelale (Luc. 1:26-31, 34, 35). Jech xtok, la xchabi sventa mu xcham ta sbikʼtal li Jesús ti kʼalal mu to chkʼot yoraile (Mat. 2:7, 8, 12, 13). Vaʼun kʼalal yichʼoj xaʼox van 30 jabil li Jesuse laj yichʼ tʼujel ta chʼul espiritu, jaʼ jech laj yichʼ biiltasel sventa x-och ta ajvalil ta xkʼexol David xchiʼuk laj yichʼ yabtel ta xcholbel skʼoplal li Ajvalilal yuʼun Diose (Luc. 1:32, 33; 4:16-21). Koliyal li chʼul espiritue ep skʼelobiltak juʼelal la spas, la xpoxta jchameletik, laj yepajes veʼlil xchiʼuk la xchaʼkuxes animaetik. Ti kʼusitik labalik sba la spas taje chakʼ jnabetik skʼoplal jutuk li bendisionetik ta jtatik kʼalal ch-ajvalilaje.

9, 10. 1) ¿Kʼusi chakʼ kiltik ti oy ta stojolalik chʼul espiritu li yajtsʼaklomtak Cristo ta baʼyel sigloe? 2) ¿Kʼusi achʼ laj yakʼ ta naʼel chʼul espiritu ta baʼyel siglo sventa xkʼot ta pasel li kʼusi tskʼan Diose?

⁹ Li ta Pentecostés ta sjabilal 33 la stunes Jeova li yip ch-abtej sventa lik stʼuj li itsʼinal ta snitilulal Abrahame, ti jaʼik yajtsʼaklomtak Cristo ti maʼukik ta snitilul moltotil Abrahame (Rom. 8:15-17; Gál. 3:29, Ch). Jamal lek xvinaj ti ch-abtej chʼul espiritu ta stojolalike, yuʼun ta sjunul yoʼonton chcholik mantal xchiʼuk ti tspasik skʼelobiltak juʼelale (Hech. 1:8; 2:1-4; 1 Cor. 12:7-11). Koliyal ti jech la spasik skʼelobil juʼelale jaʼ jech oy kʼusi achʼ laj yakʼ ta naʼel chʼul espiritu sventa xkʼot ta pasel li kʼusi tskʼan Diose: akʼo mi oy xaʼox ta sjayibal siglo tstunes Jeova ti kʼuyelan chichʼ ichʼel ta mukʼ te ta chʼulna ta Jerusalene la sjel, jaʼ xa lik stunes li stsobobbail yajtsʼaklom Cristo ti tʼujbil chbatik ta vinajele xchiʼuk ti toj echʼem chtun sventa xkʼot ta pasel li kʼusi tskʼan tspase.

¹⁰ Kʼuchaʼal laj xa kiltike, ep tajek bu la stunes xchʼul espiritu li Jeovae, la stunes sventa chchabi li yajtuneltake, li kʼusitik labalik sba la spasike xchiʼuk ti laj yichʼik tʼujele. Jaʼ jech bikʼitik oy kʼusi la spas sventa xkʼot ta pasel li kʼusi tskʼan yoʼontone. ¿Kʼusi xuʼ xkaltik li ta jkʼakʼaltike? ¿Kʼuxi tstunes xchʼul espiritu sventa spas batel li kʼusi tskʼan tspase? Toj jtunel me ti jnabetik li stakʼobiltake, yuʼun skʼan jmoj xi j-abtej xchiʼuk li chʼul espiritue. Jech oxal chaʼa jkʼeltik echʼel chantos kʼuxi yakal tstunes xchʼul espiritu Dios li avie.

Li yabtel tspas avi li chʼul espiritue

11. ¿Kʼusi chakʼ kiltik ti chkoltaat yuʼun chʼul espiritu li steklumal Dios sventa sakuk-oe, xchiʼuk kʼuxi chakʼik ta ilel ti chakʼ sbaik ta beiltasel ta stojolal chʼul espiritu li yajtsʼaklomtak Cristoe?

¹¹ Baʼyel, li chʼul espiritue jaʼ chakʼ ti sakuk-o li melel yajtsʼaklomtak Cristoe. Skʼan sakuk stalelalik li viniketik xchiʼuk antsetik ti tskolta sbaik sventa xkʼot ta pasel li kʼusi tskʼan tspas Jeovae (kʼelo 1 Corintios 6:9-11). Kʼalal skʼan toʼox x-ochik ta mantal junantike chmulivajik, tsloʼla xchiʼilik ta nupunel, tskʼupin xchiʼilik ta vinikal o ta antsil xchiʼuk oy junantik ti tsʼunul lek ta yoʼontonik li mulile (Sant. 1:14, 15). Pe sjeloj xa xkuxlejalik sventa lek x-ilatik yuʼun li sTotik ti kʼanvanem tajeke, jaʼ yuʼun chal Vivlia ti «pocbil[ik] xa[e]». ¿Bu tsta yipalik sventa stsal yuʼunik li kʼusitik chopol tskʼanike? Kʼuchaʼal chal 1 Corintios 6:11 jaʼ «ta sventa li Espíritu yuʼun Dios cuʼuntique». Kʼalal sak-o xkuxlejalike jaʼ te chakʼik ta ilel ti xchʼamojik kʼuchaʼal jun ipalil ti tsots ch-abtej ta xkuxlejalik li chʼul espiritue.

12. 1) Jech kʼuchaʼal akʼbat yil yuʼun Dios li Ezequiele, ¿kʼuxi tsbeiltas s-organisasion li Jeovae? 2) ¿Kʼuxi chkakʼtik ta ilel ti jmoj chi j-abtej xchiʼuk li chʼul espiritue?

¹² Xchibal, li Jeovae tstunes s-espiritu sventa tsbeiltas batel li s-organisasion ti bu tskʼane, ti oy jvokʼ ta Balumil xchiʼuk ta vinajele. Li kʼusi akʼbat yil yuʼun Dios li Ezequiele te chichʼ koʼoltasel ta jkot kareta li jvokʼ s-organisasion ta vinajele, ti mu kʼusi xuʼ spajesat sventa xkʼot ta pasel yuʼun li kʼusi tskʼan tspas Diose. ¿Kʼusi chujat-o batel li kareta taje? Jaʼ li chʼul espiritue (Eze. 1:20, 21). Jech xtok, tsbeiltas li jvokʼ s-organisasion Jeova liʼ ta Balumile. Jaʼ yuʼun kʼalal tukʼ koʼonton ta jchʼunbetik smantale, jaʼ me jech jmoj chi jxanav echʼel xchiʼuk li skareta Jeovae xchiʼuk jmoj chi j-abtej xchiʼuk li chʼul espiritue (Heb. 13:17).

13, 14. 1) ¿Buchʼu skʼoplal «li cristianoetic ti liʼ to cuxulic» xi Jesuse? 2) Albo junuk skʼoplal li kʼusitik melel ta Vivlia ti yakal tsjambe echʼel skʼoplal li chʼul espiritue, (kʼelo li rekuadro «¿Mi jnaʼojtik li kʼusitik achʼ jambil tal smelolale?»).

¹³ Yoxibal, li chʼul espiritue kʼunkʼun tsjambe batel smelolal li kʼusitik chakʼ ta chanel Vivliae (Pro. 4:18). Oy xa ta sjaylajunebal jabile, li revista liʼe jaʼ chichʼ tunesel sventa tsjambe mas smelolal kaʼitik mantal li «jʼabtel ti jun [«tukʼ», NM] yoʼnton [...], ti lec bije» (Mat. 24:45). Kalbetik skʼoplal li jpʼel kʼop la stunes Jesús «li cristianoetic ti liʼ cuxulic ta orae», ti xiʼe (kʼelo Mateo 24:32-34). ¿Buchʼutik skʼoplal taje? Jech kʼuchaʼal chal li xchanobil «¿Kʼusi smelolal ta akuxlejal ti liʼ xa oy li Cristoe?» ti xie, te chal ti maʼuk la skʼoplal li chopol krixchanoetike, moʼoj, yuʼun jaʼ skʼoplal li yajtsʼaklomtak ti poʼot xaʼox xichʼik tʼujel ta espiritue.a Kʼalal mi kʼot ta pasel li albil kʼope —ta baʼyel siglo xchiʼuk li avie—, jaʼ me chilbeik senyail li tʼujbil yajtsʼaklomtak Cristoe, pe maʼuk noʼox taje yuʼun chaʼibeik smelolal xtok, jaʼ ti «poʼot xa yoraile», jaʼ xkaltik, ti liʼ xa oy ta tiʼna li Cristoe.

¹⁴ ¿Kʼusi smakoj taje? «Li cristianoetic ti liʼ to cuxulic» ti xie mu jnaʼtik kʼu sjalil smakoj taje, akʼo mi jech, skʼan me jtsaktik ta venta liʼe: li jpʼel kʼop «ti liʼ to cuxulic» xie, jaʼtik onoʼox chalbe skʼoplal krixchanoetik ti jeltostik sjabilalik ti koʼol kuxulik te van buuk ora ti tsjelilan sba xkuxlejalike, ti muʼyuk mas toj jale xchiʼuk ti oy noʼox spajebe (Éxo. 1:6). Jech oxal chaʼa, ¿kʼuxi skʼan xkaʼibetik smelolal kʼalal «li cristianoetic ti liʼ to cuxulic» xi Jesuse? Taje jaʼ chakʼ ta ilel ti tsta sba xkuxlejalik li tʼujbil yajtsʼaklomtak Cristo ta 1914 kʼalal liʼik toʼox ta Balumile —kʼalal lik vinajuk senyail ti liʼ xa oy li Cristoe— xchiʼuk li buchʼutik tʼujbil ti chilik chlik li mukʼta tsatsal vokolile. Li krixchanoetik ti liʼ to kuxulike oy slikeb xchiʼuk oy slajeb. Ti yakal chkʼotanuk ta pasel ti kʼusi smakoj li senyaile jaʼ chakʼ ta ilel ti toj nopol xa li mukʼta tsatsal vokolile. Jaʼ xa me yorail ti vikʼiluk jsatike xchiʼuk ti oyuk kʼusi jpastik ta anile (Mar. 13:37). Mi jech ta jpastike, yakal me chkakʼtik ta ilel ti jnaʼojtik lek ti kʼuyelan yakal chjam batel smelolal li kʼusitik melel ta Vivliae xchiʼuk ti ta jchʼuntik li beiltasel chakʼ chʼul espiritue.

15. ¿Kʼuxi jnaʼojtik ti chakʼ kiptik li chʼul espiritu sventa jcholtik li lekil aʼyeje?

¹⁵ Xchanibal, li chʼul espiritue chakʼbe stsatsal yoʼonton li jcholmantaletike (Hech. 1:8). Ti muʼyukuke, ¿mi kʼotem van ta spʼejel Balumil xa naʼ li lekil aʼyeje? Jnoptik ta sventa liʼe. Yikʼaluk van xi jtsʼijet noʼox xchiʼuk yikʼaluk van oy xi laj kaltike: «Li voʼone mi jaʼuk onoʼox ta jchol mantal ta naetik». Pe li avi une ta sjunul koʼontontik ta jcholtik li mantale.b Xchiʼuk toj ep li yajrextikotak Jeova ti mu xikta sbaik ta chol mantal akʼo mi oy kontrainel o nutsele. Li kʼusi tsta-o yipalik sventa stsal yuʼunik li vokoliletik taje jaʼ li chʼul espiritue xchiʼuk ti jaʼ chkoltaatik ta spasel li abtelaletik ti mu spas kuʼun ta kipal jtuktike (Miq. 3:8; Mat. 17:20). Jaʼ yuʼun chaʼa, kʼalal ta jcholtik echʼel bu kʼalal xuʼ kuʼuntik li mantale yakal me ta jkoltatik li chʼul espiritue.

Li yabtel tspas ta tsʼakal li chʼul espiritue

16. ¿Kʼu yuʼun jpatoj lek koʼontontik ti chchabi steklumal Jeova li ta mukʼta tsatsal vokolile?

¹⁶ Ta mas tsʼakale, toj labal me sba kʼuxi tstunes Jeova li xchʼul espiritu sventa chakʼ kʼotuk ta pasel li kʼusi tskʼan tspase. Ta baʼyele tstunes sventa chchabivan-o. ¿Mi mu jechuk ti laj xa onoʼox stunes sventa chchabi jlom yajtuneltak xchiʼuk li steklumal Israele? Veno, toj ep me srasonal kuʼuntik sventa jpat lek koʼontontik ti tstunes yan velta sventa chchabi li steklumal ta mukʼta tsatsal vokolile. Mu me stakʼ ti jnopilanbetik xa skʼoplal ti kʼu van yelan chchabiutik li vaʼ kʼakʼal taje. Ta skoj ti jkʼanojtik li Jeovae jpat lek koʼontontik ta sventa li kʼusi chtal ta jelavele, yuʼun muʼyuk kʼusi xuʼ xchʼakutik li ta sate xchiʼuk li ta xchʼul espiritue (2 Cró. 16:9; Sal. 139:7, NM; 139:8-12).

17. ¿Kʼuxi tstunes xchʼul espiritu ta achʼ balumil li Jeovae?

¹⁷ ¿Kʼuxi tstunes xchʼul espiritu ta achʼ balumil li Jeovae? Ep kʼuxi tstunes, june jaʼ sventa tspas li balbal vunetik ti jaʼ to te chlokʼe (Apo. 20:12). ¿Kʼusi chal li balbal vunetik taje? Yaʼeluke jaʼ li mantaletik chtun kʼalal jaʼo li Ajvalilal ta Jmil Jabile. Solel ta xa jkʼan ta jkʼeltik li balbal vunetike xchiʼuk ti jkʼupintik li yan bendisionetik ta Paraisoe. Mu xa noʼox xnop kuʼuntik kʼuyelan li kuxlejal vaʼ kʼakʼale, ti kʼalal chkʼot ta pasel ta xchʼul espiritu Jeova li kʼusi tskʼan ta sventa li Balumile xchiʼuk ta sventa li buchʼutik te chnakie.

18. ¿Kʼusi skʼan jpʼeluk ta koʼontontik?

¹⁸ Mu me jchʼay ta joltik ti persa chkʼot ta pasel li kʼusi tskʼan tspas Diose, yuʼun oy jun juʼelal ti stuk xa noʼox toj tsots sventa xkʼot ta pasel yuʼune, jaʼ li chʼul espiritue. Ta skoj ti te kapal jkʼoplaltik ta sventa li kʼusi tskʼan tspas Diose, jkʼanbetik me Jeova li s-espiritue xchiʼuk kakʼtik sbeiltasutik (Luc. 11:13). Jaʼ me jech ta jtatik li kʼusi onoʼox tskʼan ta sventa li krixchanoetike: li kuxlejal sbatel osil ta Paraisoe.

[Tsʼibetik ta yok vun]

¿Mi laj kaʼibetik smelolal?

• ¿Kʼuxi la stunes xchʼul espiritu Jeova ta skʼakʼalil Vivlia sventa xkʼot ta pasel li kʼusi tskʼan tspase?

• ¿Kʼuxi tstunes xchʼul espiritu avi li Jeovae?

• ¿Kʼuxi tstunes xchʼul espiritu ta jelavel li Jeova sventa xkʼot ta pasel li kʼusi tskʼan tspase?

[Rekuadro ta pajina 10]

¿Mi jnaʼojtik li kʼusitik achʼ jambil tal smelolale?

Yakal chakʼbe-o yil sakil osil ta mantal li steklumal Jeovae. ¿Kʼusi sjamojbe tal smelolal Li Jkʼel osil ta toyole?

▪ ¿Kʼusi jtosukal skʼoplal chʼiel ta mantal chakʼ ta ilel li svolesobil xchʼut pan ta lokʼolkʼope? (Mat. 13:33; 15 yuʼun julio ta 2008, pajina 19, 20.)

▪ Laj yichʼ aʼibel smelolal ti ta 1930 batel paj stʼujel li yajtsʼaklomtak Cristo ti chbatik ta vinajele. ¿Kʼusi ti jaʼ to laj yichʼ aʼibel smelolale? (15 yuʼun enero ta 2008, pajina 22, 23.)

▪ Laj yichʼ aʼibel smelolal ti jaʼ te tsakal skʼoplal ta jecheʼ relijion li lokʼolkʼop ta sventa li sbekʼ mostasae. ¿Kʼusi ti jaʼ to laj yichʼ aʼibel smelolal li ta lokʼolkʼope? (Mar. 4:30-32; 15 yuʼun julio ta 2008, pajina 17, 18.)

▪ Li nutiʼ stsakobil choye laj yichʼ aʼibel smelolal ti jaʼ skʼoplal li buchʼutik chalik ti jaʼik yajtsʼaklomtak Cristoe, te skʼoplal li melel yajtsʼaklomtak Cristoe xchiʼuk li buchʼutik jecheʼ tskuy sbaike. ¿Kʼusi ti jaʼ to laj yichʼ aʼibel smelolale? (Mat. 13:47-50; 15 yuʼun julio ta 2008, pajina 20, 21.)

▪ Li lokʼolkʼop ta sventa li trigo xchiʼuk chopol jobel ti te chichʼ alel kʼuxi chichʼ tsʼunel li tsʼunobile laj yichʼ aʼibel smelolal ti jaʼ la skʼoplal kʼuxi chichʼ cholel echʼel li mantale. ¿Kʼusi ti jaʼ to laj yichʼ aʼibel smelolale? (Mat. 13:24-30; 15 yuʼun marso ta 2010, pajina 19-22.)