Muʼyuk xa chiʼtaik li kʼusitik chlaj skʼoplale

XCHʼUNOJIK lek ti chtal xaʼox li slajebal Balumil li Gary xchiʼuk Karene, jech oxal bat nakiikuk ta bikʼit lum kʼalal poʼot xaʼox sta batel sjabilal 1980. Lik stsʼun o tspas stukik li kʼusitik chtun yuʼunike, yuʼun la snopik ti jaʼ noʼox jech xuʼ xkuxiik komele.

Jech oxal, la sman slivroik, la stikʼ sbaik ta chanob vunetik xchiʼuk kursoetik sventa xchambel skʼoplal tsʼunolajel xchiʼuk la xchiʼinik ta loʼil epal krixchanoetik sventa sjakʼbe yaʼyejik. La stsʼunik itajetik xchiʼuk 50 ta tekʼ pekʼux teʼetik ti stakʼ lobel sate, la skʼejik bekʼ tsʼunobaletik xchiʼuk yabtejebik, la xchanik yabtelanel li osile xchiʼuk snakʼel li kʼusitik x-ayan yuʼunike. ¡Chanubtasatik yuʼun jun yamigaik ta smilel chonetik xchiʼuk stakijesel bekʼet! Sventa mi oy junukal kʼakʼal laj li sveʼelike, li Karene lik yojtikin tsʼiʼleletik xchiʼuk yibel kʼusitik ta teʼtik ti stakʼ lajesele. Li Gary xtoke la xchan slokʼesel combustible ta ixim, la spas skosinaik ti bu tstunesik siʼe xchiʼuk la snojesik ta kʼusitik chtun yuʼunik li snaike sventa mu persauk jaʼ to chlokʼ saʼik.

«Ta skoj li kʼusitik chopol chkʼot ta pasel toʼox ta sjunul balumile, nopol xaʼox tajek chkaʼi li slajebal kuxlejal liʼ ta balumile», xi li Karene. Jech toʼox chaʼi ek li Garye: «Jech kʼuchaʼal tspasik toʼox epal chex jchʼieletike, la jtikʼ jba xchiʼuk jtsop krixchanoetik ti kontra chilik li pas kʼop ta Vietname, li buchʼutik tstoy sbaik ta skoj ti yan-o stsʼunbalike xchiʼuk li manbail ta takʼine. Pe ta jlikel noʼox ichibaj koʼonton. Kʼot ta nopel kuʼun ti ta skoj noʼox krixchano chlaj li krixchanoetike».

Xi chal ta tsʼakale: «Ta jun akʼobal kʼalal li xokob jutuke, la jtsak jun Vivlia xchiʼuk la jkʼel sliklej li Achʼ Testamentoe. Li ta yan xchanibal akʼobal tale, mas xa kʼunkʼun la jkʼel. Ta svoʼobal xaʼox kʼakʼale, xi laj kalbe ta sob li Karene: “Oyutik xa ta slajebal kʼakʼal. Mu xa jaluk skʼan sventa tslokʼes kʼusitik chopol ta Balumil li Diose, jech oxal, skʼan xi jbat xchiʼuk li buchʼutik kuxul chkomike xchiʼuk jaʼ xbat jchiʼintik”», xkut. Ta anil noʼox lik saʼilanik ta jujot relijion.

Mu ta sjaliluk, kʼot jun yajrextiko Jeova ta snaik, xchiʼuk jech lik xchanik Vivlia. Xi tsloʼilta li Karene: «Xi muyubaj noʼox tajek ti oy buchʼu chalbun smelolal li kʼusi chchanubtasvan ta sKʼop Diose. Jal xaʼox yakalun saʼel stakʼobil ta sventa li slajebal balumile. Pe li avie, laj xaʼox jta li melele. Li avie la jchan ti oy spatobil oʼontonal sventa jun kuxlejal ta tsʼakale. Xchiʼuk mas nopol lik kaʼi jba ta stojolal li Jeova Diose, li jTotik ta vinajele xchiʼuk li Buchʼu la spas li kʼusitik ta vinajel-balumile».

Xi chal li Gary eke: «Lik sta mas smelolal li jkuxlejale. Mu xa stakʼ xkikta ikaʼi xchanel li Vivliae. Kʼalal la jkʼel ta sventa li albil kʼopetike xchiʼuk laj kakʼ venta ti yakal chkʼotanuk ta pasele, kʼot ta koʼonton ti mu xa jaluk skʼan xtal xchapan Dios li kʼusitik chkʼot ta pasele. Xvul ta jol ti xi la jnope: “Li kʼusi tsots skʼoplale jaʼ ti jchapan jbatik sventa chi jkuxi jech kʼuchaʼal lek chil li Diose, maʼuk ta skoj ti chtal li lajebal ta spʼejel Balumile”». Kʼalal la xchanik ti kʼusi kʼupil sba chkʼot ta pasel ta Balumile, mu xa bu laj yat yoʼontonik sventa li slajebal balumile. Laj yakʼik venta ti Diose poʼot xa ta slajes skotol li kʼusitik chakʼbe svokol li krixchanoetike xchiʼuk ti ta skʼatajes ta jun paraiso li Balumile.

¿Kʼusi tsnopik tana un ti echʼ xa 25 jabile? Xi chal li Karene: «Yantik-o xchʼi batel ti kʼuyelan ta jkʼan li Jeovae xchiʼuk li xchʼunel koʼontone. Chkakʼ persa sventa xojtikin li yan krixchanoetike xchiʼuk sventa skʼanik ek. Ta xkakʼbekutik yipal xchiʼuk jmalal sventa tsotsuk li kutsʼ kalalkutike xchiʼuk ti junuk koʼontonkutik ta spasbel yabtel Diose. Chkakʼbekutik yipal sventa lek jsabekutik yorail skotol li kʼusitik ta jpaskutike xchiʼuk sventa lekuk noʼox li jkuxlejalkutike. Jech taje, xuʼ xkakʼ koʼontonkutik ta skoltael li yan krixchanoetike».

Xi chal li Gary eke: «Skotol kʼakʼal ta jkʼanbe Dios ti akʼo xa taluk li Ajvalilal yuʼune sventa spajesbe svokol li epal miyon krixchanoetike. Jujukoj kʼalal chbat jcholbe jlakʼnatak li lekil aʼyej taje, ta jkʼanbe vokol Jeova akʼo skoltaun sventa jpatbe yoʼonton ta sventa kʼusitik chal Vivlia akʼo mi kʼajomal jun noʼox krixchano. Li Jeovae skoltaojun spasel talel jech li vaʼ 25 jabil xa echʼe. Manchuk mi jnaʼoj xchiʼuk Karen ti oy kʼusitik tsots chkʼot ta pasel ta Balumil ta tsʼakale, mi jaʼuk xa chkat koʼontonkutik ta sventa li slajeb kʼusitik chlaj skʼoplale» (Mateo 6:9, 10; 2 Pedro 3:11, 12).

[Lokʼol ta pajina 9]

Li Gary xchiʼuk Karene tspatbeik yoʼonton yantik sventa li kʼusitik chal Vivliae