«¡Jaʼ to la jta li melel kolebale!»

LI JKUXLEJAL TOʼOXE:

Te livokʼ ta Moundsville jun jteklum ti lek noʼox kuxlejal tee, ta tiʼ ukʼum Ohio, te xbat ta snorteal Virginia Occidental, Estados Unidos. Li ta jnae mu xijchʼajub, yuʼun chanvoʼ alab nichʼnabilunkutik, li voʼone xchaʼvoʼalun, oxvoʼ keremunkutik xchiʼuk jun jtsebalkutik. Li jtot jmeʼe lek stalelalik xchiʼuk lek baxbolik, skʼanojik li krixchanoetike; maʼuk jkʼulejunkutik, pe muʼyuk la spas palta li kʼusitik chtun kuʼunkutike. Ta skoj ti jaʼik stestigo Jeovae, laj yakʼik persa sventa ta jbikʼtalkutik noʼox xkojtikinkutik li beiltaseletik ta Skʼop Diose.

Akʼo mi jech, kʼalal chex keremun xaʼoxe mu xaʼox masuk oy ta koʼonton li chanubtaseletik taje. Mu xaʼox jchʼun lek mi melel ti xuʼ xakʼ muyubajel li beiltaseletik ta Vivliae. Li kʼusi xa noʼox chakʼ muyubajel chkaʼie jaʼ mi kolemun noʼox ta spasel ti kʼusi tskʼan koʼontone. Jech oxal, muʼyuk xa libat li ta tsobajeletik sventa yajtsʼaklom Cristoe. Jech lik spasik ek li jbankile xchiʼuk li kixlele. Li jtot jmeʼe laj yakʼik persa la skoltaunkutik, pe ta skoj ti ta jtoy jbakutike la jpʼajkutik.

Ta skoj ti ta jkʼan kolemun noʼox ta spasel ti kʼusi tskʼan koʼontone mu jaluk lik meʼinuk ta koʼonton li kʼusitik chopole. Jun velta kʼalal naka toʼox lilokʼ ta chanune, jaʼo chibat ta jna, oy jun kamigo ti la syebun jun sikʼolale, la jchʼam. Jaʼ jech lik jpas yan kʼusitik chopol ti tsokesvane, lik jtunes droga, lik kuchʼ pox xchiʼuk lik mulivajkun. Oy jayibuk jabil ti mas xa tsotsik droga lik jtunese, jaʼ yuʼun, junantike meʼin tajek ta koʼonton. Pe maʼuk noʼox, yuʼun li-och ta chon droga xtok sventa jtabe stojol li kʼusitik meʼinem ta koʼonton slajesele.

Ta jpasilan persa spajtsanel li jol koʼontone, pe bu chata te xvulvun ti oy kʼusi chopol ta jpase. Xi chkalilanbe jbae: «Jecheʼ xa, yuʼun ep xa kʼusi chopol la jpas». ¡Ep ta velta jtuk tajek laj kaʼi jba xchiʼuk li-ipaj ta at-oʼonton akʼo mi ep buchʼutik ta jpat jxokon li ta kʼinetik xchiʼuk li butik chkʼot jkʼejimoletike! Bateltike, chtal ta jol ti jaʼ lekil krixchanoetik li jtot jmeʼe, jech oxal ta jakʼilanbe jba kʼuxi xa noʼox ti lisok tajeke.

TI KʼUYELAN LA SJEL JKUXLEJAL LI VIVLIAE:

Kaloje chʼayemal keremun xaʼox, pe mu jechuk tsnopik ta jtojolal li yantike. Li jtot jmeʼe laj yalbeikun mi chbat jchiʼinik ta jun mukʼta tsobajel ta oxib kʼakʼal yuʼun stestigotak Jeova li ta jabil 2000. Akʼo mi mu junuk koʼonton, libat onoʼox. Pe labal to kil ti jech la spasik li jbankil xchiʼuk kixlel ti namajemik toʼox eke.

Kʼalal te xaʼox oyun li bu echʼ mukʼta tsobajele, vul ta jol ti oy xaʼox jun jabil ti te kʼot jkʼel jkʼejimoletik ta roke. Li kʼusitik jelel xvinaj laj kile jaʼ la stijbun-o koʼonton. Kʼalal kʼot jkʼel li jkʼejimoletike buyuk noʼox oy kʼaʼep xchiʼuk noj ta xchʼailal sikʼolal. Jutuk mu skotoluk li buchʼutik te oyike mu lekuk xil sbaik xchiʼuk toj echʼ xa noʼox chakʼ at-oʼonton li sletrail sonike. Yan li ta mukʼta tsobajele jun noʼox yoʼontonik ta melel li krixchanoetik te oyike, xmuyubajik la xchʼamikun manchuk mi oy xa sjabilal muʼyuk xilikun-o. Lek sak xvinaj li bu echʼ mukʼta tsobajele xchiʼuk tspat oʼontonal li mantaletik echʼe. Kʼalal laj kakʼ venta ti lek kʼusitik chkʼot ta pasel yuʼun li kʼusitik melel ta Vivliae, jaʼ laj yakʼ jnop ti kʼu yuʼun la jten komele (Isaías 48:17, 18).

Lik jnop ti chisut li ta tsobobbaile. Jech lik spasik ek li jbankil xchiʼuk kixlele, yuʼun kʼot ta yoʼontonik li kʼusitik laj yilik ta mukʼta tsobajele. Koxvoʼalkutik la jchʼamkutik chanubtasel ta Vivlia.

Jun teksto ti kʼot tajek ta koʼontone jaʼ li kʼusi chal Santiago 4:8: «Nopajanic ta stojol li Diose, jech chnopaj ta atojolic ec». Laj kaʼibe smelolal ti skʼan jel jkuxlejal mi ta jkʼan chinopaj ta stojolal Diose. Ep kʼusitik skʼan xkikta, jech kʼuchaʼal li sikʼolajele, li stunesel drogae xchiʼuk li uchʼ poxe (2 Corintios 7:1).

Laj kikta komel li baʼyel kamigotake, jaʼ la jsaʼ li buchʼu chichʼik ta mukʼ Jeovae, jaʼ kʼot ta kamigotak. Toj ep la skoltaun li mol ta tsobobbail ti chchanubtasun ta Vivliae. Tskʼoponun ta telefono xchiʼuk tsvulaʼanun sventa tsnaʼ kʼu kelan. Li avie, jech toj lek-o xkil jbakutik.

Li ta primavera ta 2001, laj kichʼkutik voʼ sventa xkakʼ jkuxlejalkutik ta stojolal Dios li jbankil xchiʼuk li kixlele. Kʼalal kʼot yorail ti lek tsobolunkutik chkichʼkutik ta mukʼ Jeova li ta kutsʼ kalalkutike, xmuyubaj tajek li jtot jmeʼ xchiʼuk li kitsʼin ti tukʼ onoʼox yakʼoj sbae.

KʼUSITIK SBALIL JTAOJAN:

Li beiltaseletik ta Vivliae ta jnop toʼox ti toj tsotsik ta pasele, pe li avie chkil ti toj ep sbalil sventa chchabiune. Li Vivliae jaʼ laj yakʼ kip sventa xkikta stunesel xchiʼuk xchonel li drogae, vaʼun likʼot ta jun krixchano ti jtunel xa li kʼusi ta jpas ta stojolal yantike.

Jaʼ jun mukʼta matanal chkaʼi ti jmoj oyun xchiʼuk li kermanotak ta spʼejel Balumil ti chichʼik ta mukʼ li Jeovae xchiʼuk ti skʼanoj sbaik ta sjunul yoʼontonike (Juan 13:34, 35). Li ta slumal Jeovae te laj kojtikin Adrianne ti jaʼ kʼot ta kajnil ti kichʼoj ta mukʼ xchiʼuk ti jkʼanoj tajeke, jaʼ jun mukʼta bendision la jta. Ximuyubaj jchaʼvoʼalkutik ti jmoj chitunkutik ta stojolal li Jpasvaneje.

Maʼuk xa ta jsaʼ kʼusi ta jkʼan jtuk, li avie ta jchol mantal ta tsʼakal ora sventa jchanubtas krixchanoetik yoʼ tstabeik sbalil mi la skʼelik li Skʼop Diose. Mu albajuk muyubajel chakʼbun li matanal abtelal taje. Xuʼ jpʼel koʼonton chkal ti sjeloj xa jkuxlejal li Vivliae. ¡Jaʼ to la jta li melel kolebale!