Jaʼ noʼox laj avakʼbe yaʼi li buchʼu jechik kʼuchaʼal ololetike

¿Mi chakʼan chanaʼ li kʼusitik melel ta sventa Diose: buchʼu jaʼ, kʼusi lek chil, kʼusi ibal sba chil xchiʼuk ti kʼusi tskʼan yoʼontone? Li Jeovae chakʼ jnaʼtik ta Skʼop, jaʼ xkaltik, ta Vivlia li kʼusitik melel ta sventa stuke. Pe mu skotoluk krixchano xuʼ xaʼibe smelolal manchuk mi tskʼelik. ¿Kʼu yuʼun? Yuʼun jaʼ jun matanal ti mu skotoluk krixchano tstae. Jkʼeltik kʼusi laj yal Jesús ta sventa taje (kʼelo Mateo 11:25).

Xi chlik li versikulo taje: «Lic scʼopan Dios li Jesuse, jech laj yal». Li kʼusi chlik yale jaʼ van ta skoj li kʼusi naka to kʼot ta pasele: tsots lik skʼopon li jnaklejetik ta oxib lum ta Galilea ti bu la spas ep skʼelobiltak sjuʼele, yuʼun mu skomtsanik li kʼusitik chopol tspasike (Mateo 11:20-24). Pe, ¿kʼu xa noʼox yuʼun ti mu xlik stsʼakliik Jesús ti te skʼeloj ta sat stukik li skʼelobiltak juʼelal tspase? Jaʼ ta skoj ti stsatsubtasoj yoʼontonik ti xuʼ yuʼun chaʼiike (Mateo 13:10-15).

Li Jesuse snaʼoj ti oy chaʼtos kʼusi chtun kuʼuntik sventa xkaʼibetik smelolal li Skʼop Diose: jaʼ li koltael chakʼ Diose xchiʼuk ti jechuk jpas jbatik kʼuchaʼal li ololetike. Xi chale: «Tati, voʼot yajvalot li vinajel banamile. Colaval ti muc xavacʼbe yaʼyic smelol cʼusi laj cal xchiʼuc cʼusi la jpas li bochʼotic bijique xchiʼuc li bochʼotic lec snaʼ yalojique. Jaʼ noʼox laj avacʼbe yaʼyic smelol li bochʼotic jaʼ jechic jech chac cʼu chaʼal ololetique». ¿Mi xavakʼ venta ti jaʼ jun matanal yaʼibel smelolal li kʼusitik melel ta sventa Diose? Li Jeovae, ti jaʼ «[yajval] vinajel banamile» xuʼ yuʼun tsnakʼ o chakʼ ta ojtikinel Skʼop mi jech xal yoʼontone; pe taje maʼuk skʼan xal ti tʼujbil noʼox yajval chakʼbee, moʼoj, jkotoltik xuʼ xkaʼibetik smelolal li kʼusitik melel ta sventa Diose. Vaʼun chaʼa, ¿kʼusi tstsak ta venta Jeova mi chakʼbe snaʼ kʼusi chal Vivlia o mi moʼoj li jun krixchanoe?

Li Jeovae jaʼ lek chil li buchʼutik bikʼit chakʼ sbaike, maʼuk li jtoybaetike (Santiago 4:6). Jech, li stuke xuʼ tsnakʼ kʼusitik melel ta stojolal «li bochʼotic bijique xchiʼuc li bochʼotic lec snaʼ yalojique», jaʼ xkaltik, li krixchanoetik ti stoyoj-o sbaik ta skoj ti lek chanubtasbilik ta sba balumil xchiʼuk ti mu xa xtun yuʼunik koltael chaʼiike (1 Corintios 1:19-21). Pe jaʼ chakʼbe yaʼi smelolal «li bochʼotic jaʼ jechic jech chac cʼu chaʼal ololetique», jaʼ xkaltik, ti bikʼit chakʼ sbaik xchiʼuk ti ta sjunul yoʼonton tsaʼike (Mateo 18:1-4; 1 Corintios 1:26-28). Li Xnichʼon Diose laj yojtikin li xchaʼvokʼal krixchanoetik taje. Epal jnitvanejetik ta relijion ti tstoy sbaike xchiʼuk ti lek chanubtasbilike muʼyuk laj yaʼibeik smelolal li kʼusitik chale, yan li uni jtsakchoyetik ti bikʼit yakʼoj sbaike laj yaʼibeik smelolal (Mateo 4:18-22; 23:1-5; Hechos 4:13). Jech xtok, oy jkʼulejetik xchiʼuk pʼijil krixchanoetik ti solel bikʼit laj yakʼ sbaik xchiʼuk ti la stsʼakliik batele (Lucas 19:1, 2, 8; Hechos 22:1-3).

Jchaʼkʼeltik li sjakʼobil laj kaltik ta slikebale: ¿Mi chakʼan chanaʼ li kʼusitik melel ta sventa Diose? Mi jeche, xuʼ xata spatobil avoʼonton, yuʼun maʼuk lek chil li buchʼutik pʼij albil skʼoplalik liʼ ta sba balumile, yuʼun jaʼ lek chil li buchʼutik pʼajbilik ta stojolal li buchʼutik pʼij chaʼi sbaike. Mi ta slekil avoʼonton xchiʼuk anopben chachan li Skʼop Diose, xuʼ me te kapal akʼoplal li ta epal krixchanoetik ti ch-akʼbatik yuʼun Dios jun mukʼul matanal, jaʼ xkaltik, ti xuʼ xavaʼibe smelolal li kʼusi melele. Mi jech chapase chakʼ ti oyuk sbalil li akuxlejale xchiʼuk chatabe sbelel li kuxlejal ta melele, jun kuxlejal ta sbatel osil li ta achʼ balumil ti jmalaojtik chichʼ talel Dios ti bu tukʼ xa kʼusitik oye (1 Timoteo 6:12, 19; 2 Pedro 3:13).a