¿Mi tsots to skʼoplal li kʼusi melele?

Epal krixchanoetike mu xa xilbeik sjelbenal li kʼusi melele xchiʼuk li kʼusi mu meleluke. ¿Mi jaʼ jech chavil li voʼot eke? Junantike jaʼ noʼox tstsakik ta venta li kʼusi tsnop stukike xchiʼuk ti kʼu yelan chaʼi sbaike, maʼuk tstsakik ta venta li kʼusi kʼot ta pasel ta melele. Li krixchanoetik avi ta spʼejel balumile mu xchʼunik mi oy kʼusi melel.

Voʼne xa onoʼox ti jech tsnop li krixchanoetike. Leʼ xa ta chaʼmil jabile li ajvalil ta Roma ti Ponsio Pilato sbie xi la sjakʼbe li Jesuse: «¿Kʼusi jaʼ li melele?» (Juan 18:38). Akʼo mi muʼyuk la smala xtakʼbat yuʼun Jesus li Pilatoe, tsots skʼoplal li kʼusi la sjakʼe. Li Vivliae ta stakʼ taje, xuʼ van labal sba chavaʼi li stakʼobile xchiʼuk xuʼ skoltaot li avie.

¿Mi oy kʼusi melel?

Oy. Li Vivliae tstunes li jpʼel kʼop melel sventa chalbe skʼoplal li kʼusi oy sprevaile o ti tukʼ xchiʼuk leke. Li Vivliae chchanubtasvan ti jaʼ ta stojolal Jeovaa chlik tal li kʼusi melele ti jaʼ li Dios ti melel snaʼ xkʼopoje (Salmo 31:5). Jech xtok, chalbutik li kʼusi melel ta sventa li Diose xchiʼuk tskoʼoltajes ta sakil osil li kʼusi melele, yuʼun jaʼ tsbeiltasutik avi ti oyutik ta jun balumil ti mu snaʼik kʼusi chchʼunike (Salmo 43:3; Juan 17:17).

¿Kʼuxi xuʼ jta li kʼusi melele?

Li Diose mu skʼan ti ta jech mechuk noʼox jchʼuntik li kʼusi chal Vivliae. Tskʼan ti jsabetik lek smelolal li kʼusi melele xchiʼuk ti jtunes lek jnopbentik sventa xijrasonaje (Romanos 12:1). Tskʼan ti xkojtikintik xchiʼuk ti jkʼantik ta sjunul jnopbentike, jaʼ yuʼun tstij koʼontontik ti jkʼeltik ta jtuktik ti jaʼ melel li kʼusi yakal ta jchantik ta Vivliae (Mateo 22:37, 38; Echos 17:11).

¿Buchʼu laj yal li baʼyel jutbil kʼope?

Li Vivliae chal ti jaʼ li yajkontra Diose: li Diablo Satanase. Jaʼ yuʼun, xi tsbiiltase: «Totil yuʼun li jutbil kʼope» (Juan 8:44). Li Satanase laj yalbe jutbil kʼopetik ta sventa Dios li baʼyel krixchanoetike (Jenesis 3:1-6, 13, 17-19; 5:5). Jaʼ xa te lik yal kʼusitik mu meleluk ta stojolal li Dios sventa mu xkojtikintike xchiʼuk la spuk batel jutbil kʼopetik ta stojolal (Apokalipsis 12:9).

¿Kʼu yuʼun tsjutik tajek kʼop li krixchanoetike?

Jech kʼuchaʼal chal li Vivliae, kuxulutik «li ta slajebal xa kʼakʼale». Li avie, ep xa krixchanoetik sloʼlaoj li Satanase xchiʼuk ep xa ti jech stalelalik kʼuchaʼal stuke. Stalel xa noʼox ti tsloʼlaik yantik sventa staik li kʼusi tskʼan stukike (2 Timoteo 3:1, 13). Jutuk mu skotol li relijionetike tsjutik kʼop. Li Vivliae yaloj xa onoʼox kʼu yelan stalelal li krixchanoetike, yuʼun xi chale: «Kʼajomal noʼox chbat xchiʼinik li jchanubtasvanejetik ti lek chaʼi chchikintabeik li kʼusi lek chaʼi stukike. Jech xtok, chchʼak sbaik lokʼel ta xchikintael li kʼusi melele» (2 Timoteo 4:3, 4).

¿Kʼu yuʼun tsots skʼoplal li kʼusi melele?

Sventa spat yoʼontonik ta jtojolaltike, skʼan melel li kʼusi chkaltike. Mi mu jechuk la jpastike, muʼyuk lek chkil jbatik xchiʼuk kamigotaktik xchiʼuk muʼyuk jmoj oyik li krixchanoetik mi mu meleluk kʼusi chalbe sbaike. Li Vivliae chal ti Diose tskʼan ti meleluk kʼusi xakʼik ta chanel li jrelijiontike, xi chale: ‹Li buchʼutik chichʼik ta mukʼ Diose skʼan xichʼik ta mukʼ ta chʼul espiritu xchiʼuk ta melel› (Juan 4:24). Kʼalal chavojtikin li kʼusi melelik chal li Vivliae, tskoltaot sventa xavakʼ venta li jutbil kʼopetik chal li relijionetike xchiʼuk ti mu xachʼune. Sventa spas avuʼune, kʼelo li mantaletik ta slikebaltik pajina li ta revista ti xi sbie: «Nopbil kʼopetik ti tsnamajesutik ta stojolal Diose».

¿Kʼu yuʼun tskʼan Dios ti xkojtikin li kʼusi melele?

Li Diose tskʼan ti xijkuxi sbatel osile, jaʼ yuʼun skʼan xavojtikin li kʼusi melel ta stojolale (1 Timoteo 2:4). Mi laj kojtikinbetik li smantaltak Dios ta sventa li kʼusi lek xchiʼuk li kʼusi chopole xchiʼuk mi la jkuxlebintike, ta me xkamigoin jbatik lek xchiʼuk (Salmo 15:1, 2). Sventa skolta li krixchanoetik ta snaʼel li kʼusi melele, li Diose la stak tal ta balumil li Jesuse, jaʼ yuʼun tskʼan ti jchikintabetik li chanubtaseletik laj yakʼ Jesuse (Mateo 17:5; Juan 18:37).

¿Mi chkʼot van yorail ti tslajesbe skʼoplal jutbil kʼop li Diose?

Tana. Li Diose chopol tajek chil ti oy buchʼutik chutilanik xchiʼuk tsloʼlaik yantike, yaloj xa onoʼox ti tslajesbe skʼoplal li krixchanoetik ti batem ta yoʼontonik jut kʼope (Salmo 5:6). Mi kʼot ta pasel yuʼun taje, tspas xtok li kʼusi xi onoʼox yaloje: «Li eil ti melel xkʼopoje te oy˗o sbatel osil» (Proverbios 12:19).