«Ta scotol li smantal Diose, ¿cʼusi mantalil ti tsots scʼoplale?»

¿Kʼusi skʼan jpastik sventa jlekubtasbetik yoʼonton li Diose? ¿Mi epal mantaletik van skʼan jchʼuntik? Li stakʼobile jaʼ ti mu epuke. Jech kʼuchaʼal laj yal stuk li Xnichʼon Dios ti jaʼ Jesucristoe, li kʼusi tskʼanbutik li Diose ta jpʼel noʼox kʼop stakʼ alel. (Kʼelo Marcos 12:28-31.)

Jkʼeltik baʼyel bu toʼox oy Jesús kʼalal laj yal taje. Te toʼox chchanubtasvan ta templo ta 11 yuʼun nisán kʼalal jutuk xaʼox skʼan xichʼ milele. Li yajkontratake oy kʼusitik tsotsik tsjakʼbeik, yuʼun tskʼanik ti mu jechuk xtakʼ yuʼune. Oy bakʼintike tsʼijil chkomik yuʼun ta skoj ti kʼuyelan la stakʼ kʼusitik chjakʼbat li Jesuse. Vaʼun oy jun ti xi la sjakʼe: «Ta scotol li smantal Diose, ¿cʼusi mantalil ti tsots scʼoplale?» (versikulo 28).

Toj tsots li sjakʼobil taje. Oy jlom judioetike chalilanbe sbaik bu junukal mantal mas tsots skʼoplal li ta Smantal Moisés ti oy mas ta 600. Oy jlom xtoke chalik ti koʼol noʼox tsots skʼoplal chilik skotol li mantaletike. ¿Kʼuxi van tstakʼ Jesús li sjakʼobil taje?

Li Jesuse laj yal ti maʼuk noʼox jun mantal tsots skʼoplale, yuʼun chib mantal laj yalbe skʼoplal. Baʼyele xi laj yale: «Cʼano me ta scotol avoʼnton li Dios avuʼune ta scotol achʼulel, ta scotol ajol, xchiʼuc ta scotol atsatsal» (versikulo 30; Deuteronomio 6:5). Kʼalal «avoʼnton», «achʼulel», «ajol» xchiʼuk «atsatsal» xie, koʼoltik li kʼusi skʼan xale.a Taje jaʼ skʼan xal ti kʼalal jkʼanojtik li Jeovae ta jkʼantik ta sjunul jkuxlejaltik, ta skotol li kʼusi jnaʼtik spasele xchiʼuk ta skotol li kʼusitik oy kuʼuntike. Jun livro ti jaʼ chalbe skʼoplal li Vivliae xi chal ta sventa taje: «Skʼan jkʼantik ta skotol kʼusitik ta jpastik li Diose». Jaʼ yuʼun, mi jkʼanojtik li Diose ta jpastik kʼusi lek ta jkuxlejaltik sventa xmuyubaj kuʼuntik (1 Juan 5:3).

Jkʼeltik kʼusi to yan laj yal li Jesuse: «Cʼano achiʼil jech chac cʼu chaʼal cʼux ta avoʼnton abecʼtal atuc» (versikulo 31; Levítico 19:18). Li skʼanel Dios xchiʼuk jchiʼiltaktike stsakojbe sba skʼoplalik. Mi jkʼanojtik li Diose ta jkʼantik ek li jchiʼiltaktike (1 Juan 4:20, 21). Mi jkʼanojtik ta melel li jlakʼnataktik jech kʼuchaʼal jkʼanoj jba jtuktike, jech ta jpastik kʼuchaʼal ta jkʼan tspasbutik li stukike (Mateo 7:12). Jech xuʼ xkakʼtik ta ilel ti jkʼanojtik li Diose, yuʼun ta slokʼol stuk la spasutik jkotoltik (Génesis 1:26).

¿Mi toj tsots van skʼoplal li mantal ti jkʼantik Dios xchiʼuk jchiʼiltaktike? Xi laj yal li Jesuse: «Muʼyuc xa yan mantaletic ti tsots scʼoplal jech chac cʼu chaʼal liʼi» (versikulo 31). Li ta yan loʼil ti xkoʼolaje, li Jesuse laj yal ti stsakojbe sba skʼoplal xchiʼuk skotol yan mantaletik li chib mantaletik taje (Mateo 22:40).

Sventa jlekubtasbetik yoʼonton li Diose mu toj tsotsuk ta pasel, yuʼun stakʼ alel ta jpʼel noʼox kʼop: kʼanelal. Taje tsots skʼoplal, yuʼun jech tskʼanbutik-o sventa xkichʼtik ta mukʼ li Diose. Kʼalal chijkʼanvane maʼuk noʼox chkaltik xchiʼuk ti chkaʼitik ta koʼontontike, moʼoj, yuʼun skʼan xkakʼtik ta ilel ta kʼusitik ta jpastik (1 Juan 3:18). ¿Kʼu yuʼun mu xavakʼ persa sventa oyuk avuʼun xchiʼuk ti xavakʼ ta ilel ti akʼanoj li Jeova ti jaʼ stalel ta xkʼanvan-oe? (1 Juan 4:8.)