La sjut kʼop li Pedro xchiʼuk Ananiase ¿kʼusi chakʼ jchantik?

Li voʼote anaʼoj ti jaʼ jutbil kʼop kʼalal oy kʼusi chaval ti anaʼoj ti mu meleluke. ¿Mi oy ajutoj kʼop jkojuk?a... Jlom yijil krixchanoetik ti skʼanojik Dios eke oy sjutojik kʼop. Jun buchʼu jech la spas taje te chal ta Vivlia, xavojtikin van. Taje Pedro sbi, jaʼ toʼox jun li ta xlajchaʼvoʼal yajtakbol Jesuse. Chikintao sloʼilal sventa xanaʼ ti kʼu yuʼun la sjut kʼope.

Kʼalal la stsakik li Jesuse laj yikʼik batel ta sna li bankilal yuʼun paleetike. Mas xa ta oʼlol akʼobal. Li Pedroe och li ta yamakʼil nae, muʼyuk buchʼu laj yojtikin xchiʼuk te choti ta stsʼel li bu stsanojik kʼokʼe. Li kiara ti laj yakʼ ochuk Pedroe laj yojtikin, vaʼun xi laj yalbee: «Li voʼote jaʼ achiʼil li [Jesuse]». Li Pedroe toj chʼayal to kʼot yoʼonton xchiʼuk lik yal ti mu xojtikine.

Ta tsʼakale ilat yuʼun yan kiara. Xi laj yale: «Leʼe jaʼ xchiʼil li [Jesuse]». Li Pedroe laj yal ti mu xojtikin xtoke. Ta jlikel noʼoxe nopajik tal ta stojolal Pedro li buchʼutik te oyike, xi laj yalbeike: «Ta melel, jaʼ onoʼox achiʼil li Jesuse».

Li Pedroe xiʼ. Jaʼ yuʼun la sjut kʼop ta yoxibal velta, xi laj yale: «Mu xcotquin li vinic chavalique». Kʼalal jech taje jaʼo okʼ jkot kots. La skʼel batel Pedro li Jesuse, vaʼun vul ta sjol ti xi onoʼox yaloj li Jesuse: «Cʼalal muʼyuc toʼox ta xʼocʼ cotse, oxib xaʼox velta laj amucun ta avoʼnton». ¡Li Pedroe toj chopol chaʼi sba ta skoj taje!

¿Mi xuʼ van jech xkʼot ta atojolal ek?... Nopo noʼox ti te oyot ta chanob vune xchiʼuk chavaʼi chalbeik skʼoplal stestigotak Jeova li achiʼiltake. Xi chal june: «Leʼike muʼyuk tspasik saludar vandera». Yan xtoke xie: «Muʼyuk tspasik kʼop sventa tspoj li slumalike». Oy to buchʼu xi chale: «Maʼukik yajtsʼaklom Cristo, yuʼun muʼyuk tspasik li skʼinal Svokʼel Ninyoe». Vaʼun oy buchʼu tskʼelot xchiʼuk xi chalbote: «Aa, li voʼote stestigoot Jeova, ¿mi mu jechuk?». ¿Kʼusi van chaval?...

Sventa xatakʼ lek taje skʼan xachapan aba. Li Pedroe muʼyuk lek chapal, jaʼ yuʼun kʼalal sujate, ¡la sjut kʼop! Akʼo mi jech, ta skoj ti laj yat tajek yoʼontone akʼbat perton yuʼun Dios.

Kalbetik xa skʼoplal Ananías xchiʼuk yajnil ti Safira sbie, chaʼvoʼ yajtsʼaklom Jesús ti la sjutik kʼop eke. Li Diose muʼyuk laj yakʼbe perton xchaʼvoʼalik. Jkʼeltikik kʼu yuʼun.

Oy xa van ta lajuneb kʼakʼal ti sut batel ta vinajel xchiʼuk ti laj yikta yajtakboltak li Jesuse. Oy van oxmil krixchanoetik chichʼik voʼ ta Jerusalén. Ep ti nom to bu likemik tal sventa tspasik li kʼin Pentecostese xchiʼuk tskʼan to te chkomik sventa xojtikinik mas li achʼ srelijionike. Jech oxal, li jlom yajtsʼaklom Jesuse chakʼ stakʼinik sventa tskoltaik.

Li Ananías xchiʼuk yajnile la xchon jsep yosilik sventa tskoltaik li buchʼu achʼ jchʼunolajeletik toe. Kʼalal laj yichʼ batel ta stojolal jtakboletik stojol yosil li Ananiase, laj yal ti jech-o yepale, pe mu jechuk, yuʼun la xchʼak komel. Li Pedroe koltaat yuʼun Dios sventa snaʼ li kʼusi kʼot ta pasele, vaʼun xi laj yalbee: «Mu jaʼuc laʼepalcʼopoj ta stojol cristiano, jaʼ [...] ta stojol Dios». Ta anil noʼox yal ta lum; vaʼun cham. Kʼalal jelav xaʼox oxibuk orae, och tal ek li yajnile, pe mu snaʼ li kʼusi kʼotem ta pasele, jaʼ yuʼun la sjut kʼop ek, vaʼun jech cham.

¡Toj tsots skʼoplal kʼusi chakʼ jchantik taje! Ti melel chijkʼopoje toj tsots skʼoplal xchiʼuk jkotoltik skʼan jpastik. Akʼo mi jech, oy onoʼox kʼusi chopol ta jpastik, mas to kʼalal kerem tsebutike. ¿Mi mu xamuyubajuk ti chanaʼ ti skʼanojot xchiʼuk ti chakʼot ta perton Jeova jech kʼuchaʼal laj yakʼ ta perton li Pedroe?... Teuk me ta ajol ti skʼan melel xijkʼopoj skotol orae. Mi oy junuk velta la jutik kʼope, skʼan me jkʼanbetik vokol Dios sventa xakʼutik ta perton. Taje jaʼ van jech la spas li Pedroe, jaʼ yuʼun akʼat ta perton yuʼun Dios. Mi chkakʼtik persa sventa mu xa jutik kʼope, chakʼutik me ta perton li Dios eke.