KʼUSITIK CHICHʼ JAKʼEL TA SVENTA VIVLIA

¿Kʼuxi xuʼ xmuyubajik li buchʼutik nupunemike?

Chtojobtasvan Vivlia kʼuxi xuʼ xmuyubajik li buchʼutik nupunemike, yuʼun jaʼ te likem tal ta stojolal Jeova, ti jaʼ laj yakʼbe slikeb li nupunele. Li Vivliae chchanubtasvan ti skʼan lekuk stalelalik sventa xmuyubajik li buchʼu nupunemike, chal kʼusi mu stakʼ spasik sventa mu sok li snupunelike xchiʼuk ti skʼan lek xloʼilajike. (Kʼelo Colosenses 3:8-10, 12-14.)

Skʼan xichʼ sbaik ta mukʼ ta jujuntal li malalil xchiʼuk ajnilale. Xuʼ me xmuyubaj ta snupunelik mi tspas xchaʼvoʼalik li kʼusi akʼbil spasik yuʼun Dios li jun nupultsʼakale. (Kʼelo Colosenses 3:18, 19.)

¿Kʼusi xuʼ spasik sventa xjalij li snupunelike?

Mi skʼanoj sbaik ta jujuntale xuʼ jmoj oyik-o li ta snupunelike. Chchanubtasvan kʼuxi xuʼ jkʼan jbatik li Diose. Lek tajek ta chanbel kʼuyelan kʼanvanemik ta melel li Dios xchiʼuk Xnichʼone, li Jesuse. (Kʼelo 1 Juan 4:7, 8, 19.)

Xuʼ jmoj oyik-o ta snupunelik li malalil xchiʼuk ajnilal mi snaʼojik lek ti jaʼ xchapanoj Dios li nupunele. Ti kʼuyelan la spas nupunel li Diose jaʼ sventa sbatel osil, sventa jun yoʼonton xaʼi sbaik li ta yutsʼ yalalike. Xuʼ xjalij li nupunele, yuʼun ti kʼuyelan pasatik yuʼun Dios li vinik xchiʼuk antse xuʼ skolta sbaik ta jujuntal xchiʼuk ti oyuk ta yoʼonton sbaike. Jech xtok, ti kʼuyelan pasat li krixchanoe xuʼ xchanbe stalelal Dios ti chkʼanvane. (Kʼelo Génesis 1:27; 2:18, 24.)