«La spasboxuk perton ta sjunul yoʼonton li Jeovae»

«Li buchʼu mu x-akʼvan ta pertone tslomes jun bakʼo ti persa te chjelav eke.» Jech lek jamal laj yal ta svuklajunebal siglo li j-al-loʼil Edward Herbert ta Gran Bretañae. Taje jaʼ sventa xkiltik ti kʼu yuʼun skʼan xkakʼtik pertone: ta onoʼox xkʼot yorail ti ta jkʼanbetik perton yantike (Mateo 7:12). Pe oy to jun srasonal ti mas to tsots skʼoplal ti skʼan xij-akʼvan ta pertone. Jkʼeltik kʼusi laj yal li jtakbol Pabloe: «Tsʼikbo abaik ta jujuntal xchiʼuk pasbo abaik perton ta sjunul avoʼontonik ta jujuntal mi oy buchʼu chopol kʼusi tspasboxuke. Jech kʼuchaʼal la spasboxuk perton ta sjunul yoʼonton li Jeovae, jaʼ jech xapasik ek li voʼoxuke» (Colosenses 3:13, TNM).

Ta skoj ti jpasmulilutike, xuʼ van oy kʼusi chopol ta jpasbetik yantik ti chopol chaʼiike o ti xuʼ x-ilin-oe xchiʼuk xuʼ van jech tspasbutik ek (Romanos 3:23). ¿Kʼusi xuʼ jpastik sventa jun noʼox koʼontontik xchiʼuk li yantike? Ta skoj ti akʼbat snaʼ yuʼun Dios li Pabloe, tojobtasvan sventa jtsʼikbe jba jchopoliltik xchiʼuk ti xkakʼ jbatik ta pertone. Taje jtunel-o kuʼuntik jech kʼuchaʼal jtunel kʼalal laj yichʼ tsʼibael leʼ xa van ta chaʼmil jabile. Jchantik batel lek li kʼusi laj yal Pabloe.

«Tsʼikbo abaik ta jujuntal.» Li jpʼel kʼop ta griego ti «tsʼikbo abaik» xie, jaʼ skʼoplal ti skʼan jtsʼikbe jbatike o ti mu xkakʼ ta koʼontontike. Jlik livroe chal ti jech chakʼ ta ilel stalelal yajtsʼaklom Cristo kʼalal «ta sjunul yoʼonton tstsʼik li kʼusi chopol tspasbate o ti xuʼ x-ilin-oe». Kʼalal «ta jujuntal» xie, jaʼ skʼoplal ti skʼan ta komon jtsʼikbe jbatike. Taje jaʼ skʼan xal ti kʼalal ta jvules ta joltik ti xuʼ oy kʼusi ta jpastik ti xuʼ x-ilinik-o li yantike, muʼyuk me chkakʼtik chchʼay li jun oʼontonal xchiʼuk jchiʼiltaktik ta skoj noʼox li kʼusitik mu lekuk chaʼiik yantike. Pe, ¿kʼusi ta jpastik mi tsaʼ smul ta jtojolaltik li yantike?

«Pasbo abaik perton ta sjunul avoʼontonik ta jujuntal.» Jech kʼuchaʼal chal jun krixchano ti lek xchanoje, li jpʼel kʼop ta griego ti «pasbo abaik perton ta sjunul avoʼontonik» xi jelubtasbile, «maʼuk skʼoplal li jpʼel kʼop tstunesik sventa chakʼ sbaik ta pertone, yuʼun mas to jamal smelolal xchiʼuk chakʼ ta ilel li sbalil ta jtatik kʼalal chij-akʼvan ta pertone». Yan vun xtoke chal ti jaʼ van skʼan xal «spasel kʼusi ti chakʼ jun oʼontonale, ti chichʼ kʼanel jun vokole, spasel kʼusi lek». Kʼalal ta sjunul koʼontontik chij-akʼvan ta perton akʼo mi «oy buchʼu chopol kʼusi [tspasbutike]» chkakʼtik ta ilel slekil koʼontontik. Pe, ¿kʼu yuʼun skʼan jech jpastik? Jaʼ ta skoj ti ta onoʼox xkʼot yorail ti ta jkʼantik xakʼutik ta perton li buchʼu oy kʼusi chopol la spasbutike.

«Jech kʼuchaʼal la spasboxuk perton ta sjunul yoʼonton li Jeovae, jaʼ jech xapasik ek li voʼoxuke.» Li srasonal mas toj tsots skʼoplal ti skʼan ta sjunul koʼontontik xkakʼ jbatik ta pertone jaʼ liʼe: ta sjunul yoʼonton chakʼutik ta perton li Jeovae (Miqueas 7:18). Jnoptik jlikeluk ti kʼu to yelan chakʼ ta ilel slekil yoʼonton Jeova ta stojolal li jpasmuliletik ti sutesoj yoʼontonike. Li stuke mu jechuk kʼuchaʼal voʼotik, yuʼun mu snaʼ spas smul. Akʼo mi snaʼoj ti muʼyuk onoʼox tskʼanbutik vokol ti xkakʼtik ta perton li Jeovae, ta sjunul yoʼonton chakʼutik ta perton mi ta jsutes koʼontontik ti jmulavilutike. Jech ta melel, ¡jaʼ slekil kʼelobil kuʼuntik ti ta sjunul yoʼonton chakʼ ta perton Jeova li jpasmulil ti tsutes yoʼontone!

Tsnopajesutik ta stojolal Jeova li xkʼuxul yoʼontone xchiʼuk tstij koʼontontik yoʼ jchanbetik stalelal (Efesios 4:32–5:1). Lek ti xi jakʼbe jbatike: «Ta skoj ti ta sjunul yoʼonton chakʼun ta perton li Jeovae, ¿kʼuxi xa noʼox ti mu xkakʼ ta perton li buchʼu tsaʼ smul ta jtojolal ti tsutes yoʼonton ta melele?» (Lucas 17:3, 4).