«Ep krixchanoetik la spʼajikun»

LI JKUXLEJAL TOʼOXE:

Lichʼi ta Santiago, ta skapitalil Chile, li bu nakalun toʼoxe nopem xaʼiik tstunesik droga, oy pandiyaetik xchiʼuk oy milbail te. Laj ta milel jtot kʼalal voʼob toʼox jabilale. Ta tsʼakal li jmeʼe la xchiʼin ta naklej jun vinik ti chʼabal tajek xkʼuxul yoʼontone. Nopolik noʼox tsmajunkutik. Yayijem-o koʼonton yuʼun li kʼusitik kʼot ta pasel li vaʼ jabiletike.

Kʼalal yakal xichʼi tale, toj simaron ta jpas jba ta skoj li chopol talelalil la jchane. Ta jchikinta toʼox li son ti heavy metal sbie, chkuchʼ toʼox tajek pox xchiʼuk ta jtunes droga bakʼintik. Nopolik noʼox te kapal jkʼoplal ta majbail ta kaye xchiʼuk li jchon drogaetike, ti ep ta velta la skʼan la smilikune. Jun veltae, li pandiya ti jkontrakutike la stojik jun jmilvanej sventa tsmilun, vaʼun la jpoj jba sventa xijatav batel kʼalal jmoj to noʼox xenojbun kuchilue. Yan velta xtoke, jtsop jchon drogaetike la stijanbikun pistola ta jol xchiʼuk la xmichʼbikun jnukʼ.

Ta 1996, kʼupij koʼonton yuʼun jun tseb ti Carolina sbie, vaʼun linupunkutik ta 1998. Kʼalal vokʼ li baʼyel kol jnichʼonkutike, lixiʼ tajek mi jech ta jpas jtalelal kʼuchaʼal li jchaʼtote xchiʼuk ti xkilbajin kutsʼ kalal ta skoj ti toj simaronune. Jech oxal chaʼa, la jsaʼ koltael ti bu chkoltavanik ta slekubtasel jkuxlejale. Laj kichʼ akʼbel poxil xchiʼuk tojobtasel sventa xlekub jtalelal, pe muʼyuk kʼusi bal-o. Jech chi-ilin-o ta kʼusiuk noʼox ti muʼyuk tsotsik skʼoplale, mu jnaʼ jpajtsan-o jba. Ta skoj ti mu jkʼan xkilbajin li kutsʼ kalale, oy toʼox kʼusi la jpas ti mu lekuke, yuʼun ta ox jmil jba. Ximuyubaj ti muʼyuk kʼot ta pasel kuʼune.

Echʼ jayibuk jabil ti mu jchʼun mi oy Diose, pe oy xa onoʼox ta koʼonton ta jkʼan ta jchʼun ta stojolal. Jech oxal chaʼa, te van kʼuk sjalil lik jtsob jba xchiʼuk evanjelikoetik. Kʼalal jech taje, jaʼo yakal xchan Vivlia xchiʼuk stestigotak Jeova li kajnile. Ta jpʼaj toʼox li stestigotak Jeovae xchiʼuk ep ta velta laj kalbeik kʼusitik toj chopol. Pe ta slekil onoʼox yoʼontonik la stakʼbeikun, ti mu jechuk jnopoje.

Jun veltae laj yalbun Carolina ti akʼo jkʼel ta Jvivlia jtuk li kʼusi chal Salmo 83:18. Li versikulo taje lek jamal chal ti Jeova sbi li Diose. Labal to sba laj kaʼi kʼalal laj kakʼ venta ti la jchan ta stojolal jun dios li ta jrelijione, pe ti muʼyuk bu la jchan ta stojolal Jeovae. Li ta slikeb sjabilal 2000, lik jchan Vivlia ek xchiʼuk li stestigotak Jeovae.

TI KʼUYELAN LA SJEL JKUXLEJAL LI VIVLIAE:

Kʼalal yakal xichʼi ta mantale, la spatbun koʼonton ti jaʼ jun Dios chkʼuxubinvan li Jeovae xchiʼuk ti tspasvan ta pertone. Jech kʼuchaʼal liʼe, ta Éxodo 34:6, 7, xi chal li Jeovae: «Jcʼuxubinvanejun, toj lec coʼnton, muc ta aniluc chiʼilin; toj ep cʼuxubinel cuʼun, xchiʼuc melel cʼusi chcal. Cʼux ta coʼnton epal mil cristianoetic; ta jchʼaybe ta coʼnton li smulique, li stoyobbailique, li xchopolilique».

Akʼo mi jech, muʼyuk bu kʼun laj kaʼi chkakʼ ta jkuxlejal li kʼusi yakal ta jchane. Jpʼel-o ta koʼonton kaloj ti mu xuʼ kuʼun ta jpajtsan jba ti toj simaronune. Kʼalal jujukoj mu spas kuʼune, ta slekil yoʼonton tstsatsubtasun li Carolinae. Tsvulesbun ta jol ti yakʼoj venta Jeova ti kʼuyelan chkakʼbe yipale. Li koltael laj yakʼbune jaʼ la stsatsubtasun sventa chkakʼbe-o yipal ta slekubtasbel yoʼonton li Jeovae, akʼo mi chʼayel xaʼox chibat laj kaʼi.

Jun veltae, li Alejandro ti jaʼ chchanubtasun ta Vivliae laj yalbun ti akʼo jkʼel li kʼusi chal Gálatas 5:22, 23. Li versikuloetik taje chal ti yabtel xchʼul espiritu Diose jaʼ ti «ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc, jnaʼtic spajesel jbatic». Li Alejandroe laj yalbun ti maʼuk ta kipal jtuk ti chchʼi-o batel ta jkuxlejal li talelaletik taje, moʼoj, jaʼ koliyal li xchʼul espiritu Diose. ¡Li kʼusi melel taje la sjelbun tajek li jnopbene!

Ta tsʼakale, li-ay ta jun mukʼta tsobajel yuʼun stestigotak Jeova. Ti kʼuyelan lek xchapanojike, ti lek chʼubabile xchiʼuk ti lek tskʼopon sbaik te laj kile jaʼ laj yakʼ jchʼun ti la jta li melel relijione (Juan 13:34, 35). Laj kichʼ voʼ ta fevrero ta 2001.

KʼUSITIK SBALIL JTAOJAN:

Simaron vinikun toʼox, pe li Jeovae la skʼatajesun ta jun manxo vinik. Xkoʼolaj matsʼalun toʼox ta achʼel ti la slokʼesun tal li Jeovae. Ep krixchanoetik la spʼajikun, pe maʼuk ta smulik. Li avie ximuyubaj ti jun koʼonton chitun ta stojolal Jeova xchiʼuk kajnil xchiʼuk li chaʼvoʼ jkeremkutike.

Li kutsʼ kalaltak xchiʼuk li kamigotak toʼoxe mu xchʼunik ti kʼu to yelan jeloj jtalelale. Li kʼusi kʼotem ta pasele jaʼ ti epik xa li buchʼutik oy ta yoʼontonik xchanel li kʼusitik melel ta Vivliae. Jech xtok, jtaoj jmoton ti jkoltaoj sventa chojtikinik Jeova li yantike. ¡Jun tajek koʼonton ti kiloj tal kʼuyelan jelbat-o xkuxlejalik li kʼusitik melel ta Vivliae!