KʼUSITIK CHICHʼ JAKʼEL TA SVENTA VIVLIA
¿Kʼu yuʼun chchaʼsut tal li Cristoe?
Kʼalal skʼan toʼox xbat ta vinajel Jesús li ta sjabilal 33 ta jkʼakʼaliltike laj yal ti chchaʼsut tale. Li Jesuse la skoʼoltas sba jech kʼuchaʼal jun vinik ti lek ichʼbil ta mukʼ ti jal bate xchiʼuk ti lek xa yichʼoj talel sjuʼel sventa x-ajvalilaj kʼuchaʼal jun ajvalil kʼalal mi chaʼsut tale. Li srasonal yoʼ tsut tal li Jesuse jaʼ sventa chakʼbe jun lekil ajvalil li krixchanoetike. (Kʼelo Lucas 19:11, 12.)
Li Jesuse chakʼbe jun lekil ajvalil li krixchanoetike
¿Kʼu yelan sbekʼtal kʼalal chchaʼsut tal li Cristoe? Kʼalal chaʼkuxie jech kʼuchaʼal jun espiritu ti mu xvinaj ta kʼelele (1 Pedro 3:18). Laje bat ta vinajel xchiʼuk te choti ta sbatsʼikʼob Dios (Salmo 110:1). Ta mas tsʼakale, te bat svaʼan sba ta stojolal li Jeova Diose, «li Bochʼo mu snaʼ xlaj yoraile», ti jaʼ akʼbat sjuʼel sventa ta x-ajvalilaj ta stojol li krixchanoetike. Jaʼ yuʼun, li Jesuse ta sut tal jech kʼuchaʼal jun Ajvalil ti mu xvinaj ta kʼelele, mu xkoʼolaj kʼuchaʼal junuk krixchano. (Kʼelo Daniel 7:13, 14.)
¿Kʼusi tspas Jesús kʼalal mi vule?
Kʼalal chvul xchiʼuk yaj-anjeltak li Jesuse, ti mu xvinajik ta kʼelele, jaʼ chtal xchapan li krixchanoetike. Ta slajes li chopol krixchanoetike, pe jaʼ chakʼbe xkuxlejal sbatel osil li buchʼutik chchʼamik kʼuchaʼal Ajvalile. (Kʼelo Mateo 25:31-33, 46.)
Kʼalal yakal ta x-ajvalilaj li Jesuse tspas ta paraiso yan velta li Balumile. Ta xchaʼkuxes buchʼutik chamemik sventa xuʼ skʼupinik li jun paraiso liʼ ta Balumile. (Kʼelo Salmo 37:29; Juan 11:25.)