KʼUSITIK CHICHʼ JAKʼEL TA SVENTA VIVLIA
¿Mi xuʼ skoltautik li anjeletike?
Li Jeova Diose ta smiyonal noʼox anjeletik la spas kʼalal jal toʼox tajek skʼan spas li krixchanoetike (Job 38:4, 7). Li anjeletik taje jaʼik kuxlejaletik ti mu xvinajik ta kʼelel ti tsots sjuʼelike xchiʼuk chtunik ta stojolal Dios, oy bakʼintike chtakatik tal yuʼun Dios sventa tsbeiltasik xchiʼuk chchabiik li yajtuneltak liʼ ta Balumile (Salmo 91:10, 11). Li avie, li anjeletike yakal tskoltaik krixchanoetik yoʼ stabeik sbalil li lekil aʼyej chcholik li yajtsʼaklomtak Cristoe. (Kʼelo Apocalipsis 14:6, 7.)
¿Mi skʼan van jpastik orasion ta stojolal li anjeletik sventa skoltautike? Moʼoj. Li orasione jaʼ jtos ichʼel ta mukʼ, taje jaʼ noʼox stuk sta-o li Diose (Apocalipsis 19:10). Ta skoj ti jaʼik yajtuneltak Dios li anjeletike jaʼ chchʼunik li kʼusitik ch-albatik yuʼun Diose, maʼuk li kʼusi chal krixchanoetike. Jech oxal, skotol ora jaʼ noʼox skʼan jpastik orasion ta stojolal Dios xchiʼuk ta sbi Jesús. (Kʼelo Salmo 103:20, 21; Mateo 26:53.)
¿Mi oy van chopol anjeletik?
Li anjeletike jech pasbilik kʼuchaʼal li krixchanoetike, yuʼun oy snopbenik sventa tsnop stukik mi tskʼan tspasik li kʼusi leke o li kʼusi chopole. Kʼux ta alel, pe oy ep anjeletik ti la stoy sbaik ta stojolal Diose (2 Pedro 2:4). Li buchʼu baʼyel la stoy sbae jaʼ li Satanase, ta tsʼakale lik stoy sbaik yan anjeletik, vaʼun kʼatajik ta pukujetike. Mu to jaluk yechʼel ti laj yichʼ jipel yalel tal ta Balumil li Satanás xchiʼuk li spukujtake. (Kʼelo Apocalipsis 12:7-9.)
Leʼ xa tal ta 1914 solel epajem li choplejal xchiʼuk majbail ti muʼyuk bu jech ilbil-oe. Taje jaʼ svinajeb ti poʼot xa slajes Dios li Satanás xchiʼuk li spukujtake xchiʼuk ti poʼot xa tskʼatajes ta jun paraiso li Balumile. (Kʼelo Apocalipsis 12:12; 21:3, 4.)
Mi chakʼanbe to mas yaʼyejale kʼelo li kapitulo 10 ta livro liʼe, ¿Kʼusi chchanubtasvan ta melel li Vivliae? ti pasbil yuʼun stestigotak Jeovae.
Xuʼ xayales ta www.jw.org/tzo
[Lokʼol ta pajina 16]
Jech kʼuchaʼal laj yichʼ koltael ta stojolal anjeletik li tukʼil Daniel ta voʼone, li avi eke tskoltaik krixchanoetik yoʼ stabeik sbalil li lekil aʼyeje.