MANTAL TA SLIKEBALTIK PAJINA | ¿MI OY TA MELEL LI ANJELETIKE? ¿MI OY KʼUSI TSPAS TA JKUXLEJALTIK?
Li kʼusi melel ta sventa li anjeletike
¿Mi chakʼan chavojtikin lek li anjeletike? Jaʼ xkaltik: buchʼu jaʼik, bu likemik xchiʼuk kʼusi tspasik. Li Vivlia ti jaʼ Skʼop Dios yakʼoj ta naʼele jaʼ chalbutik (2 Timoteo 3:16). ¿Kʼusi chal Vivlia ta sventa li anjeletike?
Jaʼ jun kuxlejal ti mu xvinaj ta kʼelel li Diose, jaʼ jech mu xkiltik li anjeletik eke, jaʼ xkaltik, ti muʼyuk sbekʼtalik xchiʼuk sbakilike. Li tukʼil anjeletike te xchiʼinojik ta naklej ta vinajel li Diose (Lukas 24:39; Mateo 18:10; Juan 4:24).
Oy bakʼintike tskʼatajes sbaik ta krixchanoetik li anjeletike, sventa xtal spasik ta Balumil li kʼusi ch-albatik yuʼun Diose. Mi tsuts li yabtelike tspasik ta anjel yan velta (Jueces 6:11-23; 13:15-20).
Kʼalal tskʼatajes sbaik ta krixchanoetik li anjeletike, ta viniketik tspasik xchiʼuk chal Vivlia ti jaʼ viniketik yaʼeluke. Akʼo mi jech, maʼuk viniketik o antsetik li anjeletike. Muʼyuk chnupunik xchiʼuk mi jaʼuk chil yalab xnichʼnabik. Jech xtok, maʼuk neneʼetik, ololetik o yijil krixchanoetik ti tspasik ta anjeletik sventa xbatik ta vinajel kʼalal chchamike. Jaʼ la spas stuk Jeova li anjeletike, jaʼ yuʼun li Vivliae chal ti jaʼ «xnichʼnabtac Diose» (Génesis 6:2; Salmo 148:2, 5).
Li anjeletike ta xkʼopojik, yuʼun li Vivliae chalbe skʼoplal li «skʼopojel krixchanoetik xchiʼuk [...] [li] skʼopojel anjeletike». Akʼo mi jaʼ tstunes anjeletik sventa tskʼoponutik li Diose, mu xakʼ ti jmuyubtatike o ti jpasbetik orasione (1 Korintios 13:1; Apokalipsis 22:8, 9).
Ti kʼu yepal oy li anjeletike jaʼ lajunmil ta velta li lajunmile, taje jaʼ van skʼan xal ti oy epal mil ta miyonetike (Daniel 7:10; Apokalipsis 5:11).a
Li anjeletike mas oy sjuʼelik, mas tsots yipik xchiʼuk mas pʼijik, jaʼ mu sta li voʼotike. Jech xtok, toj echʼ xa noʼox anil chanavik ti mu xa noʼox xnop kuʼuntike (Salmo 103:20; Daniel 9:20-23).
Akʼo mi mas toj pʼijik li anjeletike xchiʼuk ti tsots tajek yipike, ti jaʼ mu sta li voʼotike, oy kʼusi mu spas yuʼunik xchiʼuk oy kʼusi mu snaʼik (Mateo 24:36; 1 Pedro 1:12).
Jelajtik stalelal pasatik li anjeletike, mi jech oy ta yoʼontonike xuʼ xchanbeik stalelal li Diose xchiʼuk ti xnop yuʼun stukik li kʼusi tspasike. Jech kʼuchaʼal voʼotike, xuʼ snop stukik mi jaʼ tspasik li kʼusi leke o li kʼusi chopole. Kʼux ta alel, pe jlom anjeletike la stoy sbaik ta stojolal li Diose (Judas 6).
a Li ta Apokalipsis 5:11 te laj yichʼ tunesel jpʼel griego kʼop ti xi jelubtasbile: «Ep ta velta ta mil li epal mile». Taje xuʼ xakʼ ta aʼiel xtok ti ta sienal xa noʼox miyon o ta smilal xa noʼox miyon yepal li anjeletike.