KʼUSITIK CHICHʼ JAKʼEL TA SVENTA VIVLIA
¿Kʼu yuʼun kuxulutik?
¿Mi mu jechuk chavaʼi ti muʼyuk jal chijkuxiutike?
¿Mi oy ajakʼojbe aba junuk velta mi jaʼ noʼox van kuxulutik sventa xijtajin, xij-abtej, xijnupun, xkil kalab jnichʼnabtik xchiʼuk chijyijub? (Job 14:1, 2.) Li Vivliae chal ti oy jech la sjakʼbe sbaik jlom krixchanoetik ti oy lek spʼijilike. (Kʼelo Eclesiastés 2:11.)
Yoʼ jnaʼtik kʼu yuʼun ti laj kichʼtik pasele, skʼan jnaʼtik kʼuxi lik talel li kuxlejale. Ep buchʼutik chkʼot ta nopel yuʼunik ti jaʼ spasojutik jun pʼijil jpasvanej kʼalal mi laj yilik ti toj labal sba pasbil li jchinabtik xchiʼuk li jbekʼtaltike. (Kʼelo Salmo 139:14.) Mi jech taje, yuʼun oy kʼusi stu ti la spasutike. Kʼalal mi la jnabetik srasonal ti kʼu yuʼun kuxulutike jaʼ chakʼbe sbalil li jkuxlejaltike.
¿Kʼusi sventa la spasutik li Diose?
Kʼalal la spas li baʼyel krixchanoetik li Diose, laj yakʼbe jun kʼupil sba abtel. Li kʼusi tskʼan ox li Diose jaʼ ti xkuxiik sbatel osil, snojesik ta yalab xnichʼnabik li Balumile xchiʼuk ti skʼatajesik ta jun paraisoe. (Kʼelo Génesis 1:28, 31.)
Kʼalal la stoy sbaik ta stojolal Dios li krixchanoetike, li Diose muʼyuk la xchʼaybe skʼoplal li kʼusi oy ta yoʼontone, mi jaʼuk la xchʼayutik ta sjol. Li Vivliae chal ti Diose ep kʼusi spasoj tal sventa tskolta li yajtuneltake xchiʼuk sventa xkʼot ta pasel li kʼusi tskʼan yoʼonton liʼ ta Balumile. Jech xtok tskʼan ti xakʼupin akuxlejal jech kʼuchaʼal oy onoʼox ta yoʼontone. (Kʼelo Salmo 37:29.) Li Vivliae chalbutik kʼusi skʼan jpastik sventa jech xijkuxi kʼuchaʼal tskʼan li Diose.