MANTAL TA SLIKEBALTIK PAJINA: LI KʼUSI MU XANAʼ TA SVENTA LI STESTIGOTAK JEOVAE
¿Bu tstaik takʼin ta sventa li abtelal tspasike?
Li ta jujun jabile ta sienal noʼox miyon ta jpaskutik imprimir xchiʼuk ta jpukutik Vivliaetik xchiʼuk vunetik ti lokʼemik ta Vivliae. Ta jvaʼankutik Beteletik, oy jlom ti yakal ta abtele xchiʼuk oy kuʼunkutik imprentaetik ta spʼejel Balumil. Lek chapalunkutik ta epal tsobobbailetik xchiʼuk ta jtsob jbakutik ta uni naetik ti lekik ta kʼelel ti Salonetik sventa Tsobobbail sbi kuʼunkutike. ¿Bu ta jtakutik takʼin sventa ta jpaskutik skotol taje?
Skotol li abtelal ta jpaskutike jaʼ ta matanal takʼin (2 Korintios 9:7). Leʼ xa onoʼox tal ta sjabilal 1879, li ta xchibal revista, ti Zion’s Watch Tower toʼox sbie xi laj yale: «[Li revista liʼe jchʼunojkutik ti] jaʼ chkoltaat yuʼun li JEOVAE, yoʼ to jech taje mi jaʼuk tskʼan jutuk limoxna mi jaʼuk tskʼanbe koltael li krixchanoetike». Li kʼusi laj yichʼ alel taje, jech-o chichʼ pasel li avie.
Li matanal takʼine xuʼ tukʼ xichʼ takel batel li ta Beteletike o xuʼ xichʼ akʼel ta Salonetik sventa Tsobobbail ta xkaxail matanal takʼin. Muʼyuk ta jkʼankutik diesmo, muʼyuk ta jtsobkutik takʼin, muʼyuk ta jkʼan jtojolkutik xchiʼuk muʼyuk ta jkʼanbekutik stojol li jvunkutike. Muʼyuk buchʼu tstojunkutik kʼalal ta jcholkutik mantale, kʼalal ta jelubtaskutik mantal ta tsobobbaile xchiʼuk kʼalal ta jkolta jbakutik ta svaʼanel naetik ti bu ta jtsob jbakutike. Yuʼun xi onoʼox laj yal li Jesuse: «Ta moton la-akʼbatik, jaʼ jech ta moton xavakʼik ek» (Mateo 10:8). Li buchʼutik ch-abtejik ta smeʼ nail abtelal kuʼunkutike xchiʼuk li ta Beteletike mi junuk buchʼu chichʼ stojolik, mi jaʼuk li Jtsop Jbeiltasvanej kuʼunkutike.
«Ti bu tstaik takʼin li stestigotak Jeova ta sventa li abtelal tspasike, jaʼ ta matanal takʼin, yuʼun nopem onoʼox xaʼiik jech tspasik, ta jujuntal tsnopik kʼu yepal chakʼik xchiʼuk kʼu sjalikil chakʼik li ‹matanal takʼin› ta sventa srelijionike.» (Tribunal Europeo de Derechos Humanos, 2011)
Li matanal takʼine chichʼ tunesel xtok sventa jkoltakutik-o li kermanotakutik ti chil svokolike. Li yajtsʼaklomtak Kristo ta baʼyel sigloe ta sjunul yoʼonton la skoltaik li buchʼutik laj yil svokolike (Romanos 15:26). Li avi eke ta jkoltakutik li buchʼutik chil svokolik ta nikel, nojelal ta voʼ o yan kʼusitike: ta jchaʼvaʼanbekutik snaik, chkakʼbekutik sveʼelik, skʼuʼ spokik xchiʼuk xpoxilik. Jech xtok li ta lumetik ti bu sokemik kom li Salonetik sventa Tsobobbaile ta jchaʼmeltsankutik.